萬千星輝頒獎典禮

出自維基百科,自由嘅百科全書
Jump to navigation Jump to search

 萬千星輝頒獎典禮粵拼maan6 cin1 sing1 fai1 baan1 zoeng2 din2 lai5 》(英文TVB Anniversary Awards)係由香港電視廣播有限公司主辦嘅電視界頒獎典禮,而家頒發最佳劇集、最佳男女演員等十幾個獎項,表揚無綫電視全年表現出色嘅台前幕後藝員同團隊。

頒獎禮初頭係1997年《萬千星輝賀台慶》嘅助興環節出現,因反應好好,變成咗每年《萬千星輝賀台慶》嘅重要環節。2005年,《萬千星輝賀台慶》模仿美國《艾美獎》,重點集中喺頒獎禮部分,同埋喺海外有發行無綫劇集嘅地方做現場直播。由2006年開始,頒獎禮正式被分拆做獨立節目,做咗無綫台慶一個重點節目,之後又因應等埋播完「台慶劇」,2009年開始將舉辦時間延後到12月頭,2012年開始延後到12月中,2017年嗰屆更延後到第二年嘅1月中先至搞。