黃沙水產交易市場

出自維基百科,自由嘅百科全書
Jump to navigation Jump to search
黃沙水產交易市場

 黃沙水產交易市場粵拼wong5 saa1 seoi2 caan2 gaau1 jik6 si5 coeng4 (注意「黃」字有地名變音,讀「簧」;英文Wongsha Aquatics Product Market),簡稱黃沙水產市場,係廣東廣州一專業批發市場,1994年7月16號開業,喺荔灣區黃沙大道西豬欄路(珠江白鵞潭北邊河邊,舊時廣州南站隔籬同黃沙碼頭之間)。有做水產批發、零售、餐飲呢啲嘢。

佢既係中國大陸三大水產批發市場之一,又係中國大陸最大嘅鮮活水產品批發市場,亦係華南地區最大嘅水產市場[1]

[編輯]

1990年代呢度係廣州新風港嘅碼頭,維持著新風港務公司2000幾個工友嘅生計,但當其時航運業務慢慢萎縮,工友面臨失業。1994年,有人建議搞水產批發市場開闢新路,新風港務公司做咗啲分析後,定咗做市場。喺同年嘅7月16號,喺黃沙碼頭西側劃出3000方嘅地皮,搞批發市場[2]。最早入場嘅係喺海印南呢啲地頭嘅天光墟擺檔嘅商販,搬入咗港口倉庫改造嘅簡易棚仔檔口,後期起咗水產大樓改進咗檔口環境[3]。喺2013年開始,附近陸續開咗8間海鮮酒樓,可即劏即整市場度嘅海鮮。

概況[編輯]

市場入邊有大小商戶大概400個,貨源來自大陸各地同世界廿幾個國家,有200幾個品種,包括魚蝦蟹貝等,仲有澳洲龍蝦、冰島生蠔、挪威三文魚等,每日成交金額有成2000萬,每日貨品成交有成500噸[4]。附設碼頭可同時停泊3000噸、300噸、100噸位嘅船幾十條倒。市場檔主據話多係潮汕同客家人,随著市場做大生意,大交易嘅都轉去隔離嘅如意坊新風中轉站做[5]

搬遷[編輯]

廣州市政府諗著搞「退二進三」,計劃再喺市區整地產,喺2006年五湖四海集團就同番禺嘅洛溪村簽落20年嘅租約,入手村嘅15萬方嘅舊廠地,準備搞畀政府計劃搬出黄沙嘅批發市場[6]。而預計一旦子市場搬遷會影響超過10萬業者嘅生計。由2007年開始,一路搞計劃搬市場,圍繞著原址嘅開發計劃、市場重新安置等問題,市場、檔主同政府僵持多年,而開初計劃接收嘅五湖四海水產市場經轉為漁人碼頭[7]

市場主理陳智勇話,市場搬咗去芳村嘅話,市場會慢慢流失客流人氣同冇曬聲氣,認為靠簡單行政指令係搞唔返一個一樣嘅市場嘅[8],街坊同檔主亦都唔贊成搬遷計劃。喺2015年5月19號荔灣區綜合行政執法局派員,開著勾機去拆市場西邊同南邊沿江嘅31個檔口,引起外界再次關注市場可能搬遷,執法隊同商户一度僵持[9]。嗰時政府預想搬市場嘅三個新候選地點係芳村嘅龍溪、東沙碼頭同東洛圍[10]

2018年8月10號,廣州市規劃局控規修訂向公眾徵詢,諗著將市場搬到芳村東南邊嘅沙洛片區,即係當局至尾揀咗東洛圍(原廣州造船廠隔籬)[11]

[編輯]

連出去[編輯]