跳去內容

近衛文麿

出自維基百科，自由嘅百科全書

近衛文麿
日本 日本內閣總理大臣
任期
1937年至1939年、1940年至1941年
前任林銑十郎（第一任期）
米內光政（第二任期）
繼任平沼騏一郎（第一任期）
東條英機（第二任期）
日本 日本外務大臣
前任宇坦一成
繼任有田八郎
個人資料
出世1891年10月12號
日本 日本東京府麴町區（而家嘅東京都千代田區）
死1945年12月16號(1945-12-16)（54歲）
日本 日本東京都杉並區
死因自殺
政黨研究會
火曜會
大政翼贊會
仔女近衛文隆
野口昭子
細川溫子
近衛通隆
山本斐子（私生女）
父母近衛篤麿（老豆）
母校京都帝國大學法科大學
簽名
軍事背景
軍銜從二位勳一等

近衛文麿（日文：このえ ふみまろ，中國大陸有人譯近衛文麻呂[註 1]，1891年10月12號—1945年12月16號），係日本政治人，曾經做過第34、38同39任日本首相、國務大臣、外務大臣同埋司法大臣，勳位係從二位勳一等公爵，仲係攝家近衛家第二十九任當主。佢做首相期間發動二戰、成立日本史上第一個一黨專政嘅大政翼贊會、成立軸心國同大東亞共榮圈，仲係第一個支持法西斯嘅日本人。

1945年日本戰敗投降，文麿身為開戰嘅首相，絕對有可能畀人判監同埋處死，好有可能因為咁而用氰化鉀自殺，終年54歲。

經歷

[編輯]

早年

[編輯]
後生嗰陣嘅近衛

1891年，篤麿同老婆衍子嘅大仔響東京府麴町區（即而家嘅東京都千代田區）出世，由太爺忠熙改名叫文麿。文麿細個嗰時，阿媽衍子病死，老豆篤麿再娶衍子個細妹貞子做老婆。由於文麿好掛住阿媽，所以佢對後母冇乜好感[1][2]。

1904年，老豆病死，近衛家當主一位由當時淨係得12歲嘅文麿繼承，但同時之間佢要幫手還清老豆生前好多嘅債務，因此佢嘅性格變得反叛[2]。

早年入讀泰明尋常小學，之後升讀學習院中等科。跟據慣例，當時日本貴族仔女應該要升上學習院高等科，但係文麿受到第一高等學校（簡稱一高，即而家嘅東京大學教養學部）時任校長新渡戶稻造嘅影響，選擇投考一高。1912年由一高畢業之後，升上東京帝國大學（即而家嘅東京大學）哲學部，後嚟受到共產主義經濟學家河上肇影響，轉校到京都帝國大學（即而家嘅京都大學）法科大學部[3]。

響京都大學同河上肇交流期間，佢由河上身上學到社會主義，令到文麿好有共鳴。1913年，佢響電車上識咗毛利高範二女千代子，同年結婚，之後佢同前首相西園寺公望見面。西園寺公望同老豆篤麿係出嗮名嘅政敵，但係西園寺唔單止冇岐視文麿，反而出錢幫佢還債，令到文麿好感動，之後佢由老豆身上接觸嘅亞洲主義，變成信咗西園寺嘅歐美主義[4]。

1914年，佢發表文章「新思潮」，而文章內容因為過份偏右而畀人「封殺」[5]。

政治生涯

[編輯]

加入貴族院

[編輯]

1916年，根據貴族院令，文麿以公爵議員嘅身份加入貴族院。兩年之後發表一篇文「排除英美本位嘅和平主義」[6]。

1919年，佢跟住西園寺公望出席巴黎和會，會上佢同幣原喜重郎曾經提出「廢除人種差別法案」（人種差別即係中文嘅種族岐視），但係被否決[7]。1926年，佢兼任宮內省宗秩寮審議會審議員[8]。

1927年，佢同木戶幸一、德川家達組成火曜會，成為貴族院一個新勢力，勢力慢慢開始同西園寺公望嘅立憲政友黨睇齊。[9]同時之間，因為文麿生得高（身高一米八，響當時嘅日本嚟講已經好高），又係五攝家嘅時任當主（仲要係後陽成天皇第十二世孫），學歷又高[10]，加上佢提出嘅「反對英美協調外交，解除現況」呢個主張，響當時得到唔少市民支持，所以佢畀人睇好會做首相[11]。

