粵文維基百科
 粵文維基百科嘅標誌 | |
| 網址 | https://zh-yue.wikipedia.org/ |
|---|---|
| 商用？ | 唔係 |
| 網站類型 | 網上百科全書計劃 |
| 註冊 | 任人 |
| 可用語言 | 廣東話、粵文 |
| 擁有者 | 維基媒體基金會 |
名
[編輯]2006年4月表決，Cantonese Wikipedia 稱為「粵語維基百科」，Wikipedia 嘅候選名有「Wikipedia」、「維基百科」、「維奇百科」、「棫佳百科」同「域奇百科」。「維基百科」以廿五票當選，「域奇百科」得五票，「棫佳百科」得一票，「Wikipedia」〇票。Cantonese 嘅候選有「廣東話」同「粵語」，「粵語」以十九票當選，「廣東話」以十三票落選。
名稱之爭
[編輯]雖然2006年表決名稱嗰陣已經決定用「粵語」，但仍然有爭議，頭版更長期用「廣東話維基百科」一詞。喺2007年4月，有人再提出用「廣東話維基百科」之稱，一番討論之後，始終無法達成共識。喺2009年5月，頭版就改用「廣東話維基百科」、「廣府話維基百科」、「粵語維基百科」三者隨機顯示。
喺2013年8月，有用戶提議改名做「粵文維基百科」，理據係因為粵語係講出嚟嘅，寫出嚟嘅叫做粵文，所以粵文比粵語更貼切，重可以解決名稱爭議，後來經過討論同投票，社群大部份人同意呢個名，最後喺9月中正式改名。
不過喺其他語言版本嘅語言欄位連返去粵文版本嘅連結名，就一路維持住自開站以嚟用開嘅「粵語」。
域名之爭
[編輯]粵文維基百科代碼由創站開始都係「zh-yue」，但唔少網站用戶(維基友)覺得噉樣會矮化粵文，而且「zh-yue」亦唔合 ISO 639-3 提議嘅「yue」。雖然元維基同意將代碼改成yue，並且經已喺Phabricator立案（睇Phabricator:T30441），但到而家都因為技術問題而未有落實呢個改變嘅時間表。
亦有部份嘅維基友想改做「can」、「jyut」或者「yud」、「yïd」。
狀況
[編輯]粵文維基百科目前計有143,000篇文，包括討論頁、跳轉頁之類就有321,872版，一共編輯咗2,214,672次。參與人手方面，粵文維基百科共有284,298個註冊戶口，其中活躍用戶有886個，主要嚟自香港同海外，當中有12個管理員同2個事務員幫手管理成個網站。
而家粵文維基文章數量排位去到第66位。之前粵文維基有四次去到第79位後都跌返落嚟，分別係：2010年1月頭到1月中、2015年1月頭到8月底、2015年10月頭到11月中、2016年3月頭到3月底。2016年5月中到5月底，排位頭一次上第78位，之後一度失守，到同年9月底收復返。跟住粵文維基維基排名一路穩步上揚，2018年1月中上過第73位，不過好快跌返落嚟，直到2020年3月底收復返，再響4月底升上第72位，之後排名一路升，2021年7月頭一次上到65位，同年12月失守；2022年6月第二度上到65位，同年8月失守，跌返落66位。
編者邊度嚟[編輯]
|
讀者邊度嚟[編輯]
| ||||||||||||||||||||||||||||||||||||||||||||||||||||||||||||||||||
里程碑
[編輯]- 2006年3月30號：有 100 篇文。
- 2006年9月8號：有 1,000 篇文。
- 2007年4月28號：打入維基百科頭一百大種話，當時約莫有2,900篇文。
- 2007年9月23號：有 5,000 篇文。
- 2009年1月26號（牛年初一）：有 10,000 篇文。
- 2009年5月4號：喺用戶喜好設定嘅架生仔加入「傳統字同簡化字對換」，方便用簡化字嘅用戶
- 2011年2月28號：有 15,000 篇文。
- 2012年5月18號：有 20,000 篇文。
- 2013年8月11號：有 25,000 篇文。
- 2014年5月11號：有 30,000 篇文。
- 2015年2月19號（羊年初一）：有 35,000 篇文。
- 2015年9月14號：有 40,000 篇文。
- 2016年4月29號：有 45,000 篇文。
- 2016年12月30號：有 50,000 篇文。
- 2017年7月1號：有 55,000 篇文。
- 2017年9月24號：有 60,000 篇文。
- 2018年2月16號（狗年初一）：有 65,000 篇文。
- 2018年12月13號：有 70,000 篇文。
- 2019年11月12號：有 75,000 篇文。
- 2020年3月31號：有 80,000 篇文。
- 2020年5月29號：有 85,000 篇文。
- 2020年7月20號：有 90,000 篇文。
- 2020年8月8號：有 95,000 篇文。
- 2020年8月12號：有 100,000 篇文。
- 2020年12月18號：有 105,000 篇文。
