福島第一核電廠核災

出自維基百科,自由嘅百科全書
跳去: 定向搵嘢

福島第一核電廠核災日文福島第一原子力発電所事故),縮寫福島核災,係世界幾次核災之一。事發喺日本福島縣福島第一核電廠。間廠由東京電力公司經營,共有六座核子反應爐,全部係沸水式反應爐,當中四座發生事故。事緣二零一一年三月十一號日本時間下晝兩點四十六分,發生日本東北地震,並引發海嘯。海嘯令發電廠各核子反應爐嘅冷卻系統失靈,爲咗避免爐芯完全熔毀,輻射四散,禍延全球,各方盡力灌水冷卻。但灌水唔係好有效,化學作用下令各爐多日連翻氫氣爆炸,倖未全毀,部份輻射塵升上半空,輻射雲散佈關東各地,以及太平洋周邊嘅地區,電廠嘅周邊地區水土受輻射污染比較嚴重,人畜均不能安全食用。當中三號爐,爐殼損毀,缺口令輻射漏出,係各爐之中最危急。

地震發生後,福島第一核電廠所有核子反應爐,均安全自動熄爐,停止核分裂反應,但核衰變仍然繼續,餘熱高溫,需用水冷卻,以防過熱燒壞。停爐後,冷卻系統需靠火力發電推動,但因海嘯高過防波堤,令較低窪嘅發電機故障,冇法供電。冷卻系統亦靠電池行咗八個鐘後,最終斷電,冷卻水循環系統就冇法繼續運作。之後為咗降低反應爐安全殼(圍阻體)嘅壓力,核電廠職員冒死打開閥門放咗啲蒸氣出來,但最後導致氫氣爆炸兼冚樓燃料儲存池冷卻用水跌過安全水位,令燃料棍外露,導致熔化,發生泄漏輻射事故。三月廿二號,日本經濟產業省原子能安全保安院指出,福島第一核電廠正門附近嘅輻射量,比平常最少多出七十倍,而一號反應爐嘅中央控制室輻射量,亦升到平常嘅一千倍。係日本首次確認,有放射性物質外泄,稱呢次事故為核災。

呢次核災,可以同一九八六年蘇聯車諾比核電廠核災相提並論,全面禁止核試條約組織指出,同車諾比核災比起,福島核災放出嘅放射物數量,碘一三一達百分之七十三,而銫一三七達百分之六十一。方圓一百公里,食水都受污染,而日本首都東京,事故發生後幾日,輻射雲飄到東京降雨後,驗出食水含輻射水平對成年人健康冇即時影響,但唔適合畀幼兒飲用,日本政府向影響市民派樽裝水