近衛文麿響貴族院發表講話

1933年，佢升為貴族院議長，同年佢同後藤隆之助成立昭和研究會（呢個會第日做咗文麿嘅「智囊團」）[12]。1934年，佢由橫濱去美國訪問，見咗時任總統富蘭克林羅斯福同埋國務卿賀可德。返嚟日本之後，佢批評美國根本唔知道日本嘅情況[13]。

第一次做首相

[編輯]
第一次近衛內閣

1937年，林銑十郎做咗三個月首相就話唔撈。呢個時候，西園寺公望提名近衛文麿接任，獲得唔少人支持，所以文麿響6月14號正式做第34任日本首相。佢響任命內閣上有唔少新人，所以國人對呢個政府期望好高[14]。

就任之後，文麿提出要「國內嘅人要共融」，主張特赦響二二六事件入面嘅皇道派軍官，啲人聽到之後全部嚇親。其實呢個諗法一早就由前文部大臣荒木貞夫提出，但係響西園寺公望反對下就泡咗湯，而近衛呢次都係響西園寺反對下而不了了之[15]。

一個月之後，爆發七七事變，同月9號響駐中國陸軍司令官香月清司指示下，軍隊決定唔搞大件事，另外響軍人今井武夫調解下，北平特務機關長松井太久郎同第二十九軍副軍長秦德純決定簽停戰協議。但係響呢個時候，文麿向軍隊要求派四個師團打中國。雖然最後淨係出咗三個師團，但係就令前面日本軍人嘅努力白廢[16]。

之後佢向內閣會議要求畀軍費，初初就好少嘅，但係後嚟竟然追加到四億，陸軍參謀本部作戰部長石原莞爾聽到之後曾經勸過文麿，話咁樣做會同滑鐵盧之役一樣下場，提議文麿親自去南京同蔣中正搞談判。本身文麿係同意嘅，但最後又唔去。同年8月2號，佢為咗畀軍費，就向市民加稅。同時之間佢同宋子文搞談判成功，文麿決定派宮崎龍介到南京向國民政府攞電報，點知響軍人反對下又取消咗[16][17]。

同月9號，上海爆發虹橋機場事件（又叫大山事件），中日交惡。4日之後，同一個地方爆發八一三事變，文麿批准追加兩個師團，兩日之後決定向南京發起渡洋爆擊，響8月17號正式放棄由香月清司指示嘅「唔搞大件事」主張，之後更加宣佈將「北支事變」嘅官方名改叫「支那事變」，同時又打壓當初勸佢同南京政府談判嘅石原[18][19]。

同年10月，佢創立國民精神總動員中央連盟同埋企畫院，一個月之後簽訂防共協議（即係反共產黨協議），同時確立全體主義體制。同年12月，陸軍下令打南京，之後發生咗南京大屠殺，第一次中日戰爭暫時停止[20]。

1938年，當時著住勳一等瑞寶章軍服嘅近衛文麿

響1938年，陸軍參諜本部同政府開會，傾下點樣處理同中國嘅戰爭，後嚟自納粹德國嘅小組都加入。參諜本部同納粹德國小組都支持停戰談判，但係文麿響1月16號發表第一次近衛聲明，話唔會再同蔣中正接觸，並且要求繼續打中國[21]。5月，日軍攻入徐州，兩個月之後由尾崎秀實、松本重治、犬養健、西園寺公一同埋影佐禎昭代表日本政府同汪精衛接觸，同南京政府反面[22]。

同年2月，有六百個防共護國人士偷襲咗立憲政友黨總部，文麿見到之後就搞咗成上千條修正，兩個月後推出國家總動員法電力國家管理法，形式上模彷咗蘇聯嘅第一個五年計劃，5月又由外國引入戰時體制，令到日本越嚟越偏向國家社會主義[23]。8月，書記長麻生久希望響以社會大眾黨為中心，另起一個黨，但文麿覺得時機過早而冇應承。不過，呢個其實係文麿嘅計劃之一，因為呢個係為第日大政翼贊會搞獨裁嘅第一步[24]。

同年11月，佢發表咗東亞新秩序聲明（又叫第二次近衛聲明），一個月後又發表近衛三原則聲明（又叫第三次近衛聲明），話要對中國老友、一齊防範共產主義、一齊搞好經濟[25]，同時佢支持嘅汪精衛由重慶走去越南，搞到蔣中正知道之後就撤消咗佢嘅黨籍[22][21]。

