西遊記大結局之仙履奇緣

出自維基百科,自由嘅百科全書
《西遊記大結局之仙履奇緣》嘅 VCD 封面,由美亞娛樂發行

西遊記大結局之仙履奇緣》(A Chinese Odyssey - Part Two~Cinderella)係香港1995年出品嘅電影之一。

電影資料[編輯]

製作[編輯]

出品機構:

  • 彩星電影公司
  • 西安電影制片廠(協助拍攝)

監製:楊國輝

導演:劉鎮偉、江約誠(執行導演)

編劇:技安(劉鎮偉嘅筆名)

主演:周星馳吳孟達羅家英朱茵蔡少芬藍潔瑛莫文蔚……等。

背景及簡介[編輯]

套戲係改篇自中國文學名著《西遊記》嘅電影故事,分咗上下兩集,呢套係第二集,而第一集叫做《西遊記第一百零一回之月光寶盒》。成個故事係講述主角孫悟空經過重新修煉,喺做一個普通人嘅過程中獲得「道」嘅啟悟,終於由邪變正,忠心地陪住唐憎前往西天取經。劇情除咗有笑之外,劇中嘅主要道具「月光寶盒」所帶出嘅種種因果,同埋對於人世間恩怨愛恨嘅描寫,都暗暗帶有令人反思咀嚼嘅意味。

劇情大綱[編輯]

一條女性嘅身形,撐住小舟穿過水草密茂嘅,再帶住隻仔去到沙漠,行吓行吓行到一個廢墟紫霞仙子見到裏面有個老人家喺度點油燈畀四個做官兵嘅人,但係支油燈入面得啲油,冇燈芯,一問之下個老人家話因為如來佛祖坐前嘅神燈支燈芯唔見咗,所以冇辦法…一吓爆炸聲之後,頭先幾個人全部現形,老人家就係二郎神,而四個官兵就係四大金剛,佢哋係奉命下凡嚟緝拿紫霞仙子返仙界;原來紫霞仙子同佢家姐青霞仙子不嬲都狗咬狗骨,佛祖為咗要佢哋平息怨恨,於是將佢兩個捲成一條燈芯,希望有朝一日怨恨化解。得知二郎神親自下凡捉人,紫霞仙子當然唔會輕易就範,於是打起上嚟,不過因為紫霞仙子用咗啲陰濕招,最後順利走甩咗,而二郎神佢哋任務失敗,唯有返返天庭。

(承接上回故事)隨住一聲大叫「般若波羅密」,加上閃電同爆炸之後,至尊寶返到去五百年前嘅水簾洞(後來嘅盤絲洞),跟住遇到喺佢板底烙底三粒痣嘅紫霞仙子;紫霞沒收咗至尊寶手上嘅月光寶盒,重將原本寫住「水簾洞」嘅石匾一掃變成咗「盤絲洞」做佢嘅竇口,重叫自己做「盤絲大仙」。

腳底嘅痛楚未消,至尊寶突然諗返起之前成日發喺一個山洞聽到把女人聲叫佢搵腳底有三粒嘅人…佢連隨拎起塊照妖鏡一照,竟然見到自己倒影係個馬騮樣!佢入去洞度搵盤絲大仙想要返個月光寶盒,寧願穿梭時空返去同白晶晶成親都唔願相信自己就係孫悟空。不過紫霞既然將個月光寶盒據為己有就當然唔會咁順攤畀返至尊寶,因為佢可以借呢件寶物嚟避開佢家姐青霞嘅追殺,有咁遠走咁遠。

入夜之後,原本嘅紫霞仙子居然性情大變,重自稱係青霞仙子,令到至尊寶成頭問號,重俾呢個青霞仙子打到暈咗…第二朝,至尊寶俾紫霞尋晚嘅舉動嚇怕咗,紫霞為咗要証明畀至尊寶知道佢並唔係精神分裂,於是提議將佢哋嘅縛埋一齊過夜;又到入夜時份,青霞又再出現,至尊寶靈機一觸自我介紹叫自己做秦祥林,青霞見到隻手同至尊寶縛埋一齊,兩句講唔啱就又一搥打暈至尊寶…再第二朝,至尊寶提議不如拎一樣紫霞身上嘅信物俾夜晚出現嘅青霞睇,等青霞相信紫霞已經死咗,唔好再追,於是紫霞就畀咗把紫青寶劍出嚟;至尊寶見寶精美,就順手將劍一拉出,紫霞睇到呢幕景象之下心情突然一陣翻騰。

