無綫電視

電視廣播有限公司
Television Broadcasts Limited
類型	上市公司
開檔	1967年11月19號， 55年之前（有限公司註冊：1965年7月26號）
創辦人	利孝和; 邵逸夫爵士; 祈德尊爵士; 余經緯; （皆已故）
股票代號	港交所：511、OTCBB：TVBCY
總部地址	英屬香港九龍廣播道77號（第一代總部1967年－1988年）; 英屬香港→ 香港新界清水灣道電視城（第二代總部1988年－2003年）; 香港新界將軍澳工業邨駿才街77號電視廣播城（第三代總部2003年開始，現址）
緊要人物	許濤（董事局主席兼非執行董事）; 李寶安（董事局副主席、集團行政總裁兼執行董事）; 黎瑞剛（非執行董事，前董事局副主席）
產業	免費電視廣播、數碼媒體、節目製作及發行同分銷
產品	翡翠台、明珠台、J2、無綫新聞台、無綫財經·資訊台
服務	傳媒、電視、大眾傳播、數碼媒體
年營業額	43.36億港元
東主	Young Lion（26%）、Silchester International（16.3896%）、邵氏基金會（3.9%）
員工人數	4300名僱員同藝人（2018年）
網址	www.tvb.com
	親建制派同中共

「無線電視」跳轉到呢度。要睇電視制式，請去【地面電視】。

電視城大門

電視廣播有限公司（粵拼：din6 si6 gwong2 bo3 jau5 haan6 gung1 si1）（英文：Television Broadcasts Limited，通稱無綫電視，簡稱TVB；港交所：00511，OTCBB：TVBCY）係香港其中一間電視台，由利孝和、祈德尊、余經緯、邵逸夫等人創辦。無綫喺1967年11月19號啟播，嗰陣香港得佢一間免費收睇電視台（英文：Free to air）。佢而家除咗有主要嘅中文頻道翡翠台（Jade）同埋英文頻道明珠台（Pearl）之外，重有J2同埋全港唯一24個鐘免費播放財經節目嘅無綫財經台，以及全港第二條24個鐘免費新聞頻道無綫新聞台。

電視廣播有限公司而家嘅總部係位於將軍澳工業邨嘅電視廣播城，舊時嘅總部先後喺九龍塘廣播道77號同清水灣電視城。

喺1990至2000年代，由於無綫電視劇收視長期拋離當時嘅亞洲電視，加上公司規模亦大過其他香港電視台，所以有大台之稱。

歷史[編輯]

啟播初期[編輯]

1965年，香港政府有意發出地面電視牌照，吸引六個財團參與競標，當時中選者係由希慎興業大股東利氏家族、余仁生家族成員余經緯、邵逸夫旗下邵氏兄弟（香港）有限公司等人、機利文洋行（而家嘅太平洋行）等合組嘅香港電視集團^{[註 1]}。

無綫電視喺啟播最初五年，只係提供黑白電視廣播，本地節目亦較為簡單。 1967年6月10號，首批彩色電視機由日本運抵香港。無綫喺1969年，就試驗彩色電視製作，包括《香港節》，而第一個彩色節目係電視劇集《鼠縱隊》，同時試驗中嘅《歡樂今宵》喺晚上8點播映。本地彩色電視製作喺1971年6月中開始播映，首個本地電視劇集係《西施》；11月19號，《歡樂今宵》成為全香港第一個以全面彩色製作嘅直播節目。 1972年開始大部分彩色製作同埋播送，1975年底已經全面完成彩色製作及播送。1976年。無綫開始喺海外市場進行節目發行、視像租賃期業務。

無綫同香港演藝圈嘅關係[編輯]

無綫電視多年來都製作咗唔少節目得到香港唔少人關注，例如《香港小姐》、《勁歌金曲》同埋《新秀歌唱大賽》等等，亦有唔少國際知名嘅藝人，都係無綫出身，例如：周潤發、劉德華、梁朝偉、周星馳、梅艷芳、張曼玉等。

慈善籌款[編輯]

無綫電視每年都有同一啲慈善機構合作舉辦籌款節目，當中會搵唔少藝人參與。

歷任董事局主要成員同管理層[編輯]

姓名	時間	備註
董事局主席
利孝和	1967年11月19號—1980年6月27號
邵逸夫	1980年6月28號—2009年12月31號	行政主席
邵逸夫	2010年1月1號—2012年1月1號	非執行董事
梁乃鵬	2012年1月2號—2014年12月31號	行政主席
陳國強	2015年1月1號—2020年2月3號	非執行董事
許濤	2020年4月29號—	非執行董事
董事局副主席
祈德尊	1967年11月19號—1981年3月11號
方逸華	2000年10月25號—2012年3月25號
梁乃鵬	2003年9月—2012年1月1號	副行政主席
黎瑞剛	2016年10月17號—2020年4月29號
李寶安	2020年4月29號—2021年5月27號
董事總經理
余經緯	1969年2月—1976年12月11號
費道宜	1995年—2006年5月31號
方逸華	2006年5月31號—2008年12月31號	董事局副主席署理
方逸華	2009年1月1號—2012年3月25號	董事局副主席兼任
集團總經理
何定鈞	2002年—2005年
李寶安	2009年9月15號—2014年12月31號	改任行政總裁
集團行政總裁
李寶安	2015年1月1號—2021年5月27號