1939年1月，文麿話自己唔想再做軍方嘅「傀儡」，同月5號就唔撈，由平沼騏一郎接任。但係冇耐，平沼因為簽訂德蘇互不侵犯條約而辭職。同年6月，近衛發表「新體制聲明」，一個月後就有成6個黨因為呢個聲明而解散[26]。

近衛同東條英機、吉田善吾、松岡洋右傾計

1939年，米內光政組成內閣，用返上一任陸軍大臣畑俊六，但係畑俊六響三國同盟條約上同米內意見分岐，所以就唔撈，搞到成個內閣都要辭職。而西園寺公望再一次提名近衛文麿出任下屆首相，獲得大部分人接納，所以佢就響1940年上台[26]。

第二次做首相

[編輯]
第二次近衛內閣

1940年7月，近衛成功搞點內閣。幾日後，佢提出要成立大東亞共榮圈，決定展開新體制活動，放棄當初由大正天皇提出嘅「大正民主」，再次解散其他支持民主嘅黨，令到大政翼贊會一黨專政。同年9月，日軍入侵法屬印度支那，四日後佢又同德國、意大利簽咗三國同盟條約，形成二戰軸心國[27]

1941年，佢簽訂蘇日中立條約，外相松岡洋右要求向美國提出修正案，但畀美國拒絕[27]。同年6月，西方爆發蘇德戰爭，身為三國同盟條約成員之一嘅日本，被迫要出手幫德國[28]。

7月2號，佢決定發起「情勢ノ推移ニ伴フ帝国国策要綱」，海軍要向南海進攻（因為有好多天然資源），同時陸軍要全力攻蘇聯。同月7號，佢又發動關東軍特種演習[29]。

7月18號佢決定內閣辭職，原因係出於松岡洋右（松岡響對待美國嘅手法上同文麿相反，因此文麿覺得佢造成咗日美不和，但大日本帝國憲法話明唔可以亂炒大臣）[28]。

第三次做首相

[編輯]
第三次近衛內閣

1941年7月18號，響第二次內閣辭職同一日，佢即日上任做第三次首相，搞成咗第三次近衛內閣，除咗外務大臣由「南進論派」嘅豐田貞次郎接任之外，其他全部留任。同時，美國對日本入侵法屬印度支那不滿，就唔畀對日本運石油，令日本陷入困境[30]。

近衛文麿（約莫1941年秋天）

9月，佢頒佈咗帝國國策遂行要領，要求美英兩方響交涉期之前應承日美話事人會談，當晚仲見咗美國駐日大使約瑟夫格爾。但係美國最後決定唔接受呢個提議[31]。之後，陸軍方面覺得日美已經唔會傾得成，要求內閣響10月15號之前畀回應[32]。

迫於現實，近衛文麿響限期前三日響荻外莊同陸相、海相、企畫院總裁、外相五個人傾點算好（又叫荻外莊會談），最後文麿因為對呢場仗冇信心，而且陸相東條英機嘅「強硬派講法」獲得支持，所以近衛響第二日提出要辭職，10月18號正式總辭。本身佢係提名咗「主和派」嘅東久邇宮稔彥王繼任首相，但係內大臣木戶幸一最後就改為提名「強硬派」嘅東條英機[33]。

有人話，文麿並唔係因為外交失敗而辭職，而係因為有病先至唔撈（佢就連東條嘅重臣會議都冇出席）。而佢嘅二女婿細川護貞都話佢係因為有痔瘡先至咁做。響近衛辭職之後冇耐，就爆發太平洋戰爭[32]。

終戰前和平工作

[編輯]

1943年，經過前一年同英美外交失敗之後，近衛文麿開始察覺到日本好有可能會打輸仗，由強硬派轉為主和派。心腹佐藤賢了係第一個發現佢呢個變化嘅人，試過變返近衛做強硬派，但係嗰時嘅近衛一早已經開始參加和平工作[34]。

1944年，塞班島畀美軍成功攞返（原先唔屬於日本），開始有好多人要求東條英機落台，但一直唔鍾意東條嘅近衛突然唔出聲，佢話要東條為二戰負上最大責任，如果佢繼續做就錯得多。之後佢曾經話日本可能戰敗，到時天皇就要退位，所以佢就同仁和寺嘅和尚傾點數，響投降之後天皇就出家到仁和寺（後嚟天皇並冇咁做）[35]。

