完全變態

蝴蝶會經歷完全變態－啱啱出世嗰陣係一條（同成蟲好唔同樣嘅）幼蟲，幼蟲生到咁上下會結蛹，最後變成成蟲。

完全變態jyun4 cyun4 bin3 taai3（英文：holometabolism / complete metamorphosis）係指某啲昆蟲當中見到嘅一種發育方式。如果話一種昆蟲行完全變態，即係指呢種昆蟲一世蟲分做四個階段：

• 蛋、
• 幼蟲（喺鱗翅目入面又叫毛蟲）、
• 蛹（完全變態嘅最大特徵）同埋
• 成蟲

出名行完全變態嘅昆蟲有蝴蝶、飛蛾、蜜蜂同甲蟲呀噉。完全變態嘅相對係不完全變態。

幼蟲

内文：幼蟲同毛蟲

幼蟲（larva；眾數係 larvae）通常都係一條條噉嘅樣嘅，喺外形上同成蟲好唔同，冇翼唔識飛，而且啲眼係簡眼。喺鱗翅目（蝴蝶同飛蛾）當中，幼蟲又可以叫「毛蟲」。

幼蟲最重要嘅工作係要猛咁食嘢：啲蟲乸生蛋嗰陣，好多時都會特登將啲蛋生喺毛蟲要食嘅嘢附近，例如蝴蝶乸同飛蛾乸生蛋嘅時候，就好興將啲蛋生喺毛蟲要食嘅植物上面，等啲幼蟲一出世就有嘢食；啲幼蟲生咗出嚟就會係噉勁食嘢，儲起養份；佢哋一路食一路脫皮（增齡），去到咁上下就會結蛹。

蛹

内文：蛹

蛹（pupa；眾數係 pupae）係一個靜止、集中於改變身體結構嘅階段。

一隻蛹好多時腹部查實仲識郁，但喺呢個階段，隻蟲嘅絕大部份活動都會停止，冇得去覓食，所以要齋靠幼蟲階段狂食嘢儲起咗嘅養份維生。喺呢個時候，隻蛹體內會進行一連串複雜嘅生命過程，會將隻蟲嘅器官（除咗神經系統之外）分解變成液體噉嘅狀態，跟手呢個液化咗嘅身體會重組變成成蟲嘅身體。蛹嘅階段有幾長視乎物種而定，最後隻成蟲嘅器官會喺個蛹入面完成發育，跟住隻蟲就會破蛹而出。

值得注意嘅係，有部份昆蟲物種嘅蛹階段長得好交關，甚至可能會喺蛹入面過多過一次冬。

一堆蠶蛹；有幾隻已經變咗成蟲（蠶蛾）。

成蟲

兜蟲嘅三個生命形態：幼蟲、蛹、同成蟲（由左至右）。

内文：成蟲

成蟲（adult / imago）係隻蟲生命最後一個階段。

破咗蛹之後嘅成蟲無論喺外形同結構上都同隻幼蟲極之唔同，但仲係同一隻生物。例如有昆蟲學家就做過場噉嘅實驗：佢哋搵咗一批毛蟲返去個實驗室度，俾啲毛蟲聞一啲氣味，當中某一啲嘅氣味會伴隨住一啲（唔致命嘅）痛楚；唔出乎意料嘅係，啲毛蟲話咁快就學識避開嗰啲同痛楚一齊出現嘅氣味；而更加緊要嘅係，呢啲毛蟲大個咗變咗蝴蝶之後，都仲識得避開嗰啲氣味－即係話佢哋仲記得細個嗰陣學到嘅嘢。

一隻成蟲最重要嘅工作就係要傳宗接代：隻成蟲啲器官冚唪唥都發育成熟嗮，有交配同埋（乸嘅話）產卵嘅能力，可以繁殖；交配同繁殖嘅具體做法唔同昆蟲可以好唔同，例如兜蟲同鍬甲蟲就出嗮名啲蟲公會用角打交，打贏咗嘅就有得同啲乸交配。

有唔少昆蟲物種啲成蟲都係唔會食嘢嘅：呢啲物種嘅成蟲好多時甚至連口器都冇－佢哋由個蛹捐出嚟之後要做嘅，就係有咁快得咁快去搵返個伴侶交配傳宗接代，生完蛋之後冇幾耐，就算佢哋冇畀獵食者食落肚，最後都會監生餓死；呢種情況喺飛蛾當中零舍常見，例子可以睇吓出名嘅北美洲大型飛蛾物種合桃仁飛蛾（Citheronia regalis）。

目

以下呢啲目嘅昆蟲都係行完全變態嘅：

• 甲蟲
• 烏蠅
• 膜翅目（個目包括咗蜜蜂、蟻同黃蜂）
• 鱗翅目（蝴蝶同飛蛾）
• 跳蝨

... 等等。

睇埋

• 不完全變態
• 幼蟲同毛蟲
• 若蟲

拎

• How Did Insect Metamorphosis Evolve?. Scientific American.