鍾嘉欣

出自維基百科,自由嘅百科全書
Jump to navigation Jump to search
鍾嘉欣
Linda chung in kowloon bay2.jpg
女演員
羅馬拼音 Chung Ka Yan
英文名 Linda Chung[1]
花名 洪白嵐、Miss Cool、嘉欣BB
國籍 Flag of Canada.svg 加拿大
籍貫 廣東省茂名市高州
出世 (1984-04-09) 1984年4月9號(34歲)
Flag of Canada.svg 加拿大溫哥華
職業 演員歌手
語言 英語粵語國語
教育程度 英屬哥倫比亞大學 教育系二年級
宗教信仰 基督教
演奏樂器 鋼琴
出道地 溫哥華
出道日期 2004年4月1號
出道作品 皆大歡喜
代表作品 溏心風暴
金石良緣
珠光寶氣
點解阿Sir係阿Sir
活躍年代 2004年至今
唱片公司 星娛樂(2008年至2011年)
海蝶音樂(東南亞地區)(2008年至2011年)
星煥國際(2011年至今)
經紀公司 TVB
網站 www.linda-chung.net
網路電影資料庫(IMDb)資訊

鍾嘉欣(Linda Chung/Chung Ka-Yan,1984年4月9號—)係一個香港女演員同埋歌手,曾經係當紅嘅無綫電視花旦。

屋企[編輯]

佢係加拿大溫哥華華裔,喺加拿大溫哥華出世,鄉下喺廣東茂名。佢屋企有阿爸阿媽、一個阿哥同一個家姐。2002年,喺溫哥華嘅譚普敦中學(Templeton Secondary School)畢業。後來,喺英屬哥倫比亞大學度讀書。同一年,佢喺英屬哥倫比亞省本拿比市麗晶廣場第一次舉辦嘅選美比賽《麗晶活力新星大賽(Crystal Cover Girl)》攞倒第一名。

簡介[編輯]

鍾嘉欣喺2003年參加溫哥華華裔小姐得到冠軍同另外嘅三個獎,之後喺2004年參加國際華裔小姐競選同樣得到冠軍,係第三個來自溫哥華嘅國際華裔小姐。之後同香港無綫電視簽約成為旗下經理人合約藝員。之後,佢初時獲無綫委任做「翡翠新力量」,後來就獲安排加入時裝版《皆大歡喜》扮演洪白嵐,好快就得到觀眾鍾意,更加憑呢個角色競逐萬千星輝頒獎典禮嘅進步最快演員二十大。由於佢又乖女,演技又唔錯,所以得到唔少監制支持,佢亦喺好短時間之內,接咗好多個廣告同音樂錄影帶,無線都畀機會開始去力捧佢。

2006年,係鍾嘉欣嘅上位期,佢憑《法證先鋒》入面嘅林汀汀一角,獲雜誌選為「最理想的螢幕情人」,因此再成為「宅男女神」,迅速成為無綫電視嘅「當家花旦」之一。僅僅出道兩年嘅佢憑《隨時候命》、《人生馬戲團》同埋《法證先鋒》入面嘅角色上位,喺2006年萬千星輝頒獎典禮奪得「飛躍進步女藝員」。

2007年,佢以《溏心風暴》裏面嘅常在心而人氣急升,演技亦開始得到觀眾認同,更加憑呢個角色以黑馬姿態競逐2007年萬千星輝頒獎典禮「最佳女演員」,同一時間做埋「我最喜歡女主角」最後五強,常在心呢個角色亦攞咗「十大我的至愛電視角色」嘅獎。《溏心風暴》呢套劇更加令佢同林峰成為觀眾一致都認同嘅螢幕情侶,佢哋亦都憑呢套劇榮獲「我的至愛情侶檔」。重有,佢講到流利嘅英文,加上佢本身為人低調,又擁有甜美同高貴嘅氣質重有清純乖女嘅形象,呢啲都係佢喺娛樂圈嘅優勢。同一年,佢亦成功開拓埋電影市場,參與咗第一部電影《十分愛》,已經得到各界嘅認同,喺2008年1月,佢更憑呢一部處女作獲提名第27屆香港電影金像獎嘅最佳新演員。之後,喺《十分愛》電影嘅姊妹作《我的最愛》中雖然只係客串咗一幕,同樣得到好評。