1945年2月嗰陣，佢同昭和天皇講：「今次（二戰）日本係輸硬㗎啦，可惜都冇計。我最驚嘅，唔係打輸仗，而係有機會引起共產主義革命。不如盡快決定點樣可以完咗場仗佢。」[34][36]同年6月，內大臣木戶幸一提出要和平交涉，一個月後時任外相東郷茂德提名近衛做特使，12號獲得天皇任命（其實近衛根本唔想做）。雖然佢做咗特使，但佢響飛去莫斯科之後一樣畀人趕返嚟，連見都冇見面。所以佢轉為同其他人商討交涉案，案件入面要求日本放棄琉球、小笠原群島同埋北千島，但係呢個提議畀日軍用為暫時性，所以近衛開始要求同英美直接見面傾[37]。

終戰後同死

[編輯]
東久邇宮內閣
盟軍總司令一個憲兵響度檢查近衛嘅屍體

1945年8月15號，日本無條件投降，由東久邇宮稔彥王接任首相，近衛獲任命為內閣副總理。同年10月4號，近衛同駐日盟軍總司令德格拉斯麥克阿瑟見面，麥克阿瑟指出要保留天皇嘅權力，但就要改造日本政府，近衛就話「我會接受你（麥克阿瑟）嘅所有意見。」最後，麥克阿瑟同佢講：「近衛你雖然嚟自封建家族，但你係『世界主義者（cosmopolitan）』，精通世界形勢。希望你可以聯同其他同你一樣思想嘅人支持駐日盟軍總司令改憲法。」之後一日，稔彥王因為同駐日盟軍總司令傾唔埋而唔撈[38][39]。

10月8號，近衛同GHQ顧問佐治艾奇遜見面，傾下點樣可以改憲法。之後佢又帶埋松本重治、牛場友彥同佐佐木惣一一齊傾[38]。10月23號，朝日新聞發佈冇耐就要改皇室典範，時任首相幣原喜重郎反對，近衛第二日即刻就同佢傾。佢對於呢次嘅行動（改皇室典範）覺得好開心，佢認為自己好有可能會攞到新嘅政治地位，仲覺得自己已經抵消咗響二戰犯嘅「罪行」，唔會畀遠東國際軍事法庭拉。另一方面，紐約時報批評近衛唔應該改皇室典範，話「如果近衛文麿畀人睇成戰犯，冇人會覺得出奇」[40]。

盟軍總司令響11月話因為稔彥王嘅辭職，已經完美咁解決咗問題，所以近衛提出嘅改皇室典範係冇用嘅。呢個消息大大咁打擊咗近衛，同時盟軍總司令都開始追究佢嘅戰爭責任。11月5號，情報部調査分析課長羅曼赫伯正式起訴佢。12月6號，近衛畀遠東國際軍事法庭列入甲級戰犯名單，關響巢鴨監獄。同月16號，佢響畀人審前用氰化鉀自殺，終年54歲，係日本歷嚟唯一一個自殺死嘅首相[3][39][41]。

12月21號，正式搞葬禮，葬響京都市北區大德寺嘅「近衛家廟所」[39]。

評價

[編輯]

正面

[編輯]
近衛

除咗生得高、血統高貴、學歷高之外，近衛響人中地方留咗仁丹（衛生鬍），畀人感覺就好似希特拉，有唔少人因而改佢花名「希特拉」。正正係因為有呢幾個因素，所以響佢後生嗰陣曾經得到唔少人力捧（最捧佢嘅係西園寺公望），就連政敵都唔夠膽睇輕佢[42][43]。

作家今東光曾經咁樣話近衛：「有一次，有個一流嘅妓女出席宴會，唔少政治人剩係識得叫佢幫手斟酒，一啲都唔尊重嗰位妓女。但近衛唔同。佢叫個妓女『請畀君飲返杯』。起碼佢有返至基本嘅尊重，所以話佢嘅天性就係做政治人。」[44]

而內大臣木戶幸一響近衛死後讚佢：「佢係一個開放、識得點去包容人哋嘅人。正因為咁，所以當初先有咁多日本市民支持佢。唔知點解，我響同佢相處嗰陣硬係會遇到啲麻煩。」[45]

