第56屆英國下議院選舉
第56屆英國下議院選舉
| |||||||||||
|---|---|---|---|---|---|---|---|---|---|---|---|
‹ 2010 •  • 2017 ›
| |||||||||||
| 2015年5月7號 | |||||||||||
| 選舉類型 | 下議院 | ||||||||||
| 議席數目 | 650 | ||||||||||
| 選舉席次 | 650 | ||||||||||
| 選舉統計 | |||||||||||
| 總投票數 | 46,425,386 | ||||||||||
總投票百分比
| |||||||||||
| 66.1% ▲ 1% | |||||||||||
|
|
卡梅倫－保守黨 | ||||||||||
| 投票數 | 11,334,920 | ||||||||||
| 獲得議席 | 331 ▲ 25 | ||||||||||
| 36.9% | |||||||||||
|
|
文立彬－工黨 | ||||||||||
| 投票數 | 9,344,328 | ||||||||||
| 獲得議席 | 232 ▼ 26 | ||||||||||
| 30.5% | |||||||||||
|
|
尼古拉·斯特金－ 蘇格蘭民族黨
| ||||||||||
| 投票數 | 1,454,436 | ||||||||||
| 獲得議席 | 56 ▲ 50 | ||||||||||
| 4.8% | |||||||||||
|
|
紀理歷－自由民主黨 | ||||||||||
| 投票數 | 2,415,888 | ||||||||||
| 獲得議席 | 8 ▼ 49 | ||||||||||
| 7.9% | |||||||||||
|
|
彼德·羅賓遜－民主統一黨 | ||||||||||
| 投票數 | 184,260 | ||||||||||
| 獲得議席 | 8 ▬ 0 | ||||||||||
| 1.2% | |||||||||||
|
|
奈傑爾·法拉奇－英國獨立黨 | ||||||||||
| 投票數 | 3,881,129 | ||||||||||
| 獲得議席 | 1 ▲ 1 | ||||||||||
| 12.6% | |||||||||||
| 政黨議席分佈圖 | |||||||||||
| |||||||||||
331 保守黨
56 蘇格蘭民族黨
8 民主統一黨
|
232 工黨
8 自由民主黨
1 英國獨立黨
| ||||||||||
 英國首相 | |||||||||||
.jpg)
第56屆英國下議院選舉喺2015年5月7號舉行[1]。呢次選舉除咗將改選英國下議院冚棒冷議席之外，亦會搞埋地方選舉。選舉制度改革係呢次選舉嘅焦點之一。現任嘅保守黨政府本身計劃將下議院議席減到六百席，同時間自由民主黨亦要求喺國會選舉入面加埋比例代表制，但係由於法律重未修改，所以選舉制度改革亦被推遲。
估計大選之後嘅英國政局都係充滿變數。選民對前景有唔同睇法。有選民話：「我哋而家開始走出經濟緊縮，但係嚟緊五年都係要一個啱心水嘅政府。」亦有選民話：「因為選情太緊湊，如果我唔出嚟投票，攞唔到我想要嘅結果，到時我只可以怪自己。」[2]
