海幢寺

出自維基百科,自由嘅百科全書
(由海幢公園跳轉過嚟)
海幢寺大雄寶殿塔殿
廣州市文物保護單位
喺邊海珠區南華中路188號
古建築
時代清朝
4-5 [註 1]
登錄1993年8月 [註 1]
地圖
Map

海幢寺(幢讀唐,粵拼hoi2 tong4 zi2)係喺廣州河南嘅其中一棟,佔地大概1.97萬方,係廣州五大叢林(另幾大分別係光孝寺華林寺六榕寺同毀咗嘅長壽寺[1])之一。喺大清時期係第一個向外國人開放嘅佛教寺院,喺大中華史入邊有過好重要嘅文化、政治同外事功能[2]。1993年8月,海幢寺被定為廣州市文物保護單位。

海幢寺原址喺南漢時,係做皇家嘅園林,入邊仲起咗個千秋寺,後尾就丟荒再做埋民房。到咗明代末年,有商人再買低改作自己嘅私家花園,後再轉贈俾光牟、池月兩位法師,就改造成最初嘅海幢寺[3]

[編輯]

1860年廣州府城地圖中嘅海幢寺

喺明代後期富商郭龍岳買低咗個地皮,同自己起咗個私家花園「蘭園」。收尾光牟、池月兩位僧人向郭氏募緣得到咗幅地,就改建做佛堂,佢哋係根據咗佛經「海幢比丘梵文Sa^gara-dhvaja)潛心修習《摩訶般若波羅蜜多心經》成佛」嘅意思,將佛堂改名做海幢寺。[4][5]

平南王屠廣州城後[編輯]

喺清軍屠城佔據咗廣州後,平南王尚可喜聽從咗天然和尚嘅勸導,帶頭捐錢俾海幢寺擴建,以超度十日屠城而屈死嘅亡魂。喺尚可喜嘅支持下,新建立嘅官府內外人等,都一齊跟著捐錢俾寺院,而陸續買到寺隔離啲田地搞擴建。由康熙五年(1666年)去到康熙十八年(1679年)嘅十幾年入邊,成個寺院就起到有23間堂舍。其中平南王嘅老婆、王妃舒氏就捐建咗大雄寶殿,平南王本人就捐建咗天王殿,總兵許爾顯捐建咗韋馱殿、伽藍殿,廣東巡撫劉秉權捐建咗山門(而家嘅南華中路度,位置原本係海皮)……隨著寺院啲堂舍猛咁擴張,最初起嘅佛堂、准提堂都改成咗客堂,仲起埋回廊環繞著凸顯壯觀。原本好樸素嘅海幢寺,仲開始用嗮啲綠琉璃磚瓦做屋頂,呢樣建材喺嗰時係最華麗名貴嘅,連啲顯赫嘅王府都未必會用到[3]

中華民國後[編輯]

中華民國初期,當局將寺南北兩側嘅地,割咗出嚟改建成南華路同福路,而寺院嘅面積就大幅縮減,部分寺地仲轉咗成私人地。粵東紅十字會會長陸如磋就試過喺民國五年(1916),將一幅佢得到嘅、原屬海幢寺普同塔嘅地捐咗俾紅十字會[3]。開闢同福路嘅時候係腰斬咗個寺園成南北兩部分。到咗民國十七年(1928年),廣州市政府再將部分嘅海幢寺房地劃出改做「河南公園」,喺民國廿二年(1933年)9月改名做「海幢公園」。到中華民國政府遷去台灣前,海幢寺唔少嘅殿房都因為開馬路而拆咗,剩低嘅有大雄寶殿、天王殿、舍利塔殿等。

海幢寺普同塔嘅畫(1903年)[6]
海幢寺僧(1903年)[6]

1949年中共建政後,試過幾次修葺個公園,而寺度仲有乾慧、素仁兩位僧人留守打理。

到咗1966年文化大革命海幢寺遭遇浩劫,四大天王殿被啲紅衛兵清拆,寺入邊啲佛像被揼爛嗮,文物大多流失同損毀。到咗1980年代尾,大雄寶殿就變成音樂茶座兼舞廳。

廣州市佛教協會喺1992年獲准接收咗殿堂。到咗1993年1月就成立埋海幢寺重修委員會,同年3月7號經廣州市人民政府批准,海幢寺舉行灑淨儀式,恢復返宗教活動,由市佛教協會副會長新成法師擔任方丈,同時負責海幢寺嘅重修復建。成個重修嘅工程共投入咗1000幾萬,修復返大雄寶殿,重建咗天王殿、塔殿、放生池同7层高嘅僧舍、藏經閣綜台樓等。1997年又喺大雄宝殿前地東側,新起咗座叫寶嚴塔嘅石塔。

大雄寶殿(1840年代)

用途[編輯]

指定嘅外商遊覽地[編輯]

清代去廣州做生意嘅外商同啲家屬,朝廷只俾佢哋喺官府指定嘅十三行商館範圍度活動,仲要求喺季風後、佢哋搞完交易就要退去長期嘅居留地澳門。外商受唔到啲咁嚴重嘅人身限制、仲多番向官府抗議。為咗安撫外商,收尾朝廷同地方官府就同意咗放寬限制,會適當咁擴大自由活動嘅範圍。據載喺乾隆五十九到六十年間(1794年—1795年),根據留粵英商波朗嘅稟求,經埋兩廣總督長麟嘅核准,大清朝廷開始准許咗外商喺每月嘅初三、十八兩日,可以過海到河南嘅海幢寺同陳家花園郊遊[7];嘉慶二十一年(1816),兩廣總督蔣攸銛再批准咗十三行外商,可以喺每月初八、十八、二十八日,由官員帶領同通事(翻譯)陪同、過海到河南嘅海幢寺同花地灣郊遊,每次限十人[8]

