中華人民共和國對外宣傳
中華人民共和國對外宣傳，一般係指中國共產黨喺中國以外不同嘅海外媒體，以唔同方式宣傳中國共產黨嘅管治或者影響當地華人嘅輿論。近年有越來越多外國傳媒，政府機構同埋官員都開始關注中國政府喺海外傳媒嘅參與，有部份人甚至指控呢啲宣傳混入咗一啲假新聞，其實係滲透，或者稱呼呢啲叫做『中共大外宣』。[1]
歷史同發展
[編輯]早喺2008年至2009年間，中國政府就開始部署耗資450億人民幣嘅「大外宣」戰略，推動中國官媒向國際擴張，嘗試改善中國嘅國際形象，同埋宣傳中國共產黨嘅主張。其中無國界記者組織、自由之家同國際記者聯盟，分別喺2019年3月、2020年1月同2020年12月都發表報告，提到佢哋通過收購投資外國媒體同大型電訊企業、設立「假外媒」、將自己國際電視廣播現代化，喺國際媒體上大量購買廣告等手段嚟控制各國民眾獲取新聞資訊嘅途徑，而且呢啲行為有逐年增長嘅趨勢。其中自由之家嘅報告入面就指，呢啲「大外宣」針對嘅受眾，主要是海外華人同埋非華裔[1]。
另外，美國獨立社交平台研究公司Graphika喺2021年2月發表報告，指出有數以百萬計嘅虛假社交平台帳戶有組織同有系統咁幫中共唱好，呢啲戶口，2019年起集中攻擊香港反送中運動，去到2020年武漢肺炎疫情爆發後，呢啲網軍又將重點改為幫中國講好話，同時抵毀美國喺武漢肺炎期間嘅抗疫工作。報告點名提到，包括港人講地在內嘅多名親中派人士同網媒，仲有中國外交部發言人趙立堅、多位中國駐外大使等，有份參與散播垃圾假資訊（spamouflage）。報告又話，有關活動有幕後組織同資金支持[2][3][4]。
對維基百科嘅影響
[編輯]有一啲觀點認為，中文維基百科湧現愈嚟愈多嚟自中國大陸嘅用戶，甚至成為管理員，佢哋大部分立場係支持中國共產黨同中國政府，甚至會群起攻擊同佢哋政見有出入嘅人士。佢哋喺資料來源問題上亦主張封殺香港嘅《蘋果日報》、《立場新聞》等報道異見觀點嘅媒體，又會挑戰台灣喺中文維基百科上面嘅政治地位，外界認為維基百科已經淪為中國政府「講好中國故事」嘅「中國大外宣」新工具[5]。
因為問題已經對其他用戶造成安全性嘅威脅，甚至有用戶受到身體傷害，去到2021年9月14號，負責管理維基百科嘅維基媒體基金會宣布，經過深入調查未被官方認可嘅「中國大陸維基人用户組」嘅活動後，已禁止 7 名來自中國大陸嘅用户，同埋移除 12 名中國大陸管理員嘅權限[6]。
武漢肺炎瘟疫期間
[編輯]喺武漢肺炎爆發初期，中共網信辦就試過喺2020年2月向大陸嘅傳媒發出唔少指示，要求啲新聞機構要積極咁影響國際輿論，而且唔可以喺出街嘅報導入邊用「無法治癒」、「致命」、「封鎖」呢啲字眼[7]。另外，喺2021年9月，網絡安全公司FireEye發表報告，指一啲親中人士喺唔同語言嘅社交平台散播宣傳假新聞，話美國要為武漢肺炎病毒散播負責[8]。
中國大陸情況
[編輯]喺中國嘅對外宣傳計劃入面，有時北京政府會搵一啲喺中國大陸住嘅白人或者外籍人士，用唔同方式唱好中國同埋批評西方國家嘅傳媒。
