許雲基
 |
| ||||
|---|---|---|---|---|
 | ||||
| 個人信息 | ||||
| 出世 | 1924年7月16號 | |||
| 出世地 | .svg){kind=small} 臺灣臺中州大甲郡外埔庄 | |||
| 國籍 |  中華民國 | |||
| 研究 | ||||
| 領域 | 核子物理學 | |||
| 機構 | 國立臺灣大學物理學系 | |||
| 出名 | 同戴運軌佢哋一齊完成中華民國同埋戰後全亞洲第一次人工撞擊原子核實驗 | |||
| 得獎 | 1992年中華民國物理學會特殊貢獻獎[1] | |||
許雲基（粵拼：heoi2 wan4 gei1，1924年7月16號—），臺灣臺中人，係一位核子物理學家[2][3]:34。佢喺臺中一中畢業之後，去咗日本本土嘅京都帝國大學工學部讀書，打完仗之後返國立臺灣大學電機系讀書並且喺嗰個學系畢業[4]:161。
1947年，許雲基做咗國立臺灣大學物理學系嘅助教，同戴運軌同埋太田賴常佢哋一齊喺臺大重建荒勝文策團隊當年喺臺大整、曾經完成世界第二次人工撞擊原子核實驗嘅郝國夫-威爾頓加速器，並且成功喺1948年完成咗中華民國同打完仗之後全亞洲第一次人工撞擊原子核實驗。之後，許雲基接手咗太田賴常主持嘅原子核物理實驗室[5]，並且領導啲臺籍技師改良嗰個實驗室嘅設備[4]:166，令到佢成為1960年代亞洲最先進嘅原子核實驗室[6]:4[7]:99-100。之後，許雲基由助教逐漸升到講師、副教授、教授嘅職位，並且喺1962年成為咗臺大物理系嘅系主任[8]。1985年，許雲基喺臺大物理系退休，喺1989年成為嗰個系嘅名譽教授[4]:180[6]:15,21，並且喺2005年起率領重建原子核實驗室變做臺大物理文物廳[9][10][11]:151。
生平
[編輯]早年
[編輯]1924年，許雲基喺臺灣日據時期臺中州大甲郡外埔庄出世[2]，中學嗰時喺臺中一中讀書[5]。喺臺中一中畢業之後，許雲基去咗日本本土嘅京都帝國大學工學部讀書，在嗰度讀書嗰陣時聽過荒勝文策開設嘅課程，同時又知道喺學校原子核實驗室做緊嘅木村毅一佢哋喺度做緊原子核實驗[4]:161。第二次世界大戰打完之後，許雲基由京都帝國大學電氣系轉去臺大電機系讀書[5]，並且喺1947年夏天喺嗰個學系畢業[2]。喺畢業前夕，許雲基受到化學系助教張苕旭嘅推薦去國立臺灣大學物理學系嘅原子核擊破實驗小組，嗰個學系嘅副教授太田賴常就希望許雲基可以喺畢業之後第二日就嚟報到[12]:914。但係許雲基喺畢業之後先返去佢係大甲嘅屋企休息咗一段時間，先至喺嗰年嘅9月尾返臺北，10月正式開始喺臺大物理系任職[2][5][13]:157。正因為咁，許雲基俾人狠狠鬧咗一餐[12]:914。根據許仲平嘅講法，當時嘅許雲基份人溫和又謙虛，講嘢嗰陣時經常有意無意用一隻手遮住個口，直到佢晚年仲係咁[12]:914。
任職臺大物理系
[編輯]
許雲基喺1947年10月向太田賴常報到並且成為嗰個學系嘅助教之後，太田賴常就安排許雲基住喺氣象館後面嘅紅磚屋，先將嗰個學系嘅基革計數器整好之後，由抽真空學起[5][13]:157[14]:53[15]:8,10。之後，許雲基跟住戴運軌同埋太田賴常，同河田末吉幫臺籍技師許玉釧、周木村、林松雲嗰班人重組荒勝文策嗰班人當年喺臺大整、曾經完成世界第二次人工撞擊原子核實驗嘅郝國夫-威爾頓加速器[6]:21[11][14]:53。為咗得到充足嘅實驗材料，佢哋除咗向當時資源比較豐富嘅化學系借嘢之外，亦都曾經向中國廣播電台同埋臺灣電力公司等等嘅單位攞到報廢嘅真空管同埋大彈殼等等嘅嘢作為實驗嘅材料[12]:914。