另外，近衛嘅婚姻生活過得好好，係日本少有可以同正室關係咁好嘅政治人。1913年，當時仲係學生嘅佢，對響架電車上識嘅靚女、第一高等學校女學生千代子一見鍾情，之後努力追佢，最後兩個人響同年年尾結婚。呢次亦都畀人叫做「學生結婚」，近衛對呢個稱號覺得好威水。但係佢都有妾侍[46]。

負面

[編輯]
軸心國嘅三大領袖

雖然佢留嘅「希特拉型」仁丹同埋高大嘅身材係令到唔少人力捧，但同時有人批評佢一早就諗住學希特拉咁搞獨裁，想攞至高權力，好似由佢成立嘅大政翼贊黨，就係日本史上第一個一黨專政嘅法西斯黨[43]。

現代人多數將東條英機視為二戰最大負責人，其實開戰嘅人係近衛，軸心國又係由近衛一手搞成，所以唔少人覺得佢先至係二戰最大責任人。因此，近衛由初初嘅畀人睇好，後尾民望跌到落谷底，有學者仲將佢講成「響大正、昭和、平成三個年代，近衛係民望最低嘅。」[47]

而佢響日本投降後，未審判前就自殺，更惹嚟好多人抨擊，批評佢冇用同埋唔負責任，為咗逃避畀遠東國際軍事法庭審判，將二戰嘅責任淨係要由有畀軍事法庭審判嘅人承擔，同埋攞埋大日本帝國海軍同陸軍做「擋箭牌」，但自己都好似唔關事。就連佢嘅老友、外交官重光葵都話佢唔抵幫：「如果以一個二戰懷疑罪犯嚟講，近衛係最醜劣嘅。」有人認為佢之所以會咁做，係佢覺得自己死梗，唔想審判後畀人唱到「遺臭萬年」，所以就自殺咗先，令到啲人冇咁反感[註 2][48]。

對於佢當初決定開戰，啲人批評佢野心太大同埋過份自大，覺得日本實係好打得；又目光短淺，冇諗過戰爭所為百姓造成嘅傷害[49][50]。最後一位海軍大將井上成美就話：「佢咁無腦又自大，都可以做到首相，真係一個食『五目飯』嘅政治人[註 3]。響二戰問題上，海軍曾經講過好多次NO，但佢又自大，最後搞到日本要投降。啲人成日響度鬧東條，但查實近衛先係開戰嗰個人。」[51]

對於佢響1941年打後突然轉軚，變成主和派，有人認為近衛係響度「贖罪」，透過大力支持同做和平工作嚟彌補返佢當初發動二戰所對日本造成嘅傷害，令到自己個名冇咁臭[52]。但都有人認為，佢係想透過和平工作，一洗二戰發動者呢個臭名，從而攞到新嘅政治地位，所以佢響做東久邇宮內閣期間先至咁願意幫盟軍總司令改憲法[50][53][54]。

另外，文麿同同父異母細佬秀麿係出嗮名唔似嘅兄弟。秀麿響文麿自殺之後，曾經話：「我大佬不嬲都係咁懦弱。」「響我細個嗰時，佢曾經同我講好多關於天文同埋宇宙呢方面嘅知識。而家諗起上嚟，我覺得如果佢做哲學家或評論家，會好過佢做政治人。」[55]

屋企[56]

[編輯]
文麿同老婆千代子

老豆：近衛篤麿

阿媽：衍子

兄弟姐妹：長細妹武子---長細佬秀麿---二細佬直麿---三細佬忠麿

老婆：千代子（子爵高範個女）

情人：山本縫子

  • 私生女：斐子（原本係水谷川忠麿嘅契女，後嚟斷絕關係）

情人：市丸

註

[編輯]
  1. ↑ 「麿」係日本漢字，原先係中國字，但後嚟就演變成日本常用人名。呢隻字係出自中國嘅「麻呂」，原先意思同「糜」一樣，由中國傳入日本，但由於日本以前係打直寫字，久而久之就合埋變咗一隻字「麿」。而中國到而家都暫時對於「麿」未有統一嘅讀法，所以譯返隻字原來嘅意思「麻呂」。正因為咁，所以「麿」同「麻呂」係通用嘅，就好似阿部仲麻呂又可以叫「阿部仲麿」。但呢種用法響香港並唔常用，香港人多數直接叫「近衛文麿」。
  2. ↑ 另外，東條英機響得知自己畀軍事法庭起訴之後，曾經攞槍自殺，但就自殺唔成
  3. ↑ 五目飯係日本一道菜，主要有油豆腐同蛋，而菜會跟據季節而有所變化。呢到係指佢淨係識食，但就唔識去用腦。