- 2021年5月3號：有 110,000 篇文。
- 2021年7月11號：有 115,000 篇文。
- 2021年10月9號：有 120,000 篇文。
- 2022年6月30號：有 125,000 篇文。
- 2023年2月2號：有 130,000 篇文。
- 2023年11月5號：有 135,000 篇文。
- 2024年5月17號：有 140,000 篇文。
彈
[編輯]成立嘅根據
[編輯]有批評認為，由於粵文維基百科同中文維基百科都係寫漢字，所以粵文維基百科無必要獨立存在。不過，隨著多個國家各種方言嘅維基百科嘅建立（其中包括多個唐文維基百科），粵文維基百科嘅存在已經有咗好多個板可以參照。亦有人認為，所謂方言只係官方重視一種語言而輕視另外一種語言嘅結果，實際無所謂嘅方言，粵文並唔係一種方言而係一種獨立嘅語言。大多數粵文維基百科嘅編者同意爾個觀點。另外有人認為，使用同一種文字並唔影響粵文維基百科獨立存在，例如多種歐洲語言都用拉丁字母，但係佢哋係獨立嘅語言。
另外考慮到無論係喺港澳定係內地粵文地區大家平時睇嘅書報都係用中華民國國語書寫，因此有人認為國語事實上更符合粵文人口嘅閱讀習慣。而由於粵文維基百科多數文唔夠中文維基百科咁充實，更加令人質疑粵文維基百科嘅實用性同必要性。更有人覺得粵文維基百科只有體現粵文獨立性嘅象徵意義。不過，只要將兩邊講同一樣嘢嘅文對比下，就會發現，有部分的確係粵文維基百科嗰篇，比中文維基百科嘅更好更豐富。
粵文用字用詞
[編輯]有批評意見提出，粵文有好多常用字嘅正確寫法並未查明，有啲詞亦無標準寫法。爾個係粵文維基百科發展期間，客觀存在嘅問題。為此，爾度開咗專門版面來規範字詞嘅用法，將渠逐漸解決。
有人認為，粵文書面表達同中文普通話本身差別唔大，不過喺粵文維基百科，有啲編者就特登用口語來突顯兩樣嘅差異，例如：雖然粵文入面都有食物同食品爾兩個詞，但係粵文維基百科個別編輯者情願揀個同普通話唔同，又好少喺文字上用到嘅「嘢食」。對此，粵文維基百科編者回應話，維基係實用嘅工具，而且過度口語化嘅質問，喺20世紀初白話文運動嘅時候已經出現過好多次。
有意見批評，粵文維基百科入面用咗太多粗口字，甚至攞來做性器官嘅名，又聲稱爾個係爾度嘅特有現象。其實噉係對部分粵字用法嘅誤解。
Info：粵語白話文用字
粵維嘅文章，可以有呢啲有粵語特色得嚟、同時又合乎百科客觀原則嘅用法：
用法 例句 呢句例句會喺邊度見到？ 啱啱好 「地球嘅溫度啱啱好，容納得到生命。」 講生命或者地球等課題嘅文 成日 「蜜蜂成日會用佢哋嘅針嚟攻擊敵人。」 講蜜蜂或者昆蟲等課題嘅文 XX 吓 「灰姑娘同王子跳跳吓舞，就到咗十二點鐘。」 講灰姑娘以至其他童話故事嘅文 諗頭 「科幻作品好多時都會講到當代科學上嘅重要諗頭。」 講科幻文學相關課題嘅文 硬淨 「鋼非常硬淨，一般認為用鋼起建築物係好穩陣嘅。」 講建築相關課題嘅文 但係無論係邊隻語言嘅維基，除非一篇文係講粗口相關嘅課題，否則就應該唔會有粗口出現。
繁簡爭議
[編輯]有維基用家覺得粵文維基百科淨係用深筆字，無照顧到簡筆字用家嘅需要。為此，2009年5月4號，粵文維基百科行出咗繁簡字處理嘅第一步，整咗個Javascript寫嘅架生，但係後來從2010年7月1號開始用落有問題。關於深筆字同簡筆字點樣處理仲喺度拗緊。 2013年8月有用家重新執過個架生，解決咗部分問題，並且提供源代碼同搜索結果轉換等新功能。
地域中心問題
[編輯]由於粵文維基百科嘅參與者多數係香港人，有人認為粵文維基百科好可能會出現地域中心。不過，粵文維基百科並唔拒絕香港以外地區用家嘅編輯，亦唔會將啲文改到更啱香港人嘅樣。2013年起有幾個廣東省嘅用家，持續活躍參與，加入咗唔少同廣東有關嘅內容。
參考
[編輯]- 維基媒體mailing lists：[1][2]（2004年12月），[3]（2005年1月），[4]（2005年2月），[5][6]（2005年9月），
- 中文維基百科嘅辯論：[7]（2004年12月），[8]（2005年6月）
- 元維基建議書
- meta:Requests for new languages/Wikipedia Cantonese（第一次建議書，因為申請程序改革而關閉）
- meta:Requests for new languages/Wikipedia Chinese languages（夾埋吳語嘅建議書，因為申請程序改革而關閉）
- meta:Requests for new languages/Wikipedia Cantonese 2（第二次建議書，通過）
- 粵文維基全部資料（個人資料除外）
- Wikipedia:Wikipedia嘅命名；Wikipedia:字詞命名
- Wikipedia:Wikipedia嘅命名/粵文維基百科
- ↑ "Legal: Data publication guidelines". 《維基媒體基金會》. 2023年10月18號.