馬尼拉人質事件
 |
| 馬尼拉人質事件 | |
|---|---|
| |
| 地點 |  菲律賓馬尼拉黎剎公園
|
| 座標 | 14°34′52″N 120°58′30″E / 14.58104°N 120.974922°E |
| 日期 | 2010年8月23號 |
| 時間 | 大概上晝10點至夜晚9點半 （UTC+8） |
| 形式 | 挾持人質 |
| 武器 | XM16E1步槍同埋刀[1] |
| 死亡數 | 8個人質 同埋 兇徒Rolando Mendoza（共9人）[2] |
| 受傷數 | 7個人質 同埋 2個途人（共9人） |
| 受害者 | 康泰旅行團（編號PMK04-100820） |
| 主腦 | Rolando Mendoza（有譯：羅蘭多·門多薩） |
馬尼拉人質事件係一宗脅持案，發生喺菲律賓首都馬尼拉，2010年8月23號。件事由朝早九點左右到接近夜晚九點。事緣有個菲律賓差人，叫Rolando Mendoza，官至高級警務督察，畀人炒咗，於是拎支M16步槍，脅持康泰旅行社嘅旅遊巴士，同乘客廿五個人做人質，叫菲律賓政府畀佢復職，之後放咗幾人，連埋司機走甩咗，最後脅持十五人質，全部香港人。
近十個鐘後，槍手同菲律賓特警駁火，十五人質，八死七傷，有人一家五口去，兩口返；亦有兩公婆同姨仔一齊去，一齊踏上不歸路。消息傳返香港嗰陣，全港震驚，傳媒叫呢件事做「馬尼拉血色星期一」、「悲慘嘅星期一」[3]、「港殤」[4]。香港特區政府宣佈區旗下半旗三日致哀[5]；香港各主要網站亦改成黑白畫面致哀。
槍手背景
[編輯]槍手係菲律賓人Rolando Mendoza，菲律賓警察，畀人炒魷魚。佢喺菲律賓大學犯罪學畢業，有犯罪學學士學位；1981年加入菲律賓國家警察部隊分部（馬尼拉警察分局），1991年加入啱啱成立嘅菲律賓國家警察局，後尾升到高級警務督察。
1986年，佢俾國際青年商會（Jaycees International）選為菲律賓十大傑出警員[6]，獲得「國家警察局效率獎」、「國家警察局功勛獎章」、「國家警察局服務獎章」等十七項榮譽[7]。
2008年，佢涉嫌勒索馬尼拉東方文華酒店總經理，所以警察局停佢職，第二年俾國家警察局開除，連退休金都無埋[7]。
事件經過
[編輯]劫車
[編輯]出事旅行團係香港康泰旅行社馬尼拉四日遊，編號PMK04-1008202010，事發嗰日，個團本來準備嗰晚返香港[8]，朝早十點左右，一行人去國父黎剎紀念公園玩完返旅遊巴嗰陣，Rolando Mendoza着住警服、手執M16突擊步槍嘅，話要搭順風車，導遊拒絕之後，佢表露身份，夾硬上車。
當時全車有廿三人，包括大人十七人、細路三人、導遊、司機、領隊各一人，團友年齡介乎四歲到七十二歲，八男十二女。Rolando用手扣鎖住司機，又叫團員退到車尾，領隊即刻打電話返香港，報告事件[4]。旅行社即時通知香港旅遊業議會、旅遊註冊署、香港保安局、菲律賓駐港領事館及中國駐菲律賓大使館尋求協助[9][10]。
十點正，六十六歲老婦李鳳貴，因為肚痛要去廁所，而菲律賓籍女導遊Diana Chan亦話自己囝囝就嚟大學畢業，求槍手放佢，Rolando於是放佢哋走，但要換兩個喺當地公園影相嘅菲律賓人上車。
