嘉諾撒聖方濟各書院
嘉諾撒聖方濟各書院（St. Francis' Canossian College，簡稱SFCC）係香港一間天主教英文女子資助中學，喺1869年創校，亦係意大利嘉諾撒仁愛女修會喺香港開設嘅第二間學校。校舍一直都喺灣仔半山堅尼地道9至13號，刻畫喺外牆嘅四個守護天使係學校嘅標誌，象徵忠、信、仁、愛。小學部叫做嘉諾撒聖方濟各學校，喺堅尼地道校舍山坡下面嘅聖佛蘭士街，係少數有直屬中學而且經統一派位收生嘅資助小學之一。學校多年嚟培育咗好多社會知名人士，依家係一間出名嘅女校。
聖方濟各嘅學生叫做「Franciscan」，同時因為「St. Francis」嘅中文諧音同埋淳樸校風，學生有時亦都會叫自己做「蕃薯妹」。
歷史
[編輯]
喺1860年，由聖瑪大利肋嘉諾撒所創立嘅嘉諾撒仁愛女修會嘅修女，由家鄉意大利嚟到香港傳教。嗰時班修女為咗照顧灣仔平民區嘅貧困同埋失學兒童，就喺堅尼地道創辦咗聖方濟各學校（St. Francis' School），亦即係依家嘅嘉諾撒聖方濟各書院（St. Francis' Canossian College）。嗰時班修女唔單止免費教小朋友讀書，重喺同個一地方起咗一間醫院同埋孤兒院。港督參觀學校之後，好滿意學校嘅教學，就將學校納入政府資助學校，屬於香港最早期嘅政府資助學校之一。學校直到依家依然係嘉諾撒仁愛修會管理。
學校曾經喺1941年因為香港淪陷而停辦，但係班修女對辦學嘅熱情同埋決心一啲都無減退。喺二戰之後，學校喺1945年重開為聖心初中（Sacred Heart Junior School），喺1953年先至改名為嘉諾撒聖方濟各書院（St. Francis' Canossian College）。由於居民對學位嘅需求不斷增加，學校嘅兩座新翼分別喺1956同埋1958年落成，為適齡女仔提供更多嘅學位。學校亦都喺1956年成立咗香港嘅第一隊香港紅十字會青年團（Youth Unit One），其後慢慢喺其他中學越嚟越普及，成為香港其中一個最具規模嘅制服團體。
喺1962年，學校開設中六預科課程，從小學到預科提供13年嘅全面教育。禮堂大樓喺1985年落成，裏面有體育館、圖書館同埋縫紉室等等嘅設施。
後來，堅尼地道只剩低中學部同埋小學部校舍，其餘嘅建築物就用作嘉諾撒修院同埋明愛達言學校（前嘉諾撒達言學校）嘅校舍。2008年，明愛達言學校嘅校舍改建成小學部新校舍，位於中學部下面嘅聖佛蘭士街，成個小學部改建及擴建工程喺2010年完成。中學部嘅校舍從2011年開始重建，預計喺2017年落成。中學部同小學部嘅校舍覆蓋聖佛蘭士街以上同埋堅尼地道以下嘅山坡，總共佔地大約9,517平方米。
直屬小學
[編輯]嘉諾撒聖方濟各學校（St. Francis' Canossian School，簡稱SFCS）係一間全日制女子資助小學，經教育局嘅小一入學統籌辦法收生。學校提供小一至小六嘅課程，除咗英文科以外所有科目都係用中文教。喺2008-2009學年以前，學校提供半日制課程，一、三、五年級係下晝班，二、四、六年級係上晝班。
校舍喺2008年起由堅尼地道搬去中學校舍下面嘅聖佛蘭士街42 - 44號，直到2010年完成遷校及擴建工程，佔地約4,762平方米。現址自嘉諾撒仁愛女修會喺1869年接管後曾用作多項教育服務，包括喺1959年為失明兒童所設立嘅嘉諾撒啟明學校、喺1974年為聾啞兒童所設立嘅嘉諾撒達言學校等，亦曾經喺1987年將校舍租畀明愛設立為弱智兒童辦學嘅明愛樂勤學校，租約喺2007年期滿。
