Google地圖: 北緯 30°1′48″, 東經 32°34′37″

蘇彝士運河

出自維基百科,自由嘅百科全書
(由蘇伊士運河跳轉過嚟)
跳去導覽 跳去搵嘢

美國海軍華盛頓號航空母艦就嚟要穿越橫跨蘇彝士運河蘇彝士運河友誼大橋底下

蘇彝士運河阿拉伯文قناة السويس Qanā al-Suways;英文 Suez Canal),又譯蘇伊士運河,係埃及嘅一條運河,響西奈半島西側,橫跨蘇彝士地峽,響地中海側嘅塞德港紅海蘇彝士灣側嘅蘇彝士al-Suways)兩座城市之間,總長度差唔多有一百六十三公里,係世界上最大嘅冇船閘運河。

呢條運河駁通咗歐洲亞洲之間,南北水運,而唔使兜過去非洲南邊嘅好望角,航程慳咗好多。由英國倫敦港或法國馬賽港到印度孟買港航行一次,可慳四成三同五成六。有蘇彝士運河之前,有時啲人由船上落貨,經陸路往來地中海同紅海之間。

[編輯]

古代[編輯]

起運河,史上可追到埃及第十二王朝,法老辛努塞爾特三世(Senusret III,佢嘅名即為「蘇彝士」一詞嘅來源)為咗通過陸行平底船嚟直接貿易,下令挖掘咗一條東西方向嘅運河,駁通紅海同尼羅河。證據顯示,呢條運河至少用到公元前13世紀拉美西斯二世時期,跟住運河荒廢。根據希臘史學家希羅多德著作《歷史》(The Histories of Herodotus)記載,大概喺公元前600年 Necho 二世著手重新挖掘,不過佢冇完成呢個工程。

重建運河,去到公元前500年,由征服埃及嘅波斯王朝國王大流士一世完成。大流士喺尼羅河岸建立咗好多花崗岩石碑紀念佢嘅功績,當中有一塊響離蘇彝士一百三十公里遠嘅 Kabret 冇幾遠嘅叫做大流士碑銘(Darius the Great's Suez Inscriptions)中寫住:

大流士王曰:吾乃波斯人。吾起過波斯而征過埃及。吾命開此河,發過尼羅奔流埃及,止過瀚海瀕臨波斯。此河即成,埃及之舟舶可沿諸直抵波斯,合吾所願。

(Saith King Darius: I am a Persian. Setting out from Persia, I conquered Egypt. I ordered this canal dug from the river called the Nile that flows in Egypt, to the sea that begins in Persia. When the canal had been dug as I ordered, ships went from Egypt through this canal to Persia, even as I intended)[1].

呢條運河喺公元前250年左右,托勒密二世重新攞到。喺跟住一千年,佢畀人不停咁改進、摧毀同重建,直到最尾過公元八世紀,畀亞剌伯帝國阿拔斯王朝哈里發曼蘇爾(al-Mansur)廢棄。

部分可考嘅古代部分運河開放時期嘅開始時間有:

  • 辛努塞爾特三世時期,約公元前1874年。
  • Sity 一世時期,公元前1310年
  • 尼科(Nkhaw)時期,公元前610年
  • 大流士時期,公元前510年
  • 托勒密二世時期,公元前285年
  • 羅馬圖拉真國王時期,公元前117年
  • 阿拉伯埃米爾時期,公元後640年。跟著開放咗150年。
1881年嘅蘇彝士運河圖畫

近代重建[編輯]

千幾年後,十八世紀末拿破侖佔領埃及,嚟得切計劃開條運河,駁通地中海同紅海。之不過因為法國人勘測出錯,計算出紅海嘅海平面高過地中海,噉就意味住開條冇船閘運河係冇可能,跟著拿破侖放棄咗佢嘅計劃,重喺同英國勢力對抗時離開埃及。

一八五四年同一八五六年,法國駐埃及領事斐迪南·德·雷賽布(Ferdinand Marie de Lesseps,1805-1894)子爵,攞咗奧斯曼帝國埃及總督帕夏塞伊德(Said Pasha)嘅特別許可。雷賽布係十九世紀三十年代好出名嘅法國外交家之一。帕夏授權成立一間公司按照澳洲工程師Alois Negrelli制定嘅計劃,開條開放運河,開畀世界各國船艇。有關土地租賃,公司可從運河通航起,營運九十九年。蘇彝士運河公司Compagnie Universelle du Canal Maritime de Suez)一八五八年十二月十五號成立。

挖運河,要穿過沙漠,唔少埃及人要挨住十一年,部分苦工甚至畀人鞭笞。工程克服咗好多技術、政治同經費上嘅問題。最尾嘅花費去到一千八百六十萬,多過初頭預算兩倍。一八六九年十一月十七號,運河通航,呢一日定為通航紀念日。

19世紀第一次通過運河嘅情形之一

對運河嘅爭奪[編輯]