十二點零五分，女子曾綺麗獲准帶另外三個細路落車。曾綺麗原本只可以帶佢一對仔女走，慌忙之間，佢話十二歲男仔汪政逸係佢親戚，要帶埋佢走，Rolando同意[11]。
下晝一點十六分，有人拎飯盒上車，同Rolando傾咗一陣。十幾分鐘後，阿婆李鳳貴，同有糖尿病嘅老公李奕彪亦都獲釋。
談判
[編輯]下晝二點十五分，Rolando Mendoza喺巴士玻璃貼上「big deal will start after 3PM today」，即係今日下晝三點後會有大事、「big mistake to correct a big wrong decision」，即用重大錯誤去改正大兼錯嘅決定，之後槍手再喺旅遊巴窗口貼出字條，「3PM dead lock」，即係下晝三時最後期限等幾張字條，惟在當時未見異常。Rolando細佬到場談判，要求延長期限至下晝三點半。
三點半，槍手又貼另一張告示「Media Now」，要求見傳媒。槍手又要求當局同旅遊巴入油，等架車可以繼續開冷氣。
四點半，一名當地隨團影相人員獲釋。
五點，康泰旅行社總經理劉美詩召開記者會，佢同女團友聯絡過，知道獲釋人士情緒穩定，正喺酒店休息。團友相信槍手唔想傷害老弱婦孺，所以容許佢協同仔女同另一名細路落車，槍手並無威嚇語句。劉美詩又話，由於獲釋人士嘅證件重喺車上，未知佢哋會唔會如期當晚回港。佢話當時康泰重有三團共五十三人喺馬尼拉，將改變部分行程。佢相信呢次係個別事件，唔影響旅行社日後出團去菲律賓旅遊。廿四號到廿八號會再有三團六十八人出發去菲律賓[12]。
喺「談判」期間，菲律賓警方多次主動放棄逮捕槍手救出人質嘅機會。
駁火
[編輯]大概七點零九分，Rolando Mendoza打畀電台，話知道警方已經派特警部隊接近佢，並威脅如果特警部隊唔撤走就會殺死團友。四分鐘後Rolando嘅細佬退出談判，原因係菲律賓警方以同謀罪名拉咗佢並鎖上手扣，菲律賓警方用意主動挑釁Rolando，Rolando喺旅遊巴收聽電台得知，情緒轉向激動。
大概七點廿三分，現場傳出最少六聲槍聲。七點半，槍手放走司機，司機及後訛稱所有人質被殺。
七點卅八分，當地警員開始試圖進入巴士，期間現場多次傳出槍聲。警員試圖用卡車同埋繩強行拉開車門唔成功，又試圖從太平門進入巴士失敗。現場睇過程嘅部分群眾包括香港無綫電視新聞部工程人員溫明，同一個細路中流彈受傷。
八點卅九分，警員喺未有確認人質安全嘅情況下向巴士掟催淚彈。
八點四十二分，菲律賓特警用M16步槍擊斃Rolando，掛屍車門。兩分鐘後，當地電視台報導指槍手被殺。
八點四十六分，倖存者陸續逃出巴士。
八點五十分，香港特區政府行政長官曾蔭權喺政府總部召開記者招待會，並同時宣佈第二日區旗下半旗致哀。
第二日
[編輯]
8月24號朝早菲律賓GMA電視網絡報導，遇害人質增至八人，包括俾警方打死嘅槍手Rolando Mendoza，一共死九人[3]。Rolando細佬Gregorio Mendoza俾馬尼拉警區（Manila Police District）當局控以串謀非法禁固罪，有可能被判終身監禁或死刑[13]。旅遊巴仍然停放喺黎剎廣場，遇難者家屬抵達現場，並進行路祭哀悼遇難者[14]。
