黃智雯
| 黃智雯 | |||||||||||
|---|---|---|---|---|---|---|---|---|---|---|---|
 2018年12月嘅黃智雯 | |||||||||||
| 女藝人 | |||||||||||
| 英文名 | Mandy Wong Chi Man | ||||||||||
| 花名 | ManMan、阿Dus、黃智Dus、wmm、星期日女王 | ||||||||||
| 國籍 |  中國（香港） | ||||||||||
| 籍貫 | 廣東廣州 | ||||||||||
| 出世 | 1982年12月21號 英屬香港 | ||||||||||
| 職業 | 演員、主持 | ||||||||||
| 語言 | 粵語、英語、國語 | ||||||||||
| 教育程度 | 香港演藝學院舞蹈及戲劇系表演藝術文憑 | ||||||||||
| 母校 | 聖公會基德小學 文理書院（九龍） | ||||||||||
| 屋企人 | 家姐：Cathy Wong | ||||||||||
| 演奏樂器 | 鋼琴[1]、結他[2] | ||||||||||
| 代表作品 | 電視劇： 主持節目：
| ||||||||||
| 出名角色 |
| ||||||||||
| 活躍年代 | 2007年至今 | ||||||||||
| 經紀公司 | 無綫電視（2007年-） | ||||||||||
| 網路電影資料庫（IMDb）資訊 | |||||||||||
| |||||||||||
黃智雯（英文：Mandy Wong Chi Man，1982年12月21號—）係香港女演員，曾經參選2007年度香港小姐競選（入圍最後五強），而家係無綫電視（TVB）嘅經理人合約女藝員兼無綫當家花旦之一，近年曾經拎到多個人氣女角色同潛質女藝人獎。佢喺2018年喺《三個女人一個「因」》飾演有三重人格嘅大律師「方以因」，憑住呢個角色成為「星馬雙料視后」[3] 同「雙料民選視后」[4][5]。
簡歷[編輯]
早年生活[編輯]
黃智雯喺九龍新蒲崗大，讀過聖公會基德小學同文理書院（九龍），佢2002年喺香港演藝學院攞到舞蹈文憑，主修音樂劇舞[6]；並喺2007年攞到戲劇文憑[7]。畢業之後，黃智雯曾經喺國泰航空做過三年嘅空姐[8]。 佢喺2007年參加香港小姐競選，入圍最後五強。
黃智雯嘅家姐係英皇教育前補習名師Cathy Wong；媽媽喺灣仔開化妝品店。
演藝生涯[編輯]
2008年至2011年：新人出道，啱啱入無綫[編輯]
2008年，黃智雯被安排入讀第22期無綫電視藝員訓練班，之後開始展開佢嘅演藝生涯。佢初期喺多部劇集入面飾演記者、鄰居、秘書等跑龍套角色。2009年，黃智雯喺潘嘉德監製嘅劇集《巴不得爸爸...》入面飾演女主角胡杏兒嘅妹妹「蘇鳳蓮」而開始為人熟悉，黃智雯喺劇入面嘅「眼鏡妹」造型更加被網民封做女神。自此之後，黃智雯成為監製潘嘉德嘅御用演員。
2010年，黃智雯喺時裝劇《搜下留情》第一次做第三女主角，飾演女主角陳慧珊細膽怕事嘅妹妹「鄭笑雯（鵪鶉妹）」。劇入面黃智雯再用「眼鏡妹」嘅造型亮相，好受觀眾歡迎，更加被媒體封咗做「宅男女神」。同年，黃智雯同無綫簽約，正式成為無綫經理人合約女藝員[9]。2011年，黃智雯喺《居家兵團》、《怒火街頭》、《潛行狙擊》同《不速之約》入面都擔任重要角色，戲份幾重，仲第一次入圍《萬千星輝頒獎典禮2011》「飛躍進步女藝員」，更加被外界視為大熱人選之一。