之後，佢嘅重組加速器計劃喺1946年10月開始進行[15]:8，並且喺1948年5月13號下晝8點35分以高速質子撞擊鋰，令到佢分裂成兩個α粒子，完成咗中華民國同埋戰後全亞洲第一次人工撞擊原子核實驗[3]:24[4]:161,162[6]:4[7]:99[10][14]:53[15]:6。同年6月20號，佢哋重複進行實驗，證明佢嘅結果係可以重現嘅[14]:53[15]:6。為咗保持進度，許雲基喺嗰段時間將啱啱結婚嘅老婆寄托喺大甲嘅屋企，並且經常同太田賴常同埋許玉釧、林松雲一齊喺實驗室入面過夜，醒返之後就繼續做嘢[2][7]:100。嗰個加速器俾國立臺灣大學校方保留咗落嚟，展示喺臺大物理文物廳，即係原本嘅物理學講座原子核實驗室[10]。對於當年整加速器嘅這段往事，許雲基回憶嘅時候話：「當時我哋點會有咁多力？[7]:100」而俾人問到當時會唔會驚加速器漏電同埋輻射嘅問題嘅時候，佢就答：
| 「 | 驚死喇，但係好似都無死到。第一次實驗打鋰原子成功嗰陣時，我哋就用對眼睇。射線出來嗰陣時，興奮到不得了，乜嘢都無攞嚟擋住。但係大家都活到七八十歲，好似都無事[7]:100。
|
」 |
1949年，由於太田賴常受到二二八事件嘅波及而俾國民政府趕返日本[4]:164，許雲基接手咗太田賴常主持嘅實驗室[5]。跟住，許雲基領導啲臺籍技師多次改良原子核物理實驗室[4]:166。首先，佢嘅團隊製威爾遜雲霧室觀測α粒子嘅軌跡，改良咗太田賴常嗰陣時只能夠觀察但係就無法記錄佢嘅軌跡嘅缺點[4]:167。跟住，佢哋改造加速器以產生高能嘅中子，並且提高原子核反應嘅層級，並且利用氦-4反應產生14.1MeV嘅高能中子嚟研究佢所引起嘅子核反應[5]。許雲基團隊亦都將嗰個加速器嘅離子源改裝成無線電頻段離子源，並且為咗進行離子濺射實驗而將加速器徹底改裝成重離子加速器[4]:167。另外，佢哋嘅研究團隊亦都使用以百麗玻璃燒杯同埋中國廣播公司報廢嘅高功率真空管電極改造而成嘅水銀整流管製造重水。經過大約一年嘅努力，佢哋成功製造出98%嘅重水[5]。
1954年3月1號，美國嘅比堅尼環礁試爆氫彈，並且造成嗰個島周圍嘅海域嚴重輻射污染，而嘅嗰度海域嘅受污染魚類亦都俾人運返臺灣。因為咁，當時嘅臺灣省漁會將嗰啲魚運返去臺大二號館大廳，利用許雲基團隊自製嘅基革計數器檢測佢嘅放射性[3]。另外喺1960年代，許雲基率領嘅團隊開始自製碳-14偵測器[4]:169，主要嘅目的係瞭解二戰之後大氣層核試驗對台灣稻米輻射量嘅影響，結果佢哋發現臺灣樹木入面嘅放射性碳含量比歐洲仲要高[5]。喺當時，許雲基團隊用咗放射性碳定年法協助當時嘅考古人類學系做文物鑑定同埋地質系做同化石同埋地層有關嘅研究[5][9][16]:3-4，係臺灣當年唯一具備呢個技術嘅團隊[2]。而臺灣長濱文化遺跡年代嘅測定，就是喺嗰段時間由許雲基帶領嘅團隊完成嘅[4]:169[9]。佢哋亦都希望可以運用呢個技術去測量宇宙射線嘅變化[16]:3-4。許雲基團隊嘅呢啲研究令到臺大物理系嘅原子核實驗室成為1960年代亞洲最先進嘅原子核實驗室，並且發表咗接近三十篇論文[6]:4[7]:99-100。1961年，當時做副教授嘅許雲基攞到國際原子能機構的補助，去日本東海村原子能研究所做為期兩年嘅專題研究[4]:168[17]:8。喺臺大物理系任職嗰時，許雲基透過一篇篇論文咁累積，由助教逐漸升到講師、副教授、教授，跟住喺1962年10月開始成為臺大物理系嘅系主任[8]。1965年，臺灣行政院國家科學委員會成立物理研究中心，許雲基就同禾夫岡·哥羅爾一齊成為臺大物理系喺嗰間中心嘅講座教授[4]:167。