下晝自由黨同埋社會民主連線帶領幾十個示威者到菲律賓駐港總領事館示威[15]。民建聯亦帶領廿幾個示威者到菲律賓駐港總領事館示威[16]。菲律賓駐港總領事克拉羅·克里斯托瓦爾（Claro Cristobal）接受菲律賓某電台訪問時話，菲律賓駐港總領事館已經收到多名香港市民嘅投訴電話，要求菲律賓為事件負責同賠償死者家屬[17]。
康泰喺廿四號中午，公佈遇難者名單，仍然係八名人質遇害[18]。香港特區政府隨後公佈旅行團死傷者十五人名單[19]。
康泰旅行社喺廿四號公佈：
- 呢團團友，一律獲發恩恤金兩萬港元，
- 遇難團友，個個獲平安保險賠償卅萬港元。其中傅卓仁、楊綺華、楊綺、汪子林四人，生前經旅行社手買咗美亞旅遊保險，由於保險公司，酌情將件事，由其他意外，改為因乘搭交通工具而導致意外，每位死者所獲嘅美亞人身意外賠償，由五十萬港元加到一百萬港元。
- 有買美亞旅遊保險嘅傷者，緊急醫療保障，可高達一百萬港元同返香港六個月內，複診費用高達十萬港元保障。
- 儘快安排遺體送返香港。
- 聯絡社會福利署，派人同公司員工心理輔導[20]。
後續
[編輯]香港行政長官曾蔭權提議八位遇難人質葬喺和合石墳場嘅景仰園，記念佢哋嘅犠牲[21]，當中傅卓仁家屬同汪子林家屬接受邀請[22]。2011年，香港政府追贈金英勇勳章畀謝廷駿、梁錦榮、同傅卓仁[23]。
香港傳媒持續關注下顎重傷嘅人質易小玲嘅康復進度。2013年底，佢喺台灣接受手術，成功重建下顎[24]。
人物名單
[編輯]死者
[編輯]| 中文名 | 拉丁字母名 | 年齡 | 性別 | 身份[4][25][26][27][28][29] |
|---|---|---|---|---|
| 梁錦榮 | Leung Kam Wing, Ken | 58 | 男 | 團友 梁家 |
| 梁頌詩 | Leung Chung See, Doris | 21 | 女 | 團友 梁家 梁錦榮、吳幼媛個女 |
| 梁頌儀 | Leung Song Yi, Jessie | 14 | 女 | 團友 梁家 梁錦榮、吳幼媛個女 |
| 汪子林 | Wong Tze Lam | 51 | 男 | 團友 汪家 |
| 楊綺華 | Yeung Yee Wa | 44 | 女 | 團友 汪家 汪子林老婆 楊綺琴個妹 |
| 楊綺琴 | Yeung Yee Kam | 46 | 女 | 團友 汪家 楊綺華家姐 |
| 傅卓仁 | Fu Cheuk Yan | 39 | 男 | 團友 傅家 |
| 謝廷駿 | Tse Ting Chunn, Masa | 31 | 男 | 香港康泰旅行社領隊 |
| 文多薩 | Rolando Mendoza | 55 | 男 | 兇徒（槍手） |
傷者
[編輯]| 中文名 | 拉丁字母名 | 年齡 | 性別 | 狀況 | 身份 |
|---|---|---|---|---|---|
| 吳幼媛 | Ng Yau Woon, Amy | — | 女 | 輕傷 | 團友 梁家 梁錦榮老婆 |
| 梁頌學 | Leung Song Xue, Jason | 18 | 男 | 頭部受撞擊[30] | 團友 梁家 梁錦榮、吳幼媛個仔 |