2012年至2015年：演技進步，穩坐二線[編輯]
2012年，黃智雯喺時裝家庭劇《缺宅男女》中飾演巴辣人妻「婁笑蘭（關二嫂）」，佢鵲巢鳩佔嘅形象備受矚目，再次令佢受到觀眾歡迎，佢嘅演技亦都被網民盛讚進步咗好多。黃智雯之後喺時裝醫療劇《On Call 36小時》第一次做第二女主角，飾演見習醫生「洪美雪」。佢之後時裝警匪劇喺《飛虎》再做第二女主角，飾演倔強飛虎「蘇文強」。之後佢喺《巴不得媽媽...》做第三女主角，同兩位經驗豐富嘅前輩演員黃淑儀同汪明荃合作，佢嘅表現同樣獲得讚賞。黃智雯喺2012年憑《缺宅男女》喺《萬千星輝頒獎典禮2012》第一次入圍「最佳女配角」最後兩強，仲攞到「飛躍進步女藝員」獎。自此之後，黃智雯就成為無綫當家花旦之一。
2013年，時裝警匪劇《女警愛作戰》喺香港地區首播，黃智雯喺劇入面飾演一個外冷內熱嘅衝鋒隊督察「司徒驕（Madam Kiu）」。之後，佢喺穿越劇《情逆三世緣》飾演女主角關詠荷嘅妹妹「田秋雁」，呢次係佢第一次次演繹反派角色，呢套劇嘅監製莊偉建亦都喺媒體面前公開讚佢演得好出色。同年，黃智雯喺時裝醫療劇《On Call 36小時II》再次飾演神經外科醫生「洪美雪」，喺《TVB 馬來西亞星光薈萃頒獎典禮2013》拎到「最喜愛TVB電視角色」獎，並憑呢套劇入圍《萬千星輝頒獎典禮2013》「最佳女配角」，更加被外界視為大熱之一[10][11]。
2014年，黃智雯喺台慶劇《飛虎II》入面再次飾演女飛虎「蘇文強」，並憑呢套劇入圍《萬千星輝頒獎典禮2014》「最佳女配角」同第一次入圍「最受歡迎電視女角色」。
2015年，黃智雯喺時裝劇《師奶MADAM》飾演「熊丹丹（Angel）」。同年，佢喺時裝懸疑劇《拆局專家》第一次擔正做第一女主角，飾演冷酷嘅「雷蕾」，喺《TVB 馬來西亞星光薈萃頒獎典禮2015》拎到「最喜愛TVB電視角色」獎，係佢第二次拎到呢個獎，同時憑呢套劇第一次入圍《萬千星輝頒獎典禮2015》「最佳女主角」。佢之後喺台慶劇《張保仔》飾演青樓名妓「朱淑君」，呢套劇亦都係佢拍嘅第一套古裝劇。
2016年到而家：晉升一線，成為無綫當家花旦[編輯]
2016年，黃智雯喺時裝溫情劇《超能老豆》再擔正做第一女主角，飾演品性純良嘅「諸麗花（花老師）」。佢之後喺時裝法律劇《律政強人》飾演亦正亦邪嘅律師「方寧（Martha）」，同前輩方中信同廖啟智合作，佢喺劇入面精明幹練嘅形象得到觀眾好評，亦都憑呢套劇第一次入圍《TVB 馬來西亞星光薈萃頒獎典禮2016》「最喜愛TVB女主角」最後五強同拎到「最喜愛TVB電視角色」獎，係佢第三次拎到呢個獎，佢仲喺《星和無綫電視大獎2016》拎到「我最愛TVB女角色」獎。同年12月，佢喺民初劇《流氓皇帝》飾演「吳多茹」，當中嘅百樂門舞女造型吸引咗唔少網民關注。
2017年，黃智雯喺時裝劇《雜警奇兵》同《降魔的》都擔正做第一女主角。佢憑住《雜警奇兵》「龍麗莎（Laser 姐）」呢個角色喺《星和無綫電視大獎2017》拎到「我最愛TVB電視女角色」獎，係佢第二次拎到呢個獎。同年，佢喺台慶劇《降魔的》同時飾演溫柔熱血嘅急症室醫生「莊芷若」同由千年黑色鼠尾草化身嘅「魔（Salvia）」，演技得到觀眾好評[12]；佢憑呢套劇入圍《萬千星輝頒獎典禮2017》「最受歡迎電視女角色」最後五強，同埋喺《觀眾在民間電視大獎2017》「民選最佳女主角」得票第二名。
