訴諸新穎

訴諸新穎（參見拉丁文：Argumentum ad novitatem）係一種唔啦更謬論，指講緊謬論嘅人詏話佢個主張因為比較新穎所以係正確嘅－「呢個主張因為夠革新，所以係正確嘅」。例如係以下呢段對話噉：

A 君：都成廿一世紀啦，仲信耶穌 2,000 年前教嗰套？你老唔老土啲呀？

B 君：舊嘅觀念都唔一定係錯嘅，例如牛頓力學呢套物理學理論有成 500 年歷史，但係到咗今日都仲好啱用，喺好多工程學領域嗰度都好有價值。相比之下，十九世紀弗洛伊德所創嗰套精神分析理論俾心理學界批評到體無完膚，家陣經已冇心理學家會當佢係一回事。由此可見，比較新嘅觀念唔一定比較正確。

基本概念

訴諸新穎可以有兩種形式：

• 高估新同現代嘅嘢，所以冇諗過佢哋係咪真係最好；又或者
• 低估舊同傳統嘅嘢，所以冇認真諗過舊嘅嘢係咪真係差。

呢種論證手法喺廿一世紀嘅社會好常見，好多人都好想用最新穎嘅嘢：例如廣告就成日用「邊隻邊隻產品係最新嘅」嚟到做宣傳，想令啲消費者因為隻產品新就覺得佢好；而喺二零零零年代上半橛發生嘅科網泡沫就可以了解成係源自啲人對當時嘅新穎諗頭熱衷得滯，而搞軭咗個市場。

事實係，歷史多次證明咗，比較新穎嘅諗法都唔一定係正確過或者好用過舊時嘅諗法嘅。亦可以睇下社科中對創新嘅研究講到，諗頭或者發明唔單只要新，仲要有用，先可以算係有價值。

相關諗法

相關嘅謬論：

• 訴諸傳統：可以話係訴諸新穎嘅相反，指啲人有陣時純粹因為一個主張係古老嘅所以就覺得佢係啱。
• 唔啦更謬論

等等。

睇埋

• 傳統
• 經濟泡沫
• 錯失恐懼
• 範式轉移