趁天未黑,紫霞就叫至尊寶一齊去行下市集,但係去到市集時,倆人就引起咗喺路邊休息嘅一個頭人同一個拎住月牙鏟嘅人注意。突然,紫霞拉咗至尊寶埋一邊同佢表白,原來紫霞喺頭先見到至尊寶抽出寶劍嘅一刻已經愛上咗佢,不過至尊寶對白晶晶一往情深,所以就一口拒絕,之但係紫霞係都要知道至尊寶真正嘅心事,於是「嗖」一聲就化成一縷煙飛咗入至尊寶個心裏面問個清楚…至尊寶成個人當場呆咗望住自己個心口,重俾三個流浪漢喺佢身上大肆搜掠。

當晚黑,紫霞仙子叫至尊寶一個人喺沙漠度等佢家姐青霞出現,點知俾至尊寶遇到觀音大仕追殺頑孫悟空嘅一幕,重俾佢見到原來個月光寶盒已經喺唐三藏手上。至尊寶暱埋諗住睇吓有冇機會趁亂偷返個月光寶盒,點知當事件發展去到唐三藏話要自盡嚟求觀音大仕唔好消滅孫悟空嘅一段時,居然陰差陽錯出現咗一啲改變,就係個月光寶盒俾至尊寶打開咗嘅同時,至尊寶俾唐三藏用嚟自盡嘅金剛杖扑暈咗,而唐三藏亦因為咁而俾開咗嘅月光寶盒吸咗入去,唔知去咗邊個空間(睇上集嘅開場一段)。

第二朝至尊寶喺沙漠醒返,唔見青霞之餘亦唔見咗紫霞,於是周圍咁搵;當晚,至尊寶去到一個接近黑風嶺嘅山頭借宿,瞓瞓吓諗住起身痾夜尿,點知喺大後面重遇返去過好多個空間,奇裝異服嘅唐三藏;唐三藏誤認至尊寶係孫悟空,而至尊寶亦知道月光寶盒喺唐三藏手上,於是拉咗唐三藏一齊去到露宿處要求唐三藏交出寶盒……

喺冇幾耐之前,拎住月牙鏟嘅沙悟淨同埋豬頭人豬八戒路經黑風嶺,見到山頂洞口飛出個一個黑色嘅身影,越過山頭,原來佢就係每當月黑風高時就會四出吸精氣嚟補充精元嘅黑風老妖!呢個時候,黑風老妖嚟到露宿處,將喺度露宿嘅流浪者一個一個咁吸盡精氣,唐僧倆人眼見隻黑風老妖嚟到眼前預備吸佢哋嘅精氣,知道詐瞓都唔係辦法,於是彈起身分頭走;呢邊唐三藏誤打誤撞將黑風老妖炸燶咗,嗰邊阿至尊寶俾悟淨兩師兄弟誤認係大師兄孫悟空,呢頭四個人會合埋一齊,點知牛魔王又連隨殺到,重將佢哋四人全部帶晒返去牛魔王嘅山寨。

今日牛魔王嘅山寨裏頭滿堂紅布,賓客如雲,好似搞緊啲咩喜事,原來牛魔王要嫁妹,而嫁嘅就係人人都誤認佢係孫悟空嘅至尊寶。牛魔王當眾宣佈,呢日除咗慶祝個妹香香出閣嫁畀佢契細佬阿孫悟空(至尊寶)之外,重趁佢老婆鐵扇公主唔喺屋企,慶祝佢自己就嚟納妾,而呢位準妾待竟然係紫霞仙子!牛魔王重將喺唐僧手上得返嚟嘅月光寶盒即席送畀紫霞作為訂情信物,至尊寶為咗想要返個寶盒,事後就假意講咗一段感人對白[1]嚟討好紫霞,而紫霞亦深受感動,點不知鐵扇公主呢個時候返嚟對牛魔王大興問罪,喺老虎乸面前,牛魔王唯有將迎娶紫霞一事轉嫁畀至尊寶,於是鐵扇公主拉至尊寶埋一邊審問,但係審問嘅唔係關於牛魔王搞古惑嘅事,而係關於至尊寶竟然唔記得佢哋之間嘅舊情,搞到至尊寶一頭霧水,重約佢當夜嘅二更時份喺後花園「聚舊」;鐵扇公主拉牛魔王離開之後,紫霞亦相約至尊寶當夜二更時份帶埋月光寶盒一齊遠走高飛。