| 汪綽瑤 | Wong Cheuk Yiu, Tracy | 15 | 女 | 腳部受輕傷 | 團友 汪家 汪子林、楊綺華個女 汪政逸家姐 |
| 陳國柱 | Chan Kwok Chu, Joe | 46 | 男 | 雙手手腕中槍 | 團友 陳家 |
| 易小玲 | Yuk Tsu Ling | 32 | 女 | 下顎中槍，碎裂變形，右手兩指斷咗 | 團友[31] 陳家 陳國柱情人[32] |
| 羅錦芬 | Lo Kam Fun | 66 | 女 | 輕傷 | 團友 李瀅銓阿媽 |
| 李瀅銓 | Lee Ying Chuen | 36 | 女 | 輕傷 | 團友 羅錦芬個女 |
| 溫明 | Wen Ming | 47 | 男 | 肚皮俾流彈擦傷 | 香港無綫電視新聞部工程人員[1] |
| — | Mike Yadrillo y Campanero | 10 | 男 | 大髀中流彈受傷 | 菲律賓人圍觀者[33] |
獲釋及逃脫人質
[編輯]| 中文名 | 英文名 | 年齡 | 性別 | 身份 |
|---|---|---|---|---|
| — | Diana Chan | 32 | 女 | 菲籍導遊 |
| 利哥·告魯斯（音譯） | Rigor Cruz | 19 | 男 | 菲籍攝影人員 |
| 丹尼路·美德路（音譯） | Danilo Medril | 65 | 男 | 菲籍攝影人員 |
| 阿拔圖·盧邦（音譯） | Alberto Lubang | 38 | 男 | 菲籍巴士司機 自己走甩 |
| 李奕彪 | Li Yick Biu | 72 | 男 | 團友 李家，有糖尿病 |
| 李鳳貴 | Li Fung Kwan | 66 | 女 | 團友 李家 李奕彪老婆 |
| 曾綺麗 | Tsang Yee Lai | 40 | 女 | 團友 傅家 傅卓仁老婆 |
| 傅頌賢 | Fu Chung Yin | 4 | 女 | 團友 傅家 傅卓仁、曾綺麗個女 |
| 傅澤賢 | Fu Chak Yin | 10 | 男 | 團友 傅家 傅卓仁、曾綺麗個仔 |
| 汪政逸 | Wong Ching Yat, Jason | 12 | 男 | 團友 汪家 汪子林、楊綺華個仔 汪綽瑤細佬 |
多方反應
[編輯]民眾
[編輯]由於電視直播成件事，同網上有新聞即時更新，好多人即時睇到成件事。
有人發現軍方用木槌攻擊車門玻璃嘅位，全部係匪徒貼紙嘅位，有人質疑係軍方咗掩飾事實，而將人質性命安全排尾[34]。有網民仔細睇番啲相，揭發菲律賓警方有多項舉動，非但對拯救人質毫無幫助，甚至有可能涉嫌故意草菅人命，以圖達到另一啲目的。其中一張相顯示警員「打空槍」——扮想開槍嘅動作，但手上冇沒槍。另一張相顯示警員救人前，用大鎚打爛強化玻璃車窗，而大鎚打極都無果，打嘅位原本都張咗槍手寫出訴求嘅紙，上有槍手涉及嘅冤案紀錄案件編號、法院審理檔案編號等仔細證據。網友同專家都質疑警員打爛強化玻璃，旨在「破壞證物」，但無助營救。網民認為，若然噉做係為硬闖車廂，但唔預備梯等工具，菲律賓警方無法自圓其說[35]。