例如，旅居中國嘅英國籍網絡紅人Lee Barrett，同埋佢個仔Oli Barrett，就喺佢哋嘅YouTube頻道不時發表支持中國嘅言論，例如Lee聲稱新疆嘅維吾爾青年喺接受「教培中心」嘅培訓後就可以改善生活，Oli就曾經批評香港反送中運動，又話獲國際社會唔同人譴責嘅警暴係五眼聯盟國家嘅傳媒推動出來。英國《泰晤士報》就引述牛津大學一個研究，指佢哋嘅影片獲各地唔少中共官員喺Twitter轉發，而且拍攝亦獲得中國國際廣播電台嘅資助。喺2020年11月，佢哋兩仔爺同多名外國網紅，仲獲得中國國際廣播電台邀請訪問陝西西安，拍攝宣傳中國百姓幸福嘅故仔[9]。
各國個別情況
[編輯]美國
[編輯]中國被指喺美國進行嘅外宣，主要有三類，包括喺主流媒體畀錢刊登一啲宣傳文章，通過一啲喺美國有發行嘅中國媒體，同埋透過喺唔同院校設立孔子學院。
中共中央宣傳部官方嘅英文報章《中國日報》，多年嚟都喺美國唔少媒體，例如《紐約時報》，畀錢刊登一啲帶有宣傳性質嘅文章，做法引起唔少美國國會議員關注。例如，《中國日報》英文版自2016年11月以嚟，就畀咗1,900多萬美元印刷費同廣告費美國媒體，其中向《華盛頓郵報》同埋《華爾街日報》等美國主流媒體支付嘅廣告費，就超過1,100萬美元。呢啲廣告被冠以《中國觀察》嘅名稱，以插頁形式插入美國媒體嘅刊物入面。雖然話係廣告，但內文形式就好似新聞咁，用嚟宣傳中國政府嘅立場、美化中國同埋中國共產黨嘅形象。[1]
踏入2020年，中美關係因應中美貿易戰，香港反送中運動同香港國安法惡化，美國國務院亦行駛咗《外國使團法》，先後將包括《人民日報》、《環球時報》等18間喺美國有發行嘅中國媒體機構定義為外國使團。國務院發言人歐塔加斯（Morgan Ortagus）喺10月嘅時候就批評習近平將中國官方國家支持嘅宣傳機構，包裝成獨立嘅通訊社，影響媒體自由[10][11]。另外，2020年8月，《華盛頓自由燈塔》報道，《紐約時報》已默默刪除網站上數以百計嘅中共宣傳文章[12]。
去到2020年10月，美國國務卿蓬佩奧亦正式落命令，要求所有美國孔子學院喺年底前關閉，直指佢哋假藉語言機構嘅包裝，其實係中國外宣組織[13]。
澳洲
[編輯]喺澳洲，有好多中文傳媒都同共產黨有密切關係，甚至係被共產黨控制。對於一啲表達對共產黨批評嘅聲音，共產黨甚至會用恐嚇嘅手段。例如，移咗民去澳洲嘅香港人林松，喺2010年就曾經被中共恐嚇，叫佢唔好講北京六四大屠殺事件，如果唔係就會好似1967年香港反共節目主持人林彬咁死法[14]。
近年，中共亦利用微信嘗試高度控制當地華人收到嘅訊息，情況甚至去到當地國防部門要向聯邦政府作出警告[15]。亦有一啲澳洲中國留學生，被指喺澳洲以唔同形式公開表達對中共政府嘅支持。佢哋甚至喺香港反送中運動期間，暴力騷擾當地人士和平表達意見聲援嘅活動[16]。