2008年係佢喺演藝事業嘅高峰,喺呢一年佢總共有成五部電視劇同埋一部電影推出。其中由佢主演嘅電視劇《金石良緣》就為自己創下咗良好嘅口碑,演技進步神速,令到覺得佢冇演技嘅人亦都改變咗睇法,佢喺劇入面再度同馬浚偉拍戲並且再一次飾演兩公婆,氣質就好似金童玉女咁,仍然非常之受觀眾歡迎。喺《法證先鋒II》裏面,佢只能夠喺呢套劇客串其中幾集,表現亦都一樣獲得好嘅評價,佢嘅觀眾緣亦都愈來愈好。喺《溏心風暴之家好月圓》度,原本飾演李司棋個女嘅佢,無線電視見佢同林峯喺《溏心風暴》度嘅銀幕情侶檔受到大部分觀眾嘅歡迎,最後佢就被安排飾演于素心,並且要周旋喺林峯同黃宗澤飾演嘅角色之間,繼上年佢喺《溏心風暴》嘅戲份兩度做咗最高收視之後,呢套嘅姊妹作《溏心風暴之家好月圓》亦都係全年嘅收視冠軍,而最高50點收視亦要歸功喺佢同米雪轉讓股份嘅一幕戲度,佢嘅表現亦都得到好嘅評價。

以前曾經喺節目度現場唱歌嘅佢,都得到唔錯嘅評價。以前曾經喺一啲節目度現場獻唱嘅佢,獲得不俗嘅評價。喺2006年,佢亦都唱出佢第一首嘅歌曲《發誓》,收錄喺《金牌女兒紅》入面,呢首係佢第一次主演嘅《搜神傳》嘅片尾曲。之後,佢唱咗唔少由佢演出嘅電視劇嘅主題曲同片尾曲。除咗電視劇嘅主題曲同片尾曲,佢亦有唱兒歌,都好受小朋友嘅歡迎。除咗拍劇集、電影同廣告,無綫重幫佢開拓歌唱事業,同星娛樂(Star Entertainment Ltd)簽約正式做歌手,成為歌、影、視三棲嘅藝人。同年嘅8月20號推出咗第一張個人專輯《1人晚餐,2人世界》,喺10月21日推出埋第二版,銷量都幾好,發行咗三個月就有金唱片15,000張嘅銷量,獲得「最暢銷本地女新人」嘅稱號。佢嘅第二主打歌曲《其實我不快樂》亦喺網上面熱播,大受歡迎。喺年尾,佢以《金石良緣》同埋《搜神傳》裏面嘅施嘉嘉同薊彩芝同前輩級演員一齊競逐2008年萬千星輝頒獎典禮「最佳女演員」同「我最喜歡女主角」最後五強。另外,佢亦喺唔少香港大型音樂頒獎典禮度攞咗多個女新人嘅獎項。

另外,同一年佢同廖碧兒、林峯和蕭正楠一齊擔任「奧運之星」幫北京奧運宣傳。

喺2009年11月12號,佢推出第二張個人大碟《My Love Story》,當中嘅《日夜想你》、《生死也為愛》同《有一天》都係佢自己作曲嘅。《日夜想你》做咗嗰年嘅第一主打,佢嘅創作因為呢首歌而得到外界嘅肯定,更加憑呢首歌曲喺幾個音樂頒獎典禮度獲頒發歌曲獎項,佢嘅專輯喺發行大約一個月亦獲得金唱片嘅銷量。喺2009年萬千星輝頒獎典禮,佢就以《珠光寶氣》裏面嘅宋子凌入圍「最佳女配角」嘅最後五強。喺呢一年,佢雖然只係得一部電視劇推出,不過因為喺《老友狗狗》裏面飾演中性嘅角色黎羨如,個樣更加被指好似台灣嘅人氣偶像吳尊,亦都因為佢嘅演出有突破,角色有新鮮感,所以得到好多好評。

2010年,由曾志偉所領導嘅賀歲電影《72家租客》裏面,佢飾演曾志偉同袁詠儀嘅女,第一次做一位詠春打女,演技都得到好評。2010年3月,佢已經連續三年攞到壹電視大獎嘅「十大電視藝人」。

同一年,佢有三套主演嘅電視劇喺無綫電視度播,其中《老友狗狗》更係嗰年嘅第一季劇集收視冠軍同埋全年劇集收視頭五名。另外,佢又憑《蒲松齡》裏面嘅柳心如得到「十大我的最愛電視角色」,同時間又憑《蒲松齡》裏面嘅柳心如入圍咗2010年萬千星輝頒獎典禮「最佳女演員」,同一時間做埋我最喜歡女主角最後五強。之後喺11月後期播映嘅《囧探查過界》飾演鬼魂飄鍾意得,外間頭一兩集對呢套劇同佢個角色好壞參半,但係好快已經對佢嘅表現全部都一致畀好嘅評價。

喺2011年1月5號,繼2010年早期同鄭融合唱嘅派台歌《愛得起》之後,隔咗接近一年時間,終於派出今年佢嘅第一主打改篇歌曲《If You Want Me》去各大電台同埋電視台。商業電台不嬲都唔支持無綫電視出身嘅歌手,新人一年之後好多都唔會有機會再次上佢個榜,但就喺呢首歌派台之後,佢嘅感情同歌唱技巧唔單止令到外界對佢改觀,佢亦都榮獲商業電台嘅唱片騎師黃君慧、余迪偉同鄺兆昌喺電台度讚賞,最後佢終於可以上倒903專業推介。

