獨角仙

How to read a taxobox 獨角仙
一隻公嘅獨角仙成蟲
物種分類
界 動物界 Animalia 門 節肢動物門 Arthropoda 綱 昆蟲綱 Insecta 目 甲蟲目 Coleoptera 科 金甲蟲科 Scarabaeidae 亞科 兜蟲亞科 Dynastinae 屬 獨角仙屬 Allomyrina 種 獨角仙 A. dichotoma

獨角仙duk6 gok3 sin1，又有叫日本兜蟲或者雙叉犀金龜，係金甲蟲科兜蟲亞科之下嘅一個物種。獨角仙係其中一種最出名嘅兜蟲：佢哋廣泛噉分佈喺東亞多地，包括日本列島、臺灣、朝鮮半島至華東等地嘅森林都見得到佢哋嘅蹤影；佢哋全身有硬淨嘅「甲」保護住（多數甲蟲都有嘅特徵），同多數嘅兜蟲一樣，佢哋當中啲公嘅頭前方有大隻嘅角，啲公會用角嚟打交爭地盤同埋交配權利。

喺日本文化裏面，獨角仙有一定嘅文化意義：獨角仙公嘅角，畀日本人覺得望落似武士戴嘅頭盔kwai1－事實係，獨角仙個日文名就係嚟自武士兜同蟲嘅結合嘅；獨角仙廣受日本人喜愛，日本嘅細路好興養佢哋做寵物，而且日本嘅媒體作品仲時不時會用獨角仙嘅形象，例子可睇吓《寵物小精靈》呀噉。

形態

睇埋：兜蟲

獨角仙係兜蟲下嘅一個物種。

• 獨角仙以兜蟲嚟講唔算大隻。佢哋成蟲可以去到成 8 cm 咁長，當中公（4 - 8 cm）體型大過乸（4 - 6 cm）些少；
• 無論公定乸，一隻成年嘅獨角仙同多數嘅甲蟲一樣「有硬甲」：佢哋由頭到腹都畀一浸又厚又硬淨嘅外骨骼（尤其係翼鞘）保護住，背脊有兩對翼，一對厚嘅翼加一對好似薄膜噉嘅翼，令到獨角仙曉飛，仲能夠垂直起飛；喺色水上，獨角仙屬於比較暗淡嘅甲蟲－佢哋身體軟嗰部份呈啡色，而硬淨嘅外甲就係深啡至黑噉嘅色，唔似得（例如）外甲呈淺綠噉色嘅大力士甲蟲（；另一種出名嘅兜蟲）。
• 同第啲兜蟲一樣，獨角仙公乸明顯唔同樣：公同乸嘅成蟲最樣眼嘅分別係，獨角仙公嘅頭前方有兩隻角，一大一細，兩隻都分叉，當中大啲嗰隻會成 Y 字噉形；喺夏天（交配季節）嗰陣，啲獨角仙公會用佢哋嘅角嚟玩相撲，嘗試用力量制服對手，一嘢撬到對手飛起，而打贏咗嘅公就會得到地盤；除此之外，一隻獨角仙公隻角大，反映咗佢喺幼蟲階段嗰時得到良好嘅營養－啲乸會偏好同角大又強壯（爭到地盤）嘅公交配。
• 獨角仙成蟲係食齋嘅，最鍾意食啲含有豐富糖份嘅植物物料，例如係樹汁、花蜜同埋生果呀噉，成日會成群噉喺樹上面聚集搵樹汁飲；有陣時，啲獨角仙公會為咗爭優質嘅飲樹汁位置而用佢哋嘅角打交，打贏咗先有得喺呢啲靚位飲樹汁。
• 獨角仙主要係喺夜晚活動嘅。

• 
  2008 年兩隻獨角仙成蟲；左邊嗰隻係公，右邊嗰隻係乸。
• 
  2004 年影到嘅獨角仙；
  一隻公嘅獨角仙頭前方，有一大一細兩隻角。
• 
  2010 年有隻獨角仙公喺度爬樹。
• 
  2018 年有幾隻獨角仙喺樖樹上面聚集。
• 
  2013 年一日日頭之下嘅一隻獨角仙公
• 
  成 8.2 厘米咁長嘅一隻獨角仙公（算係比正常大少少）
• 
  2014 年一晚影到嘅一隻獨角仙公
• 
  呢條泥入面嘅獨角仙幼蟲生到去第三齡，就快要結蛹。