例如，今日傳媒集團係其中一個以服務喺澳洲嘅中國人為主嘅華語媒體集團，旗下有五個媒體，分別係今日悉尼、今日墨爾本、今日昆士蘭、今日阿德、今日珀斯[17]。不過，佢哋同中國共產黨有頗為密切嘅關係，例如喺2017年1月，中國駐悉尼總領事顧小傑，就曾經訪問今日傳媒集團，又大讚今日傳媒集團自創辦以來「始終堅持客觀公正嘅輿論導向」[18]。另外，前中共外交官陳用林喺2019年4月喺悉尼科技大學一個研討會發言嘅時候，亦提到今日傳媒集團喺好多議題上都極力地同中共保持一致[19]。
喺2020年12月，澳洲SBS同《布里斯本時報》就報道，澳洲情報部門分析咗一啲中文傳媒網站同熱門微信公眾號，發現好多都係完全受北京控制同審查，部份更加係由中共直接管理。報道提及嘅中文傳媒或者微信平台公眾號，包括東南網澳大利亞站，大洋傳媒，南海傳媒，微悉尼，今日悉尼等。報道又引述消息人士話，就算有啲表面係獨立嘅澳洲中文傳媒，都透過被增派職員同埋內容分享協議而受到影響[20][21]。
另外，澳洲策略政策研究所喺2020年12月17號亦都發表報告，揭露澳洲中文傳媒受到中國共產黨嘅影響去審查內容，其中點名提及澳洲大洋傳媒（Australia Pacific Media Group）同埋佢旗下嘅《大洋時報》（Pacific Time），喺澳洲為中國宣傳。而且，有包括澳洲廣播公司同SBS在內嘅其他機構，被發現受到中共限制發布一啲唔符合北京立場嘅資訊，當中例如包括限制佢哋喺社交媒體平台微信上發表內容[22]。
台灣
[編輯]中共亦透過直播、微電影競賽，社交媒體等宣傳方式推動兩岸「統一」，試圖引領政治意識形態，建立新統戰模式，吸引同台灣年輕人互動。[1]
有部份觀點認為，台灣一啲親中商人，會得到中共資金嘅支持，買下台灣主要傳媒，多報道一啲對中國共產黨有理嘅新聞。其中經常被指控嘅，就係蔡衍明喺2008年收購嘅中國時報文化集團（之後改組為旺旺中時媒體集團）。流亡美國嘅中國異見分子何清漣就形容，中共對台灣媒體嘅滲透，已經係國家安全嘅問題[23]。
新加坡
[編輯]新加坡《聯合早報》嘅報導新聞嘅語氣幾迎合中國大陸，民進黨立委蔡易餘曾經表示經過對《聯合早報》長久嘅觀察，形容佢係一個親中派嘅媒體，亦係中國大外宣嘅一部分[24]。
馬來西亞
[編輯]亞洲紅點傳媒被指係北京政府對馬來西亞華人進行統戰嘅媒體之一，但亞洲紅點否認，指自身資金來源唔係「紅色資本」[25]。
睇埋
[編輯]參考
[編輯]- ↑ 1.0 1.1 1.2 1.3 〈中共大外宣｜收購外媒、花錢買報道宣揚「中國故事」 10年全球大規模洗腦 ｜ 蘋果日報〉。《Apple Daily 蘋果日報》 (香港中文)。原著喺2020-12-12歸檔。喺2020-12-29搵到。
- ↑ 〈美報告踢爆中共系統性轉發假消息 點名趙立堅港人講地新民黨員〉。Radio Free Asia (英文)。喺2021-03-04搵到。
- ↑ "Spamouflage Breakout - Chinese Spam Network Finally Starts to Gain Some Traction" (PDF).
