九龍南綫
(由九龍南線跳轉過嚟)
.JPG)
九龍南綫，之前叫南環綫、九龍南環綫，係喺香港九龍嘅屯馬綫延綫，由南昌站開始向南延伸，經過1990年代西九龍新填地，連接尖東站，黐埋東、西鐵綫嘅南面。條綫全長3.8公里，連埋新起嘅柯士甸站，有3個車站。
九龍南綫喺2005年開始起，2009年8月16號[1]通車。延綫起好之後，搭西鐵綫就可以由屯門直接去到紅磡。紅磡站變咗做東鐵綫同西鐵綫嘅總站，尖沙咀支綫成為西鐵綫嘅一部分，通車後西鐵綫會開密啲車，多人嗰時由3分半鐘，改為3分鐘一班車，密咗15%。工程係由九廣鐵路公司規劃、批出合約同埋畀錢出嚟起，但因為兩鐵合併，呢條綫由香港鐵路有限公司負責睇住佢起同埋營運。
計劃
[編輯]香港政府喺《鐵路發展策略2000》入面話起九龍南環線。2002年9月24號，香港特區政府邀請嗰時嘅九廣鐵路公司做南環線詳細規劃同設計。
2003年，以深水埗區南昌站為總站，九廣鐵路嘅西鐵（兩鐵合併之後叫做西鐵綫）正式通車。雖然話方便新界西北居民直達市區，但係南昌站始終唔係市區中心，利用市區邊緣做總站嘅做法，俾人認為係搞到西鐵通車之後客量比估計少得多嘅主因。嗰時有人認為，起九龍南綫對西鐵日後嘅發展好重要。
2004年3月26號，香港特區政府第一次將九龍南綫項目刊憲；對呢條線嘅修訂亦喺2005年1月7號刊憲。
香港特區政府喺2005年6月24號將批咗嘅九龍南綫方案刊憲，8月開始簽約，2006年開始起。
