荷包蛋
荷包蛋係指外形類似荷花未開時嘅花萼嘅雞蛋食品，通常煎製而成，所以好多時候荷包蛋一詞係煎荷包蛋（英文：Over）嘅簡稱。
煎荷包蛋嘅做法係將煎蛋雙面煎，蛋白通常會包著蛋黃，而蛋黃通常熟透。煎蛋過程要反轉隻蛋，令蛋黃唔會露出。係反蛋嘅一種，但去茶餐廳叫反蛋好多時會畀咗熟蛋，為免撈亂，要點荷包蛋會直接叫荷包蛋，而唔會叫反蛋。
喺美國，煎荷包蛋會按蛋黃熟透程度，分為hard（完全凝固）、medium（半凝固，即「溏心蛋」）同easy（未凝固）三種。
另一方面，水煮嫩蛋嘅方式亦可製成荷包蛋咁嘅樣，因此亦有「水煮荷包蛋」之稱。
傳說由來
[編輯]好耐以前中國有位御廚為咗討皇帝嘅歡心，就日日琢磨點樣做出新嘅菜色花樣。有一日，佢見到水中嬌艷嘅荷花，就諗「我可唔可以將蛋整成荷花嘅樣呢？」於是，佢開始試住做，經過多次試驗，終於做出咗裏面嘅蛋黃似蓮蓬，外形酷似荷花嘅煎蛋。皇帝見到呢種煎蛋唔止外形好睇，而且食起來滑嫩爽口，於是龍顏大悅，並將呢種煎蛋叫做「荷包蛋」。
後來，御廚告老還鄉，就將「荷包蛋」嘅做法話畀鄉鄰聽，於是荷包蛋就進入咗平民百姓屋企，成為深受大家歡迎嘅一道料理。