鐵路迷
鐵路迷（英文：Railfan），又叫鐵道迷、軌道迷、火車迷，意思指鐵路運輸嘅愛好者，講緊係業餘性質上對鐵路有興趣，以至迷上佢嘅人。喺亞洲區，「鐵道迷」一詞喺台灣同日本比較常用。中國大陸、香港等地多叫「鐵路迷」、「火車迷」或純粹以「鐵迷」、「鐵膠」（香港） 去叫。
世界各地嘅鐵路迷
[編輯]香港
[編輯]喺香港，由於城市軌道交通系統網絡同依家嘅巴士網絡有競爭；而後者嘅資訊同巴士迷文化較發達，所以單純鍾意鐵路資訊嘅鐵路迷可能比較少。其他嘅鐵路迷可能本身係巴士迷。同時做埋巴士同鐵路嘅愛好者經常被叫或者自己叫自己做「巴鐵迷」；而同時鍾意巴士、小巴、鐵路、道路交通建設、飛機同輪船嘅就做咗「交通迷」。
一般人好難攞到同香港鐵路系統有關嘅詳細資訊：因為香港嘅鐵路運營公司用「基於商業、保安或版權保護」等理由，好少對外分享香港鐵路運輸資訊，例如系統嘅運作機制、工程資訊等（例如兩鐵合併後嘅港鐵員工內刊同技報，非員工或非經港鐵公司認可電子裝置/VPN無法取閱或瀏覽，或者只可以憑單一連結閱讀單一期數嘅技報；令外，員工必須確保車廠內做緊解編並做緊大修嘅車（俗稱「斷卡」）盡量唔可以畀外界人士睇到。但以往九鐵公司出版嘅員工內刊《策力》就屬於少有嘅例外，會送畀大專圖書館等外間機構；而喺2004年，九鐵亦請過鐵路迷睇馬鞍山鐵路新車到港嘅卸貨過程，亦係少數例外）；而喺反對逃犯條例修訂草案運動爆發後，由於港鐵公司擔心相關資訊同車站機房佈局外泄會令示威者更容易破壞鐵路設施，所以對鐵路迷態度轉趨保守，以至單純喺鐵路站影相亦可能被指干犯遊蕩罪（似早年喺星加坡當鐵路拍攝做懷疑恐怖份子嘅行為）。至於香港鐵路基本資訊，除咗喺港鐵公司嘅宣傳印刷品、報章雜誌報導收集攞到之外，其他較深入嘅鐵路資訊，只喺一啲鐵路迷組織或鐵路資訊討論區作內部分享。另外港鐵各路線嘅車輛車種好多，都係香港鐵路迷嘅主要討論話題，有時仲會討論到前九廣鐵路同京九鐵路入面營運緊嘅車種。
不過，部分香港鐵路迷都成日收集同詳盡咁列出香港嘅鐵路資訊，包括鐵路路線、車站、列車等，去加強外界對香港鐵路系統嘅認識。
香港有過一啲鐵路迷組織，包括香港鐵路會（HKRS）、香港模擬鐵路聯盟（BVEHK）、香港鐵路聯盟（HKRU，2001年至2009年）。不過自2007年兩鐵合併後，港鐵公司將鐵路營運資訊封閉；由於呢啲鐵路迷組織成員，部分嚟自鐵路公司職員，要跟住鐵路公司政策保護公司資訊，所以佢哋好少公開宣傳組織或發放資訊，所以外人唔容易加入呢啲組織。2012年，嗰陣已經冇以純鐵路做主題嘅愛好者組織，而係做咗其他交通迷組織（如巴士迷）其中一項興趣分支。
2014年，因為網絡嘅興起同憑住西港島綫做契機，有啲從社交媒體專頁而成嘅鐵路迷組織誕生，例如MTRiders、香港鐵路發展研究組（HKRDG）、香港模擬鐵路發展中心（HKRSC）、港鐵新路綫動向（MTR Trends）等，呢啲可以被叫做新生代鐵路迷組織。以上組織通過佢嘅Facebook專頁分享香港鐵路資訊，模擬鐵路遊戲（BVE、OpenBVE）嘅香港鐵路版本製作，鐵路規劃研究同搞鐵路迷活動（如搭新通車路線嘅頭班車、鐵路攝影團等）。隻後，雖然相關專頁仲繼續發展，但多數新一代嘅鐵路迷更加鍾意去開相關嘅YouTube頻道，而內容主要以車務為主（例如唔載客列車、車次組合等）。