2018年，黃智雯擔正做第一女主角嘅時裝心理喜劇《三個女人一個「因」》繼《雜警奇兵》之後再被放喺星期日黃金時段播放，黃智雯因為咁而被網民封做「星期日女王」[13][14]。佢喺劇入面飾演患有三重人格嘅大律師「方以因（Evie）」，同時分飾次人格「菠蘿椰奶（Pina Colada）」同第三人格「愁擘擘」。劇入面三個截然不同嘅人格都被佢賦予傳神嘅演繹，由正經內斂嘅主人格，狂野豪邁嘅次人格，悲觀細膽嘅第三人格，以至人格模仿另一個人格嘅演繹都恰到好處，令佢大受好評，演技備受觀眾肯定。由於呢套劇播出後大受歡迎，TVB更加喺觀眾熱烈要求下，破例喺MyTV SUPER上載20集足本版劇集。呢套劇播之出後，黃智雯獲邀喺第十七屆美國華裔小姐競選總決賽擔任特別嘉賓，主辦單位喺美國紐約時代廣場俗稱「世界第一屏」嘅納斯特克展示屏刊登廣告，令到佢成為史上第一位登上呢個廣告屏嘅TVB藝人。黃智雯喺「萬千星輝賀台慶」以大熱姿態攞到「馬來西亞最喜愛TVB女主角」同「新加坡最喜愛TVB女主角」兩個獎[15]，成為繼陳豪、佘詩曼、陳展鵬同胡定欣之後第五個同時攞到兩地「雙料」名銜嘅演員。佢喺得獎感言提到：「我到今日仍然好深信，努力未必係有回報，但喺只要肯努力，一定會有人睇到。」另外，黃智雯喺視評人方以文舉辦嘅《觀眾在民間電視大獎》攞到「民選最佳女主角」獎，同埋喺視評人游大東舉辦嘅《香港電視大獎》攞到「女主角獎（劇集）」，成為由觀眾投票揀出嚟嘅「雙料民選視后」。佢喺《觀眾在民間電視大獎》攞到1375票，得票率超過50%[16]；而佢喺《香港電視大獎》攞到1107分，大幅拋離其他對手[17]。佢亦都憑《三個女人一個「因」》成為《萬千星輝頒獎典禮2018》視后大熱人選之一，入圍「最佳女主角」同「最受歡迎電視女角色」最後五強。
2019年，黃智雯第一次一個人主持真人 show 節目《一個因去跳舞》。佢喺節目中由零開始學做韓國女團成員，拍攝期間更加因為訓練密集、欠缺休息而病咗，最後要入院打針，佢認真同敬業嘅態度得到觀眾讚賞[18][19]。同年，黃智雯喺時裝喜劇《街坊財爺》飾演幫手解決貴利問題嘅熱心社工「朱瑪莉（Mary）」，同前輩鄭則仕、苑瓊丹、黎諾懿同埋邵美琪合作演出。
2020年，黃智雯喺三套劇都擔正做第一女主角。佢首先喺時裝懸疑劇《十八年後的終極告白》飾演重案組督察「阮麗瑾（Madam Yuen）」。呢套劇嘅氣氛沉重，加上佢嘅角色經歷咗悲慘嘅變故，令到佢喺拍完之後用咗接近半年時間抽離情緒[20]。佢之後喺時裝奇幻喜劇《降魔的2.0》再次飾演溫婉善良嘅醫生「莊芷若」，當中芷若借咗肉身俾鬼魂啤啤同馬季約會嘅一幕，黃智雯成功演繹到啤啤嘅神韻，演技得到唔少網民稱讚[21]。而《十八年後的終極告白》同《降魔的2.0》有兩個星期都係喺翡翠台兩個黃金時段緊接住播出，係佢第一次有主演嘅劇集同期疊播[22]。黃智雯憑《降魔的2.0》嘅莊芷若喺《hk01娛樂民選港劇大獎》以超過四百票攞到「最佳女主角」獎，係佢喺《三個女人一個「因」》嘅方以因之後再次成為由觀眾投票選出嘅「民選視后」[23]。同年，黃智雯喺台慶劇《使徒行者3》飾演有學者症候群同亞氏保加症嘅 CIB 總督察「章紀孜（Madam G）」，被觀眾讚佢演技成熟有深度[24]。佢憑呢套劇成為《萬千星輝頒獎典禮2020》視后大熱人選之一，入圍「最佳女主角」同「馬來西亞最喜愛 TVB 女主角」最後五強。
