臺灣史

出自維基百科,自由嘅百科全書

臺灣史即係臺灣嘅歷史,以有文獻記載計大約有4百幾年歷史咁耐,但以考古計就發現重耐之前臺灣就有人住,考古學家話喺臺南縣左鎮鄉(宜家嘅臺南市左鎮區)發現嘅人類化石至少都有成3萬年,估計啲人係喺歐亞大陸搬去臺灣,屬於舊石器時代[1]

中國文獻入面,懷疑可能係講臺灣嘅有《尚書》禹貢篇入面叫「島夷」、喺《列子》湯問篇入面叫「岱員」、《史記》秦始皇本紀叫「灜洲」。而喺《後漢書》東夷篇入面嘅「東鯷」、《三國志》吳志孫權傳、沈螢《臨海水土志》嘅「夷洲」、《隋書》流求傳嘅「流求」、《宋史》流求傳嘅「燮求」、趙汝适《諸蓄志》嘅「流求國」同「毗舍耶國」、《元史》外夷篇嘅「瑠求」,呢啲都係講臺灣。

而喺明代,嗰陣鍾意用地名代表晒成個島,根據張燮嘅《東西洋考》講,曾經叫過嘅稱呼有:雞籠(基隆)、淡水、北港、東蓄、打狗、大員。而喺明代嗰陣,將成個琉球群島叫做「大琉球」,而臺灣就叫做「小琉球」。

1624年荷蘭人去到臺灣之後,將安平港叫做「臺窩灣」,呢個本來係嗰度一個原居民部落嘅名,而明代啲人聽到呢個名之後,就演變成好多個名好似大員、臺員、大冤、大灣,最後變成「臺灣」。

臺灣本島各段歷史時期示意圖(1624年起)左起:荷西明鄭清治日治中華民國(至今)等時期,框入面個數字係大約嘅統治時間(年)。

早期臺灣[編輯]

內文:臺灣史前時期臺灣原住民

1642年之前嘅臺灣本來同澎湖係分開,各自有自己嘅歷史。而臺灣係以原住民做主體嘅一個部落社會,以平地嘅平埔族同山地嘅高山族兩個部落為主,兩個族入面又有分開唔同嘅細族。

澎湖1360年之前嘅嘢多數都係神話傳說,唔知真定假,到1360年嗰陣做咗元朝一個行政區,明朝清朝嘅政府都有派兵駐守,所以澎湖舊時嘅嘢多數都唔計入臺灣歷史入面。

荷西時期[編輯]

內文:臺灣荷西時期

荷蘭人1604年佔領咗澎湖[2],後來明朝政府兩度派兵要趕走荷蘭人,打咗好耐最後喺1642年荷蘭人轉攻南部臺灣[3],最後佔領咗大員,成功建立統治機構,而澎湖就畀返明朝政府。

荷蘭人佔領咗大員之後,喺嗰度起城堡,叫「奧蘭稔」(Orange),1627年改名叫「熱蘭遮城」(Zeelandia)。除咗城堡,又起街道。同時荷蘭人一路擴張佔領範圍,嗰陣嘅臺灣北部一早俾西班牙人佔領咗,1626年荷蘭人打到去北部,將西班牙人打走晒,同時又討伐嗰度啲原住民,最後成個臺灣俾荷蘭人控制晒。

喺荷蘭人同西班牙人統治嗰陣,喺臺灣起咗好多教堂同基督教學校,好多傳教士去咗台灣傳教,令臺灣原住民生活起咗好大變化,佢哋開始唔再過部落社會生活,而且好多都信咗基督教。

鄭氏時期[編輯]

內文:臺灣鄭氏時期

鄭成功反清復明失敗,改為東征台灣,等有個基地可以長期同清朝對抗。喺1661年4月鄭成功帶兵由金門料羅灣開始,先入澎湖,再入臺灣同荷蘭人打咗十個月,荷蘭人最終喺1662年2月1號簽約投降。

鄭成功入咗臺灣之後,建立咗台灣第一個漢人政權。鄭成功死咗之後,佢個仔鄭經繼位,大力發展經濟。鄭經喺1681年病死嗰陣,本來立佢個仔鄭克臧繼位,但馮錫範發動政變,另立鄭克塽做王。清政府收到風,知道入面亂,喺1683年7月施琅帶軍攻臺,臺灣同滿清一路打,打到9月台灣終於唔夠打,鄭克塽向清朝投降,臺灣納入清朝版圖,結束咗鄭氏三代廿三年統治。

清領時期[編輯]

