紅星

出自維基百科,自由嘅百科全書
Jump to navigation Jump to search
紅星
蘇聯國旗度嘅紅星

紅星粵拼hung4 sing1),常見嘅樣係紅色五角星(符號:),係個常用符號,呢個符號表達嘅含義好多樣,主要係宗敎、政治意味,比如基督教嘅聖誕樹頂有紅星裝飾、意識形態方面有共產主義。呢個符號常見喺呢啲事物度:國徽國旗、其他類型嘅勳章、節慶裝置、紀念建築標誌

20世紀以來,紅星作爲基於列寧主義共產主義嘅特別符號,用得好多下,佢嘅出鏡同另一個共產主義象徵「金星英文Gold Star」(又叫黃星)咁上下多,後者可以喺諸如中華人民共和國國旗、越南現行國旗度見到。而喺蘇聯國旗度,紅星鑲喺金星入面,再搭埋錘同鐮喺塊紅旗度。紅星同錘、鐮嘅組合亦見於其他共產主義旗徽度。

不過紅星呢個符號唔係浄衹共產主義嘅意思,亦有其他嘅用法、含義。

共產主義符號[編輯]

意味[編輯]

作爲共產主義乃至社會主義象徵,五角紅星嘅五隻角有佢嘅意義。有講法話象徵住勞動者勞動所用嘅五隻手指,同時象徵住世界勞動者分佈嘅五大洲;又有種講法話,呢五隻角代表共產主義領導下嘅五個社會群體,即係後生軍人、工人、農民、學者(泛指知識階層)。紅星一般象徵住共產主義政黨支配、領導下嘅社會新秩序,而呢種秩序據共產主義意識形態嘅睇法,係正義嘅,所以紅星係佢正義嘅表徵。

起源[編輯]

紅星作爲共產主義符號,可以追溯到一戰即將結束時嘅俄國內戰(1917年~1922年)。1917年,同德意志帝國奧匈帝國打仗嘅軍輸咗,被迫撤退到莫斯科,同莫斯科啲守軍撈埋一齊。爲咗分開莫斯科本地守軍同撤退嘅俄軍部隊,守軍軍官喺佢啲士兵嘅帽度加粒五角星。日後呢班莫斯科守軍同蘇聯紅軍布爾什維克政府合流,啲士兵就將粒五角星塗紅,因爲紅色象徵共產主義,於是就有咗紅星呢個共產主義符號[1]

有種講法話,紅星係紅軍當中嘅猶太人士兵引入嘅嘢。呢種講法話,喺俄國革命時,啲猶太士兵將俄國當作「應許之地」,相信猶太人會喺俄國企返起身,於是佢哋就將自身標誌嘅猶太星塗紅。呢種講法存疑,唔係幾可靠。呢種講法嘅根由在於排猶反共有重疊之處,當年俄國革命爆發後,掀起排猶風潮,排猶嘅人始終認爲共產主義起勢係猶太人搞鬼[2]。而實際上猶太人標誌嘅大衛星六角星,共產主義者嘅紅星係五角星,呢兩樣嘢實質唔同,呢種講法可能撈亂咗佢哋,然後曲解出噉嘅睇法。

除咗傳得最開嘅區分守軍嘅講法外,重有種講法話,紅星源自托洛茨基尼古拉·奇里靈戈英文Nikolai Krylenko一次會面。1917年,作爲布爾什維克成員,奇里靈戈擔任紅軍總司令官,同時佢亦係個世界語者,所以佢隨身戴住世界語嘅象徵綠星徽章[3]。托洛茨基見到後問粒綠星嘅含義,奇里靈戈介紹話粒星嘅五隻角分別象徵世界五大洲。托洛茨基聽咗後,佢有個諗法,就係啲紅軍士兵都應該有粒紅星喺身,個意頭借自綠星。呢種講法有個問題,在於呢場會面冇證據確定係幾時、邊度嘅事,所以呢種講法堅定流係未知嘅。

用例[編輯]

內文: 蘇聯加盟共和國國旗

共產紅星嘅典型用法係用喺共產主義國家嘅國旗國徽度,例如蘇聯國徽南斯拉夫國旗,佢哋上面就有粒紅星。另外,西班牙加泰羅尼亞文地區嘅紅版獨立星旗(Estelada),上面嘅紅星係同時作爲分離主義社會主義嘅象徵來用。

古巴國旗。呢款國旗喺古巴革命之前用落,星係表示獨立,無關共產主義

廣義上,紅底嘅五角星都算做紅星,比如紅底黃星,雖然呢種嚴格講起應該叫金星,不過佢嘅意味同共產紅星非常接近,所以亦睇做係紅星。呢種意味嘅紅底黃星可以喺中華人民共和國國旗越南國旗見到,其中中國大陸政權國旗叫做「五星紅旗」,越南現時國旗叫做「金星紅旗」。又比如遠東共和國嘅人民革命軍嘅軍裝度有黃星,呢粒星嘅含義同紅星一樣。紅星又會同鐮同錘一齊出場,鐮錘嘜頭通常放喺紅星入面或者下面。不過唔係所有紅底五角星都係共產主義象徵,比如古巴國旗有紅底白星,呢款國旗喺古巴革命之前就用落。

