SOLID

SOLID 係軟件工程上嘅五條原則，個名取自嗰五條原則嘅開頭字母。SOLID 由美國軟件工程師羅拔·C·馬田（Robert C. Martin）喺 2000 年提出，旨在令電腦程式嘅設計（以至軟件工程）變得更加：

• 有彈性－通常一個程式喺搞掂之後，設計者仲會想做啲擴充或者加修補程式。
• 強韌－有時一個程式可能有彈性易改，但一改就勁出錯，「強韌」意思就係打後嘅修改唔會令個程式出一大柞錯。
• 流動－即係呢個程式搞掂咗之後，設計者有得攞佢某啲部份返用，例如有個子程序，要依賴好多原本嗰個程式嘅其他部份先行到，呢個子程式會難返用。
• 無粘性－即係喺打後改個程式嗰陣，依然可以保留到原先嗰個設計。

以上呢啲問題傾向係（直接間接）因為依賴性（dependency）而起嘅：想像一個程式 A，有個子程序 S，如果 S 一定要 A 嘅某啲部份先行得到（有依賴性），噉個設計師想改個程式嗰陣就比較會有難度（一改咗某個部份，就搞到 S 行唔到或者行起上嚟出錯），而且想攞 S 去第個程式嗰度用嗰陣又撈絞（第啲程式未必有 S 依賴嘅部份），所以 SOLID 嗰五條原則主要集中於控制一個程式嘅依賴性問題。

五大原則內容

• S：單一功能原則（Single responsibility principle）：每個物件都應該得一個單一嘅功能；一個物件多功能嘅話，佢就會有需要成日修改，出錯嘅機會就增加。
• O：開閉原則（Open Closed Principle）：一個子程式應該要容易擴張，但唔易修改；幫一個子程式加料嗰陣，佢嘅基本功能要不變。
• L：里氏替換原則（Liskov Substitution principle）：一個程式入面嘅物件應該要容易用同一子類嘅嘢替換，而個程式嘅正確性不變。
• I：介面隔離原則（Interface-segregation principles）：多個特定客戶端介面好過一個寬泛用途嘅介面；一個子程序多嘢要改嗰陣就麻煩。
• D：依賴反轉原則（Dependency inversion principle）：一個子程式應該依賴於抽象而唔係實例。

睇埋

• 物件導向程式編寫
• 軟件工程

參考

• Robert C. Martin (2000). "Design Principles and Design Patterns" (PDF). objectmentor.com.