水圈
水圈（粵拼：seoi2 hyun1；英文：hydrosphere）係指喺一粒行星、微型行星、或者衞星嗰度－包括表面上下－嘅水嘅總體。
根據估計，地球個水圈嘅總容量大約係喺 13.68 億立方公里左右[1]。地球嘅水圈包括嗮佢上面所有嘅水－即係佢表面嗰啲河、湖、同海等嘅水體，仲有地下水以及係喺極地呢啲凍嘅地方以冰嘅型態雪住咗嘅水呀噉。地球上面嘅水當中有 97.5% 左右都係鹹水，得嗰 2.5% 嘅係淡水，而喺呢啲淡水當中，有成 68.9% 嘅係以冰或者雪嘅型態存在嘅，呢啲雪住咗嘅水主要分佈喺極地同埋高山嘅冰川嗰度，又有 30.8% 嘅係以地下水嘅型式存在－即係話地球上面嘅淡水淨係得 0.3% 存在喺湖同河呢啲就手嘅地方[1]。
地球表面大約有 75% 嘅面積俾個海𢫏住咗，呢個面積大約係 3 億 6,100 萬平方公里噉大，而呢個海嘅平均鹽度大約係每公斤海水 35 克鹽（3.5%）左右[2]。地球上面有噉大份嘅面積俾水𢫏住，令到地球又有花名叫「藍色行星」或者「水行星」[註 1]。
水圈同生命
[編輯]
水呢種物質對於生命嚟講係不可或缺嘅－多數生物需要飲水先至生存到，而且地球水圈仲幫到地球維持佢個大氣層。早期地球浸大氣層好稀薄，多數係氫同氦（而唔係現代生物唞氣要用嘅氧同二氧化碳等），就好似現時嘅水星個大氣層噉，而且早期地球有一個由岩漿組成嘅「海」－環境可以話係極之惡劣，冇已知嘅生物會頂得順呢種環境。打後地球冷卻，呢個過程釋放咗啲氣體同水蒸氣出嚟，而佢上面嗰啲火山活動亦都再釋放多啲氣體同水蒸氣。地球變凍咗，令到啲水蒸氣可以凝結變成雨，落返去地表，外加大氣入面嗰啲二氧化碳溶入去雨水入面，温室效應弱咗，令到大氣層再凍返少少，而地球變得冇噉熱令到水蒸氣再凝結，如是者形成咗一場超級大雨－呢場雨令到地球有咗個由水組成嘅海。呢啲嘢據估計大約發生喺 40 億年前[3]。
地球上第一條生命係喺海入面誕生嘅。呢啲生物唔使唞氧氣，而遲吓等到藍綠藻（Cyanobacteria）進化咗出嚟，呢種生物識得將二氧化碳轉化做嘢食同氧氣－地球個大氣嘅氧含量就噉開始咗升，令到需要靠唞氧氣嚟生存嘅現代生物能夠進化出嚟[4]。
水循環
[編輯]
水循環（Water cycle）指水係噉由一個狀態變成第個狀態嘅轉化過程[5]。喺地球嘅環境入面，水有得以好多種形態存在，好似係大氣入面嘅濕氣（雪、雨、同雲）、小溪、海、河、湖、地下水、地底嘅帶水層（Aquifers）、冰山、同埋潮濕泥土入面嘅水氣呀噉，而水會以由以鐘頭計至成世紀長嘅週期嚟喺呢啲形態之間循環變換。令到呢啲轉化過程進行嘅主要係太陽（例如太陽射落地球嘅熱力會令到地表嘅一啲水蒸發升上天，形成雲）同埋地心吸力（地心吸力令到水會向下流，由山上嘅小溪流去大河，再去海等等）。
據估計，地球每年循環嘅水有大約 577,000 立方公里噉多。呢啲水係由海嘅表面－502,800 立方公里－或者陸地－74,200 立方公里－蒸發走嘅，而同量嘅水會以降水嘅形式跌返落去地球嘅表面，當中大約 458,000 立方公里嘅跌返落海，119,000 公里嘅跌返落陸地－呢個差異表示陸地由降水嗰度攞到嘅水量多過佢蒸發嘅水量－119,000 - 74,200 = 每年 44,800 立方公里，但係陸地上面嗰啲河道－每年 42,700 立方公里－同地下水－每年 2,100 立方公里－會流失啲水落海。所以總括嚟講，地球水圈各部份嘅水量比例大致上係處於平穩狀態嘅[1]。
據估計，海水要完全換一次大約需要 2,500 年嘅時間，而冰入面嘅水完全換一次就要 10,000 年，深嘅地下水同山上面嘅冰川就要 1,500 年，而湖要 17 年，河就淨係使 16 日[1]。
南非裔科普作家 Marq de Villiers 形容水圈係由水組成嘅一個封閉系統，好複雜而且佢入面嘅各部份互相依賴，同埋「望落似係特登整出嚟支撐生命嘅噉」[6]。de Villiers 指出，冇證據說明水會蒸發走去太空，所以喺地球上嘅水嘅總量應該由好耐之前（至少幾百萬年前）經已冇乜點樣變過－水可以俾人污染或者濫用，但係唔會多咗或者少咗。
蒸發散
[編輯]水有好多途徑可以蒸發上天，而蒸發咗嘅水跟手會以雨或者雪等嘅降水落返去地球表面。地球上嘅水蒸發多數都係發生喺海嗰度嘅，又有啲水份會直接噉由冰同雪嗰度蒸發（昇華），而發散（Transpiration）就係指水由啲樹上面嗰啲好細嘅窿蒸發走[6]。蒸發、昇華、同發散嘅過程喺水學（Hydrology；研究水嘅科學領域）入面俾人合稱做蒸發散（Evapotranspiration）。
睇埋
[編輯]
註釋
[編輯]- ↑ 但係行星地質學家 Ronald Greeley 指出，水喺太陽系外圍啲嘅地方查實好常見。
攷
[編輯]- ↑ 1.0 1.1 1.2 1.3 World Water Resources: A New Appraisal and Assessment for the 21st Century (Report). UNESCO. 1998.
- ↑ Kennish, Michael J. (2001). Practical handbook of marine science. Marine science series (3rd ed.). CRC Press. p. 35.
- ↑ Yin, Q.; Jacobsen, S. B.; Yamashita, K.; Blichert-Toft, J.; Télouk, P.; Albarède, F. A short timescale for terrestrial planet formation from Hf-W chronometry of meteorites. Nature. 2002, 418 (6901): 949–52.
- ↑ Scientific American - The Origin of Oxygen in Earth's Atmosphere
- ↑ Wilfried Brutsaert. (2005). Hydrology: An Introduction (1st ed). Cambridge University Press.
- ↑ 6.0 6.1 Marq de Villiers (2003). Water: The Fate of Our Most Precious Resource (2 ed). Toronto, Ontario: McClelland & Stewart. p. 453.