有香港警務處特別任務連（俗稱：飛虎隊）前教官指出，面對呢啲挾持人質嘅槍手，特警隊理應儘早制定策略，必要時要以迅速手法制服槍手。常見安排乃係一方面由狙擊手埋伏，必要時「一槍攞命」以制服甚至擊斃槍手；另一方面，「配備避彈衣、頭盔、全副武裝甚至炸藥」嘅攻擊隊人員應準備就緒，隨時支援。萬一狙擊擊失手或槍手開始殺人，攻擊隊就要喺最短時間內強行攻入或爆破進入目標地方，擊倒槍手。但從現場所見，警員方未有喺情況惡化後迅速拯救，做法唔專業，錯失救人機會。有香港軍事評論員指出 ，突擊救人嘅警員裝備極不足，例如部分人連頭盔都冇，亦冇準備條梯，槌又無法即刻打爛車廂玻璃，結果一度束手無策，攻唔入車廂；更離譜嘅係，突擊警員起初似乎連開太平門都唔識，大槌亦只得一把[36]。
軍事評論員馬鼎盛認為，呢次事件顯示，菲律賓當地警方能力唔夠，又認為由於當地貪污問題嚴重，警員並唔注重訓練；而且事件中有諸多疑點，例如人質有冇俾警方子彈打死[37]。
英國廣播公司訪問咗曾經同英軍同埋蘇格蘭場做過反恐工作嘅 Charles Shoebridge，佢亦指出咗菲律賓當地警方嘅十大錯誤[38]。
有香港網民喺Facebook發起喺24號着黑衫悼念死難者[39]。
傳媒
[編輯]有傳媒報導，菲律賓警方喺營救過程當中，應對消極，應變措施不足，引起中港兩地及世界各地其他譴責[40]。
2010年8月24號，除中國日報香港版之外，港澳所有報章都頭版報導呢次事件。香港多份報章當日亦改用黑色報頭，向死者致哀[41]。
組織機構
[編輯]出事嘅康泰旅行社網站首頁換上黑色標誌悼念呢次事件，並開設公眾留言專頁以悼念領隊謝廷駿[42]。
多個香港政黨到菲律賓駐港領事館示威，譴責菲律賓政府喺呢次事件嘅手法[43][44]。
包括無綫電視、香港有線電視、蘋果日報香港區網站、Google香港區網站、Yahoo香港、香港電台（RTHK）、香港討論區、Uwants討論區、高登討論區、樂古討論區、香港網絡大典、香港巴士大典及香港鐵路大典等多個網站喺24號更改主題色調以示哀悼[45]。
網站
[編輯]有香港網站及傳媒為紀念死傷市民，決定將標誌改為黑白一日。
政府
[編輯]
行政長官曾蔭權高度關注事件，並親自同保安局局長處理呢件事。保安局局長李少光話，特區政府已成立特別小組，並派出一個高級警員同一個入境事務主任趕去馬尼拉，以協助中國駐馬尼拉大使館處理事件[47]；特區政府並喺8月24至26號，一連三日下半旗致哀。同時，為對事件中嘅遇難者表達哀悼，每晚都搞嘅均幻彩詠香江喺8月24號嘅表演取消[48]。另外，香港政府網站主頁換上黑色標誌同將整個網頁灰階化，以悼念呢次事件[49]。民政事務總署喺全港十八區設弔唁冊，畀公眾人士悼念遇難者[50]。
香港特區政府當晚決定安排國泰航空包機，接載喺馬尼拉被挾持人質嘅家屬、保安局副局長黎棟國、醫療人員、社工、警員、入境事務處人員同臨床心理學家到當地[52]。第一班CX2905號班機原定8月24號上晝1點30分開出，最終喺上晝2點時12分離港；第二班喺同一日上晝8點開出。
商務及經濟發展局局長劉吳惠蘭對喺馬尼拉發生嘅脅持香港遊客事件極度關注並深感哀痛。佢決定即時終止喺歐洲嘅官式訪問行程，第一時間返港協助處理事件[53]。政務司司長唐英年取消星期三出訪意大利同瑞士嘅行程，留港處理善後[54]。
