咖喱

  想搵綽號「咖喱」嘅香港女藝人嘅話，請睇黃雅慧。

印度咖喱雞

咖喱（粵拼：gaa3 lei1）係由好多種香料撈埋一齊整出嚟嘅醬。佢係源自印度，成日响印度菜、泰國菜度見到，通常會跟肉類同飯一齊食。

咖喱係一種多樣變作同特殊咁調過味嘅菜餚，最出名嘅印度同埋泰國烹調法，仲有日本嘅日式咖喱，所以咖喱已經成為亞太區主流菜式之一。除咗茶之外，咖喱係少數真正泛亞嘅飲食。印度口味係以混合各方嘅風格而做出含有異國風情菜式而聞名嘅。

各地咖喱

港式咖喱

一串港式咖喱魚蛋（通常都辣）

據聞20世紀初香港嘅酒店西餐餐牌已經有咖喱，後嚟駐港印度軍人同埋尼泊爾啹喀兵跟英軍嚟香港，咖喱亦都流入警隊。之後有印巴裔廚師出去開店，咖喱流入民間，不過而家一般茶餐廳同快餐店供應嘅咖喱（例如咖喱雞同咖喱魚柳）多數都基於馬來西亞咖喱。

唔同地方嘅咖喱用嘅香料粉其實差唔多，主要有黃薑粉、香茅粉、豆蔻粉、丁香粉呢啲，不過分量唔同，煮嗰時用嘅材料又唔同，就會整到唔同濃度、辣度同鹹甜度嘅咖喱。印度咖喱用嘅香料多，孜然粉同香茅粉比例多，而且唔落椰奶，味道偏辣，而馬來西亞咖喱就加咗椰漿，令味道甜啲滑啲，比較適合香港人嘅口味。港人口味嘅馬來西亞咖喱會用10幾種嚟自東南亞嘅香料，又會加砂仁粉提香。港式咖喱配菜無特定，比如會落青椒、紅椒、洋葱同埋芫荽呢啲。

出名啲嘅港式咖喱菜式包括咖喱魚蛋同埋咖喱牛腩飯。