訴諸傳統
訴諸傳統（粵拼：sou3 zyu1 cyun4 tung2；英國話：appeal to tradition；拉丁話：Argumentum ad antiquitatem[1]）係一種唔啦更謬論，指講緊謬論嘅人詏話佢個主張因為受到傳統支持所以係啱嘅－「呢個主張因為我哋不嬲信開，所以係啱嘅」[2][3][4][5]。例如係以下呢段對話噉：
- A 君：我認為新教嘅信念係真確嘅，因為教會信呢個諗法信咗好耐喇。
- B 君：噉又點呢？歷史說明咗，有好多舊嘅諗法都係錯嘅。例如中世紀嗰陣嘅羅馬天主教會主張話地球係宇宙嘅中心，仲為咗要維持佢哋嘅聲望而迫害伽利略，但係後嚟嘅科學研究清楚噉證明咗教會係錯嘅。所以「教會信呢個諗法信咗好耐」都唔等如呢個信念係真確嘅。
A 君喺度用緊訴諸傳統嚟詏嘢，因為佢成個過程入面淨係用咗「我信嗰套嘢係傳統」嚟到撐佢個諗法。
假設[編輯]
如果細心噉諗吓，就會知道「呢個主張因為我哋不嬲信開，所以係啱嘅」呢條思路做咗兩個好有問題嘅假設：
- 前人諗出呢個主張嗰陣，個主張係真確嘅；呢個假設好有問題，因為事實證明咗，世界上有好多傳統嘅迷信（例如係粵文化當中打小人噉）一開始就係建基於一啲好有問題嘅諗法嘅。
- 前人信呢個主張嘅理由，喺而家都仲行得通；呢個假設都有問題，因為隨住年日過去，有好多過往望落合理嘅諗法都有可能會發現咗新知識而變得明顯唔合理－呢種事喺科學同哲學嘅歷史上係噉發生緊。
合理使用[編輯]
要留意嘅係，訴諸傳統謬論嘅問題在於齋靠「嗰個主張古老」嚟到撐一個主張，但係如果用呢個主張嘅人唔衹係用呢個理由嚟撐佢個主張，仲有加埋第啲（同「信咗好耐」相關嘅）理據嘅話，噉佢個論證有可能係合理嘅，例如係以下呢段對話噉：
- A 君：我主張要改過電腦鍵盤嘅設計，唔再用 QWERT 呢種排列。
- B 君：我認為我哋應該繼續用 QWERT 嘅鍵盤，因為佢用咗好耐，要改嘅話會涉及好多人力物力，根本唔合乎經濟效益。
- A 君：哦，你喺度訴諸傳統！
- B 君：冇呀，我除咗「用咗好耐」之外，仲有用「人力物力」呢個理據嚟到撐我個諗法喎。
睇埋[編輯]
攷[編輯]
- ↑ Logical Fallacies and the Art of Debate.
- ↑ Appeal to Tradition - Logically Fallacious.
- ↑ "Fallacy: Appeal to Tradition". 原著喺2018年8月11號歸檔. 喺2018年8月5號搵到.
- ↑ Appeal to Tradition - TV Tropes.
- ↑ Harpine, W. D. (1993). The appeal to tradition: cultural evolution and logical soundness. Informal Logic, 15(3).