紫荊俠

紫荊俠好可能係香港人，係繼黑玫瑰、木蘭花、女殺手、Janet Bin之後第五代香港女俠。而家喺香港活躍緊嘅「真實超級英雄」。

紫荊俠誕生

2011年3月29號，紫荊俠喺Facebook上面誕生。因為財政司司長曾俊華宣佈向每個香港市民派現金6000緡，於是紫荊俠喺2011年5月開始行動，將佢將會攞到嘅6000緡，向失業人士派錢派糧。紫荊俠有超強嘅正義感同同情心，出場時下下都以低胸裝示人，著上黑色緊身衫、皮靴、蒙面頭套配紫色眼罩挺身而出，派錢濟貧，拯救窮人。6月10號，佢受邀喺大陸門戶網站騰訊開通微博，短短24個鐘頭，微博「聽眾」數已超萬人。

身份

紫荊俠身份神秘，據東周刊報導，佢個西人名Sofia，三十幾歲，自稱係生意人，喺英國、美國留過學，屬於香港嘅中產階層，月入約莫4萬港元。

佢嘅真身引起香港各界追查。而家只知陳細潔、莊思敏、徐美琪都唔係紫荊俠嘅真身。佢亦喺佢Facebook專頁上面親自否認自己係前全國人大委員長萬里嘅孫女萬寶寶。

2011年5月30號，紫荊俠喺佐敦渡船角文苑樓嘅香港社區發展網絡油尖旺食物銀行現身，送咗兩箱約莫60包即食麵畀食物銀行，重向在場每名長者派發100緡現金。