3月25號,佢發行咗佢第三張嘅個人音樂大碟《My Private Selection》,亦喺同一日舉行咗首賣會同埋喺4月3號舉行簽唱會,《My Private Selection》係佢出道至而家嘅第一張新曲加精選。呢隻碟除咗收錄得到媒介都認同嘅第一主打歌《If You Want Me》,亦都收錄咗另外嘅四首新歌,包括佢嘅創作作品《得閒找你》,同埋另外嘅三首《囉嗦》、《I'll Be Waiting For You》、《愛得起(獨唱版)》。隻碟裏面更加收錄埋十三首精選嘅單曲,包括《1人晚餐。2人世界》同《My Love Story》裏面嘅歌。

2011年,佢憑住之前喺電視劇裏面出色嘅演出,佢獲傳媒捧為「花旦嘅接班人」,更加譽為無綫電視旗下嘅新「四大花旦」之一,再一次奠定佢嘅視壇地位。

2011年4 - 5月,電視劇《點解阿Sir係阿Sir》播映,係佢另一部代表作。佢響劇入面做嘅古嘉嵐喺第八集先至出場,戲份同第二男主角嘅吳卓羲差不多,都係自作多情咁鍾意第一男女主角嘅炮灰角,而且佢哋冇編埋一齊,令唔少人不滿,都為佢哋唔抵。佢出場之後,最初係扮酷嘅保齡球教練姿態現身,好快做咗觀眾同網民嘅討論焦點。後來,Miss Cool嘅冰山融化咗,佢同陳豪嘅感情戲受到熱烈嘅關注,佢哋「愛的抱抱」重令到觀眾同網民回味無窮。到咗後期劇情發展就嚟尾聲,陳豪嘅角色臥底身份畀人揭發,令到畀人呃感情嘅鍾嘉欣崩潰。觀眾一方面讚賞佢嘅演技,另一方面就不齒陳豪角色嘅所作所為,大鬧佢係世紀賤男,觀眾唔單止一面倒咁稱讚佢嘅演出,覺得佢比楊怡喺呢部劇同《談情說案》嘅表現重好。同一時間話佢絕對有能力喺頒獎禮上面爭獎,各大報章都罕有咁熱烈報道呢件事。喺大結局之前,喺冇龐大嘅製作同宣傳之下,「Miss Koo」成功掀起咗全城嘅熱話,佢都親身上咗《東張西望》接受訪問。

參演過嘅劇集[編輯]

標題 飾演
二零零四 皆大歡喜
《Virtues of Harmony II》
洪白嵐
(Michelle)
二零零五 奇幻潮
《Fantasy Zone》
Cathy
隨時候命
《Always Ready》
施楚淇
(Sandra)
二零零六 人生馬戲團
《The Bitter Bitten》
路 丹
(Lo Dan)
法證先鋒
《Forensic Heroes》
林汀汀
(Lam Ding Ding)
二零零七 我外母唔係人
《Heavenly In-Laws》
紫 微
(Zhi Mei)
迎妻接福
《Best Bet》
杜麗瑩
(To Lai Ying/Sheila)
溏心風暴
《Heart of Greed》
常在心
(Sheung Joi Sum)
二零零八 金石良緣
《A Journey Called Life》
施嘉嘉
(Sze Ka-Ka)
法證先鋒II
《Forensic Heroes II》
林汀汀
(Lam Ding Ding)
溏心風暴之家好月圓
《Moonlight Resonance》
于素心
(Yue So Sum)
搜神傳
《Legend of the Demigods》
薊彩芝
(Gai Choi chi)
珠光寶氣
《The Gem of Life》
宋子凌
(Sung Chi Ling/Elise)
二零零九 老友狗狗
黎羨如
(Lai Sin Yu)
二零一零 蒲松齡
《The Legend of Pu Song Ling》
柳心如
公主嫁到 吳四德(阿四)
囧探查過界
《Cross Boundary Exploration》
鍾意得(得仔)
二零一一 點解阿Sir係阿Sir
《Yes Sir, No Sir》
古嘉嵐(Miss Cool)
九江十二坊
《The Twelve Mills of Jiujiang》
宋子澄
荃加福祿壽探案
《Fun with Liza and the Gods of Life》
詩 影
二零一二 缺宅男女 關嘉樂
當旺爸爸 高如珠(Madam Ko)
耀舞長安 卞玉嫣(首席舞優)
護花危情 喬子琳(Miss Kiu)
我外母唔係人 紫 薇(百花仙子)
幸福摩天輪 康如楓
二零一三 巨輪 卓靜(Rachel)
二零一四 愛情來的時候中文愛情來的時候 Linda
飛虎II 鍾韋恩
大藥坊 杜佳期

參考[編輯]

出面網頁[編輯]


前任:
王燁希
溫哥華華裔小姐競選冠軍
2003年
繼任:
李亞男


前任:
陳泳錦
國際華裔小姐競選冠軍
2004年
繼任:
李亞男