2021年，黃智雯喺時裝懸疑劇《刑偵日記》飾演 EOD Number One 拆彈員「游雁星（Madam 星）」，同王浩信、袁偉豪、黎諾懿，仲有前輩惠英紅、姜皓文合作。為咗配合角色需要，佢喺套劇開拍四至五個月前就開始健身[25]，喺拍攝拆彈同爆破戲份時要著住八十磅重嘅仿真防爆衣同埋戴二十五磅重嘅頭盔[26]。
2020年10月-2021年2月，黃智雯拍攝以海關為題材嘅劇集《把關者們》，擔正做第一女主角，喺劇入面飾演海關 TCB 商品說明調查科總貿易管制主任「關佩欣（Madam Kwan）」，同袁偉豪飾演夫婦[27]。2021年5月，黃智雯拍攝邵氏網劇《廉政狙擊》，喺劇入面飾演廟街歌廳女郎，同好姊妹胡定欣，仲有同黃宗澤、吳卓羲同王浩信合作[28]。
舞台劇[編輯]
2020年1月，黃智雯第一次演出舞台劇《今晚打老虎》（一共六場），飾演才女「王秀英」。
2021年5月，黃智雯第二次演出舞台劇，喺國際知名劇場導演鄧樹榮執導、由法國當代輕喜劇改編嘅舞台劇《超自然之戀》（一共四場）飾演美女機械人「Chloé」[29]。其中14號20:00同埋15號15:00嗰兩場有座談會。佢喺呢套舞台劇挑戰跳西班牙舞同劍擊，表演得到同劇演員嘅讚賞[30]。佢嘅演出更加被紐約戲劇新聞網站 BroadwayWorld 寫文報導同讚賞[31]。
合作多次嘅演員[編輯]
羅子溢[編輯]
黃智雯喺入行初期成日同羅子溢合作。佢哋合作過七次，一齊拍過嘅電視劇包括《搜下留情》、《On Call 36小時》系列、《缺宅男女》、《飛虎》系列同《巴不得媽媽...》，喺《搜下留情》同《飛虎》系列飾演情侶[32]。
袁偉豪[編輯]
黃智雯同袁偉豪一齊喺2007年加入TVB。佢哋合作過十二次，一齊拍過嘅電視劇包括《On Call 36小時》系列、《飛虎》系列、《好心作怪》、《情逆三世緣》、《拆局專家》、《流氓皇帝》、《三個女人一個「因」》、《使徒行者3》、《刑偵日記》同《把關者們》，喺《On Call 36小時》系列、《三個女人一個「因」》同《把關者們》飾演情侶[33]。佢哋由配角合作到主角，更加喺2018年嘅《萬千星輝賀台慶》一齊攞到「馬來西亞同新加坡最喜愛男女主角」，成為「星馬雙料視帝視后」[34]。
馬國明[編輯]
黃智雯同馬國明由女配角合作到女主角。佢哋合作過七次，一齊拍過嘅電視劇包括《On Call 36小時》系列 、《飛虎》、《流氓皇帝》、《降魔的》系列同《使徒行者3》。佢哋喺《降魔的》系列有感情線，同埋喺《使徒行者3》飾演情侶[35]。
合作多次嘅監製[編輯]
潘嘉德[編輯]
黃智雯自從喺2009年被監製潘嘉德賞識，參演《巴不得爸爸》之後就成為佢嘅御用演員。兩人合作過十一次，合作劇集包括《巴不得...》系列、《搜下留情》、《不速之約》、《On Call 36小時》系列、《拆局專家》、《超能老豆》、《流氓皇帝》同《三個女人一個「因」》。監製潘嘉德更加讚黃智雯勤力肯拼搏，從來無令佢失望[36]。2020年1月，黃智雯第一次演出舞台劇，就係由潘嘉德執導嘅《今晚打老虎》。