攷

[編輯]
  1. ↑ 伊藤武 (1937)。《近衛公清談録》。千倉書房。ASIN B000JANJQI。
  2. ↑ 2.0 2.1 〈右派から左派まで熱狂した「近衛新体制」の空気（1940－1941）〉。《ダイヤモンド・オンライン》 (日文)。喺2020-12-03搵到。
  3. ↑ 3.0 3.1 〈歴代総理の胆力「近衛文麿」（4）椅子に腰掛け天皇奏上の"無礼" (2019年10月3日)〉。《エキサイトニュース》 (日文)。原著喺2021年10月18日歸檔。喺2020-12-03搵到。
  4. ↑ 勝田龍夫 (1981)。《重臣たちの昭和史》。文藝春秋。ISBN 9784163626604。
  5. ↑ 中西寬。《近衛文麿「英米本位の平和主義を排す」論文の背景-普遍主義への対応》。法學論叢。
  6. ↑ 日本放送協会。〈令和初の「歌会始」披露したのは誰？〉。《NHKニュース》。原著喺2020-11-27歸檔。喺2020-12-03搵到。
  7. ↑ Margaret MacMillan (2003). Paris 1919: Six Months That Changed the World. Random House Trade Paperbacks. ISBN 978-0375760525.
  8. ↑ 《宮内省職員録》。宮内大臣官房秘書課。1926。
  9. ↑ 三訂版,世界大百科事典内言及, 美術人名辞典,デジタル大辞泉,百科事典マイペディア,デジタル版 日本人名大辞典+Plus,江戸・東京人物辞典,世界大百科事典 第２版,ブリタニカ国際大百科事典 小項目事典,日本大百科全書(ニッポニカ),精選版 日本国語大辞典,旺文社日本史事典。〈近衛文麿とは〉。《コトバンク》 (日文)。喺2020-12-03搵到。
  10. ↑ 〈菅首相は庶民かどうか？歴代首相と比べて格付けしてみました。（歴史家・評論家 八幡和郎）〉。《選挙ドットコム（ザ選挙）》 (日文)。2020-10-06。喺2020-12-04搵到。
  11. ↑ 〈日本外交１５０年　東京大名誉教授　渡邉昭夫氏〉。Mainichi Daily News (jp)。2019-08-06。原著喺2020-09-18歸檔。喺2020-12-04搵到。{{cite news}}: CS1 maint: unrecognized language (link)
  12. ↑ INC, SANKEI DIGITAL (2020-10-12)。〈明治維新から昭和 戦時下の日本、「改革」の名のもとで共産主義化の危機：イザ！〉。《イザ！》 (日文)。喺2020-12-04搵到。
  13. ↑ INC, SANKEI DIGITAL (2019-02-23)。〈【編集者のおすすめ】『日米戦争を策謀したのは誰だ！』林千勝著〉。《産経ニュース》 (日文)。喺2020-12-04搵到。
  14. ↑ 秦郁彥 (2001)。《日本官僚制総合事典：1868 - 2000》。東京大學出版會。ISBN 978-4130301213。
  15. ↑ 〈歴代総理の胆力「近衛文麿」（3）天皇いわくの近衛の「弱さ」〉。《アサ芸プラス》 (日文)。喺2020-12-04搵到。
  16. ↑ 16.0 16.1 INC, SANKEI DIGITAL。〈【昭和天皇の８７年】盧溝橋事件の真相 日中戦争はこうして始まった〉。《産経ニュース》 (日文)。原著喺2021-04-23歸檔。喺2020-12-04搵到。
  17. ↑ 秦郁彥 (1996)。《盧溝橋事件の研究》。東京大學出版會。ISBN 978-4130201100。
  18. ↑ 自由時報電子報 (2018-10-15)。〈政治的日常》日中全面戰爭下的內閣（上）：第一次近衛文麿內閣 - 自由評論網〉。《自由時報電子報》。喺2020-12-05搵到。
  19. ↑ 〈2017とくほう・特報/盧溝橋事件８０年と安倍政治/日中全面戦争の泥沼 なぜ陥ったか〉。www.jcp.or.jp (日文)。喺2020-12-05搵到。
  20. ↑ 〈デジタル毎日ご購読・お申し込み〉。《毎日新聞》 (日文)。喺2020-12-05搵到。
  21. ↑ 21.0 21.1 Hosaka, Masayasu, 1939-; 保阪正康, 1939- (1999). Shō Kaiseki. Tōkyō: Bungei Shunjū. ISBN 4-16-660040-0. OCLC 45718842.{{cite book}}: CS1 maint: multiple names: 作者名單 (link)