內文:臺灣清領時期
《臺南地圖》作者不詳/十八世紀

康熙二十二年(1683年)滿清政府派福建水師提督施琅帶軍攻台,結束咗鄭氏三代廿三年統治,之後第二年清朝廷喺台灣設臺灣府,隸屬福建省。

滿清政府統治臺灣一直到清光緒二十一年(1895年),由於喺甲午戰爭輸咗,滿清政府被逼將台灣割讓畀日本,結束咗滿清朝廷喺臺灣二百一十三年統治。

日據時期[編輯]

內文:臺灣日據時期

1895年(清光緒二十一年、日明治二十八年),日本根據馬關條約,收咗臺灣,喺6月17號舉行「臺灣始政典禮」,正式開始統治臺灣。呢個時期嘅臺灣,包括臺灣島澎湖群島

日本一路統治臺灣到民國三十四年(1945年),由於中國抗日戰爭勝利,日本無條件投降,結束咗日本喺臺灣五十一年統治。

光復時期[編輯]

內文:臺灣光復時期

1945年中國抗日戰爭勝利,日本將佔領咗嘅中國領土,包括東北四省、澎湖群島同埋臺灣還返畀中華民國。之後重成立咗「臺灣調查委員會」負責統籌接收臺灣嘅嘢,之後臺灣就成為中華民國一個行省,又喺臺灣省設八縣九省轄市,成立行政長官公署,委任陳儀做臺灣省行政長官。

1947年2月爆發二二八事件,結果國民黨政府將行政長官公署改組做臺灣省政府

1948年國共內戰激化,國民黨大陸唔夠共產黨打,最後中華民國南京迫遷到去廣州,再去到重慶成都,最後喺1949年去到臺灣。臺灣由原本中華民國一個省,變成中華民國首都同政權管轄範圍。中華民國走咗之後,共產黨就喺大陸另行成立「中華人民共和國」政府。

呢個時候嘅臺灣,係包括臺灣島本身、澎湖群島金門馬祖,即係簡稱「台澎金馬」。

中華民國迫遷去臺灣之後,國民黨政府將政府總部定喺臺北,作為反共復國基地,但軍力唔夠共產黨打,不過由於1950年韓戰爆發,美國總統杜魯門派艦隊守住台灣海峽,隔住咗大陸對台灣攻擊。

由於美軍艦隊隔咗一隔,加上中美關係改善,周恩來1972年簽定咗上海公報之後,確定美國一個中國立場,之後發表《告臺灣同胞書》,提出「和平統一祖國」方案同「三通」主張,暫時放棄武力解放台灣。兩岸關係開始無咁緊張。而中華民國同中華人民共和國大家都唔隸屬對方,各自有自己主權。

金門心戰標語「三民主義統一中國」,1986年8月由司令趙萬富上將下令烈嶼師長龔力少將去起,翌年同因三七事件去職。

不過國民黨政府重成日都諗住反共復國,又成日驚共產黨嘅人滲入臺灣做統戰,於是臺灣立法院通過「懲治判亂罪犯條例」,又實施戒嚴,人民無論言論、集會、結社都受到限制,好多人俾國民黨政府當中共嘅人拉咗去坐監,有啲重判咗死刑,其中有好多都係判錯嘅冤案同假案。

由於政府對人民迫得太緊,民間開始有好多政治社會運動發起,特別針對人權保障、反對戒嚴、要求司法獨立、同埋民意代表要由選舉產生。

臺灣喺呢啲社會運動之下,開始有反對黨出現,民間一連串反威權統治、爭取民主自由運動,最後爆發美麗島事件「黨外」民主運動。

美麗島事件之後,國民黨政府唔可以唔改變,開始民主化、本土化、鬆弛化,放棄反共復國同三民主義統一中國嘅諗法,維持同大陸統治權分開,各自唔隸屬對方,各自有自己主權嘅狀況。

而大陸嗰陣時開始由鄧小平話事,佢提倡改革開放,認為大陸發展經濟先最重要,對於台灣,亦放棄對臺用武,認為只要喺一個中國原則入面,你唔搞我,我唔搞你,維持現狀唔變咁就無問題,又提出以「一國兩制」作為解決台灣問題基本模式。兩岸政府亦逐啲逐啲咁開放邊境,兩岸人民開始喺文化、學術同經濟上交流,兩岸關開始唔再咁敵對。

1986年民進黨成立,1987年政府開放黨禁。1988年蔣經國死咗之後,由李登輝繼任。李登輝推行民主化同本土化路線,1996年舉行咗第一次全民直選正副總統。

參考[編輯]

  1. 中華民國行政院原住民委員會,臺灣原住民介紹 互聯網檔案館歸檔,歸檔日期2007年6月25號,.
  2. 荷蘭佔領澎湖
  3. 一六二四年荷蘭人佔據大員

[編輯]