圈中好友[編輯]
黃智雯加入無綫電視之後人緣好好，佢嘅好朋友包括趙希洛、胡杏兒、胡定欣、胡蓓蔚、姚子羚、李施嬅、孫慧雪、袁偉豪、馬國明、陳山聰、謝東閔、胡鴻鈞同何遠東等，佢同胡杏兒、胡定欣、胡蓓蔚、姚子羚同李施嬅組成姊妹團「胡說八道會」[37]，亦同袁偉豪、陳山聰、謝東閔、胡諾言、胡定欣、胡蓓蔚、姚子羚同李施嬅組成「Crazy Runner」[38]。黃智雯因為拍《降魔的》而同胡鴻鈞同何遠東結緣，組成「降魔的偷跳小隊」[39]；佢更將趙希洛稱為「靈魂姊妹」（soul sisters）[40]。
感情生活[編輯]
黃智雯男朋友係珠寶公司高層詹文天（Anthony Jim），佢哋由2012年開始拍拖[41]。
演出作品[編輯]
電視劇（無綫電視）[編輯]
| 首播 | 劇名 | 角色 |
| 2008年 | 同事三分親 | 女住戶 |
| 甜言蜜語 | 琴 師 | |
| 溏心風暴之家好月圓 | 陳杜丹（Donna） | |
| 東山飄雨西關晴 | 莊婌媛 | |
| 畢打自己人 | 馬慧丹（Mandy） | |
| Click入黃金屋 | Bennie | |
| 2009年 | 學警狙擊 | 張樹珊 |
| 桌球天王 | Amy | |
| 老婆大人II | 伍凱彤 | |
| 蔡鍔與小鳳仙 | 吳賞梅 | |
| 巴不得爸爸... | 蘇鳳蓮 | |
| 2010年 | 搜下留情 | 鄭笑雯（鵪鶉妹） |
| 飛女正傳 | 記 者 | |
| 居家兵團 | 諸葛蓉 | |
| 2011年 | 怒火街頭 | 張芷芯（Silvia） |
| 潛行狙擊 | 蒙心凌（阿檬） | |
| 不速之約 | 邰 欣 | |
| 2012年 | 缺宅男女 | 婁笑蘭（關二嫂） |
| On Call 36小時 | 洪美雪 | |
| 飛虎 | 蘇文強 | |
| 巴不得媽媽... | 夔懿曦 | |
| 法網狙擊 | 黃菲菲 | |
| 2013年 | 女警愛作戰 | 司徒驕（Madam Kiu） |
| 好心作怪 | 夏思嘉 | |
| 情逆三世緣 | 田秋雁 | |
| On Call 36小時II | 洪美雪 | |
| 2014年 | 飛虎II | 蘇文強 |
| 2015年 | 師奶MADAM | 熊丹丹（Angel） |
| 拆局專家 | 雷 蕾 | |
| 張保仔 | 朱淑君 | |
| 2016年 | 超能老豆 | 諸麗花（Ophelia） |
| 律政強人 | 方 寧（Martha） | |
| 流氓皇帝 | 吳多茹／水奕璇 | |
| 2017年 | 雜警奇兵 | 龍麗莎（Laser 姐） |
| 降魔的 | 莊芷若（Felicity）／Salvia | |
| 2018年 | 三個女人一個「因」 | 方以因（Evie）／菠蘿椰奶（Pina Colada）／愁擘擘 |
| 2019年 | 街坊財爺 | 朱瑪莉（Mary） |
| 2020年 | 十八年後的終極告白 | 阮麗瑾（Madam Yuen） |
| 降魔的2.0 | 莊芷若／Salvia | |
| 使徒行者3 | 章紀孜（Madam G） | |