晚年
[編輯]
1985年，許雲基喺臺大物理系退休，並且喺1989年同禾夫岡·哥羅爾一齊成為臺大物理系嘅名譽教授[4]:180[6]:15,21。喺佢退休之後，因為原子核實驗室唔夠位，所以佢嘅加速器迫住要拆，但係林松雲同埋許玉釧兩位技師因為唔捨得而將佢嘅零件擺喺唔同地方接近二十年[10][11]:151。佢哋兩個甚至將嗰啲零件擺喺倉庫、地庫、沖涼房天花板等等嘅地方[7]:100-101[9]。到咗2004年，臺大物理系決定重組嗰部加速器，並且在2005年開始由許雲基陪住林松雲同埋許玉釧兩位技師，一齊率領重建原子核實驗室成為臺大物理文物廳，並且於嗰一年嘅11月21號正式開幕[9][10][11]:151。嗰次重建過程亦都俾人拍咗做紀錄片《衝破原子核》[6]:9,21。許雲基總結三十八年的教職生涯嗰陣時話：「好困難嘅時代，但係大家都好認真」[5]。
攷
[編輯]- ↑ James M. Nester (2015年2月)。〈2014年物理學會特殊貢獻獎得獎人簡介〉 (PDF)。《物理雙月刊》 (臺灣中文)。中華民國物理學會。37 (1): 136–137。原著 (PDF)喺2015-08-14歸檔。喺2015-08-14搵到。
- ↑ 2.0 2.1 2.2 2.3 2.4 2.5 周华 (2014-02-13)。〈【对话春运】：92岁高龄台湾物理学家Hsu Yuin-Chi之青山依旧在，几度夕阳红〉 (中國中文)。中国航空旅游网。原先內容歸檔喺2015-07-19。喺2015-07-19搵到。
- ↑ 3.0 3.1 3.2 鄭伯昆 (1999年2月)。〈再談早期台大核子物理實驗室〉。《物理雙月刊》 (臺灣中文)。中華民國物理學會。29 (1): 23–35。原著喺2015-08-14歸檔。喺2015-08-14搵到。
- ↑ 4.00 4.01 4.02 4.03 4.04 4.05 4.06 4.07 4.08 4.09 4.10 4.11 4.12 4.13 張幸真 (2003-07-31)。〈台灣知識社群的轉變－以台北帝國大學物理講座到台灣大學物理系為例〉 (臺灣中文): 20。原先內容歸檔喺2015-06-28。喺2012-06-11搵到。
{{cite journal}}: Cite journal requires|journal=(help) - ↑ 5.00 5.01 5.02 5.03 5.04 5.05 5.06 5.07 5.08 5.09 5.10 林夏玉 (2006-05-01)。〈碳十四同位素定年〉。《臺大校友雙月刊》 (臺灣中文)。國立臺灣大學 (45)。原先內容歸檔喺2015-07-18。喺2015-07-18搵到。
- ↑ 6.0 6.1 6.2 6.3 6.4 6.5 6.6 〈臺灣物理史數位典藏計畫〉 (PDF) (臺灣中文)。行政院國家科學委員會。2007-03-29。原著 (PDF)喺2015-01-27歸檔。喺2015-01-27搵到。
