萬里長城

出自維基百科,自由嘅百科全書
Jump to navigation Jump to search
長城
Welterbe.svg 聯合國教科文組織認定嘅世界遺產
GreatWall2.jpg
萬里長城
登錄原文名
英文 The Great Wall
法文 La Grande Muraille
基礎信息
Flag of the People's Republic of China.svg 中國
遼寧省、吉林省、河北省、北京市、天津市、山西省、內蒙古自治區、陝西省、寧夏回族自治區、甘肅省、新疆維吾爾族自治區、山東省、河南省、湖北省、湖南省、四川省、青海省
座標 40°25′0.012″N 116°4′59.988″E / 40.41667000°N 116.08333000°E / 40.41667000; 116.08333000座標: 40°25′0.012″N 116°4′59.988″E / 40.41667000°N 116.08333000°E / 40.41667000; 116.08333000
文化遺產
標準 i、ii、iii、iv、vi
438
登錄史
登錄年份 1987年 (第11屆)
長城嘅分佈,可見萬里長城曾經去到宜家嘅北韓蒙古
嘉峪關長城
烽火台

萬里長城粵拼maan6 lei5 coeng4 sing4)喺現代意義上係指中國明長城,由東面鴨綠江虎山長城,到西面嘉峪關,全長21196公里,總共有36,500華里,所以叫做萬里長城,亦有人叫佢做中國長城zung1 gwok3 coeng4 sing4)。長城平均高6-7米、闊4-5米,係起喺中國古代嘅浩大軍事防禦工程。亦係世界上僅有嘅幾個巨型結構[1][2]

中國嘅萬里長城係人類文明史上最偉大嘅建築工程,喺2000幾年前春秋戰國時期開始起,秦朝統一中國之後起好萬里長城。漢、明兩代又曾經大規模咁修築過。

甘肅嘉峪關伸展到遼寧丹東虎山,全長21196公里。長城平均高7.8米,平均底部闊6.5米,頂部闊5.8米。佢每隔100米就有一座長方形石台作瞭望之用。

萬里長城曾經俾人認為係太空人登陸月球嗰陣可以一眼望到嘅地球上建築物,但亦有人認為係冇可能。

材料同起法[編輯]

春秋戰國時代到明末,長城起咗兩千幾年。由於各個時代嘅生產力、技術水準唔同,亦由於各個政權所面臨嘅軍事形勢都唔同,歷代修建嘅長城喺構造、建築方法同埋形制方面都有唔同;而由於各地方嘅地理條件嘅差異,即使同一時代修築嘅長城面貌都有唔同嘅地方。

就唔同歷史時期同築城技術嘅發展嚟講,北魏之前各朝修築嘅長城,主要係版築夯土,北魏時期出現咗磚石結構嘅長城,明代長城就廣泛運用石砌法、磚砌法同埋磚石混砌法。

就長城沿線各地嘅地理條件嘅唔同嚟講,建造長城所需嘅材料都按「因地制宜」嘅原則就地取材解決。喺山地,就開山取石壘牆;喺黃土地帶,就取土夯築;喺沙漠,就用蘆葦或者柳條,加以層層鋪沙修築。另外,砌牆所用嘅磚、瓦、石灰同埋木料等等,除咗就地設窯燒製或者砍伐之外,官府重設有專門部門供應。

長城體系主要由關隘、城牆同樓臺、烽火台三個部分組成,此外重包括其他附屬設施。城牆同樓臺又可以分為城門、城樓同城牆三部份。

喺出入長城嘅咽喉要道上一般都設有關隘駐守住。關隘一般起喺狹窄嘅通道上面,好似兩座山之間最窄嘅地方,山水之間嘅狹長走廊,同埋溪流、河谷嘅相交處。由於關隘喺軍事上嘅重要意義,呢處嘅長城有更堅固、完善嘅防禦體系。關隘一般由關口嘅方形或多邊形城牆、城門、城門樓、瓮城組成。有啲重有羅城同埋護城河。

城門[編輯]

城門係進出關口嘅通道。元朝以前多數用木過梁,後尾改用磚或者石塊砌成拱券形嘅門洞,叫做「券門」。門洞入便裝有巨大嘅包鐵木門,門外就用巨釘嵌鑲,門內側裝有門閂同埋鎖環,有啲重裝有機關。

城樓[編輯]

城門上面起咗城樓,係重要嘅觀察所、指揮所同埋戰鬥據點。城樓係三層以下嘅木結構或者磚木結構建築。

烽火台[編輯]

長城體系設有好多烽火台作為情報傳遞系統。根據歷史文獻、出土漢簡同埋實地考察可知,烽火台嘅數量有好多而且一直延伸到長城以外好遠嘅地方。按烽火台嘅位置同埋功能,可以分為四組:設喺大漠深處嘅烽火台係發出警訊嘅最前線,沿長城兩側設置嘅烽火台向沿線傳遞情報,由長城通往京師嘅系列烽火台同王朝中央聯繫,重有一組烽火台同長城所在地附近嘅地方政府同埋駐軍聯繫。按明朝嘅制度,舉一煙鳴一炮即係解來敵有100人左右;舉二煙鳴二炮係解來敵有500人左右;1000人以上就舉三煙鳴三炮。

其他附屬設施[編輯]

長城體系除咗作為情報傳遞系統嘅烽燧以外,重建立咗以城障等設施構成嘅縱深防禦配置。秦漢時各種設施得到完善,而且喺長城內外設置咗屯戍城作為屯駐重兵之所,而且向縱深發展,形成網絡。喺城牆、城堡嘅外側,重有專登設置嘅障礙物,好似僵落、虎落等等。秦朝喺河套長城一帶,廣植榆樹去阻擋匈奴騎兵,人稱榆關。北齊嗰時喺長城入便側設戍,險要之處置州鎮,築扎軍隊,形成前沿嘅線狀佈防。

參考[編輯]

  1. "破解長城千年之誤". 人民網. 2000年9月2號. 
  2. "中國長城". 中國中央電視台. 2002年9月28號.