由於今屆選舉選情緊湊，有唔少關鍵戰場，包括保守黨多個喺2010年只係險勝嘅地區，好似北沃里克同南里布爾，工黨都有機會由保守黨手上攞返。但係工黨選情都有隱憂，好似前首相白高敦喺2010年成功幫工黨保住嘅柯科迪同考登比斯選區，今屆如果被蘇格蘭民族黨攞咗，就意味著蘇格蘭選區版圖可能改寫[2]。
另外，今屆選舉亦值得留意嘅重有自由民主黨黨魁克萊格所屬嘅錫菲爾德哈拉姆選區，由於自民黨聲勢插水，佢保唔保得住自己嘅議席都成問題[2]。
今屆選舉峰迴路轉，結果係保守黨攞到過半數議席輕鬆打低工黨贏出，而選舉之前同保守黨打成五五波嘅工黨就比五年前嘅大選冇咗好多個議席，至於蘇格蘭民族黨就成為大贏家由六席一變去到五十六席。有英國傳媒分析，可能係象徵聯合王國走向終結[3]。
背景
[編輯]今屆英國大選被人認為係近十年嚟當地難得一見嘅緊湊選戰，全英國有約四千五百萬名選民可以投票，而上屆投票率有百分之六十五，今屆由差唔多四千個候選人去爭全國六百五十個下議院議席，所以「贏出指數」就係三二六，即係啱啱夠過半數席位[4]。
2014年5月，英國獨立黨喺歐洲議會選舉入面贏出，做咗歐洲議會英國選區入面嘅最大黨，現家搞民調得出重超越自由民主黨將會做埋第三大黨嘅資格，極有可能係呢屆選舉入面嘅黑馬。另外，蘇格蘭國家黨、英國綠黨、威爾斯黨都有實力攞到更多議席令到選舉更加難估。文立彬領導嘅工黨亦可能趁保守黨同自民黨支持率下滑嘅時候重新攞返執政權。而執政聯盟喺蘇格蘭獨立公投入面驚險咁保住蘇格蘭之後，亦希望喺呢次選舉入面贏出繼續執政，同時亦係民意支持度上止咳。
2015年3月30號，由於英國法律規定，首相要喺選舉之前廿五個工作日向英國君主提出解散國會。卡梅倫中午覲見英女王伊麗莎白二世，呢次見面係卡梅倫最後一次以首相身份見女王，然後宣佈執政五年嘅聯合政府解散重新大選。首相卡梅倫話英國正喺「正確嘅軌道上面」，如果畀工黨執政，將會帶嚟「經濟混亂」。而英國工黨領袖文立杉就話，保守黨會令到英國企業面臨「危險」。佢向公眾講，話現任首相承諾將英國係唔係繼續留喺歐盟而搞公投，會令到英國有風險搞到影響力降低[5]。
候選人
[編輯]今次大選有十一個華裔人士參選，係歷屆最多。其中保守黨嘅麥大粒被人認為勝算好高，三十一歲嘅麥大粒喺英國約克郡出世，父母喺七十年代由香港移民到英國，佢做過律師，而家做緊自己嘅事業，今次喺向來係屬於保守黨票倉嘅漢普郡哈文特選區出戰[6]。
另外兩個工黨華裔女候選人都有機會攞到議席[6]。
英國從來冇華人贏出做到國會下議院議員，如果今次有華裔候選人贏出，將會改寫英國華人參政嘅歷史[6]。
議題
[編輯]保守黨話事人卡梅倫用刀叉食熱狗被人話太「上等人」
[編輯]2015年4月9號，距離大選重有一個月，爭取再做首相嘅卡梅倫被人影到用刀叉食熱狗，有輿論話佢同埋執政保守黨都好難撇甩佢哋係代表上流社會嘅形象[7]。
想繼續做首相嘅卡梅倫早幾日暫時擺低大選包袱，到多實同親戚朋友食下嘢，喺陽光下燒烤、飲啤酒，不過呢一幕就成為咗焦點[7]。
卡梅倫同同枱嘅人一樣，拎起刀叉食熱狗。佢隨即被人話佢係太「上等人」。卡梅倫領導嘅保守黨過去就成日被人話太「離地」，幫唔到社會基層出聲，今次用刀叉食熱狗又惹嚟爭議，但係卡梅倫話，自己係老豆老母同學校嘅悉心栽培之下長大，強調唔會為咗選票，故意掩飾又或者改變自己日常行為[7]。
英國傳媒成日都好鍾意拎政客嘅食相嚟大造文章，好似卡梅倫嘅對手工黨黨魁文立彬，上年就被人影低佢用手食煙肉三文治嘅猥瑣樣，有意見就話今次卡梅倫用刀叉食熱狗，可能係為咗避免同樣嘅事發生[7]。