香港政府立即對菲律賓發出黑色外遊警示，係制度設立以來首次直接發出黑色外遊警示；由於菲律賓發生嚴重人質脅持事件，香港特區政府呼籲市民唔好去當地以及立即離開當地[55]；而身在當地港人亦應注意人身安全，提高警惕。
新華社表示中華人民共和國中央人民政府高度關注事件[56]。身兼中央港澳工作協調小組組長嘅國家副主席習近平同外交部長楊潔篪都親自致電行政長官曾蔭權表達慰問[57]，胡錦濤、溫家寶等國家領導人致電慰問喺馬尼拉事件中遇難嘅港人親屬同傷者[58]。
中國駐菲律賓大使館領事王曉波話，獲釋嘅香港旅客經初步檢查，身體狀況正常，已被安排返酒店休息。佢指人質獲釋初期情緒不穩，要在場大使館人員安撫，之後回復平靜，王曉波話暫時未有人要求提早返香港。王曉波重要求菲律賓書面解釋呢次強制解救嘅行動。佢話，早前菲律賓當局話，由於槍手夜晚情緒不穩，可能對人質行兇，故此採取行動[59]。
外交部向菲律賓發出旅遊警告，並提醒中國公民加強自我保護[60]。
菲律賓總統阿基諾三世下令各部門徹查事件。佢承認對特警隊表現「唔滿意」，但同時把責任推向傳媒，指傳媒現場直播導致槍手對警方「部署」瞭如指掌，傳媒須「負上一定責任」[61]。佢指槍手接聽一個電話後，情緒轉趨激動，再加上槍手細佬俾警方拉咗，導致槍手情緒失控而動武[62]。但阿基諾三世到而家都冇解釋點解唔聽特首曾蔭權嘅電話，以及有冇以人命安全作首要考慮，更公開話佢認同當局唔派高級官員同槍手談判嘅決定，聲稱防止槍手提出更多條件。對此而引致嘅後果，阿基諾三世僅以「急轉直下」去形容，聲稱感到「非常不幸」，並冇承認係菲律賓當局嘅責任[61]。
馬尼拉警區喺8月24號起訴槍手Rolando Mendoza細佬Gregorio，指佢串謀非法禁錮[63]。
菲律賓宣佈8月25號為全國哀悼日，悼念事件中死難嘅香港人，以示同香港團結一致。喺哀悼期間各政府建築物下半旗致哀[64]。
澳門特別行政區行政長官崔世安致函香港特別行政區行政長官曾蔭權，代表澳門特區政府及澳門居民對遇難香港市民表示深切哀悼，向遇難及受傷者親屬致以誠摯慰問。並表示澳門特區政府願意全力提供各種協助[65]。
旅遊局旅遊危機處理辦公室話喺菲律賓嘅澳門居民都平安。其中，於馬尼拉旅遊的7名居民，將提前搭飛機經香港返澳門；而喺宿霧旅遊嘅11名居民會繼續行程，星期五返澳門。危機辦同時提醒澳門居民近期謹慎前往菲律賓，正喺菲律賓嘅澳門居民注意人身安全[66][67]。
外交部發言人陳銘政話事件係偶發性個別事件，旅遊警示不變[68]。
網上嘅不當言論
[編輯]成龍響社交網站上面話香港人唔嬲，又話自己代表全部香港人，搞到好多網民批評佢[69]。之後，有人發現佢響菲律賓有咖啡店，重讚過嗰度尐差人[70]。最後佢道歉[71] 。
參考
[編輯]- ↑ 1.0 1.1 無綫電視新聞 2010-08-23 [1] 互聯網檔案館嘅歸檔，歸檔日期2012年6月20號，.
- ↑ 菲律賓馬尼拉香港旅行團死傷團員名單zb2香港政府新聞處新聞公報
- ↑ 3.0 3.1 "Death toll from hostage crisis rises to 9, including hostage-taker". GMA News. 2010-08-24. 喺2010-08-24搵到.
