粉嶺及上水新市鎮

鳥瞰新市鎮，自北望南。近為上水，遠為粉嶺。

粉嶺及上水新市鎮，香港新市鎮之一，有諸多寫法。新市鎮地處新界北地，起自當地兩大鄉，粉嶺同上水，本身依帶有墟市，有一啲唐樓，粉嶺有聯和墟，上水有石湖墟，以此開托新城亦屬自然。新市鎮以九廣鐵路粉嶺火車站同上水火車站為中心，擴展出去。一九七八年，香港政府以彩園邨為開端，將依帶化成都市。

香港新市鎮規模，喺世界為城市級別，並唔係鎮，故此，粉嶺及上水新市鎮都歸入城市類別。城佔地七百八十公頃。二〇一六年政府統計署做中期人口統計，城內大約有二十六萬人。

由於粉嶺及上水新市鎮，有兩個龍頭，中間夾雜好多鄕村，有啲人會分開叫粉嶺新市鎮同上水新市鎮。

行政上歸北區，代議政制歸北區區議會。

文

新市鎮英文叫Fanling/Sheung Shui New Town。個名取自英國人習慣，由於香港人見斜綫符號，意思同用法，通通都唔清唔楚，唐文更加無佢用法。故此翻譯唐字會帶來一啲困難。官方都不一致，會有唐英皆錯嘅情況。

英文斜綫插喺字間，是為逗號代替品，或為及（and）字嘅省畧，按習慣，前後都唔可以加空白。有啲加空白，寫做Fanling / Sheung Shui New Town之類，咁唔啱英文文法。英文維基百科，直情唔用斜號，索性改成Fanling-Sheung Shui New Town。

英文意思都搞錯，唐字繙譯亦都好混亂。斜綫喺唐文，唔係標點符號，而係特殊符號。兩個字之間，多數視為選項，用咗會引來誤解。若搬字過紙，會寫「粉嶺/上水新市鎮」，唐人睇落來會當咗佢選項 ，其他寫法，睇成選項咁寫，加空白寫成「粉嶺 / 上水新市鎮」，或全形標點，「粉嶺／上水新市鎮」。亦有按唐字文法，寫為粉嶺上水新市鎮，或寫做粉嶺及上水新市鎮。

地理

粉嶺上水位處沖積平原，夾雜山嶺。平原為深圳河支流，梧桐河同雙魚河沖積而成。

史

大清此地為雙魚約之內。一八九九年，英國得到新界之後，一九一〇年起咗九廣鐵路，先設上水火車站，後設粉嶺火車站，設喺上水鄕同粉嶺圍附近，為依帶有交通之便。咁上下時間，九龍深水埗起嘅大埔道同青山道，亦喺處駁通，環通新界。自始石湖墟同聯和墟，亦有所發展。

第二次世界大戰之後，香港有好多難民湧入，接住就係嬰兒潮，市區住得好迫。繼荃灣同沙田之後，香港政府又再拓展其他新市鎮。上水粉嶺雖則離市區甚遠，但有公路同鐵路之便，就選為新一期新市鎮。一九七八年，興建上水彩園邨，一九八二年落成，可謂新市鎮先聲。邨原為菜園村地，就近上水火車站，為開始嘅好地方。一九八四年，粉嶺火車站附近，祥華邨落成。接住八十年代中，新市鎮到處大興土木。 一九八六年有上水天平邨。一九八九年有上水太平邨。

進度而言，上水快過粉嶺。粉嶺發展轉向粉嶺火車站南面，和合石以北一帶，原本百福村、田心村、畫眉山村地方，發展稱為粉嶺南。一九九〇年，華明邨落成。一九九五年有華心邨。另外，一九九四年火車站西北有嘉福邨。

同期，粉嶺聯和墟嗰邊，又開始大興土木。一九九三年有榮福中心，一九九六年有榮輝中心。

一九九七年，香港主權移交後，新市鎮繼續擴展。