經濟同房屋問題
[編輯]今次英國大選，經濟同房屋都係焦點嘅議題。隨著當地樓價急升，保守黨同工黨都有政策幫後生仔買樓。分析認為房屋政綱能唔能夠成功爭取到游離選民嘅支持，變咗各黨贏輸關鍵[8]。
英國後生一代對想買樓但係上車難都有深刻感受。單係睇倫敦嘅上車盤，平均樓價就要三十八萬英鎊，假設做九成按揭，貸款同人工比率係四點五倍去計，年收入要有七萬七千英鎊先買得起。但係上年嘅數據倫敦人平均一年嘅人工只有大約二萬八千英鎊；如果以全英國所有地區平均去計，年薪都要有成四萬鎊先可以上車，但係英國人平均年薪只有二萬二千英鎊[8]。
今次英國大選，房屋政策係其中一大「戰場」，無論保守黨定係工黨都有唔少呢類政綱，希望能夠「投選民所好」，攞到支持；其中保守黨就提出加建二十萬個單位，幫年輕人首次買樓，並且宣布擴大之前搞過由前首相戴卓爾夫人率先提出嘅《租客置業計劃》；英國首相卡梅倫話：「你咁辛苦做嘢，你咁努力草錢，你居緊嘅屋，係應該畀你買到、攞到係手嘅，擁有民主置業夢返生，我哋會幫你達成。」喺新計劃之下，而家租緊公共房屋嘅草根家庭可以有高折扣去買佢住緊嘅單位，大約有一百三十萬個家庭受惠。至於工黨就承諾唔使畀首次買樓印花稅，對象係買三十萬英鎊或樓下物業嘅首次買樓人士；如果政策能夠喺出年落實，三年入面預計有七十萬個首次買樓人士受惠，即係超過九成人受惠。工黨又計劃，如果上台執政，五年之內會陸續開始所有工程，起一百萬個單位出嚟；亦諗緊推行「英人英地」政策，令本地居民比海外買家優先買樓，並且增加對海外投資者嘅買樓徵稅，保障本地人嘅利益[8]。
分析認為今屆大選比過往更加聚焦英國國內議題，特別係經濟政策；喺選情激烈嘅情況下，政黨要拉票政綱就要大篇幅落係樓市政策到，期望能力爭取特別係游離選民嘅支持，因為咁樣可能會成為政黨贏輸關鍵[8]。
民意調查
[編輯]
2015年4月9號，英國廣播公司最新民調話，執政保守黨同在野工黨支持度都係差唔多，只係輕微差咗一個百分點，呢屆選舉係近年被人話最難估邊面會贏嘅其中一場選舉。分析估計兩黨都好難攞到組閣用到嘅大多數席數，嚟緊五年英國好有可能繼續要組成聯合政府嚟執政[7]。
選前民調話，無論係執政保守黨定係在野工黨都攞唔到過半數議席，會同上屆選舉一樣，會出現「懸峙國會」嘅局面要籌組聯合政府先可以執政，好多個細黨都有機會左右局面，成為「造王者」；咁多個細黨入面，蘇格蘭民族黨嘅選情就最被人睇好，議席可能由而家嘅六席大幅急升到五十席；而同保守黨聯合執政嘅自由民主黨，支持度比上屆選舉大幅插水，但係都有機會可能會拉攏合組成聯合政府，呢場選舉被人形容成近四十年嚟最難估嘅選舉[2]。
票站
[編輯]
全英國設咗四萬三千個票站左右，唔同類型都有，除咗常見嘅學校、社區中心，教堂之外、連寺廟之類都成為票站；另外一啲票站就起喺足球、板球同乒乓球之類嘅場地入面，有鄉下地方嘅票站甚至起喺酒吧入面；不過，做得票站一定要符合一啲基本條件就係場地要方便易記，亦可以保障私隱；不過，而家流行興自拍，雖然英國嘅選舉法冇明文禁制，但係選舉當局提醒選民，唔鼓勵佢哋喺票站咁做[4]。
拉票
[編輯]保守黨
[編輯]最後拉票時刻，領導保守黨嘅現任首相卡梅倫打出「勞工牌」，又打「親民牌」，爭取支持。卡梅倫強調過去五年嘅執政成果尤其喺經濟方面，呼籲選民唔好做「被自己後悔嘅事」。佢又話：「我哋要喺過去五年嘅基礎上起嘢，定係返翻原點，嘥咗之前一切犧牲同付出。你希望我繼續帶住國家向前，定係被文立彬同你返翻起點，嘥咗過去五年嚟所做嘅嘢。」[6]
