M+博物館

出自維基百科,自由嘅百科全書
跳去導覽 跳去搵嘢
M+博物館

M+博物館香港一間起緊嘅視覺文化博物館,喺西九龍西九文化區,重點展出20至21世紀嘅藝術、設計、建築同影像,首階段工程預計喺2020年第二季竣工,博物館預計喺九個月至一年後開幕。

關於M+[編輯]

M+係香港嶄新嘅視覺文化博物館,同時係西九文化區項目之中嘅一塊重要基石,囊括20至21世紀來自香港、中國內地、亞洲以至全世界嘅視覺藝術、設計、建築同流動影像。

M+位處於全球最有活力嘅地區之一,旨在愈加交互連繫於全球狀態之中,為視覺文化記錄過去、透視現狀、貢獻未來。M+將採跨領域嘅出發點,同時挑戰亦尊重既定界別之間嘅規限,為唔同嘅看法、敍述同觀眾建立交會點。

M+博物館大樓由Herzog & de Meuron,聯同香港TFP Farrells同香港奧雅納工程顧問公司共同設計,預計喺2021年對外開放。M+自2012年開始,即推動各類型嘅公眾項目同展覽,同埋建立永久館藏。

M+大樓[編輯]

經過全球性比賽,M+大樓將由世界知名嘅瑞士建築師事務所Herzog & de Meuron,聯同香港TFP Farrells同香港奧雅納工程顧問公司合作設計。預計喺2021年對外開放、佔地六萬平方米嘅M+大樓,將坐擁維多利亞港景致,成為與眾不同嘅地標式建築。

外型修長、設計開揚通透嘅豎向板樓,配備教學、辦公室同餐飲設施,聳立於設有多個展館嘅水平展廳之上。大樓低層就會連接平台花園同區內其他設施,並設有公共資源中心、劇院、購物區、餐廳同後勤區。以倫敦泰特現代美術館、北京國家體育館(「鳥巢」)同其他著名建築設計項目享負盛名嘅Herzog & de Meuron建築師事務所,靈活運用M+選址嘅特色,喺現有嘅機場快線隧道旁邊,開闢出寬敞嘅大型地下展區「Found Space」,成為主宰整個M+項目嘅關鍵。

爭議事件[編輯]

被親中派媒體狙擊[編輯]

2021年3月,中聯辦控制嘅《大公報》同《文匯報》多次報道批評西九文化區 M+ 博物館,質疑佢哋一啲藏品違犯《國安法》,又話佢哋唔少藏品意識不良。有部份親中派人士亦附和兩報說法,話M+ 博物館唔尊重道德價值[1]

部分被指違反國安法嘅作品,包括美籍華裔攝影師劉香成有關六四嘅攝影作品、中國異見藝術家艾未未天安門舉中指嘅作品等。M+表明,無論籌劃展覽或發展藏品,博物館都係以研究為基礎,以嚴謹嘅學術精神為原則[1]

另外,親中派傳媒人屈穎妍亦有發表文章參與批鬥,但係提及嘅各樣資料都被發現錯誤,包括收藏家嘅背景、董事局成員名單等[2]。佢俾公民黨前立法會議員陳家洛形容係搞港式文革[3]

參考[編輯]

  1. 1.0 1.1 "【香港文革】大公文匯續批鬥 M+ 斥亂買「偽術品」醜化國家領導人、充斥裸照 馬逢國附和:需尊重道德價值 | 立場報道 | 立場新聞". 立場新聞 Stand News (英文). 喺2021-03-21搵到.
  2. "屈穎妍《大公》專欄 批鬥 M+ 博物館藏品文章錯處多 | 立場報道 | 立場新聞". 立場新聞 Stand News (英文). 喺2021-03-25搵到.
  3. "Chan Ka Lok 陳家洛". Facebook (英文). 喺2021-03-25搵到.

出面網頁[編輯]