官府嘅外交場地[編輯]

英王佐治三世派遣嘅馬加爾尼使團,喺1793年到北京拜會完乾隆,返程嘅時候南下最尾到咗廣州,嗰時新任嘅兩廣總督長麟就揀咗寺院接待同送別使團。海幢寺有著多年接待旅粵遊散外商嘅經驗,喺當局防範「外夷」嘅時代,以佢嘅地理位置優勢,就成為咗朝廷接待「粵道貢國」使臣嘅場地,逐步參與埋清政府嘅對外接待事務[9]。1794年荷蘭駐八打威(Batavia)總督派遣咗使團去祝賀乾隆皇帝登基六十周年,使團經澳門到咗廣州後,喺10月13日長麟又係喺海幢寺接待咗荷蘭使團。1817年1月,再次喺北京外交失利嘅英國譚夏士(Lord Amherst)使團返抵廣州,喺1月7號兩廣總督蔣攸銛同樣咁揀咗喺海幢寺同譚夏士會晤。

俄國皇太子尼古拉(即末代沙皇尼古拉二世),22歲陣就環遊世界,旅程中喺1891年(光緒十七年)4月5號到8號就逗留過廣州,由沙面嘅法國領事館安排食宿,受到埋兩廣總督李翰章(李鴻章兄弟)嘅隆重接待。抵埠嘅嗰日喺晚餐前,皇儲就化名搭艇仔去咗河南島,參觀埋上邊嘅佛寺(即海幢寺)[7]

其他[編輯]

喺清末,南武公學會愛咗海幢寺嘅諸天閣、圓照堂來辦學;中華民國建立後,部份地方亦曾經畀政府拎來做「海幢公園」。而家恢復返做「海幢寺」,仲重建咗天王殿、照壁、山門同牌坊。

存物同重建物[編輯]

寺入邊留低咗明朝嘅鷹爪蘭、澹歸和尚墨寶同詩稿、幽冥鐘、清朝碑記。原址近岸,山門側近有「珠海波光」一景,家下因填海而離江稍遠。

到現代大雄寶殿供奉嘅3座銅佛,高有10幾米,叫做三世佛,即過去、現在、未來佛。過去佛係燃燈佛,現在佛係釋迦牟尼,未來佛係彌勒菩薩。重建後嘅天王殿入邊嘅四大天王,無論高度、體積都係廣東入邊嘅寺院之最。

軼事[編輯]

咸豐十年(1860年)英法聯軍入北京,火燒圓明園。英軍喺華南佔領咗九龍司,仲一度兵臨廣州,佔據埋貢院,致使嗰年南海、番禺兩縣童生嘅應試地點,就改咗去海幢寺[7]

生於丹麥嘅安徒生,佢出名嘅作品《安徒生童話》入面,有個《沒有畫的畫冊》,喺呢個故事嘅第廿七夜,有提到過中國其中一個城市嘅景象。據中山大學歷史系教授蔡鴻生喺《廣州海事錄——從市舶時代到洋舶時代》嘅考證,〈第廿七夜〉喺1840年創作,而嗰陣中西通商嘅港口得廣州一個,而個故仔度描述嘅廟宇同四圍啲景色,係有著海幢寺同十三行嘅影子[10]

畫廊[編輯]

[編輯]

  1. 1.0 1.1 1963年3月1號,廣州市人民委員會公佈首批市文保單位,公佈名「海幢寺」,編號「16」,1966年8月20號撤銷。1983年8月13號,市政府重核定公佈名單時,踢走海幢寺等受文革破壞嘅四道文物。1993年8月,市政府公佈第四批市文保單位,公佈名「海幢寺大雄寶殿塔殿」,編號「5」。

[編輯]

  1. 长寿路有座长寿寺?真的!还曾是广州名流聚会地…… 2017-09-15 荔湾人文
  2. 乾隆年代外销画3个世纪后回到广州 2017-12-12 大洋网
  3. 3.0 3.1 3.2 滄海遺珠——海幢寺僧人詩歌(一) 鄭運蘭 佛門網 - 香港佛教網站 2020-07-07
  4. 祝鵬 (1984年10月). 沿. 學林出版社.
  5. 鄧端本 (1987年10月). . 廣東旅遊出版社.
  6. 6.0 6.1 Wood, Dick (23 December 1903), "Come with Me to China", The Tacoma Times, p. 2.
  7. 7.0 7.1 7.2 海幢寺:清代广州的涉外寺院 互聯網檔案館歸檔,歸檔日期2020年8月11號,. 蔡鸿生 广州文史
  8. 這座隱藏在珠江南岸的海幢寺,曾是廣州官方外交場所 2020-02-13 十七君的詩書見聞
  9. 張龍平 (2018年). 西 (PDF). . 澳門大學澳門研究中心,澳門基金會. 總第89期: pp.71. 原著 (PDF)喺2020年8月12號歸檔. 喺2020年8月11號搵到. {{cite journal}}: |pages= has extra text (help)
  10. 安徒生童話點解提廣州?無去過都識寫? 資料嚟自《金羊網》 2019-02-24

出面網頁[編輯]