- ↑ 4.0 4.1 4.2 〈港旅團馬尼拉遭脅持 槍手掃射 八死七傷〉。蘋果日報。2010-08-24。原著喺2010年8月25號歸檔。喺2010-08-24搵到。
- ↑ 特區區旗明日及後日續下半旗
- ↑ Papa, Alcuin (2010-08-23)。〈槍手背景資料〉。Philippine Daily Inquirer。原著喺2012-06-19歸檔。喺2010-08-23搵到。
- ↑ 7.0 7.1 〈中國政府強烈譴責菲律賓歹徒暴行 要菲方書面解釋〉。原著喺2010年8月27號歸檔。喺2010年8月24號搵到。
- ↑ 被挾持康泰團原訂今晚返港
- ↑ 〈菲律賓搶手劫持 港導遊電話偷報〉。原著喺2010年8月24號歸檔。喺2010年8月24號搵到。
- ↑ 〈菲律賓劫持事件現感人一幕 丈夫用身體擋子彈救妻〉。原著喺2016-10-10歸檔。喺2010-08-24搵到。
- ↑ 〈香港遊客遭劫事件：提前獲釋婦女巧救陌生孩子下車〉。原著喺2010年8月25號歸檔。喺2010年8月24號搵到。
- ↑ 〈香港獲釋女子透露遭劫持部分細節〉。原著喺2010-08-25歸檔。喺2010-08-24搵到。
- ↑ Police file charges vs hostage-taker's brother
- ↑ 〈存档副本〉。原著喺2020年3月28號歸檔。喺2010年8月24號搵到。
- ↑ 〈多個團體到菲駐港使館抗議〉。原著喺2020年3月28號歸檔。喺2010年8月24號搵到。
- ↑ 多個政黨派代表到菲律賓領事館抗議
- ↑ RP consulate in HK swamped with protests over hostage crisis
- ↑ 康泰公佈遇難4男4女名單 (12:10)
- ↑ 〈康泰團15死傷者名單〉。原著喺2010年8月27號歸檔。喺2010年8月24號搵到。
- ↑ 〈菲律賓血案遇難名單公佈 賠償額增至100萬〉。原著喺2010年8月27號歸檔。喺2010年8月24號搵到。
- ↑ Special burial offered for hostage victims, South China Morning Post (August 28, 2010)
- ↑ （中文） 〈四名遇難者 安葬景仰園〉。Apple Daily。September 2, 2010。
- ↑ （中文）〈家人祭告謝廷駿獲授勳〉。Sing Tao Daily。July 2, 2011。原著喺2012年4月4號歸檔。喺2020年2月9號搵到。
- ↑ 〈易小玲拆線 病房慶生辰〉。《Apple Daily 蘋果日報》。原著喺2014-01-29歸檔。喺2020-02-09搵到。
- ↑ 〈機警媽媽撒謊救小團友 11歲童幸逃離 父母中槍雙亡〉。明報。2010-08-24。原著喺2010年8月28號歸檔。喺2010-08-24搵到。
- ↑ 〈康泰公佈遇難4男4女名單〉。明報。2010-08-24。原著喺2010年8月27號歸檔。喺2010-08-24搵到。
- ↑ 〈中國外交部向菲律賓發出旅遊警告〉。原著喺2016年3月9號歸檔。喺2010年8月24號搵到。
- ↑ 菲律賓馬尼拉香港旅行團死傷團員名單
- ↑ Manila hostage incident victim name list
- ↑ 〈醫生指梁頌學曾被硬物撞擊〉。香港有線。2010-08-24。喺2010-08-24搵到。
{{cite news}}: CS1 maint: url-status (link) - ↑ 〈馬尼拉受傷一名女團友下顎中槍舌頭破爛需接受整形〉。商台。2010-08-24。原著喺2012年6月19號歸檔。喺2010-08-24搵到。
- ↑ 〈同遊菲國出事 元配趕往揭發 重傷港漢有二奶〉。原著喺2011年6月11號歸檔。喺2011年3月31號搵到。
- ↑ 〈記者中流彈擦傷 裝器材鐵箱當護盾〉。明報。2010-08-24。原著喺2010年8月27號歸檔。喺2010-08-24搵到。
