都城嘉慕威曼都城巴士

都城嘉慕威曼都城巴士 MCW Metrobus
倫敦嘅都城嘉慕威曼都城巴士第一型 香港九龍巴士嘅11米三軸版都城嘉慕威曼都城巴士，屬第二型設計。
製造廠	都城嘉慕威曼
邊道出	英格蘭伯明翰
取代咗	MCW-Scania Metropolitan
製造年份	1977年—1989年
後繼產品	DAF DB250
主要對手	利蘭Atlantean 利蘭Fleetline Bristol VRT 艾莎富豪B55 利蘭泰坦（B15） 丹尼士統治者 利蘭奧林比安 丹尼士巨龍/禿鷹 富豪Citybus Scania BR112DH Scania N112 Scania N113
規格
長	9.7米、11米（兩軸、三軸）、12米
闊	2.5米
引擎	吉拿6LXB/6LXCT/6LXDT 勞斯萊斯 康明斯L10
波箱	Voith DIWA 851/854/864G Maxwell

都城嘉慕威曼都城巴士（MCW Metrobus），又譯成都城嘉慕都城型，係英國都城嘉慕威曼出嘅一款後置引擎雙層巴士，1977年推出。

設計

都城巴士嘅設計同當年嘅後置引擎雙層巴士有啲似，引擎都係打橫擺喺車尾，而散熱水箱就擺喺車頭偏右位置。佢可以配吉拿6LXB/6LXCT/6LXDT、康明斯L10或勞斯萊斯引擎，而波箱可以係Voith或Maxwell等公司造。

大部分都城巴士嘅車身係由都城嘉慕威曼自己搞掂，型號係Apollo。其中喺1977至1985年出嘅第一型嘅車身設計同MCW-Scania Metropolitan個車身一樣有高低級下層擋風玻璃，左邊深過右邊。而喺1981年推出嘅第二型就減少咗部件種類數量，而下層擋風玻璃係左右對稱。都城嘉慕威曼曾經諗過設計第三型畀倫敦運輸局，但最終都冇出到。另外有啲都城巴士係用亞歷山大AD/RH/RL或者Northern Counties車身。

英國

都城巴士喺英國本土有多間巴士公司買，蹤跡遍及英國各地。

其中買得最多嘅係倫敦運輸局，喺1978至1985年引入共1442架都城巴士，其中1440架係第一型設計，另外兩架係第二型。呢啲巴士轉過手之後，最終喺2004年全數退役。而喺都城嘉慕威曼總部所在地伯明翰負責巴士運作業務嘅 West Midlands PTE（及後來嘅West Midlands Travel，現時稱為National Express West Midlands）係買得第二多，佢喺1978至1989年間引入1130架都城巴士（另有1架冇用過），最後一架行到2010年至退役。

香港

香港嘅中華巴士喺1978年引入12架單門客車版9.7米都城巴士，專係行往來南區同埋中環嘅豪華巴士線。中巴再喺1978至1979年引入全球僅有嘅40架雙門版11.45米都城巴士。1981年，中巴引入兩架12米三軸都城巴士，係香港首批12米三軸巴士，其中第一架係雙門版，第二架係三門版。其後中巴喺1983至1988年引入82架雙門版12米都城巴士。中巴有3架都城巴士喺1990年代因為喺交通意外撞毀而提早退役，而其餘嘅就喺1998年9月1號中巴專營權完咗之後賣咗畀新世界第一巴士。

九龍巴士亦喺1981年引入3架雙門版12米三軸都城巴士，但之後冇進一步引入12米三軸都城巴士，而喺1983至1985年引入80架9.7米都城巴士，再喺1986至1990年引入253架11米三軸都城巴士。另外九巴喺1987年引入一架有冷氣嘅11米三軸都城巴士，佢用一副引擎行車同埋行引擎室上面嘅Sütrak冷氣機，不過架車好快試驗失敗而要拆冷氣，1989年重新投入服務。九巴喺1989年再引入8架9.7米都城巴士，佢哋係配280匹嘅康明斯引擎同埋有手動減速器嘅波箱，專係行往來荃灣同埋錦田嘅51線，經荃錦公路上大帽山。不過佢哋行咗51線幾年就傷晒，而俾改裝過而又舊啲嘅同款車代替。

九廣鐵路公司攞到輕便鐵路經營權之後成立巴士部（今日嘅港鐵巴士）去提供輕鐵專區交通服務，再加上要自己做返九廣鐵路接駁巴士線，因此九鐵公司喺1987至1989年引入39架新嘅9.7米都城巴士。

停產

1989年，都城嘉慕威曼嘅母公司Laird Group放棄都城嘉慕威曼業務，都城嘉慕威曼都城巴士設計就賣咗畀Optare同埋DAF，都城巴士自此宣告停產。後來兩間公司以都城巴士為藍本，研製出配Optare Spectra車身嘅DAF DB250巴士（帶有都城巴士第三型設計嘅影子）。

參考/睇多啲

• 龔嘉豪 (2010)。《都城嘉慕 都城巴士》。尚線出版。ISBN 9789881893727。 {{cite book}}: Unknown parameter |month= ignored (help)