Wikipedia:是日正文/2024年1月
灰狼，通常就噉簡稱狼，係一種源於歐亞大陸同北美洲嘅大型犬科動物，分佈喺歐亞同北美嘅溫帶地區，包括咗 38 個次物種。狼外形上嘅特徵包括咗以下呢啲：佢哋嘅耳仔同口鼻冇多數犬科動物咁尖，冬天會生一啲又長又濃密嘅毛，啲毛多數以灰色為主（所以個名就叫「灰狼」），不過都有狼係啲毛以白、紅同黑等為主色嘅。除咗噉，狼仲係現存犬科動物當中最大隻嘅：成年嘅狼公平均有 43 至 45 公斤（95 至 99 磅）重，而成年嘅狼乸就平均有 36 至 38.5 公斤（79 至 85 磅）咁重。
狼係犬屬動物裏面最專化嘅物種，位於食物鏈嘅頂層：狼相當強壯，能夠撞擊大隻嘅獵物同輕易噉制伏細隻過佢哋嘅動物；狼仲有高度嘅智能同社會性，佢哋有能力同同類溝通，一對對或者一家人（阿爸阿媽同啲仔女）噉樣行動，而且仲曉為咗獵食大型動物而同第啲羣嘅狼合作，彼此之間可以互相協調，作出高度組織化同事先計劃過嘅獵食行動，所以有能力獵食一啲大隻過佢哋一截嘅大型有蹄類動物，好似係駝鹿噉（成年駝鹿身長閒閒地係狼嘅兩倍），又可以輕易噉捉啲細隻嘅動物（例如係兔仔）嚟食或者食腐肉。事實係，狼呢種具有高獵食能力同智能嘅動物通常都係佢哋身處地區內嘅頂級獵食者－喺多數情況下，得人類、老虎同熊有能力對佢哋造成威脅。
狼同人類嘅關係密切得嚟又千絲萬縷：喺古代，狼成日都會獵食人類所養嘅牲畜，對好多人類羣體嘅生計構成威脅，所以狼同人嘅關係曾經係相當惡劣嘅－喺古時嘅童話故事同民間傳說當中，狼多數都係扮演奸角；到咗現代，人類喺科技上嘅進步令到狼群難以再對人造成威脅，多數狼攻擊人嘅事件都係因為癲狗病而起嘅，冇癲狗病嘅狼好少可會成功殺死大人，而且仲因為人嘅打獵活動而開始驚人同傾向遠離人；雖然係噉，狼史上同人嘅深遠關係令到佢哋依然成日出現喺大眾媒體當中，而且仲成為咗現代動物學研究得最徹底嘅物種之一。 (成篇文章……)