| 2021年 | 刑偵日記 | 游雁星（Madam 星） |
| 未播 | 把關者們 | 關佩欣（Madam Kwan、Yan） |
電視劇（邵氏兄弟）[編輯]
| 首播 | 劇名 | 角色 |
| 2018年 | 飛虎之潛行極戰 | 張慧珊（Dr. Cheung） |
| 拍緊 | 廉政狙擊 | 家晴 |
主持節目[編輯]
| 播出日期 | 節目 | 集數 | 備註 |
| 2007年 | 事必關己 | 固定外景主持 | |
| 2009年 | 東張西望 | 固定外景主持 | |
| 2017年 | 胡說八道真情假期 | 第1-6集 （一共10集） | 喺澳洲拍攝 |
| 2019年 | 一個因去跳舞 | 第1-5集 （一共5集） | 喺韓國首爾拍攝 |
綜藝節目[編輯]
電影[編輯]
| 首映 | 片名 | 角色 |
| 2012年 | 2012我愛HK 喜上加囍 | 節目編導 |
| 天生愛情狂 | 二妹 | |
| 2013年 | 風暴 | 女酒樓侍應 |
舞台劇[編輯]
| 年份 | 劇名 | 角色 | 合作演員 |
| 2020年1月 | 今晚打老虎 | 王秀英 | 錢嘉樂、袁偉豪、楊詩敏、羅冠蘭、李國麟、康華、魯文傑 |
| 2021年5月 | 超自然之戀 | Chloé | 葉榮煌、王耀祖 |
獎項[編輯]
MY AOD我的最愛頒獎典禮[編輯]
| 年份 | 獎項 | 劇集 | 角色 | 結果 |
| 2012年 | 我的最愛最具潛質女藝人 | 缺宅男女 | 婁笑蘭（關二嫂） | 攞獎 |
萬千星輝頒獎典禮[編輯]
| 年份 | 獎項 | 劇集 | 角色 | 結果 |
| 2012年 | 飛躍進步女藝員 | 缺宅男女 | 婁笑蘭（關二嫂） | 攞獎 |
| On Call 36小時 | 洪美雪 | 攞獎 | ||
| 飛虎 | 蘇文強 | 攞獎 | ||
| 巴不得媽媽... | 夔懿曦（泥水妹） | 攞獎 | ||
| 2018年 | 馬來西亞最喜愛TVB女主角 | 三個女人一個「因」 | 方以因／菠蘿椰奶／愁擘擘 | 攞獎 |
| 新加坡最喜愛TVB女主角 | 攞獎 |
壹電視大獎[編輯]
| 年份 | 獎項 | 劇集 | 角色 | 結果 |
| 2013年 | 最搶鏡女配角 | 缺宅男女 | 婁笑蘭（關二嫂） | 攞獎 |
星和無線電視大獎[編輯]
| 年份 | 獎項 | 劇集 | 角色 | 結果 |
| 2013年 | TVB飛躍進步藝人 | 缺宅男女 | 婁笑蘭（關二嫂） | 攞獎 |
| On Call 36小時 | 洪美雪 | 攞獎 | ||
| 飛虎 | 蘇文強 | 攞獎 | ||
| 巴不得媽媽... | 夔懿曦（泥水妹） | 攞獎 | ||
| 2016年 | 我最愛TVB電視女角色 | 律政強人 | 方 寧 | 攞獎 |
| 2017年 | 我最愛TVB電視女角色 | 雜警奇兵 | 龍麗莎 | 攞獎 |
TVB 馬來西亞星光薈萃頒獎典禮[編輯]
| 年份 | 獎項 | 劇集 | 角色 | 結果 |
| 2013年 | 最喜愛TVB電視角色 | On Call 36小時II | 洪美雪 | 攞獎 |
| 2015年 | 最喜愛TVB電視角色 | 拆局專家 | 雷蕾 | 攞獎 |