但係，鐵路迷界別嘅欺凌風氣都唔差得香港巴士迷界別好遠，有啲鐵路迷用Whatsapp同Facebook群組攻擊其他鐵路迷，根據一名受過欺凌嘅鐵路迷透露，鐵路迷界別經常出現冒充人哋嘅情況出現（例如YouTube帳戶），而且部分鐵路迷同有相熟港鐵職員做靠山，成日亂做嘢；另外，由於車務消息相對較為沉悶，而且相關內容經常重複，所以一啲用車務研究做重心嘅新一代鐵路迷會被批評。所以，部分人會歧視鐵路迷同巴士迷，並將佢哋污名化。另外，自反對逃犯條例修訂草案運動爆發後，由於港鐵公司嘅應變措施受公眾批評，導致部分對港鐵仲有好感嘅鐵路迷亦因為噉俾人鬧。
中國大陸
[編輯]2021年5月14日，「中國火車迷協會」同「中國易經哲學家協會」、「中國武林書畫家協會」、「中國海派鳳凰國服藝術協會」等12家組織俾中國民政部列入第四批涉嫌非法社會組織嘅名單[1]。
法律
[編輯]
根據香港法例第556B章《香港鐵路附例》第28H(1)(e)條，「不得在未獲港鐵公司書面同意並受依照港鐵公司所施加的條款及條件規限的情況下，使用任何錄音或錄影或拍攝器材以進行訪問或拍錄或製作影片或錄像。」[2]，但冇嚴厲執行。但係如果齋去拍相就唔受限制。而港鐵公司喺2017年4月交畀香港立法會嘅文件裏面指出，港鐵內部考慮過喺唔影響安全下，允許用流動裝置喺鐵道範圍拍片，同時指出第28H(1)(e)條嘅合理性成疑。[3]
英國全國鐵路系統嘅所有車站都畀影相[4]。然而，倫敦交通局唔允許喺未經許可嘅情況下影相，但允許在喺冇輔助設備嘅情況下進行個人攝影[5]。而泰恩-威爾地鐵就禁止任何未經系統營運商許可嘅攝影。
註
[編輯]- ↑ 高蕾 (2021-05-14)。〈民政部公布中国教育服务行业协会等12家涉嫌非法社会组织名单〉。新华社。喺2022-07-28搵到。
- ↑ "MTR > MTR By-laws". www.mtr.com.hk (英文). 喺2022-08-28搵到.
- ↑ 港鐵公司 (2017-04-28). "Legislative Council Panel on Transport Subcommittee on Matters Relating to Railways Review of Mass Transit Railway By-laws and Mass Transit Railway (North-West Railway) Bylaw" (PDF). 《香港立法會文件》.
- ↑ "Railway enthusiasts". Network Rail. 原著喺2016-12-30歸檔. 喺2015-09-25搵到.
- ↑ "Filming & photography on TFL". 原著喺2022-04-06歸檔. 喺2022-05-06搵到.
連出去
[編輯]- 中國大陸
- 台灣
- 香港
- 香港鐵路迷協會嘅facebook頁
- 香港模擬鐵路發展中心嘅facebook頁
- 香港鐵路發展研究組嘅facebook頁
- MTRiders嘅facebook頁
- 鐵流 Railic嘅facebook頁
- 港鐵新路綫動向 MTR Trends嘅facebook頁
- 香港鐵路大典
- 香港鐵路會（HKRS）
- GORailTravel鐵路旅行