範例理論

範例理論（粵拼：faan6 lai6 lei5 leon6；英文：exemplar theory）係一套認知心理學理論，講人腦點樣儲起啲概念嘅。根據範例理論個睇法，人會將物件同概念儲存化成特定實例或者「範例」噉嘅型式，儲喺記憶嗰度，每當佢哋要決定眼前嘅事物「係咪 XXX」嗰陣，佢哋會將件事物同佢哋入便嗰個「XXX 嘅範例」對比，從而決定件事物算唔算係 XXX。

例如家陣要定義咩係雀鳥，講嘢嘅人可以提出「烏鴉、燕子同天鵝都係典型嘅雀鳥」噉嘅講法。靠範例做判斷嘅思考法，傾向排除一啲邊緣個案，例如企鵝都係雀鳥，但係喺特徵上同啲「典型例子」有明顯差異（企鵝唔識飛，但啲典型例子冚唪唥都識）所以係邊緣個案。