工黨
[編輯]在野工黨黨魁文立彬同樣集中博基層支持，佢話今次大選係被「打工仔」揀佢哋真正要嘅政府。佢呼籲：「已經五年，英國只係為有錢同最有權勢嘅人做嘢，但係聽日（7號）就係你嘅大日子，用你手上嘅一票，將你嘅選票投畀工黨，畀我哋攜手建設國家，再一次為勞動階層服務。」 [6]
自由民主黨
[編輯]至於選情落後嘅自由民主黨，就繼續打「中間牌」，話應該將國家利益攞係政黨上面，承諾喺政府入面起到穩定作用[6]。
結果
[編輯]| 政黨 | 黨領袖 | 攞到選票 | 攞到席數 | |||
| 保守黨 | 卡梅倫 | 11,334,920（36.9%） | 331（50.9%） | 331 / 650
| ||
| 工黨 | 文立彬 | 9,344,328（30.4%） | 232（35.7%） | 232 / 650
| ||
| 英國獨立黨 | 奈傑爾·法拉奇 | 3,881,129（12.6%） | 1（0.2%） | 1 / 650
| ||
| 自由民主黨 | 克萊格 | 2,415,888（7.9%） | 8 (1.2%) | 8 / 650
| ||
| 蘇格蘭民族黨 | 尼古拉·斯特金 | 1,454,436（4.7%） | 56（8.6%） | 56 / 650
| ||
| 綠黨 | 娜塔莉·本內特 | 1,154,562（3.8%） | 1（0.2%） | 1 / 650
| ||
| 民主統一黨 | 彼德·羅賓遜 | 184,260（0.6%） | 8（1.2%） | 8 / 650
| ||
| 威爾士黨 | 莉安·伍德 | 181,694（0.6%） | 3（0.5%） | 3 / 650
| ||
| 新芬黨 | 蓋瑞·亞當斯 | 176,232（0.6%） | 4（0.6%） | 4 / 650
| ||
| 阿爾斯特統一黨 | 麥克·內斯比特 | 114,935（0.4%） | 2（0.3%） | 2 / 650
| ||
| 社會民主工黨 | 阿拉斯戴爾·麥克唐納 | 99,809（0.3%） | 3（0.5%） | 3 / 650
| ||
| 其他政黨 | 冇 | 349,487（1.1%） | 1（0.2%） | 1 / 650
| ||
組成
[編輯]| 331 | 232 | 56 | |||
| 保守黨 | 工黨 | 蘇格蘭民族黨 | 其他政黨 | ||
分析
[編輯]保守黨
[編輯]英國大選，執政保守黨贏出，攞到國會過半數議席，可以單獨執政，首相卡梅倫會籌組新政府。分析認為，游離選民嘅支持係保守黨最後能夠贏出嘅關鍵。首相卡梅倫從2010年執政以嚟，就面對歐洲多國都不斷咁陷入債務危機。雖然推出緊縮措施惹嚟唔少批評，但係就令到英國經濟保持增長，更成為游離選民係最後一刻投畀保守黨嘅重大因素[3]。
今次選舉保守黨居然贏出，會繼續執掌唐寧街十號嘅保守黨黨魁兼首相卡梅倫。當日中午就去到白金漢宮覲見英女王伊利沙伯二世，獲得授權籌組新政府。由於保守黨攞到國會過半數議席，可以單獨執政，而唔使聯合其他政黨。卡梅倫係翻返首相府之後強調要令英國更加團結。卡梅倫話，佢會領導住呢個黨，作為一個國家，一個英國，確保成個國家復蘇：「由北至南、東至西，更意味要重整我哋嘅經濟。」卡梅倫同時宣布會推動公投決定係唔係退出歐盟，並指會跟返選前承諾會盡快下放更多權力畀蘇格蘭[9]。