校歌
[編輯]|
Verse 1:
Refrain:
Verse 2:
Verse 3:
|
舊生（用英文名嚟排）
[編輯] |
關於呢個表嘅英文名排序，請睇英文維基版本。
政商界
[編輯]- 陳麗玲：陳樹渠已故夫人，陳氏教育機構校董會前主席，香港寶聲集團前主席，北角街坊福利事務促進會前會長（1960年畢業）
- 余若薇：資深大律師，前公民黨黨魁同主席，香港立法會前議員（香港島選區）
- 林鄭月娥：現任香港特別行政區行政長官，前政務司司長
- 劉聖雪：新民黨成員，曾經參選2015年香港小姐競選
- 容海恩：香港立法會議員（新界東選區），新民黨副主席，執業大律師
- 楊何蓓茵：教育局常任秘書長
- 馮馬潔嫻：香港殘疾人奧委會暨傷殘人士體育協會主席，立法會前秘書長馮載祥夫人，喺唐英年參選特首時負責佢嘅公關工作
- 查史美倫：行政會議成員，港區全國人大代表，香港金融發展局主席，匯豐銀行非執行董事，前中國證監會副主席
- 殷巧兒：香港家庭計劃指導會理事會副主席，群力資源中心註冊董事，前香港中文大學評議會主席，前香港藝術發展局副主席等
- 黃浪詩：香港乳癌基金會副主席，前香港駐悉尼經濟貿易辦事處處長，前香港影視及娛樂事務管理處處長
- 趙崇幗：前任經濟發展及勞工局副秘書長，第29屆奧林匹克運動會馬術比賽（香港）有限公司副行政總裁，地政總署前署長劉勵超夫人，曾經係葉劉淑儀競選辦主任
- 吳徐鳳英：前警務處助理處長（人事）
- 孫鍾小芬：教育局前局長孫明揚夫人，太平紳士，曾喺學校教數學多年至九十年代先退休，林鄭月娥、楊何蓓茵同趙崇幗都係佢嘅學生
- 陳文綺慧：東華學院校務委員會主席，培力藥業集團董事，萬象行有限公司董事，前東華三院主席，文洪磋個女、文肇偉個妹，文天祥後裔
教育界
[編輯]- 莫鳳儀：香港演藝學院校董會成員，香港教育大學附屬有限公司行政會議成員，啟基學校創校校長，榮譽勲章，太平紳士，十大傑出青年
- 何芝君：明愛專上學院教授，前香港理工大學社會科學系副教授，香港女權運動領袖，係反國民教育運動嘅絕食者之一
- 關詩珮：新加坡南洋理工大學中文系助理教授
- 關利平：前香港城市大學生物化學系教授，曾任香港城市大學學務長
- 劉美明：生化專家，輻射生機學會創始人
- 陳胡美好：前英皇書院校長
體育界
[編輯]文化及演藝界
[編輯]- 葉文炘：前Now財經台主播
- 莊安宜：前香港有線電視首席新聞主播
- 黃婉瑩（Annie）：資深烹飪導師，都市閒情《今晚食乜餸》主持，寫過多本烹飪著作
- 馮翠珊：國際時裝品牌Alexander McQueen亞太區主席，歌手蘇永康老婆
- 鄧藹霖：前香港電台DJ
- 李 敏：作家，填詞人，編劇，歌手及主持人
- 黃可盈：藝人
- 秦家聰：秦觀三十三世孫，新聞工作者，作家，中美建交後中國接受嘅第一個美國華裔記者，係少數男學生之一
- 關懿婷：喺無綫電視同亞洲電視做過主播，現任渣打銀行香港公共事務處企業及業務傳訊主管
- 陳詠桐（JC）：歌手
- 李寶瑩：粵劇花旦
- 李家怡：創作歌手，超級巨聲參賽者，曾獲頒香港傑出學生
- 斯美玲：前任三藩市灣區KTSF電視台國粵語新聞編輯主任
- 陳庭欣：藝人，2010年香港小姐冠軍（只讀到小學畢業）
- 卓韻芝：前商業電台叱吒903DJ，自由創作人
- 黎美言：歌手，組合HotCha成員之一
- 黃明樂：自由創作人，《港孩》作者，曾任梁家傑特首選舉競選經理
