香港金曲頒獎典禮 2021/2022

出自維基百科,自由嘅百科全書
跳去導覽 跳去搵嘢
香港金曲頒獎典禮 2021/2022
File:Hong Kong Gold Songs Award 202122.jpg
頒獎典禮官方標誌
日期2022年7月24號 (2022-07-24)
晚上8點30分至11時
地點將軍澳電視廣播城一號錄影廠
國家或地區Flag of Hong Kong.svg 香港
主辦單位香港電台電視廣播有限公司
主持人鄭裕玲崔建邦李志剛黃天頤
得獎最多張敬軒(3獎)
金曲獎、男歌手大獎、最佳中文唱片獎
電視/電台轉播
電視網絡電視:
無綫電視翡翠台港台電視31
電台:
香港電台第二台

香港金曲頒獎典禮 2021/2022》(英文Hong Kong Gold Songs Award Presentation Ceremony 2021/2022)係由香港電台無綫電視首屆聯合主辦嘅香港流行音樂頒獎典禮,取代過去兩台分別舉辦嘅十大中文金曲頒獎音樂會同埋勁歌金曲頒獎典禮。典禮原定喺2022年4月3號晚上8點30分至11點15分喺九龍灣國際展貿中心EMax匯星舉行,但兩台喺2月24號宣佈因應武漢肺炎香港疫情而另擇日子舉行。兩台之後喺5月23號宣佈,典禮落實喺7月24號晚上8時30分假將軍澳電視廣播城一號錄影廠舉行[1],並由鄭裕玲崔建邦李志剛黃天頤擔任司儀[2],酒會同記者室司儀由許文軒阿O擔任,典禮口號為「領導樂壇 凝聚音樂力量 締造香港金曲新一頁」[3]。呢次頒獎典禮亦為慶祝香港特別行政區成立二十五周年紀念系列活動之一[4]

張敬軒共獲頒三個獎項,成為呢次嘅大贏家。不過,呢次頒獎典禮喺機制公平性、流程安排、出席歌手數目同嘉賓分量都受到外間一啲爭議,港台甚至被指封殺部分歌手。

典禮前事件[編輯]

  • 呢次頒獎典禮只設樂隊獎而冇組合獎,又將Mirror、Error、C AllStar同埋P1X3L成員分拆角逐男歌手獎,就連未出過Solo都榜上有名,做法成為一啲網民討論嘅話題[5]
  • Mirror由於係ViuTV旗下藝人,對於佢哋會否出席ViuTV競爭對手無綫電視有份搞嘅頒獎禮以及佢哋會唔會有獎,坊間一直都有討論。Mirror喺頒獎禮之前就話要準備演唱會,而表明唔去[6]
  • 喺2022年1月,香港電台傳出制訂「十大禁播歌手名單」,部份「上榜」歌手或樂隊中嘅成員,都有作明顯政治表態。名單包括黃耀明何韻詩RubberbandC AllStar達明一派Dear Jane方皓玟Serrini謝安琪同埋許廷鏗。對此香港電台亦無否認,坊間關注,佢哋到底有冇機會參與呢次頒獎禮[7][8]

出席歌手/音樂人及表演環節[編輯]

公佈獎項後嘅公眾評論同關注[編輯]

  • 呢次頒獎禮出席嘅歌手唔多,有啲人就算有獎攞都無嚟 ,而香港華納唱片更加無歌手亮相[9]。亦有部分媒體形容頒獎過程沉悶,相比起《叱咤樂壇流行榜頒獎典禮》花盡心思搞氣氛,呢次頒獎禮只係安排唱好多經典歌。另外,表演同頒獎嘉賓嘅分量亦唔夠,甚至安排新人鍾柔美同詹天文頒獎俾姚焯菲,就連姚焯菲自己都覺得愕然[10]
  • 有部分網民覺得,出席頒獎禮嘅歌手,都係幫咗無綫作嫁衣裳,為無綫宣傳佢哋旗下嘅聲夢歌手[11]
  • Mirror最終仍然攞到一啲獎項,其中包括「香港金曲最佳合唱歌曲獎」。不過,TVB Music Group Limited行政總裁張仲恒喺李志剛嘅電台節目討論Mirror唔去頒獎禮嘅事情上,就被指言語句句有骨[12]

參考[編輯]

  1. 《香港金曲頒獎典禮》7‧24舉行 最佳進步獎入圍名單曝光 (16:00). 明報OL. 2022-05-23. 喺2022-06-25搵到.
  2. 香港金曲頒獎典禮丨谷婭溦開心奪華語歌曲 惜不在港無緣親身領獎. 頭條日報. 2022-07-21. 喺2022-07-21搵到.
  3. 《香港金曲頒獎典禮2021/2022》 領導樂壇 凝聚音樂力量 締造香港金曲新一頁. 香港電台. 2022-01-05. 原先內容歸檔喺2022-01-05. 喺2022-01-05搵到. {{cite news}}: Cite has empty unknown parameter: |dead-url= (help)
  4. 獲「香港金曲榮譽大獎」 新生代求賜好歌 鮑比達:我團火仍在 好好做音樂. 文匯報. 2022-07-20. 喺2022-07-20搵到.
  5. am730. 香港金曲|有樂隊冇組合 MIRROR ERROR C AllStar P1X3L成員分拆角逐男歌手獎 未出過Solo都榜上有名. am730 (中文). 喺2022-07-25搵到.
  6. 盧凱瑤 (2022-07-22). MIRROR拒出席《金曲頒獎禮》公平性受質疑 李志剛:崔建邦代攞囉. 香港01 (香港中文). 喺2022-07-25搵到.
  7. TNL香港編輯 (2022-01-26). 網傳《港台》訂「十大歌手禁播名單」,RubberBand:繼續專心做音樂. The News Lens 關鍵評論網 (中文). 喺2022-07-25搵到.
  8. 自由時報電子報 (2022-01-27). 被列「港台十大禁播歌手」 何韻詩:好榮幸啊! - 國際. (中文). 喺2022-07-25搵到.
  9. 關穎賢 (2022-07-24). 金曲頒獎禮|一文睇清缺席而有獎歌手 呢間唱片公司竟然冇人嚟?. 香港01 (香港中文). 喺2022-07-25搵到.
  10. 關穎賢 (2022-07-25). 香港金曲獎評論|曾志偉望頒獎禮似金像獎 大量歌手缺席星光暗淡. 香港01 (香港中文). 喺2022-07-25搵到.
  11. 香港金曲頒獎典禮|網民怒轟:「仲衰過新城頒獎禮!」 | 流行娛樂. 新Monday (美國英文). 2022-07-24. 喺2022-07-25搵到.
  12. 新假期 (2022-07-22). 金曲頒獎典禮|李志剛節目疑寸爆MIRROR有獎唔拎 張仲恒:要尊重個賽制 | 影視娛樂. (美國英文). 喺2022-07-25搵到.