打更一路行一路敲響二更嘅聲,至尊寶喺佢嘅寢室靜雞雞咁溜出嚟,點知喺後巷遇到悟淨八戒兩人,兩人希望至尊寶去救埋師父唐三藏,然後一齊上路取西經;唐僧喺牢獄裡面,對至尊寶百般勸告,重即席「唱」出咗佢「登登登登[2]」嘅心底話,希望悟空(至尊寶)能夠立起心肝一齊去取西經,不過至尊寶覺得呢啲嘢完全係無稽之談,於是唔理唐三藏,返去諗住帶埋紫霞一齊離開,點知入到去紫霞嘅寢室竟然見到紫霞暈咗喺地下,重一身鮮!至尊寶唔理三七廿一即刻抱住受傷嘅紫霞離開牛魔王嘅山寨。

至尊寶帶住仍然暈緊嘅紫霞,同悟淨八戒幾個人一齊走到去沙漠,點知俾牛魔王個妹香香截住去路,原來香香對孫悟空(至尊寶)移情別戀仍然心深不息,於是出手打暈至尊寶,再使出佢嘅看家絕技---「移形換影大法」,將豬八戒同紫霞仙子嘅元神掉換,悟淨出手阻止唔切,香香再一次使出移形換影大法,想將悟淨嘅元神換入嚿石度,點知俾悟淨爪返轉頭,搞到香香自己同悟淨嘅元神交換咗,最後五個人全部暈晒喺沙漠。

第二朝,幾個人慢慢轉醒,豬八戒軀體嘅入面變咗係青霞仙子,而紫霞嘅軀殼入面就變咗豬八戒,不過同時亦存在住紫霞嘅元神,於是幾個人即刻圍住擁有香香元神嘅沙悟淨,要佢將大家變返原本咁,但係原來移形換影大法當發功一次,就要等七七四十九日後先可以再發第二次。至尊寶想趁機會喺紫霞手上攞返個月光寶盒之時,竟然俾追到嚟嘅牛魔王一手搶咗去,睇牛魔王一身傷痕,再睇一齊嚟到嘅鐵扇公主同樣都係傷痕纍纍,原來佢哋夫妻反咗面,追到嚟係要各自搶返自己嘅「愛人」;紫霞唔肯跟牛魔王返去,於是就大打出手,青霞加入幫拖;喺打鬥嘅混亂之中,至尊寶趁機會鬆人,鐵扇公主見情郎逃走,即刻緊追其後,追到去山崖頂,點知至尊寶失足跌咗落崖,鐵扇公主見至尊寶寧願跳崖死都唔肯同佢一齊,唯有傷心咁離去;另一邊大戰牛魔王嘅結果就係:紫霞同豬八戒嘅軀體俾牛魔王捉咗返去,而悟淨同香香嘅軀體就俾鐵扇公主嘅大鐵一吹唔知去咗邊。

先前喺市集度摷過至尊寶成身嘅三個流浪漢因為偷菩提子,俾幾個官兵綁住正要押佢哋去充軍,喺山邊休息嘅時候,幾個看守嘅官兵竟然俾山頂跌落嚟嘅嘢整,有俾呢嚿嘢壓死,亦有嚇到錯手互相俾死,睇真呢嚿嘢竟然係至尊寶,三個流浪漢見神仙打救,於是就帶咗至尊寶(其實係至尊寶糊里糊塗帶住佢哋三個)去到盤絲洞。

至尊寶醒返之後,流浪漢阿頭菩提子同佢講返喺暈緊之時成日發開口夢叫住兩個人嘅名,一個係晶晶,而叫得次數最多嘅係紫霞。傾傾吓,白晶晶殺到入嚟盤絲洞話要搵盤絲大仙拜師學藝,至尊寶一見白晶晶出現頓時喜出望外,晶晶開頭以為至尊寶係佢嘅負心舊情郎孫悟空,但係經過一輪對話之後先發現認錯人,至尊寶將喺五百年後點樣遇到白晶晶嘅遭遇用案件重演形式交代出嚟,重即時提出要同白晶晶成親,白晶晶一心拜師點知居然有人向佢求婚,為咗証實係真係假,於是「嗖」一聲就化成一縷煙飛咗入至尊寶個心裏面睇清楚…至尊寶又再次當場呆咗望住自己個心口,而三個流浪漢就照舊喺佢身上大肆搜掠…

