香港同星加坡關係

出自維基百科,自由嘅百科全書
跳去導覽 跳去搵嘢

香港同星加坡關係係指歷史上嘅香港星加坡,以至而家中華人民共和國香港特別行政區星加坡共和國之間的雙邊關係,係中國-星加坡關係嘅一部份。兩個地方以前都係大英帝國嘅殖民地,而家同時係國際金融中心。1997年之前星加坡政府喺香港嘅代表係星加坡駐香港專員公署,1997年之後就係星加坡駐香港總領事館。

[編輯]

星加坡同香港喺19世紀就開始商貿往來。根據1900年代香港報刊嘅評論版面,當時已經有星加坡同香港相互競爭嘅講法。據1923年星嘉坡日本人寫嘅《新嘉坡概要》入面記載,當時星加坡同香港之間已經存在貿易關係,當時亦都有日本商船往返香港同星加坡兩個地方[1]

金文泰喺1925年到1930年做香港總督,喺1930年到1934年做三洲府總督

喺兩個地方重屬於英國管治嘅時候,有部份曾經喺香港政府或者星加坡政府做過嘅官員都曾經喺對方政府任職,呢啲官員將先做嗰度嘅制度帶入之後做嗰度。例如金文泰喺1925年到1930年嗰時做香港總督,之後又喺1930年到1934嗰時做三洲府總督;柏立基喺1955年到1957年嗰時做星加坡總督,之後又喺1958年到1964嗰時做香港總督。金文泰做三洲府總督嗰時,效法香港行政局三洲府行政局再委任華人做行政局非官守議員。柏立基做香港總督嗰時,亦都跟星加坡自治嘅方式,推動公務員本地化,重提升咗香港本地人做政府嘅高層職位。

1959年開始做星加坡總理李光耀訪問過香港好多次,亦曾經好多次就香港嘅政制發展表達睇法[2]。1984年,中華人民共和國同英國簽《中英聯合聲明》,宣佈中華人民共和國會喺1997年7月1號接收香港,搞到香港出現移民潮,其中有一部份香港人移民星加坡。1989年六四事件之後,星加坡政府每年向香港發出2.5萬個家庭移民簽證配額,當時排隊嘅人龍甚至由當時專員公署所在嘅金鐘延伸到2公里之外嘅灣仔[3]。1997年,星加坡工人黨領袖鄧亮洪因為俾李光耀等人告誹謗被判敗訴而要流亡澳洲,期間曾經短暫停留過香港,重喺香港中文大學嘅幫助之下出版咗《鄧亮洪回憶錄》[4]。2000年,香港中文大學向李光耀頒榮譽博士學位,搞到學生會好不滿,佢哋發動聯署行動,要求校方撤回決定[5]

2014年9月17號,星加坡總理李顯龍訪問香港,同香港行政長官梁振英見面。梁振英同李顯龍講咗兩地之間各方面嘅合作同交流,當中包括房屋、土地規劃同基建等等。梁振英亦都擺晚宴去款待李顯龍[6]。2015年3月23日,星加坡建國總理李光耀死咗,梁振英亦都寫咗封信畀李顯龍致哀[7]。2015年6月30號,星加坡學生余澎杉因為上載批評李光耀嘅影片而俾人押入精神病院,香港八間大學嘅學生會同學民思潮同一日到星加坡駐香港總領事館請願,要求星加坡政府放咗余澎杉[8]

貿易關係[編輯]

2012年,香港對星加坡嘅出口額係25.3億美元[9],而星加坡對香港嘅出口額係168億美元[10]。香港主要向星加坡出口機械、貴金屬、交通架生等等[9],而星加坡主要向香港出口機械、精煉石油、貴金屬等等[10]

1995年9月,香港星加坡商會成立[11]

文化關係[編輯]

2004年4月,星加坡同香港簽訂《文化合作諒解備忘錄》[12]。2006年香港藝穗會舉辦嘅雙城節就係以星加坡為焦點,去配合兩地簽咗《文化合作諒解備忘錄》[13]。2015年,香港藝穗會舉辦咗「2015 照亮香港在星加坡」活動[14]

星加坡教育部喺香港設立咗唯一一間嘅海外學校星加坡國際學校[11]

參考[編輯]

  1. "新嘉坡概要" (PDF). 新嘉坡日本人會. 1923-11. 喺2015-08-11搵到. Check date values in: |date= (help)
  2. "李光耀曾多次訪港 關注中港關係". 本土新聞. 2015-03-23. 喺2015-08-11搵到.
  3. "移民潮算到港英頭上 鄭赤琰:港府接爛攤子". 信報財經新聞. 2015-01-27. 原著喺2015-05-29歸檔. 喺2015-08-11搵到.
  4. "你所不知的星加坡?". 香港獨立媒體. 2013-08-25. 喺2015-08-11搵到.
  5. "抗議中大頒授榮譽博士學位予李光耀聯署信". 香港中文大學學生會. 2000-11-22. 原著喺2016-03-04歸檔. 喺2015-08-11搵到.
  6. "李顯龍訪港晤梁振英 商交流合作". 成報. 2014-09-18. 喺2015-08-17搵到.
  7. "梁振英致函李顯龍對李光耀逝世致哀". 香港電台. 2015-03-23. 喺2015-08-17搵到.
  8. "各地團體請願 促星加坡釋余澎杉". 自由亞洲電台. 2015-06-30. 喺2015-08-11搵到.
  9. 9.0 9.1 Alexander Simoes. 产品香港出口到星加坡 (2012) Archive.is歸檔,歸檔日期2015年8月12號,. Observatory of Economic Complexity. [2015-08-11]. 
  10. 10.0 10.1 Alexander Simoes. 产品星加坡出口到香港 (2012) Archive.is歸檔,歸檔日期2015年8月12號,. Observatory of Economic Complexity. [2015-08-11]. 
  11. 11.0 11.1 "与在香港特区的星加坡公司及社团联系". 星加坡駐香港總領事館. 喺2015-08-11搵到.
  12. "香港與東亞區域合作" (PDF). 策略發展委員會. 2009-12-17. 原著 (PDF)喺2016-03-04歸檔. 喺2015-08-11搵到.
  13. "藝穗會". 香港2006. 2006. 喺2015-08-11搵到.
  14. "2015 照亮香港在星加坡". 藝穗會. 2015-07-24. 喺2015-08-11搵到.

睇埋[編輯]

出面網站[編輯]