1989年東歐劇變時,有好多東歐國家嘅共產政權崩潰,之後新起嘅政權紛紛脫共,鏟走佢哋國旗、國徽度粒紅星。之後浄低嘅共產國家中,蘇聯喺1991年尾解體,南斯拉夫喺1992年4月27號解體,佢哋從中分離嘅國家都喺旗徽度拋棄紅星。不過從南斯拉夫獨立嘅馬其頓共和國,雖然佢嘅國旗喺獨立後唔再用紅星旗,但佢嘅國徽一直有粒紅星,直到2009年先將國徽頂粒紅星除低。

之後更有啲國家禁紅星。比如匈牙利,喺1993年修改刑法,喺公眾場合用紅星呢個符號屬違法行爲,不過歐洲人權法院根據言論自由裁定喺匈牙利戴紅星係基本人權[4]。亦有啲前共產國保留紅星,比如蘇聯軍嘅繼承軍俄羅斯軍,脫共之後,2002年定紅星作爲俄軍軍徽[5],一直到2014年,俄羅斯軍方先宣佈用新標誌[6]。另外以前作爲蘇聯加盟國嘅現時國家,佢哋嘅軍隊、裝備等有唔少重殘留緊紅星。俄軍方經營嘅新聞紙亦係叫「紅星」(俄文Кра́сная звезда́,拉丁化:Krasnaya zvezda)。

東歐,共產政權時代(1945年~1989年)創立嘅一啲體育會、波隊會用「紅星」做名。比如貝爾格萊德紅星足球會(斯拉夫塞爾維亞文Црвена звезда,拉丁塞爾維亞文:Crvena zvezda),東德萊比錫嘅「Roter Stern」。不過非共產政權國家嘅波隊都會用「紅星」呢個名,比如法國嘅「Red Star F.C.」,瑞士嘅「FC Red Star Zürich」。

冷戰時,包括美國在內嘅反共主義陣營社會主義者都會用紅星呢個符號。喺西方世界,有時會將紅星作爲激進思想嘅表徵,比如1990年代活躍嘅搖滾樂隊討伐體制樂團,佢哋就用紅星來表示佢哋係激進派。

廣義「紅星」[編輯]

實際除咗紅色,作爲共產主義標誌嘅紅星亦可以有以下廣義版本。

其他用例[編輯]

除咗共產主義意味,紅星呢個符號又有多種用法,比如徽章(好似開拓使、軍隊嘅徽章)、商標(好似喜力啤酒、梅西百貨Mozilla瀏覽器嘅嘜頭)。

相集[編輯]

[編輯]

獎章[編輯]

建築、裝飾[編輯]

徽號[編輯]

有關嘅書[編輯]

  • Bogdanow, Alexander A. (亞歷山大·亞歷山德羅維池·波格打諾夫). 《Der Rote Stern》 (用德文寫). ISBN 9783867411974. 
  • Edgar Snow(艾德嘉·史諾) (1994年). 《Red Star over China:The Classic Account of the Birth of Chinese Communism》 (用英文寫). Grove Press. ISBN 9780802150936. 
    • 作者:(美)埃德加·斯諾;譯者:董樂山 (1979年). 《西行漫記:紅星照耀中國》 (用簡體中文寫). 生活·讀書·新知三聯書店. 
    • 作者:(美)埃德加·斯諾;譯者:董樂山 (2005年). 《西行漫記:紅星照耀中國》 (用簡體中文寫). 東方出版社. ISBN 9787506020732. 
    • 作者:(美)埃德加·斯諾;譯者:董樂山 (2011年). 《紅星照耀中國》 (用簡體中文寫). 作家出版社. ISBN 9787506020732. 
  • 長辛店機車車輛工廠廠史編委會 (1960年). 《北方的紅星:長辛店機車車輛工廠六十年》 (用簡體中文寫). 作家出版社. 
  • 今村匡平 (1967年). 《赤い星の下で 解放軍々医留用8年の記録》 (用日文寫). 信每書籍出版部. 
  • 金贊汀 (1988年9月). 《日の丸と赤い星 中国大陸の朝鮮族を訪ねて》 (用日文寫). 資訊中心出版局(情報センター出版局). ISBN 4-7958-0832-5. 

[編輯]

  1. Khvostov, Mikhail (1996年). The Russian Civil War (1) The Red Army (譯:俄國內戰【一】紅軍). Men-At-Arms. ISBN 1-85532-608-6. 
  2. "隱蔽的真相:布爾什維克領導都是猶太人". 新浪讀書. 2012年7月10號. 喺2015年10月28號搵到. 
  3. 綠星係世界語象徵,佢哋有自己嘅旗綠星旗
  4. "Wearing a red star in Hungary 'is a basic human right' (譯:喺匈牙利戴紅星「係基本人權」)" (用英文寫). Earth Times(地球時報). 
  5. "外軍掠影:軍事轉型中的俄羅斯軍隊". 解放軍報. 人民網. 2007年8月13號. 喺2015年11月11號搵到. 
  6. "Russian Defense Ministry Reveals New Military Symbol (譯:俄羅斯國防部透露新軍隊標誌)" (用英文寫). The Moscow Times(莫斯科時報). 2014年6月19號. 喺2015年11月11號搵到. 

睇埋[編輯]