| 2016年 | 最喜愛TVB電視角色 | 律政強人 | 方寧 | 攞獎 |
| 2017年 | 最喜愛TVB綜藝節目 | 胡說八道真情假期 | 與胡杏兒、胡蓓蔚、胡定欣、李施嬅、姚子羚一同獲獎） | 攞獎 |
觀眾在民間電視大獎[編輯]
| 年份 | 獎項 | 劇集 | 角色 | 結果 |
| 2018年 | 民選最佳女主角 | 《三個女人一個「因」》 | 方以因 | 攞獎 |
香港電視大獎[編輯]
| 年份 | 獎項 | 劇集 | 角色 | 結果 |
| 2018年 | 女主角獎（劇集） | 《三個女人一個「因」》 | 方以因 | 攞獎 |
明報周刊演藝動力大獎[編輯]
| 年份 | 獎項 | 劇集 | 角色 | 結果 |
| 2018年 | 最突出女角色 | 《三個女人一個「因」》 | 方以因 | 攞獎 |
| 我最支持的演藝動力大獎 | 《三個女人一個「因」》 | 方以因 | 攞獎 |
01娛樂民選港劇大獎[編輯]
| 年份 | 獎項 | 劇集 | 角色 | 結果 |
| 2020年 | 最佳女主角[42] | 《降魔的2.0》 | 莊芷若 | 攞獎 |
其他獎項[編輯]
| 年份 | 頒獎/機構 | 獎項 | 结果 |
| 2017年 | 無綫電視 | 無線電視台十年長期服務員工獎 | 攞獎 |
| 2017年 | 新浪微博之星大獎2017 | 微博給力綜藝節目- 胡說八道真情假期 | 攞獎 |
攷[編輯]
- ↑ "黃智雯 Mandy 💞 (@wong_manman) posted on Instagram: "🌿🌾 #mylittlecorner" • Apr 16, 2021 at 2:37pm UTC". Instagram (英文). 喺2021-06-17搵到.
- ↑ "【廉政狙擊】胡定欣為新劇角色失眠 黃智雯重拾結他廟街獻藝". Topick. 2021-05-25.
- ↑ 【星馬視帝視后】黃智雯袁偉豪成雙料視帝視后
- ↑ "觀眾在民間電視大獎2018結果". 2018-12-11.
- ↑ "2018香港電視大獎——民選視后投票結果". 2019-04-29.
- ↑ "畢業生 - 舞蹈 - 香港演藝學院". www.hkapa.edu (英文). 喺2019-01-28搵到.
- ↑ "歷屆畢業生名單 - 校友 - 人物 - 香港演藝學院". www.hkapa.edu (英文). 喺2019-01-28搵到.
- ↑ "補習天后家姐帶挈關二嫂唐樓搬豪宅脫貧". FACE第246期. 2012-02-08.
- ↑ "網友熱搜鵪鶉妹 黃智雯倒模曼玉捱出頭". 蘋果日報. 2010-04-30.
- ↑ "Bobby穿越千年 苦戀關詠荷 - 東方日報". orientaldaily.on.cc. 喺2021-06-17搵到.
- ↑ 黃智雯第一次演反派
- ↑ 【獨家專訪】黃智雯需要被人控制性格飄忽追求實在愛情
- ↑ "黃智雯不介意被封「星期日女王」：美劇都係一個禮拜一集啦". 香港01. 2018-03-01.
- ↑ ""星期日女王"黄智雯杀出重围". 羊城晚报 (中文). 2018-03-15.
- ↑ "袁偉豪黃智雯得獎打孖上 膺星馬雙料視帝視后". 明報OL網. 2018-11-20.