生命歷程

一條獨角仙幼蟲

睇埋：完全變態

同第啲甲蟲一樣，獨角仙係行完全變態嘅，一世蟲分蛋、幼蟲、蛹同成蟲四個階段，條命大約有 12 個月咁長。

獨角仙大半世都喺泥入面渡過：喺夏天尾，大咗肚嘅獨角仙乸會將啲蛋分散式噉生喺泥裏面；蛋會喺大約 10 日至 14 日內孵化，變成幼蟲；獨角仙啲幼蟲一條條噉形，白白哋噉色；佢哋一出世就會食腐殖質（簡化講就係泥土入面由植物同動物物料腐爛形成嘅一啲有機物質）維生；佢哋要一路猛咁食嘢儲起養份，一路脫皮增齡，幼蟲期會維持 8 個月左右，生到咁上下（過咗第三齡）就會結蛹，而蛹嘅時期會維持大約 2 個禮拜。

蛹多數會喺春去夏來嘅時期（6 月至 7 月）嗰陣變成成蟲：成蟲可以有成 4 個月咁耐命，佢哋由個蛹度捐咗出嚟之後，就要離開泥土，去搵伴侶交配傳宗接代－啲獨角仙公會開始用角打交爭地盤，而啲獨角仙乸就會搵啲角又大又靚嘅公做對象交配；交配過後，啲乸就會搵地方生蛋；而無論公定乸，獨角仙都唔會有能力越冬－成蟲多數到咗 9 月中至 10 月頭（秋天）就會冚唪唥死晒。

喺秋冬期間，獨角仙啲幼蟲會住喺暖笠笠嘅泥入面，一路食嘢一路過冬，跟住重覆上述呢個由生到死嘅過程。

文化影響

15 世紀一個武士兜

睇埋：昆蟲相撲

獨角仙喺日本文化入面有咁上下地位。

• 獨角仙公嘅角 Y 字形噉分叉，畀好多人覺得望落有些少似日本武士傳統戴嘅頭盔－事實係，獨角仙個日文名就係嚟自 kabuto（武士兜）同 mushi（蟲）嘅結合嘅；再加上獨角仙公又出晒名成日會打交，令到獨角仙公近乎成為咗「鬥志」嘅象徵。
• 《哥斯拉》、《幪面超人》同埋《寵物小精靈》等多套出名嘅日本媒體創作品，都有用到獨角仙嘅形象，例如《寵物小精靈》入面嘅精靈 No. 214 赫拉剋羅斯個設計就係基於獨角仙嘅。
• 日本嘅細路好興養獨角仙做寵物：獨角仙相對乾淨、易打理、對人類冇害、會食生果（生果係人類都成日食嘅嘢，所以對多數人嚟講易搵），所以好易養；啲細路仲會攞自己養嘅獨角仙玩昆蟲相撲－佢哋會將兩隻公嘅獨角仙擺喺一條木頭上面，再睇兩隻獨角仙打交；因為獨角仙咁有人氣，日本嘅寵物相關舖頭仲會賣獨角仙，而喺 2020 年代初，一隻典型嘅獨角仙無論公乸，據講賣價都係喺 2,000 至 4,000 円日圓左右。

... 呀噉。

睇埋

• 兜蟲
• 鍬甲蟲
• 武士兜

文獻

• Hongo, Y. (2003). Appraising behaviour during male-male interaction in the Japanese horned beetle Trypoxylus dichotomus septentrionalis (Kono). Behaviour, 140(4), 501-517.
• Hongo, Y. (2010). Does flight ability differ among male morphs of the Japanese horned beetle Trypoxylus dichotomus septentrionalis (Coleoptera Scarabaeidae)?. Ethology Ecology & Evolution, 22(3), 271-279.
• Iguchi, Y. (1998). Horn dimorphism of Allomyrina dichotoma septentrionalis (Coleoptera: Scarabaeidae) affected by larval nutrition. Annals of the Entomological Society of America, 91(6), 845-847.
• Karino, K., Seki, N., & Chiba, M. (2004). Larval nutritional environment determines adult size in Japanese horned beetles Allomyrina dichotoma. Ecological Research, 19(6), 663-668.
• Ohde, T., Morita, S., Shigenobu, S., Morita, J., Mizutani, T., Gotoh, H., Zinna, RA., Nakata, M., Ito, Y., Wada, K., Kitano, Y., Yuzaki, K., Toga, K., Mase, M., Kadota, K., Rushe, J., Lavine, LC., Emlen, DJ. and Niimi, T. (2018) Rhinoceros beetle horn development reveals deep parallels with dung beetles. PLOS Genetics, 14: e1007651.
• Siva-Jothy, M. T. (1987). Mate securing tactics and the cost of fighting in the Japanese horned beetle, Allomyrina dichotoma L.(Scarabaeidae). Journal of Ethology, 5(2), 165-172.

拎

• Photos of Allomyrina dichotoma septentrionalis （英文）
• Photos of Allomyrina dichotoma tunobosonis （英文）
• Photos of Allomyrina dichotoma （英文）
• Japanese Beetle Brothers. TV Tropes （英文）