- ↑ 〈網絡驚爆！菲警救人先毀證？〉。原著喺2010年8月27號歸檔。喺2010年8月24號搵到。
- ↑ 〈網絡驚爆！菲警救人先毀證？〉。原著喺2010年8月27號歸檔。喺2010年8月24號搵到。
- ↑ 〈專家狠批菲警連頭盔都沒有 裝備差行動不專業 延誤救人時機〉。明報。2010-08-24。原著喺2010年8月28號歸檔。喺2010-08-24搵到。
- ↑ 〈馬鼎盛批評菲律賓警方能力不足〉。原著喺2016年3月8號歸檔。喺2010年8月24號搵到。
- ↑ BBC News - Ten things the Philippines bus siege police got wrong
- ↑ 〈16萬網友哀悼遇難團友〉。原著喺2010年8月29號歸檔。喺2010年8月24號搵到。
- ↑ 〈港巴遭劫 人質被殺 流血落幕 港人批菲警不專業 - NOWnews 今日新聞網〉。原著喺2010年8月26號歸檔。喺2010年8月24號搵到。
- ↑ 〈多份報章改以黑色報頭向挾持人質死者致哀〉。原著喺2020年3月28號歸檔。喺2010年8月24號搵到。
- ↑ 〈殉職領隊~謝廷駿 我們永遠懷念你〉。原著喺2010年8月29號歸檔。喺2010年8月24號搵到。
- ↑ 〈多個團體到菲駐港使館抗議〉。原著喺2020年3月28號歸檔。喺2010年8月24號搵到。
- ↑ 多個政黨派代表到菲律賓領事館抗議
- ↑ 香港網絡大典 馬尼拉挾持巴士事件
- ↑ 港交所默哀悼念菲遇害港人[失咗效嘅鏈]
- ↑ 《保安局局長會見傳媒發言全文》（香港政府新聞公報，2010年8月23號）
- ↑ 〈幻彩詠香江今晚取消〉。原著喺2010年8月27號歸檔。喺2010年8月24號搵到。
- ↑ 香港政府一站通
- ↑ 政府設立網頁並在各區弔唁菲律賓挾持人質事件中死難者
- ↑ 「深切哀悼菲律賓遇害港人」Facebook專頁
- ↑ 〈菲律賓人質事件七死八傷〉。原著喺2010年8月26號歸檔。喺2010年8月24號搵到。
- ↑ 《商務及經濟發展局局長終止歐洲訪問行程》（香港政府新聞公報，2010年8月23號）
- ↑ 〈唐英年取消週三外訪行程〉。原著喺2016年3月9號歸檔。喺2010年8月24號搵到。
- ↑ 《香港對菲律賓發出黑色旅遊警示》（香港政府新聞公報，2010年8月23號）
- ↑ 外交部發言人：中國政府高度重視香港遊客在菲律賓遭劫持
- ↑ 習近平及楊潔篪向港府表達慰問[失咗效嘅鏈]
- ↑ 胡錦濤、溫家寶、習近平致電慰問遇難香港同胞親屬和受傷同胞
- ↑ 中新網
- ↑ 〈香港電台 中國外交部向菲律賓發出旅遊警告〉。原著喺2016年3月9號歸檔。喺2010年8月24號搵到。
- ↑ 61.0 61.1 〈菲總統認警隊訓練裝備不足〉。星島日報。2010-08-24。原著喺2010年8月27號歸檔。喺2010-08-24搵到。
- ↑ 〈菲總統承認特警處理手法有改進空間〉。商台。2010-08-24。原著喺2010年8月27號歸檔。喺2010-08-24搵到。
- ↑ 〈菲警起訴槍手弟弟串謀禁錮〉。原著喺2010年8月28號歸檔。喺2010年8月24號搵到。
- ↑ 菲律賓週三哀悼死難香港人[失咗效嘅鏈]
- ↑ 〈崔世安致函慰問遇難港人家屬〉。澳廣視。2010-08-24。喺2010-08-24搵到。
- ↑ 〈在菲7澳人今提早回澳〉。澳廣視。2010-08-24。喺2010-08-24搵到。
- ↑ 〈危機辦呼籲澳門居民謹慎赴菲〉。危機辦。2010-08-24。原著喺2021年8月5號歸檔。喺2010-08-24搵到。
- ↑ 〈台灣赴菲律賓旅行團照常出發 退團民眾需付償金〉。原著喺2010年8月28號歸檔。喺2010年8月24號搵到。
- ↑ 成龍盼平息港菲仇怨 「別擔心，我們沒有憎恨」, 星島日報
- ↑ 〈成龍瞎挺菲律賓 被揭為私利 曾志偉譙「應道歉」〉。2010-08-27。原著喺2020-03-28歸檔。喺2013-08-23搵到。
- ↑ 成龍發聲明拆彈 免愈描愈黑, 太陽報
出面網頁
[編輯]