麥當勞

麥當勞（McDonald's Corporation）主賣漢堡包，係全球最大嘅連鎖快餐企業，總部喺伊利諾州橡溪（Oakbrook, Illinois）。麥當勞兄弟同埋Ray Kroc喺1950年代喺美國開。好多國人當咗麥當勞做美國生活文化象徵。

麥當勞係道瓊斯工業平均指數（Dow Jones Industrial Average）成份股。

食物

買嘢食送嘢玩，例如夢工廠電影嘅人物或日本 Sanrio嘅公仔。

麥當勞有同細路搞「麥當勞生日會」，細路包場搞派對，家長請食餐，餐廳姐姐同小丑哥哥同小朋友玩遊戲、送紀念品。

麥當勞作為一個全球性嘅品牌，喺唔同地方都有一定文化影響，或者有當地獨特嘅一面。喺某啲國家，由於所代表嘅快餐文化被指責對公眾健康產生負面影響，好多人叫做「垃圾食物」（junk food）。法國好多人敵視麥當勞，當咗麥當勞係美國生活方式入侵嘅代表。^{[未記出處或冇根據]}

麥當勞喺香港經營多年，有時會被稱爲「M記」，另外亦衍生咗一啲對香港文化嘅獨特表現同互動。

例如，由於環球唱片推出嘅歌，不時會喺麥當勞入面播，所以有部份旗下歌手，例如李幸倪同AGA，會俾人戲稱為「M記駐場歌手」^[1]^[2]。甚至有網民話，聽到AGA嘅《一》，符致逸嘅《靈魂獨舞》或者陳奕迅嘅《無條件》嗰陣，直頭感覺好似去咗麥當勞咁^[3]。

另外，喺曾蔭權擔任行政長官期間，亦有人唔支持佢，同埋要爭取一人一票普選嘅人，攞曾蔭權嘅英文名（Donald）嚟諷刺佢，高呼「勿當奴」，而呢個口號亦正好和應「麥當勞」嘅廣東話發音^[4]^[5]。

而去到麥當勞嘅嘢食方面，有啲麥當勞嘅食物亦有屬於香港獨特嘅暱稱。例如：

豬柳強：豬柳蛋漢堡有時會被簡稱爲「豬柳蛋」，但係由於「蛋」同「強」嘅速成輸入法兩個碼一樣，有時網民會打錯咗字變咗做「豬柳強」，久而久之『豬柳強』就變成豬柳蛋漢堡嘅一個外號。^[6]^[7]
魚柳Bell：其實係魚柳飽，英文Bell同廣東話「飽」嘅發音好接近，另外魚柳飽餐亦會變成「魚柳Bell Chan」。^[6]
黑旋風：其實係指麥旋風，但由於黑旋風嘅廣告喺香港太深入民心，所以有啲人會噏錯。^[6]
冒險樂園餐：其實係開心樂園餐，不過有啲人會噏錯。^[6]
脆弱雞腿包：其實係脆辣雞腿包，不過有啲人會噏錯。^[6]
孖芝：其實係指雙層芝士孖寶，但係為咗減少字數而縮寫，後嚟連麥當勞自己都有用呢個稱號做宣傳。^[6]

肥，冇均衡營養，加有防腐劑。^{[未記出處或冇根據]}

造好多垃圾，嚴重污染環境，唔環保。^{[未記出處或冇根據]}

↑ 〈【娛樂人物】係咪我啲作品有問題？AGA ｜蘋果日報〉。《Apple Daily 蘋果日報》 (香港中文)。原先內容歸檔喺2021-02-12。喺2021-01-05搵到。
↑ Tally (2019-05-14)。〈被封為快餐店駐場歌手 Gin Lee和AGA的這些歌你聽過了沒？〉。Idea HK Magazine。原先內容歸檔喺2021-02-12。喺2021-01-05搵到。
↑ Cheung, Kay。〈一聽就好似去咗麥當勞！麥當勞歌邊首最洗腦？ | 港生活 - 尋找香港好去處〉。《HK 港生活》 (香港中文)。原先內容歸檔喺2021-02-12。喺2021-01-05搵到。
↑ 〈隔牆有耳：靚女MV谷7.1 - 李八方｜蘋果日報〉。《Apple Daily 蘋果日報》 (香港中文)。原先內容歸檔喺2021-02-12。喺2021-01-05搵到。
↑ 〈七一．三點半香港人．勿當奴〉。《FM1028 民間電台網誌》 (臺灣中文)。2009-06-30。原先內容歸檔喺2016-10-11。喺2021-01-05搵到。
↑ ^6.0 ^6.1 ^6.2 ^6.3 ^6.4 ^6.5 愛Pepe三千 (2021-01-02)。〈「魚柳Bell」源於血案？點解叫「豬柳強」？港人才懂6種老麥叫法｜好食玩飛〉。《香港01》 (香港中文)。原先內容歸檔喺2021-02-12。喺2021-01-05搵到。
↑ 〈高登術語大挑戰你識幾多個？ - 香港經濟日報 - TOPick - 文章 - 休閒〉。topick.hket.com。原先內容歸檔喺2020-10-26。喺2021-01-05搵到。