第一位華裔議員
[編輯]至於喺香港第二代移民去英國嘅保守黨麥大粒喺選區度贏出，成為英國國會下議院第一位華裔議員，創造當地華人參政歷史[10]。
麥大粒話：「我認為議員嘅角色應該係堅定、勤奮嘅地區領袖，幫哈文特選區民眾喺國家入面出聲[10]。」
保守黨嘅麥大粒喺英格蘭南部漢普郡嘅哈文特選區，以超過五成嘅得票率，大贏其他對手，歷史性成為國會下議院第一位華裔議員[10]。
佢話期待幫選區居民辛勤工作，正如佢喺競選宣傳片度承諾嘅一樣：「我幫居企做鋪頭仔嘅嘢超過十年，我出生同長大都係喺約克郡[10]。」
三十一歲嘅麥大粒喺英國約克郡出世，父母係七十年代由香港移居英國。佢係劍橋大學法律系畢業，而且喺牛津大學攞到碩士，畢業之後做過律師。佢贏出選舉之後接受英國廣播公司專訪，報道話麥大粒，似乎唔願意強調自己華裔嘅背景，更話自己唔識講中文[10]。
有英國嘅華人政治組織歡迎麥大粒贏出，認為可以改善英國華人嘅待遇。英國華人參政計劃顧問胡沛成就話：「麥大粒以華人身份，佢將會對中英問題有特別睇法。相信上任之後，政府高層會好重視佢嘅意見。」不過除麥大粒之外，其餘十個華裔候選人都輸咗[10]。
英國宜家有成五十萬華人，佔全國六千四百萬人口唔夠百分之一。報道話，英國華人多數係香港移民，七十年代開始移民入嚟。但係第一代華人移民普遍對政治冷感，直至到幾十年後嘅第二代人大咗，對政治嘅冷漠開始解凍。吸引更多人投身政治活動，為當地華人出聲[10]。
隨著英國華人影響力愈嚟愈大，保守黨、工黨等主要政黨都成立華人支部。另外好似華人參政計劃之類組織，發起幫華人登記做選民之類嘅活動，鼓勵佢哋參加投票，嚟壯大華裔候選人嘅票源[10]。
工黨
[編輯]今次選舉作為主要反對黨嘅工黨遭受到重挫，選情比上屆大選更差，輸咗超過廿個議席畀蘇格蘭民族黨。文立彬就為工黨輸咗而辭任黨魁。佢表示，對呢場選舉唔能夠贏出衷心咁感到遺憾：「我喺呢五年入面已經盡咗力，而家你哋要展現出承擔，你哋嘅責任唔係為咗挫敗而悲痛，而係振作而且繼續戰鬥，我哋之前曾經東山再起，呢個黨一定會捲土重來[9]。」
唔少評論認為，蘇格蘭民族黨崛起係令到保守黨贏出，工黨慘敗嘅重要原因。卡梅倫曾經強調過：「選戰進入倒數時刻，你哋能夠造就所有唔同嘅可能，嚟畀我哋嘅國家前進。又唔係跟文立彬同蘇格蘭民族黨共同倒退，呢個就係重點所在[3]。」
而卡梅倫選前就將工黨同蘇格蘭民族黨綁埋一齊，話工黨同蘇格蘭民族黨合作，最終會令英國走向分裂。所以唔少選民都因為咁而希望透過支持保守黨，可以抵抗蘇格蘭民族黨嘅分離主義。結果工黨痛失蘇格蘭呢個傳統票倉。蘇格蘭民族黨嘅議席，亦由2010年嘅六席好似坐火箭咁升到五十六席，而贏返嚟嘅大多數議席都係從工黨手中搶走[3]。
最注目一仗就係喺佩斯里同南倫弗魯郡，由嚟自蘇格蘭民族黨廿歲嘅布萊克，砌低四十七歲嘅工黨外交事務發言人亞歷山大，成為超過三個世紀以嚟英國最後生嘅下議院議員。布萊克曾經話：「蘇格蘭人而家為自己出聲，呢個時候係畀西敏寺聽到佢哋嘅聲音[3]。」
自由民主黨
[編輯]自由民主黨黨就喺選舉之後議席插水，黨魁克萊格就為輸咗選舉而辭職，佢話一直都估今次嘅選舉對自民黨係好困難，「但係結果係超乎想像嘅摧毀同殘酷，我哋一定要承擔責任，辭去黨魁職務[9]。」
蘇格蘭民族黨