- ↑ "觀眾在民間電視大獎2018結果". 方以文 睇電視啦喂 Facebook. 2018-12-11.
- ↑ "2018香港電視大獎——民選視后投票結果". 游大東 Instagram. 2019-04-29.
- ↑ "選韓團扮後生！36歲黃智雯同鮮肉堆冇代溝". 東網 娛樂. 2019-01-16.
- ↑ "《一個因去跳舞》黃智雯挑戰K-Pop舞蹈訓練 Mandy跳到體力不支入院". HKET. 2019-01-23.
- ↑ "愛情長跑8年有結婚計劃 黃智雯自信勝任做賢妻". 明報. 2020-05-06.
- ↑ "【降魔的2.0】黃智雯被上身戲獲激讚 慘被封「戲份最少女主角」". 香港01. 2020-05-29.
- ↑ "兩劇疊住上！黃智雯為着背心狂操上半身". 東網 娛樂. 2020-05-01.
- ↑ "01娛樂民選港劇大獎結果". 01 娛樂. 2021-01-10.
- ↑ "黃智雯演活「學者症候群」患者被讚演技有深度 入行13年再度衝擊視后". U港生活. 2021-01-03.
- ↑ "刑偵日記｜黃智雯與男友有共識 唔擔心做高齡產婦：高齡咗好耐啦". hk01. 2021-07-07. Unknown parameter
|dead-url=ignored (help) - ↑ "黎諾懿減十磅谷胸肌 黃智雯麒麟臂油淋淋". 東網. 2020-05-26.
- ↑ "袁偉豪黃智雯新劇演夫妻 拍牀上戲齋傾偈冇動作". 明報. 2021-01-14.
- ↑ "【廉政狙擊】胡定欣為新劇角色失眠 黃智雯重拾結他廟街獻藝". Topick. 2021-05-25.
- ↑ "超自然之戀". french may. 2021-03-30.
- ↑ "男友觀戰讚精彩！黃智雯咀仔過百次嗌未夠喉". on.cc. 2021-05-16.
- ↑ "BWW Review: LARGER THAN LIFE at Hong Kong City Hall Theatre". broadway.com. 2021-05-16.
- ↑ "羅仲謙對厭黃智雯嗌分手 - 東方日報". orientaldaily.on.cc. 喺2021-06-17搵到.
- ↑ "袁偉豪黃智雯新劇演夫妻 拍牀上戲齋傾偈冇動作". 明報. 2021-01-14.
- ↑ "袁偉豪黃智雯得獎打孖上 膺星馬雙料視帝視后". 明報OL網. 2018-11-20.
- ↑ "《使徒行者3》林峯返娘家 馬國明黃智雯再續前緣". 頭條日報. 2020-10-07.
- ↑ "【三個女人一個因】合作9年 潘嘉德激讚黃智雯：冇令我失望過". hk01. 2018-03-16.
- ↑ 「胡說八道會」澳洲Trip正式出發
- ↑ "Crazy Runner拜年團 一對對甜蜜放閃". 東方日報 (中文). 喺2021-06-17搵到.
- ↑ "降魔的偷跳小隊". 2020-05-02.
- ↑ "黃智雯趙希洛法國閨密遊 互拍最「Dus」時刻". 明周娛樂 (英文). 2019-12-05. 喺2019-12-31搵到.
- ↑ "視后黃智雯隨時閃婚：胡說八道已揀好姊妹裙". 東網 娛樂. 2018-11-24.
- ↑ "01娛樂民選港劇大獎結果". 01娛樂. 2021-01-10.
出面網頁[編輯]
- 黃智雯喺香港影庫嘅資料（繁體中文 - 香港）
- BLOG | Welcome to Mandy's Blog - Yahoo! BLOG
- 黃智雯喺tvb.com嘅資料
- 黃智雯嘅新浪微博（需要註冊）
- 黃智雯嘅Instagram頁
- 黃智雯嘅Facebook頁