運河卽影響世界貿易。咁啱六個月前,美國大陸鐵路網完工,啲人東西環遊世界,時間短到創新紀錄。運河亦幫咗歐洲各國,喺非洲殖民。一八七〇年到一九三〇年間,蘇彝士運河公司,純利三十五億法郎,大部分英法兩國所得。一八七五年外債,迫使 Isma'il 帕夏(Sa'id 帕夏嘅繼任者),賣咗國有運河股份畀英國。一八八二年英國騎兵入埃及到並保護運河之後,一八八八年君士坦丁堡大會,公告運河為大英帝國保護下嘅中立區。喺一九三六年英埃條約入便,英國堅持保留控制權,控制運河。

第二次世界大戰,一九四一年二月,德國駐北非遠征軍司令隆美爾,指揮攻擊埃及嘅,准備奪取蘇彝士運河。並試圖向蘇彝士運河擲炸彈。英國著名魔術師賈斯帕馬斯克林身為特戰人員成為英軍中尉,主持用探照燈同錫片反射器,造成光幕,干擾德軍飛機師晚黑視野,再加上日頭防空炮火,令到轟炸蘇彝士運河,無咁精確,保護咗運河好多。

一九五一年埃及推翻咗當年英埃條約,新政府要求英國撤軍。一九五四年英國同意放棄,一九五六年六月,最後一批英軍撤離埃及。

因為埃及尋求攞到蘇聯軍備,英國同美國撤除咗對建設阿斯旺大壩嘅援助,喺呢件嘢之後納賽爾(Gamal Abdel Nasser)總統宣布運河國有化。呢啲導致咗英、法、以色列嘅入侵,發生咗一個星期嘅1956年蘇彝士戰爭(睇第二次中東戰爭)。沈船同破壞令咗運河閂咗,直至1957年四月喺聯合國幫手之下先清理完。仲整咗一支聯合國部隊,嚟維持運河同西奈半島嘅和平。

1967年六日戰爭後,運河再次閂門至八年後嘅1975年6月5號。佢間喺1973年猶太贖罪日戰爭入便,運河成為埃及軍隊入去西奈半島以色列控制區嘅通道,跟住以色列軍隊用運河去西便。1974年起一支聯合國維同部隊入駐西奈半島。

NASA所拍攝嘅蘇彝士運河衛星照片

現狀[編輯]

因為查實並冇海平面差異或需要翻過山脈,蘇彝士運河上冇船閘。運河深度約 22.5 米,水面闊度從南面 280 米 到北面 345 米,航道浮標間平均闊度約 135米。家下至少畀 210,000 噸排水量嘅船載貨通過,最大食水深度可達 62 英尺(19米)。喺運河多個通航區域皆有一條航道標志。

蘇彝士運河長 163公里一般係指南入口到塞得港燈塔嘅內陸段,若果由南段嘅等候區域到北面嘅航道浮標就係大概 190 公里。包括兩部分:大苦湖(Great Bitter Lake)嘅南側段同北側段。載人嘅油輪限速為 13 公里每小時,貨艙船為 14 公里每小時,通過運河嘅全程要 11 至 16 小時。

蘇彝士運河係埃及嘅重要外匯收入來源,每年約 25,000 艘船隻通過蘇彝士運河,佔世界海運貿易嘅一成四。運河管理局統計報告顯示,自 1975 年 6 月重新啓用到2000年6月嘅25年裏面,徵收嘅船隻過境費去到 300 億美元。亞歐之間除咗石油以外嘅一般貨物海運,八成經過蘇彝士運河。之不過,因為中東地區嘅大量輸油管道及公路同鐵路嘅競爭,運油船減少,蘇彝士運河面對嘅危險亦減細,近年過境費亦有所下調。埃及政府計劃喺 2010 年將運河最大允許食水深度加到去 72 英尺(22 米),以允許超級油輪通過。家下,超級油輪需要落一部份貨物,由運河特有啲細船運過,跟住喺出口處重新裝貨。

運河中有一支挖泥船隊,負責疏通工程,一支救護拖輪船隊負責救護同救火,整咗一套通訊同航行監控系統,提供導航服務,重喺塞得港同陶菲克港擁有兩個船廠。運河西岸全程有一條鐵路平行延伸。

兩岸嘅連接[編輯]

由北到南:

  • 1980年10月25號運河下一條公路隧道通車,響蘇彝士以北17公里,往返運河兩岸所需時間縮短咗好多。
  • 卡塔爾拉(El Qantara)有一條高架固定公路橋。
  • 2001年伊斯梅利亞北面廿公里起咗 El Ferdan 鐵路橋,係世界上最長「孔距」嘅閉合橋,佢「孔距」為 340 米。先前嘅橋喺 1967 年阿拉伯-以色列沖突時整爛咗。
  • Ahmed Hamdi 隧道響大苦水湖南面[2],建過1983年。因為滲水問題,1992-1995年喺舊隧道內建設咗一條新嘅水密隧道。

睇埋[編輯]

[編輯]

  1. Velāyati, Rahim (2010-02-20). "How Darius Build the Suez Canal? Its Political-Economic Impact in Achaemenid Period". Journal of Archaeological Studies. 1 (2): 177–201. ISSN 2251-9297.
  2. "Rehabilitation of the Ahmed Hamdi Tunnel under the Suez Canal". www.nccnet.co.jp. 喺2021-03-29搵到.

出面網頁[編輯]

座標: 北緯30°1′48″東經32°34′37″