  22. ↑ 22.0 22.1 Kamisaka, Fuyuko, 1930-2009.; 上坂冬子, 1930- (1999). Ware wa kunan no michi o iku : Ō Chōmei no shinjitsu. Tōkyō: Kōdansha. ISBN 4-06-209928-4. OCLC 45360512.{{cite book}}: CS1 maint: multiple names: 作者名單 (link)
  23. ↑ 日本大百科全書(ニッポニカ)。〈電力国家管理とは〉。《コトバンク》 (日文)。喺2020-12-05搵到。
  24. ↑ 伊藤武 (1936)。《近衛文麿清談録》。千倉書房。
  25. ↑ Ezaki, Michio, 1962-; 江崎道朗, 1962- (2017). Kominterun no bōryaku to Nihon no haisen (第Dai 1-han版). Tōkyō: PHP Kenkyūjo. ISBN 978-4-569-83654-6. OCLC 1000493766.{{cite book}}: CS1 maint: multiple names: 作者名單 (link)
  26. ↑ 26.0 26.1 秦郁彦, 1932- (2001)。Nihon kanryōsei sōgō jiten, 1868-2000 : tsuketari shuyō kigyō no toppu ichiran。Hata, Ikuhiko, 1932-, 秦郁彥, 1932-。Tōkyō：Tōkyō Daigaku Shuppankai。ISBN 4-13-030121-7。OCLC 50116008。
  27. ↑ 27.0 27.1 中和出版 (2020-04-28)。〈《國家的歧途》：日本如何與法西斯意大利、納粹德國組成軸心國？〉。《香港01》 (香港中文)。喺2020-12-05搵到。
  28. ↑ 28.0 28.1 〈天皇が靖国神社を参拝しなくなったのは「A級戦犯」合祀が原因か？｜靖国神社｜島田裕巳〉。《幻冬舎plus》 (日文)。喺2020-12-05搵到。
  29. ↑ 〈日本はなぜ開戦に踏み切ったか？ 真珠湾攻撃「情報戦」の真実（森山 優）〉。《現代新書 | 講談社》。喺2020-12-05搵到。
  30. ↑ Moriyama, Atsushi, 1962-; 森山優, 1962-. Nihon wa naze Kaisen ni fumikitta ka : "ryōron heiki" to "hi kettei". Tōkyō. ISBN 978-4-10-603710-8. OCLC 796782885.{{cite book}}: CS1 maint: multiple names: 作者名單 (link)
  31. ↑ 〈昭和天皇は御前会議の最後に明治天皇の御製を2度諳んじた｜保阪正康 日本史縦横無尽〉。《日刊ゲンダイDIGITAL》。喺2020-12-06搵到。
  32. ↑ 32.0 32.1 Hosaka, Masayasu, 1939-; 保阪正康, 1939-. Zoku Shōwa no kaibutsu nanatsu no nazo. Tōkyō. ISBN 4-06-514906-1. OCLC 1121457741.{{cite book}}: CS1 maint: multiple names: 作者名單 (link)
  33. ↑ 〈近衛文麿の私邸 荻外荘に雪見灯籠戻る 世田谷の女性が寄贈：東京新聞 TOKYO Web〉。《東京新聞 TOKYO Web》 (日文)。喺2020-12-06搵到。
  34. ↑ 34.0 34.1 Yoshida, Yutaka, 1954 November-; 吉田裕, 1954 Nov.- (1992). Shōwa Tennō no shūsenshi. Tōkyō: Iwanami Shoten. ISBN 4-00-430257-9. OCLC 28336286.{{cite book}}: CS1 maint: multiple names: 作者名單 (link)