{{cite web}}: CS1 maint: url-status (link) - ↑ 自由時報電子報 (2021-02-06)。〈立堅是你？美報告踢爆中國官員系統性轉發假訊息 - 國際〉。《自由時報電子報》 (中文)。喺2021-03-04搵到。
- ↑ 〈維基百科台灣詞條背後的編輯權之爭〉。《BBC News 中文》 (繁體中文)。喺2021-07-26搵到。
- ↑ 〈維基百科禁 7 內地用戶 指有滲透起底風險 內地群組：準備鬥爭 | 立場報道 | 立場新聞〉。《立場新聞 Stand News》。原著喺2021-09-15歸檔。喺2021-09-16搵到。
- ↑ 〈網信辦文件揭露當局如何操縱疫情輿論〉。《Now 新聞》 (香港中文)。喺2020-12-21搵到。
- ↑ 〈信報即時新聞 -- FireEye:親中人士以多語言宣傳 美要為新冠負責〉。《信報即時新聞》。喺2021-09-10搵到。
- ↑ 〈獲京資助 英網紅父子撐華維穩 ｜ 蘋果日報〉。《Apple Daily 蘋果日報》 (香港中文)。原著喺2021-01-10歸檔。喺2021-01-10搵到。
- ↑ 聯合新聞網 (20201022T004206Z)。〈繼新華社、環球時報 美國務院再指定6陸媒為外國使團 | 聯合新聞網：最懂你的新聞網站〉。《聯合新聞網》 (中文)。喺2020-12-29搵到。
{{cite web}}: Check date values in:|date=(help) - ↑ 〈美國務院再列6家中國媒體為外國使團 今年第三度 -- 上報 / 國際〉。www.upmedia.mg。喺2020-12-29搵到。
- ↑ 〈大外宣踢到鐵板 紐約時報悄悄撤下中共業配文 | 國際 | 重點新聞 | 中央社 CNA〉。www.cna.com.tw (中文)。喺2020-11-19搵到。
- ↑ 〈「孔子學院是中國在美外宣組織」 蓬佩奧下令年底全數關閉 -- 上報 / 國際〉。www.upmedia.mg。喺2020-12-29搵到。
- ↑ Alexander, Harriet (2019-06-18). "'Next time it will be you': Sydney's Hong Kong expats fear extradition laws". The Sydney Morning Herald (英文). 喺2021-11-11搵到.
- ↑ Galloway, Anthony (2020-12-16). "How WeChat is helping the CCP control Australian media outlets". The Sydney Morning Herald (英文). 喺2020-12-17搵到.
- ↑ 〈【反修例】昆士蘭大學反送中學生遭圍堵襲擊〉。SBS Your Language (繁體中文)。喺2020-11-17搵到。
- ↑ 〈今日传媒集团 - 首页〉。www.mediatodaygroup.com。喺2020-11-07搵到。
- ↑ 〈顾小杰总领事走访"今日传媒集团"〉。sydney.chineseconsulate.org。喺2020-11-07搵到。
- ↑ 〈陳用林再揭領館間諜活動 力挺《外交關係法》〉。《大紀元時報 香港｜獨立敢言的良心媒體》 (香港中文)。喺2020-11-07搵到。
- ↑ 〈情報部門調查澳洲中文傳媒 發現不少由北京控制〉。SBS Your Language (繁體中文)。喺2020-12-03搵到。
- ↑ Grieve, Nick McKenzie, Charlotte (2020-12-02). "Beijing controls Chinese-language media agencies in Australia, says intel agency". Brisbane Times (英文). 喺2020-12-03搵到.
- ↑ 〈最新報告揭露：中共如何影響澳洲中文傳媒〉。SBS Your Language (繁體中文)。喺2020-12-17搵到。
- ↑ 〈紅色滲透：被中國買下的台灣新聞｜何清漣／獨評讀好書｜獨立評論〉。《獨立評論@天下》 (中文)。喺2020-11-22搵到。
- ↑ 三立新聞網 (2020-04-13)。〈星媒護航譚德塞批台亂罵人 遭起底「親中背景」 | 政治 | 三立新聞網 SETN.COM〉。www.setn.com (中文)。喺2021-05-21搵到。
- ↑ 林怡廷。〈【無聲之戰】新冷戰下的馬來西亞，中國大外宣的經營真的有效嗎？〉。原先內容歸檔喺2020-08-24。喺2020-09-20搵到。
{{cite web}}: Cite has empty unknown parameter:|dead-url=(help)