攬炒巴
| 攬炒巴 | |
|---|---|
.png) | |
| 出生日 | 1993年10月25號  （31歲） |
| 本名 | 劉祖廸 |
| 職業 | 社運人士、土地測量師 |
[改維基數據] | |
攬炒巴（粵拼：Laam2 Caau2 Baa1，1993年10月25號—），本名劉祖廸（英文：Finn Lau），係一個香港出身嘅政治人，因為喺反逃犯條例修訂運動期間提倡「攬炒主義」而出名。而家住喺英國。
早年
[編輯]劉祖廸大學讀測量，畢業之後入行做測量師，攞到專業資格，曾經喺香港、新加坡、英國執業，由2019年起住喺英國倫敦[1]。佢喺連登討論區個用戶名叫「我要攬炒」，所以有「攬炒巴」呢個稱號。佢話佢冇政黨聯繫，「只係一個好熱愛香港嘅普通人」[2]。
反修例運動
[編輯]攬炒巴喺2019年反修例運動早期提出「攬炒」策略，一開始嘅議題係香港好多親中派人士有外國護照，一邊攞住西方世界嘅保障，一邊打壓香港人嘅人權，應該要求佢哋取消外國護照，等佢哋推《逃犯條例修訂草案》嘅時候會顧忌[3]。「攬炒」嘅諗法係政權要傷害香港人，香港人一定要令支持政權嘅人自己都受傷，引用《飢餓遊戲》對白「If we burn, you burn with us」[4]。
攬炒團隊
[編輯]「攬炒」倡議越來越多人支持，令攬炒巴開始出名。佢透過 Telegram 通訊軟件搵到一班同路人，一齊做「國際線」倡議，並且同喺英國、美國活躍嘅「Stand With Hong Kong」團隊合流，外界統稱「攬炒團隊」[4]。
2019年7月，攬炒團隊喺英國幾份主流報紙登報，指控中國共產黨違反《中英聯合聲明》，廣告喺《衛報》、《倫敦晚旗報》、《旁觀者》、《新政治家》見報[5]。
8月，佢哋同「G20團隊」合作，趁住G20峰會喺至少九個國家登報，要求國際社會關注香港警察暴力[6]，又喺十幾個國家發起支持香港抗爭運動集會[7]。
11月，美國《香港人權與民主法案》通過之後，佢哋聯同香港大專學界國際事務代表團整合咗有份逼害香港示威者嘅親中派人士名單，交畀美國建議佢哋制裁[7]。報告列出咗大約140名政府官員、警方高層同親中派人士嘅言論同行為，指控佢哋侵犯人權，當中包括林鄭月娥、李家超、鄧炳強、何君堯等人，又遊說多個國家取消香港獨立關稅區嘅地位[7][8][9]。
俾人拉
[編輯]劉祖廸喺2020年元旦大遊行之後俾香港警察拉咗，係嗰日好多個俾人拉嘅示威者之一。嗰陣時佢以為自己嘅攬炒巴身份已經俾警察發現咗，一世唔會再自由，人生就噉玩完。但結果佢個身份冇曝光，警察只係當佢係求其一個示威者，扣留咗佢48個鐘。放返出嚟之後，佢即刻搭飛機返咗英國，之後繼續喺英國支援香港抗爭運動[2]。
後續行動
[編輯]2020年8月，《香港國安法》頒佈生效之後，香港政府宣佈攬炒巴犯咗國安法，而家係通緝犯，並且公開佢嘅身份[1]。10月，劉祖廸拍片公開承認自己就係攬炒巴，同時宣佈攬炒團隊正式分家，分成攬炒巴本人領導嘅「攬炒團隊」（Hong Kong Liberty）同埋其他匿名領袖帶領嘅「重光團隊」（Stand With Hong Kong）[10]。
攬炒巴2020年6月喺倫敦俾人跟蹤然後襲擊[1][11]。一開始有人話佢扮俾人打搏同情，之後佢貼咗自己受傷嘅相同埋醫生紙上網闢謠[12]。佢接受BBC訪問嘅時候話，襲擊佢嘅人冇任何種族仇恨襲擊常見嘅行徑，亦冇搶佢嘢，所以相信襲擊佢嘅人係受中共指示嘅打手[11]。
2021年4月，佢宣佈暫時擺低測量師事業，全職做香港議題嘅國際遊說工作[13]。
參考
[編輯]- ↑ 1.0 1.1 1.2 "Wanted Hong Kong activist Finn Lau - behind the faceless 'Laam Caau' persona - says he will seize any 'chance of survival and give back'". Hong Kong Free Press HKFP (英國英文). 2020-10-25. 喺2021-05-03搵到.
- ↑ 2.0 2.1 〈「攬炒巴」劉祖廸拍片現真身 透露曾於元旦遊行被捕 冀成地下抗爭組織及外國政府溝通橋樑 | 立場報道 | 立場新聞〉。《立場新聞 Stand News》 (英文)。原著喺2020-10-05歸檔。喺2021-05-03搵到。
- ↑ 〈「攬炒」一詞源於撲克牌遊戲 Ben Sir教路泛民迎戰建制炮轟〉。《香港01》。2020-05-07。原先內容歸檔喺2020-09-01。喺2020-05-28搵到。
- ↑ 4.0 4.1 〈【連登動員．上】專訪「我要攬炒」真身：香港人未放棄，我們也不放棄〉。《立場新聞》。2019-07-18。原先內容歸檔喺2019-12-17。喺2020-05-28搵到。
- ↑ 〈連登「我要攬炒」發起 今起英報登廣告 控訴中國違反聯合聲明 冀英港「同行作戰」〉。《立場新聞》。2019-07-24。原先內容歸檔喺2019-08-14。喺2020-05-28搵到。
- ↑ 〈全球11報章眾籌廣告出爐 籲國際社會關注香港警暴〉 (繁體中文)。852郵報。2019-08-19。原先內容歸檔喺2019-08-23。喺2020-05-28搵到。
- ↑ 7.0 7.1 7.2 〈攬炒巴、學界代表團製建議制裁名單 林鄭、李家超、何君堯等逾百人上榜〉。《立場新聞》 (繁體中文)。2019-12-21。原先內容歸檔喺2020-05-26。喺2020-05-28搵到。
- ↑ 〈【抗暴之戰】「我要攬炒」秘製過百頁制裁名單 游說取消港獨立關稅區觸發「支爆」〉。《蘋果日報 (香港)》。原先內容歸檔喺2020-09-01。喺2020-05-28搵到。
- ↑ 〈攬炒巴真身︰攬住中共死才有新香港〉。《蘋果日報 (香港)》。原先內容歸檔喺2020-09-01。喺2020-05-29搵到。
- ↑ 〈無懼通緝現真身 攬炒巴：相搏到底〉。《蘋果日報》 (繁體中文)。2020-10-05。原著喺2021-01-21歸檔。喺2021-05-03搵到。
- ↑ 11.0 11.1 "BBC Two - China's Magic Weapon, A Brutal Attack in London". BBC (英國英文). 喺2021-08-24搵到.
- ↑ Dimsumdaily Hong Kong (2021-01-04). "Finn Lau who is in exile in U.K. reveals photo of his head injury after being beaten". Dimsum Daily (美國英文). 喺2021-04-11搵到.
- ↑ 〈攬炒巴：辭測量師工作全職為港服務 擬辦 2021.6.12 全球行動企劃 | 立場報道 | 立場新聞〉。《立場新聞 Stand News》 (中文)。原著喺2021-05-03歸檔。喺2021-05-03搵到。