  35. ↑ Takahashi, Hiroshi, 1941-2011.; 高橋紘, 1941- (1989). Tennō-ke no misshitachi : senryō to kōshitsu. Suzuki, Kunihiko, 1942-, 鈴木邦彥, 1942-. Tōkyō: Bungei Shunjū. ISBN 4-16-747202-3. OCLC 24985499.{{cite book}}: CS1 maint: multiple names: 作者名單 (link)
  36. ↑ 36.0 36.1 〈永田町アンプラグド 岸vs近衛、安倍vs細川… 祖父と孫の「因縁政局」〉。《日本経済新聞》 (日文)。2014-02-12。喺2020-12-11搵到。
  37. ↑ Gaikōnaki sensō no ketsumatsu. NHK Shuzaihan., NHK 取材班. (第Shohan版). Tōkyō: Kadokawa Shoten. 1995. ISBN 4-04-195417-7. OCLC 75970369.{{cite book}}: CS1 maint: others (link)
  38. ↑ 38.0 38.1 雨宮昭一包霞琴、李彥銘。《日本近現代史卷七：佔領與改革》。香港中和出版有限公司。ISBN 9789888369683。
  39. ↑ 39.0 39.1 39.2 升味準之輔 (1995)。《戰後政治　上》。東京大學出版會。ISBN 978-4130330213。
  40. ↑ 兒島襄 (1986)。《史録 日本国憲法》。文藝春秋。
  41. ↑ 〈なぜ近衛文麿は自殺し、岸信介は生きる道を選んだのか（魚住 昭） @gendai_biz〉。《現代ビジネス》。喺2020-12-07搵到。
  42. ↑ 有馬頼義 (1970)。《宰相近衛文麿の生涯》。講談社。ASIN B000J9FYKS。
  43. ↑ 43.0 43.1 山本七平 (2004)。《裕仁天皇の昭和史―平成への遺訓-そのとき、なぜそう動いたのか》。祥傳社。ISBN 9784396500818。
  44. ↑ 今東光 (1977)。《続極道辻説法》。集英社。ASIN B000J8UB84。
  45. ↑ 文藝春秋 (1989)。《昭和天皇の時代》。ISBN 978-4163430300。
  46. ↑ 每日新聞 (1991)。《日本の肖像―旧皇族・華族秘蔵アルバム》。每日新聞社。ISBN 978-4620603223。
  47. ↑ 福田和也 (2005)。《総理の値打ち》。文藝春秋。ISBN 978-4167593049。
  48. ↑ 豬木正道 (1991)。《猪木正道著作集　第4巻　歴史・人物・決断》。力富書房。
  49. ↑ 中川八洋 (2000)。《大東亜戦争と「開戦責任」―近衛文麿と山本五十六》。弓立社。ISBN 978-4896670110。
  50. ↑ 50.0 50.1 林千勝 (2017)。《近衛文麿 野望と挫折》。ワック。ISBN 978-4898314654。
  51. ↑ 中時新聞網。〈日本末代海軍上將隱居贖罪 痛斥A級戰犯公開亮相不知恥 - 政治〉。《中時新聞網》 (中文)。喺2020-12-11搵到。
  52. ↑ 日本電報通信社 (1946)。《平和への努力 : 近衞文麿手記》。
  53. ↑ 〈BTSはなぜ「原爆Tシャツ」を着たのか？原爆投下降伏論のウソ（古谷経衡） - Yahoo!ニュース〉。《Yahoo!ニュース 個人》 (日文)。原著喺2020-12-11歸檔。喺2020-12-11搵到。
  54. ↑ 中央公論新社 (2015)。《最後の御前会議　戦後欧米見聞録―近衛文麿手記集成》。中央公論文庫。ISBN 9784122061460。
  55. ↑ INC, SANKEI DIGITAL (2018-06-29)。〈指揮者・作曲家の近衛秀麿が生誕１２０年 ７月に記念シンポとトークコンサート：イザ！〉。《イザ！》 (日文)。喺2020-12-11搵到。
  56. ↑ 大野芳 (2006)。《近衛秀麿―日本のオーケストラをつくった男》。講談社。ISBN 9784062124904。
  57. ↑ 〈"旧皇族"竹田恒和・JOC会長は天皇家の"遠い遠い親戚"だった？ (2019年3月30日)〉。《エキサイトニュース》 (日文)。喺2020-12-11搵到。
由「https://zh-yue.wikipedia.org/w/index.php?title=近衛文麿&oldid=2177449」收