可行度研究

可行度研究（英文：feasibility study）係工程學同項目管理上嘅一個工序，係指諗清楚想開發嗰隻產品要有乜嘢功能之後，決定個項目係咪真係有得搞：好多時，啲客對於技術方面嘅嘢都唔係咁熟，會提出一啲冇可能達得到嘅要求；又或者係產品設計師想整一啲有返咁上下嶄新嘅功能，同時又因為呢啲功能嶄新得滯，唔肯定係咪真係有可能整到出嚟；可行度研究就係指攞住手上嗰啲已知嘅要求，做一大輪嘅分析，再決定隻產品係咪真係有可能整得成。

可行度研究嘅過程會同時用到技術同經濟方面嘅考量－一個開發計劃如果過唔到可行度研究，可以係因為現有嘅技術做唔到啲需求，亦都可以係因為現時嘅技術係就係做到啲需求，但要用嘅成本極高，負責做呢個開發計劃嘅單位唔肯揼咁多本去做。

TELOS

可行度研究最常會考慮嘅因素有以下呢啲，英文興嗌呢五大考量做 TELOS（嚟自嗰五個因素分別嘅開頭英文字母）：

1. T－Technical（技術）：隻預想中嘅產品用現時嘅技術有冇可能整到出嚟？
2. E－Economic（經濟）：隻預想中嘅產品要使幾多成本？會唔會帶嚟利潤？
3. L－Legal（法律）：隻預想中嘅產品會唔會犯法？
4. O－Operational（運作）：預想中隻產品有幾能夠配合到周圍嘅環境？
5. S－Scheduling（時程）：預想中隻產品可唔可以喺限時之內搞掂？

度好嗮覺得個計劃整得過，啲工程師先會郁手做設計。