米高安哲羅·安東尼奧尼

出自維基百科,自由嘅百科全書
米高安哲羅·安東尼奧尼
姓名原文Michelangelo Antonioni
出生日1912年9月29號 喺Wikidata改呢個
出生地費拉拉 喺Wikidata改呢個
死亡日2007年7月30號 喺Wikidata改呢個 (94歲)
死亡地羅馬 喺Wikidata改呢個
國籍意大利意大利王國 喺Wikidata改呢個
識嘅語言意大利文 喺Wikidata改呢個
信奉無神論 喺Wikidata改呢個
母校博洛尼亞大學、Experimental Centre of Cinematography 喺Wikidata改呢個
職業電影導演作家編劇、電影剪接師、電影製片畫師詩人導演 喺Wikidata改呢個
風格詩歌 喺Wikidata改呢個
名作迷情、情隔萬重山、Blowup 喺Wikidata改呢個
配偶Enrica Antonioni 喺Wikidata改呢個
網站www.michelangeloantonioni.it

米高安哲羅·安東尼奧尼Michelangelo Antonioni1912年9月29號2007年7月30號)係意大利現代主義電影導演

生平[編輯]

安東尼奧尼喺意大利北部小城費拉拉出世。佢家境富裕,童年同青少年時期都過得無憂無慮。細個嘅時候,佢喜歡做木偶同埋替木偶設計大屋。佢之後學習油畫,尤其鍾意畫人像畫。高中後,佢入咗博洛尼亞大學,攞咗個經濟學學位,但係讀大學時,佢已經開始成為電影發燒友,經常為報紙寫影評同電影理論,亦嘗試拍攝一部有關瘋人院嘅紀錄片,不過開拍時因燈光令病人恐慌,情況混亂而被迫停機。

1940年,佢訥開家鄉去羅馬學做導演,決心以電影做終生職業。1942年,佢為羅索里尼(Roberto Rossellini)做編劇,之後為福基隆尼(Enrico Fulchignoni)做編劇同助導,邊做邊學令佢充份掌握拍電影嘅技巧。佢決定再嘗試拍紀錄片。1943至1950年,佢拍咗幾部紀錄短片,其中《Gente del Po》、《N.U.》同埋《La Villa dei Mostri》大獲好評,冷靜嘅觀察手法,同對人物嘅重視態度,令佢成為意大學新寫實主義先驅者。

1950年,佢開始拍第一部劇情片《某種愛的紀錄》,簡單嘅故事配以獨特嘅影機運動,跟住演員嘅一舉一動,成為佢獨特嘅風格。1960年代初期,佢嘅風格已經完全成熟,而佢亦完成佢最出名嘅三部曲(1960年嘅《迷情》、1961年嘅《夜》、1962年嘅《情隔萬重山》),當中探索人與人嘅疏離關係,與及現代人處於個別環境(如:大都市)嘅孤寂感。《迷情》當年係康城首映曾引來觀眾噓聲,不過亦有評論家持相反意見。《迷情》勇奪當年康城評判團特別獎,而佢亦憑呢齣電影登上大師級導演台階。

係意大利拍完佢第一部彩色片《赤色沙漠》後,佢走到英國英語拍成《春光乍洩》。片中透過一個攝影師,講及現實嘅真實與虛構雙重概念。呢套片亦成為佢最畀人認識嘅電影。佢之後去到美國拍《無限春光在險峰》,又去北非拍《過客》。1972年,佢為電視台到中國拍成長達兩小時嘅紀錄片《中國》。

晚年,佢產量好少。1985年,佢中風後行動不便兼冇咗說話能力,沉寂影壇十年。1995年,佢得到溫.雲達斯(Wim Wenders)嘅協助,拍成《雲上的日子》。

佢除咗拍電影,亦有寫作同繪畫,出版過短篇小說如《在泰伯河上的保齡球道》、畫集《醉人的山丘》⋯⋯。佢認為繪畫寫作同電影冇分別,都係用嚟研究如何觀察事物。[1]

風格[編輯]

影評人羅卡話,安東尼奧尼係「現代電影嘅先知」,「他對現代物質文明急遽膨脹下人際關係被大環境所疏遠,造成人的迷失、孤立,愛的枯楬,以及人對變動的現實愈來愈難以把握等現像都有敏感過人的解釋。更難得者,他能率先以極其精確,新異的電影語言,努力不倦地探索著這些對文明人來說既是永恒也是急逼的命題。」[2]

馮若芷就話,安東尼奧尼其中一個深刻母題,係運用唔同嘅幾何圖形去框住女性嘅臉孔或身軀。門框、窗框、畫框、屋樑、欄槓,室內設計既美學,已變成束縛女性情慾嘅工具。[3]黃愛玲認為,安東尼奧尼世界裡面嘅男人多寡情薄義,唔值得女人鍾愛,例子有《女朋友》、《流浪者》、《迷情》。[4]

作品[編輯]

短片[5]

  • 1943/47 Gente del Po
  • 1948 N.U. - Nettezza Urbana
  • 1949 L'Amorosa Menzogna Superstizione - Non Ci Credo! Sette Canne
  • 1949 Un Vestito
  • 1950 La Funivia del Faloria
  • 1950 La Villa dei Mostri
  • 1953 Tentato Suicido, episode of Amore in Citta
  • 1965 Il Provino, preface to I tre Volti
  • 1983 Ritorno A Lisca Bianca
  • 1984 Fotoromanza
  • 1989 Kumbha Mela
  • 1990 Roma
  • 1992 Noto, Mandorli, Vulcano, Stromboli, Carnevale

長片[6]

  • 1950 某種愛的紀錄 (Cronaca di un Amore)
  • 1952 失敗者 (I Vinti)
  • 1953 好夢成空 (La Signora Senza Camelie)
  • 1955 女朋友 (Le Amiche)
  • 1957 流浪者 (Il Grido)
  • 1960 迷情 (L'Avventura)
  • 1961 夜 (La Notte)
  • 1962 情隔萬重山 (L'Eclisse)
  • 1964 赤色沙漠 (Il Deserto Rosso)
  • 1966 春光乍洩 (Blow Up)
  • 1969 無限春光在險峰 (Zabriskie Point)
  • 1973 中國 (Chung Kuo Cina)
  • 1975 過客 (Professione: Reporter)
  • 1980 奧巴瓦之謎 (Il Mistero di Oberwald)
  • 1982 女人女人 (Identificazione di una Donna)
  • 1995 雲上的日子 (Al di la Delle Nuvole)
  • 2004 愛神 (Eros)[7]

[編輯]

  1. 《安東尼奧尼回顧展場刊》(香港藝術中心一九九六年六月份電影節目)第6頁
  2. 〈不倦探索的先知〉,《安東尼奧尼回顧展場刊》(香港藝術中心一九九六年六月份電影節目)第8頁
  3. 〈倚著門框的女人〉,《安東尼奧尼回顧展場刊》(香港藝術中心一九九六年六月份電影節目)第9頁
  4. 〈那一張面孔〉,《安東尼奧尼回顧展場刊》(香港藝術中心一九九六年六月份電影節目)第9頁
  5. 《安東尼奧尼回顧展場刊》(香港藝術中心一九九六年六月份電影節目)第13頁
  6. 《安東尼奧尼回顧展場刊》(香港藝術中心一九九六年六月份電影節目)第13頁
  7. PlayitAgain網站安東尼奧尼作品香港中文譯名

[編輯]