- ↑ 7.0 7.1 7.2 7.3 7.4 7.5 7.6 張幸真 (2005年7月)。〈與原子阿公們偕行的日子：台大原子核實驗室復原紀錄片拍攝側記〉 (PDF)。《新活水雙月刊》 (臺灣中文)。中華文化總會 (1): 98–101。原著 (PDF)喺2015-09-24歸檔。喺2016-05-11搵到。
- ↑ 8.0 8.1 〈臺大物理系 歷屆系主任〉 (臺灣中文)。國立臺灣大學物理學系。2015-03-25。原先內容歸檔喺2015-08-02。喺2016-05-11搵到。
- ↑ 9.0 9.1 9.2 9.3 9.4 〈臺大物理文物廳 原子核物理 人物歷史〉 (臺灣中文)。臺大物理文物廳。原先內容歸檔喺2015-06-04。喺2015-08-24搵到。
- ↑ 10.0 10.1 10.2 10.3 10.4 〈原子核物理實驗室〉 (臺灣中文)。臺大物理文物廳。原先內容歸檔喺2015-06-04。喺2014-12-02搵到。
- ↑ 11.0 11.1 11.2 11.3 楊松翰、蔡明達、劉建甫 (2010年4月)。《Hi! NTU 解讀臺大的82個密碼》 (臺灣中文)。臺北市：國立臺灣大學出版中心。ISBN 978-986-02-2869-4。原先內容歸檔喺2015-01-28。喺2014-12-03搵到。
{{cite book}}: CS1 maint: date and year (link) - ↑ 12.0 12.1 12.2 12.3 許仲平 (1993–12)。〈許雲基與台灣首次原子核擊破實驗〉。《科學月刊》 (臺灣中文)。科學月刊雜誌社。24 (12): 913–917。
{{cite journal}}: CS1 maint: date format (link) - ↑ 13.0 13.1 刘广定 (2010)。〈中国完成的第一个核反应〉。《中国科技史杂志》 (中國中文)。北京市：中国科学技术协会。31 (2): 153–164。ISSN 1673-1441。原著喺2015-07-22歸檔。喺2015-07-18搵到。
- ↑ 14.0 14.1 14.2 14.3 劉廣定 (2009年3月)。〈史實再探——六十年前臺灣大學完成的我國第一個核分裂實驗〉 (PDF)。《科學史通訊》 (臺灣中文)。32。原著 (PDF)喺2015-01-22歸檔。喺2014-11-02搵到。
- ↑ 15.0 15.1 15.2 15.3 劉廣定 (2006年12月)。〈初探民國 34～37 年的中國核子科學〉。《中華科技史學會會刊》 (臺灣中文) (10): 7–10。原先內容歸檔喺2015-04-02。喺2015-01-26搵到。
- ↑ 16.0 16.1 〈臺大物理系研究發展概況〉 (PDF)。《時空》 (臺灣中文)。臺大物理系學生會 (5): 1–6。1967。原著 (PDF)喺2015-11-17歸檔。喺2015-08-20搵到。
- ↑ 陳政宏、劉貞辰 (1991年9月)。〈台大物理系研究發展簡史〉。《時空》 (臺灣中文)。臺大物理系學生會 (26): 6–13。原先內容歸檔喺2015-08-21。喺2015-08-20搵到。
- ↑ 〈國立臺灣大學校史紀事〉 (PDF) (臺灣中文)。臺大校史館。2012-11-13。原先內容歸檔 (PDF)喺2014-09-03。喺2015-02-26搵到。
出面網頁
[編輯]- 臺灣大學原子核物理數位典藏資料庫（臺灣正體）
- 臺灣大學物理文物廳（臺灣正體）
- 國立臺灣大學物理學系（臺灣正體）