[編輯]蘇格蘭民族黨掃晒工黨嘅票倉攞到壓倒性勝利，做咗國會第三大黨[3]。
蘇格蘭民族黨前黨魁薩蒙德就形容，蘇格蘭呢隻獅子嘅叫聲已經傳晒成個英國。有英國傳媒甚至分析話，蘇格蘭民族黨會吃住嗰勢再推多次獨立公投，今次選舉可能就係聯合王國開始走向終結。蘇格蘭民族黨黨魁斯特金話呢個講法重早，話佢哋係幫所有蘇格蘭民眾服務，而唔係只幫支持獨立嘅人[3]。
分析相信，蘇格蘭民族黨成為下議院第三大黨之後喺下議院度有更加多話語權。可以影響國防、財政同外交等政策，亦可以用嚟做推動獨立公投嘅籌碼，向政府爭取蘇格蘭更多更大嘅自主權[3]。
組閣
[編輯]由於英國保守黨勝出大選，可以獨立執政，而成功連任嘅首相卡梅倫隨即籌組新政府。多嗰現任閣員都留任，包括財相歐思邦、內政大臣文翠珊、外相夏文達同國防大臣房應麟。其中歐思邦會喺內閣扮演更重要嘅角色，會兼任埋首席大臣，地位僅次喺首相，即係相等於副首相。預計下個禮拜會公布晒所有內閣成員人選[11]。
四十三歲嘅歐思邦喺卡梅倫過去五年任期入面擔任財相，推動英國經濟喺金融海嘯後嘅經濟復蘇。嚟緊五年會繼續掌管英國公共財政，由於保守黨單獨執政，唔使再穩其他政黨組成聯合政府，即係可以自己話晒事，唔使再睇盟友頭，自由度會更高。預計歐思邦重會喺新政府度肩負住另一個重任，就是喺公投決定係唔係退出歐盟之前幫英國喺歐盟爭取攞到更多權益[11]。
另外，倫敦市長約翰遜喺今次大選翻返議會，外界關注，呢位保守黨嘅「政治明星」，喺新內閣入面做咩嘢角色[11]。
攷
[編輯]- ↑ （英文）"General election timetable 2015". Parliament.uk. 喺30 June 2014搵到.
- ↑ 2.0 2.1 2.2 2.3 （繁體中文）英大選選情緊湊 細小政黨有機會成造王者 互聯網檔案館嘅歸檔，歸檔日期2015年5月11號，.
- ↑ 3.0 3.1 3.2 3.3 3.4 3.5 3.6 3.7 （繁體中文）拆局：英大選結果象徵聯合王國或步向終結 互聯網檔案館嘅歸檔，歸檔日期2015年5月11號，.
- ↑ 4.0 4.1 （繁體中文）本屆英大選乃緊湊選戰 全國設逾四萬投票站 互聯網檔案館嘅歸檔，歸檔日期2015年5月11號，.
- ↑ （繁體中文）卡梅倫解散議會揭開英國大選序幕
- ↑ 6.0 6.1 6.2 6.3 6.4 6.5 （繁體中文）英大選開始投票 料無單一政黨贏過半議席 互聯網檔案館嘅歸檔，歸檔日期2015年5月11號，.
- ↑ 7.0 7.1 7.2 7.3 7.4 （繁體中文）英揆卡梅倫以刀叉吃熱狗被批太「上等人」 互聯網檔案館嘅歸檔，歸檔日期2015年7月8號，.
- ↑ 8.0 8.1 8.2 8.3 （繁體中文）拆局：爭游離選民支持 英政黨聚焦樓市政策 互聯網檔案館嘅歸檔，歸檔日期2015年5月9號，.
- ↑ 9.0 9.1 9.2 （繁體中文）英保守黨勝出可單獨執政 卡梅倫：更團結 互聯網檔案館嘅歸檔，歸檔日期2015年5月11號，.
- ↑ 10.0 10.1 10.2 10.3 10.4 10.5 10.6 10.7 （繁體中文）麥大粒成首位華裔下議院議員 華人參政提高 互聯網檔案館嘅歸檔，歸檔日期2015年5月11號，.
- ↑ 11.0 11.1 11.2 （繁體中文）英保守黨勝選 卡梅倫著手籌組新政府 互聯網檔案館嘅歸檔，歸檔日期2015年5月11號，.
