中華民國行政院院長

中華民國行政院院長
現任 卓榮泰 2024年5月20日就任
尊稱	院長、閣揆
官邸	臺北市大安區金華街144號
任命者	中華民國總統
先前職位	中華民國國務總理
首任	譚延闓（行憲之前） 翁文灝（行憲之後）
設立	1928年（行憲之前） 1948年（行憲之後）
副職	行政院副院長
網站	www.ey.gov.tw

中華民國行政院院長（行政院院長，簡稱行政院長，又叫閣揆）係中華民國行政院嘅阿頭，亦都係中華民國中央政府入面實際處理政務嘅人，負責領導內閣嘅各個行政部門，由總統直接任命。佢個職位類似其他共和制國家嘅內閣總理或者君主制國家嘅首相。當總統同埋副總統都同時因為某種原因而唔能夠視事嘅時候，就會由行政院院長代行總統嘅職權。現任院長係民主進步黨籍嘅卓榮泰，喺2024年5月20號就任。

行政院院長嘅前身係中華民國國務總理，行政院嘅第一任院長係譚延闓，行憲之後嘅第一任院長係翁文灝，而政府搬去台灣之後嘅第一位院長係陳誠。

簡介

喺北洋政府嘅時期，中華民國內閣嘅阿頭係國務總理或者國務卿。1928年10月3號，國民政府通過咗《中國國民政府組織法》，設立行政院院長用嚟取代國務總理，並且設置咗行政院作為全國最高嘅行政機關。10月8號，譚延闓被選做首任行政院院長。10月25號，行政院成立，開始正式辦公。

《中華民國憲法》喺1946年起草嗰陣，中國民主社會黨籍知名學者張君勱本來嘅原意係設計偏向內閣制，行政院院長係由總統提名，再要經立法院同意任命。總統嘅政令要有行政院院長嘅副署先得，職權類似內閣總理。但係由於第二次國共內戰嘅爆發，國民政府實行動員戡亂，憲法增設咗臨時條款嚟賦予總統極大嘅權力。1949年，中華民國政府因為國共內戰失敗而搬咗去臺灣之後，中國國民黨總裁蔣介石長時間做總統，並用軍事戒嚴嘅《動員戡亂時期臨時條款》做佢嘅統治基礎，所以實際上變咗做總統制。而且陳誠同嚴家淦長時間都兼任副總統同埋行政院院長，淨係喺嚴家淦做總統同埋蔣經國做行政院院長嘅時候，先至短暫變返做內閣制。

1990年代，台灣進行過幾次嘅修憲，同埋訂立咗《中華民國憲法增修條文》。喺1997年第四次修憲之後，取消咗行政院院長嘅副署權，行政院院長直接由總統任命，唔再需要經立法院同意先至可以任命，叫做「改良式雙首長制」，偏向比較似法蘭西第五共和國嘅半總統制。

由於憲法無明確話過副總統不可以同時做行政院院長，所以在戒嚴時期嗰陣，副總統陳誠同嚴家淦都曾經兼任過行政院院長。1996年，連戰用行政院院長嘅身份當選副總統，同時繼續做行政院院長，引發憲政爭議，當時民主進步黨反對副總統可以兼任院長。司法院大法官喺《釋字第419號解釋》入面，認為兩個職位嘅性質雖然唔係明顯「不相容」，但都係不適宜兼任，呢場爭議最後因為連戰嘅辭職而結束。

改做雙首長制之後，行政院院長成日轉。喺2000年第一次政黨輪替之後，民主進步黨第一次執政，喺陳水扁做總統嘅8年入面總共有六位院長，除咗唐飛之外，淨低嘅行政院院長全部都係民進黨籍。由執政黨自己組閣，而且大多數做院長嘅都曾經做過立法委員或者台灣省議員。

2008年第二次政黨輪替，中國國民黨重新再上台執政。喺馬英九嘅8年總統任期入面，同樣都有六位院長，除咗吳敦義曾經做過高雄市市長同埋立法委員之外，劉兆玄、陳沖、江宜樺、毛治國同埋張善政大多數都係學者或者官員出身，其中張善政係第一位無黨籍嘅行政院院長。

2016年第三次政黨輪替，民主進步黨第二次上台執政，喺現任總統蔡英文嘅任期入面，出現過三位院長，包括無黨籍嘅林全、民進黨籍嘅賴清德、第二次做閣揆嘅蘇貞昌同埋曾經做過副總統嘅現任院長陳建仁。