朝代
朝代、王朝、皇朝（英文：dynasty、house）係指由同一個家族通過唔同嘅方式同形式，以君主制實施世襲統治嘅政權同相應嘅歷史時期。世界上延續時間最長而且重存在嘅王朝係日本皇室，由公元前660年實行統治到而家。
喺君主制國家運用權力進行統治嘅家族集團可以叫做「王室」或者「王家」，又如果君主嘅頭銜係皇帝就可以叫做「皇室」或者「皇家」，而喺中華文化圈入便嘅國家亦都可以叫呢種家族集團做「宗室」。
史學家通常將一啲國族同文明，例如古埃及、中國，以王朝更迭嘅形式進行歷史分期。所以，「王朝」呢個詞可以用來劃分由一個家族統治嘅時代，即係「朝代」，同埋對呢個期間所發生嘅事件、趨勢、文物等進行論述。
公元20世紀之前，各地大部分嘅王朝都係實施父系繼承制度，好似法蘭克人實行嘅薩利克法。喺女性可以合法繼承王位嘅情況之下，女性君主嘅後代繼承佢嘅位之後，一般都會採用父系嘅命名方式，所以通常睇成係新王朝嘅成立。但係，歐洲嘅一啲國家近代以來通過法令等唔同方式喺女性君主或者女性王室成員嘅後代登基之後仍然喺法理上延續當朝嘅名號，喺名義上避免咗改朝換代。例如：英國國會響1952年4月通過決議規定女王伊利沙伯二世嘅後代喺繼承王位之後繼續使用王朝「溫莎」嘅名。女性君主或者女性王室成員嘅後代喺即位之後重保留住王朝原來嘅名號呢種情況，係由俄羅斯帝國響公元18世紀第一次實行：安娜·彼得羅芙娜嘅仔彼得三世喺成為皇帝之後重繼續使用羅曼諾夫王朝嘅名，雖然如果按照傳統佢就係霍爾斯坦－戈托普－羅曼諾夫王朝嘅第一位君主。其他嘅王朝實施母系繼承制度，喺唔需要通過法律程序或者其他嘅操作嘅情況之下通過女性嘅後代傳承王朝嘅名號，如同南非林波波省境內嘅祈雨女王嘅王位。
唔係所有嘅君主制政治實體都係由王朝統治嘅；而家存在嘅例子有安道爾親王國、梵蒂岡城國同耶路撒冷、羅得島及馬耳他聖約翰主權軍事醫院騎士團。歷史上亦都有唔屬於任何王朝嘅君主，例如倫巴底王阿里奧亞爾同拜占庭帝國皇帝福卡斯。有啲王朝統治主權國家入便嘅非主權政治實體，如同而家馬來西亞境內嘅王朝同埋統治緊阿拉伯聯合酋長國轄下七個酋長國嘅幾個王朝。
今日統治緊主權國家嘅王朝一覽[編輯]
而家有44個君主制主權國家，其中有42個由王朝實行統治。
- 溫莎王朝[a][b]
- 哈利法王朝
- 比利時王朝[d]
- 旺楚克王朝
- 博爾基亞王朝
- 諾羅敦王朝[e]
- 士叻斯域－荷斯地因－森訥堡－格呂克斯堡王朝[f]
- 德拉米尼王朝
- 日本王朝[g]
- 哈希姆王朝[h]
- 薩巴赫王朝
- 莫舒舒王朝
- 列支敦斯登王朝
- 盧森堡－拿修王朝[i]
- 盤陀訶羅王朝[j]
- 格里馬爾迪王朝
- 阿拉維王朝
- 奧倫葉－拿修王朝[l]
- 賽義德王朝
- 薩尼王朝
- 沙地王朝
- 波旁－安茹王朝[m]
- 貝爾納多特王朝
- 卻克里王朝
- 圖普王朝
- 納哈揚王朝[n]
註[編輯]
- ↑ 溫莎王朝源自韋廷王朝嘅分支薩克森－哥堡－哥達王朝。1917年，王朝嘅名正式由「薩克森－哥堡－哥達」改成「溫莎」。
- ↑ 伊利沙伯二世統治之下嘅主權國家可以稱為「英聯邦王國」。
- ↑ 3.0 3.1 3.2 王室領地；唔係英國本土或者海外屬土嘅一部分。
- ↑ 比利時王朝源自韋廷王朝嘅分支薩克森－哥堡－哥達王朝。1920年，王朝嘅名正式由「薩克森－哥堡－哥達」改成「比利時」。
- ↑ 諾羅敦王朝係跋摩王朝嘅分支。
- ↑ 石勒蘇益格－荷爾斯泰因－索恩德堡－格呂克斯堡王朝係歐登堡王朝嘅分支。
- ↑ 日本王朝，又叫「大和王朝」或者「菊花王朝」，係世界上延續時間最長同埋重實行緊統治嘅王朝。呢個王朝由成立到而家，已經無間斷統治咗日本二千幾年。
- ↑ 哈希姆王朝係阿里王朝嘅分支。
- ↑ 盧森堡－拿修王朝源自拿修王朝同波旁－帕爾馬王朝嘅分支拿修－魏爾堡王朝。
- ↑ 盤陀訶羅王朝係而家統治緊彭亨同登嘉樓嘅王朝。現任彭亨蘇丹係馬來西亞最高元首。
- ↑ 馬來西亞最高元首嘅位係由統治者會議喺境內九位世襲統治者之中遴選出嘅，任期五年。
- ↑ 奧倫葉－拿修王朝係拿修王朝嘅分支。另外，威廉亞歷山大通過卑雅特歷絲亦都有利珀王朝嘅血統。
- ↑ 波旁－安茹王朝係波旁王朝嘅分支。
- ↑ 納哈揚王朝係而家統治緊阿布扎比嘅王朝。現任阿布扎比酋長係阿拉伯聯合酋長國總統。
- ↑ 阿拉伯聯合酋長國總統嘅位係由聯邦最高委員會任命嘅，任期五年，由1971年建國以來一直都係由阿布扎比酋長出任。