深水埗
 |
深水埗（粵拼：sam1 seoi2 bou2，英文：Sham Shui Po），亦有人寫做深水埔或深水莆，係香港舊區，地處九龍西，響大角咀、石硤尾同長沙灣之間，商舖及住宅大廈林立，一度係世界人口至密嘅地方，入過健力士世界紀錄大全。家下深水埗慢慢變成長者同新移民聚腳地。有學者指「埗」字本為「埠」，解做「上落船嘅地方」。行政屬深水埗區。
沿革
[編輯]- 東漢到大明
深水埗話唔埋東漢（25年至220年）就有人住。事緣1955年起李鄭屋邨嗰時，地盤工人掘到個墳墓，後經考證係東漢古蹟。建築地盤其後改建做李鄭屋漢墓博物館。
深水埗原本係條村，位於九龍半島西便海皮，亦即大角咀半島底西便外側。舒懋官重修《新安縣志》，就有提及『深水莆』乃係『官富司管屬村庄』。深水埗條村，南便係大角咀半島，北面係突出嘅海角，直至涌口。過咗條涌有菴由（Om Yam）、元洲同田寮，而東面就有塘尾。深水埗古時係埠頭都唔定，之未曾獲史書印證，無從稽考。
- 大清
1644年清兵入關，大明將軍鄭成功據守臺灣。當其時臺灣海峽兩岸關係重大鑊過依家[咩時候？]，沿岸居民命仔不保。有見及此，康熙皇帝落遷界令，勒令海皮對入五十里居民搬去內陸，深水埗亦列入遷徙名冊，十室九空。康熙八年（1669年）戰局平定，朝廷頒令復界。
復界後，清廷賣大包送禾種同鋤頭過居民，出學額津貼沿岸書塾，務求復建海皮。當其時客家佬窮過蒙正，見有着數就唔執輸咯，成村人趕住搦出世紙咁湧入香港。及後定居於深水埗氏族排名不分先後有鄧、周、曾、李、鄭、蘇、黃、葉、謝、吳、徐。
- 英治
1842年，清英簽《南京條約》，香港島進入英治時期，而九龍重係大清土地。清廷驚咗港島英人啲槍火，故此設立深水莆汛，派三十五清兵看守，屬大鵬協水師右營管轄。據考證，呢個深水莆汛查實係就係家下荔枝角醫院嗰處，相傳醫院舊陣時重保留住舊「深水埗關廠界石」添。1860年，英法聯軍大敗大清。深水埗左手便仰船洲（而家寫昂船洲）連同九龍半島界限街以南一帶通通割予英人管治。1887年清廷喺馬灣設九龍海關，其下水門關廠附淺灣、谷灣、深水莆分廠。1895年深水莆升班做關廠，監視海域出沒船隻，及後改為海關船位，用於驗證鴉片同貨物抽稅。1899年英軍接管界限街以北，深水埗關廠隨之摺埋。
英國接管新界後，首先就起條大埔道通去新界東，再起多條青山道去新界西。香港政府對原清界雜亂無章嘅深水埗，就諗住填海同規劃發展。1924年之前，個海角，連帶菴由，同埋菴由個涌口同海灣，已經開成一個正正方方小鎮。西北邊海皮係欽州街，西南邊海皮係通州街，東南邊係黃竹街，東北邊係鴨寮街。元洲、田寮同塘尾三條村就響界外。嗰陣個鎮裏面已經有荔枝角道，就證明呢陣時，政府就諗住將深水埗同荔枝角之間，成個海灣填平。不過之後，都將個塊填地四四方方咁拉長到東沙島街咁遠，其餘要到1950年代之後先成事。呢塊新填地就大部份都用咗呢做英軍營盤，家下重有條營盤街做證。1924年，深水埗警署亦都埋響軍營隔籬，欽州街同荔枝角道口。
深水埗啲樓就向大埔道，向長沙灣沿岸平地發展，深水埗各村亦都消失響城市發展。
地理
[編輯]家下深水埗同石硤尾之間，以大埔道為界，而界限街以南，就歸大角嘴。至於東面，深水埗同長沙灣，因為係填海嘅關係，市係深水埗伸入長沙灣，而海同地原本就係長沙灣，所以就無一條明顯嘅界。欽州街到東京街一帶，係兩個地方嘅交接地帶。1990年代，因為要落實玫瑰園計劃，深水埗又再大規模填海，南昌邨、南昌公園同通州街公園就當係深水埗。富昌邨同對出就當入長沙灣。而其餘就當係大角嘴。所以深水埗變成同海絕緣。
家下深水埗地方，原本就一片沖積平地。沙泥係石硤尾對上個山流落來幾條涌帶落來。呢啲涌，響發展過程中，就變成家下南昌街同東京街兩條渠。不過後尾大幅發展，兩條渠實在唔夠疏水使。每逢大雨，呢區都有機會水浸。不過隨住渠務工程展開，深水埗就好少話水浸。