另一邊,牛魔王迫紫霞七日後同佢成親,紫霞深信至尊寶會返嚟救佢,於是暫時應承咗牛魔王嘅迫

喺盤絲洞內,幾個流浪漢忙住幫至尊寶搞成親,掛燈籠又掛紅帳;到咗成親嘅前一日,至尊寶喺洞內搵返紫霞先前同牛魔王大戰時跌咗嘅一串手,再加上同菩提子嘅一席話之後,心裏面泛起一陣又一陣嘅漣漪

牛魔王嗰邊,音樂聲襯托住之下,成親大典正式開始,而盤絲洞內,白晶晶喺臨成親之前竟然留離去,話已經睇清楚其實至尊寶最鍾意嘅並唔係佢,而係另有其人;正當至尊寶失意呆坐嘅時候,蜘蛛精春三十娘出現用劍指嚇至尊寶,要佢講出師妹白晶晶嘅下落,至尊寶唔知,於是春三十娘逐個將啲流浪漢殺死,到咗要殺至尊寶嘅時候,至尊寶要求想臨死時睇睇自己個心,睇吓紫霞留低咗啲乜喺入面,於是春三十娘手起刀落……

紫霞嘅等待似乎冇希望,於是要求牛魔王放咗佢家姐(豬八戒身體嘅青霞),紫霞用刀割斷咗青霞嘅綁之後就順手將把刀暗中收埋,青霞知道紫霞想點,一念姊妹之情,於是挺而出手要同牛魔王決鬥,呢個時候,暱喺人叢中嘅香香出嚟再次施展移形換影大法,不過喺過程中就將自己嘅元神移咗入一隻路經嘅仔軀體度,而青霞嘅元神就移咗入香香嘅軀體,其他人就變回原狀,但係牛魔王嘅功力實在太強,悟淨八戒同埋青霞都冇辦法救到紫霞。

一個有支好粗嘅柱打橫頂住嘅水簾洞裏頭,至尊寶嘅元神終於明白觀音大仕喺夢中嘅指示,去取西經就係要消解人世間嘅種種仇恨,於是下定決心,戴返個金剛圈,變返做已經脫胎換骨嘅齊天大~~~~

一變返做齊天大聖,孫悟空第一時間去到牛魔王山寨,使出渾身解數,終於打敗牛魔王救返唐僧,不過喺過程中紫霞仙子俾牛魔王打死咗;最後,青霞帶住悲傷嘅心情返去如來佛祖身邊做燈芯,專心修行,而幾師徒喺月光寶盒嘅幫助之下,離開咗呢個空間……當閃電爆響之後,悟空一醒已經係五百年後,佢發現自己身處喺一個叫菩提洞嘅山洞,而呢個洞喺五百年前係叫做水簾洞嘅;佢見沉默寡言嘅師父唐三藏同互相禮讓嘅悟淨八戒已經收拾好行裝,於是齊齊出發去取西經。

故事就喺一片佈滿一行腳印嘅大沙漠之下結束。

主要出場人物同埋演出者[編輯]

主題曲[編輯]

  • 「人生的天與地」(上集主題曲)
作曲:盧冠廷/填詞:唐書琛/主唱:盧冠廷
作曲:盧冠廷/填詞:唐書琛/主唱:盧冠廷
  • 「未了情」(上集完場曲)
作曲:賀緣汀/填詞:唐書琛/主唱:莫文蔚
  • 「追月」(下集完場曲)
作曲:侯湘/填詞:唐書琛/主唱:朱茵
  • 「ONLY YOU」(下集插曲)
作曲:BUCK RAM & ANDO RAND/填詞:劉鎮偉/主唱:羅家英

[編輯]

  1. 因為呢套戲,呢段對白成為咗日後嘅經典:「曾經,有一份好真誠嘅愛情擺喺我面前,但我無好好咁去珍惜,等到失去嘅時候先至追悔莫及,人世間最痛苦嘅事情莫過於此。如果上天能夠畀我一個重新嚟過嘅機會,我會同嗰個女仔講三個字:『我愛你』。如果係都要喺呢份愛加上一個期限,我希望係,一萬年。」
  2. 改篇自<Only You>嘅抵死歌詞,節錄其中幾句:「Only YoU~~~~~,Can take me 取西經,Only You,能殺妖精鬼怪,碰到釘,咪驚,我 Understand,要全力地去 DO~~~~~,戴返個箍就喃嘸呵彌陀佛。」