爭議[編輯]

親中偏頗新聞報導同節目內容爭議[編輯]

2010年代開始，無綫電視旗下嘅新聞部好多時都被視為親中派媒體，公信力亦好差，喺2019年反修例運動爆發後更加明顯，根據香港中文大學傳播與民意調查中心喺2016年嘅民調，無綫電視嘅公信力評分係5.88，但去到2019年11月就跌到4.45。^[1]^[2]

無綫電視亦被指長期對香港嘅非建制派作出唔公平嘅對待。另外，有部份人亦抨擊以時事資訊包裝但非新聞部製作嘅《東張西望》，不時猶如政府上身，為政府政策推銷，對社會問題不時抱有偏頗預設立場，又試過盜用他人短片，甚至發佈假新聞^[3]^[4]。

演員待遇爭議[編輯]

內文：無綫電視演員待遇爭議

無綫對旗下演員嘅薪酬同工作安排，不時引起批評，其中「一年一show」係其中一個引起最大爭議嘅手法^[5]，又對一啲非一線藝人不斷咁減人工^[6]^[7]，甚至出現過勞死嘅事件^[8]。

被批評雙重標準打壓藝員親非建制政治意見表達[編輯]

有啲無綫旗下藝人，曾經因為表達親非建制嘅政治意見，受到無綫一啲打壓。例如張明偉就曾經因為不滿元朗信義中學打壓學生表達政治意見，喺2021年7月去元朗信義中學門外唱《銀河修理員》，結果被無綫雪藏，之後張明偉決定約滿後離開無線^[9]。另外，喺香港反送中運動期間，李綺雯^[10]^[11]同埋歐陽巧瑩^[12]都因為政治立場問題被無綫雪藏，最終選擇離巢。

不過，對於親中派藝人表達意見，例如係楊明、陳百祥、莊思敏等，就算係去到人身攻擊嘅地步（例如：莊思敏曾經人身攻擊黃之鋒話佢扮河童），無綫亦冇限制佢哋。

被指封殺競爭對手媒體同埋同佢哋友好嘅藝人[編輯]

無綫電視亦被指，會封殺同競爭對手媒體（較早期有亞洲電視，之後有香港電視同ViuTV），甚至係友好嘅藝人。例如：

喺2009年4月，身為亞視簽約藝人嘅鮑起靜攞到香港電影金像獎影后獎項，佢喺發表得獎感言時提到亞視，但呢一段俾轉播金像獎頒獎禮嘅無綫刪走。當時除咗亞視批評無綫無考慮觀眾感受，亦有網友質疑無綫嘅做法^[13]，爾冬陞炮轟無綫話佢唔尊重個節目，金像獎主席陳嘉上亦表示失望，話下年會重新投標^[14]。
喺2013年11月，有一個由方力申、鄧麗欣、唐寧拍攝，由國際培幼會贊助嘅無綫電視節目準備播出，但當時係香港電視旗下藝人嘅唐寧，佢嘅部分就被剪去^[15]。

另外，無綫亦因為喺開放免費電視牌照嘅議題上立場唔同，喺2013年亦將壹傳媒嘅媒體列為不受歡迎媒體，結果被香港記者協會批評干預新聞自由，剝削公眾知情權^[16]。

濫用殯葬場地對先人不敬爭議[編輯]

無綫被指唔只一次喺拍攝劇集拍嘅時候使用殯葬場地當做其他場景，例如：

2023年播出嘅劇集《新四十二章》入面取景嘅大學場地原來係位於屯門曾咀靈灰安置所，因而引起網民批評^[17]^[18]。
2022年播出嘅劇集《白色強人II》曾經借和合石靈灰安置所同火葬場景扮醫院^[17]。

有啲網民就批評，呢啲舉動對先人不敬，亦有人話無綫咁樣係對在生嘅觀眾不敬，當觀眾係傻^[17]。

管理商標版權嘅爭議[編輯]

內文：無綫電視管理商標版權嘅爭議

無綫電視發展多年，製作唔少影視作品，對香港社會發展有一定角色，亦不時成為公眾討論嘅對象。連同佢哋嘅唔同商標，無綫電視因而持有同管理唔少版權。不過，喺涉及第三方使用呢啲商標或者影視作品嘅問題上，無綫嘅做法就俾一啲人批評。有啲人批評，無綫就連坊間非牟利使用佢哋作品做二次創作都打壓，反而自己就唔尊重他人版權^[19]。亦有人認為，無綫透過管理呢啲版權商標嘅手段，去打壓外間對無綫嘅批評^[20]。