非洲鯽

尼羅河非洲鯽 (Oreochromis niloticus)

根據糧農組織嘅報告，1950-2009年嘅全球非洲鯽收穫量，以百萬噸計

非洲鯽（英文：tilapia）係魚市場上最常見嘅魚類品種之一，喺香港叫「福壽魚」或者「金山鯽」，喺台灣叫「吳郭魚」、「羅非魚」或者「金鳳魚」，喺中國叫「羅非魚」，但係佢其實並唔係一個魚嘅品種，而係慈鯛科入面十幾種魚嘅統稱（慈鯛科有大約200個屬，超過2000個品種）；佢嘅適應力好強，即使係喺中度污染嘅淡水（有啲品種可以喺鹹淡水交界嗰度生存）仍然能夠生存。

喺慈鯛科入面，非洲鯽嘅魚包括哂 coelotilapine、coptodonine、heterotilapine、oreochromine、pelmatolapiine 同埋 tilapiine 族類嘅近百種魚（以前全部都叫「Tilapiini」，中文譯做「非洲鯽」、「吳郭魚」、「羅非魚」）；但係喺經濟角度，最重要嘅「非洲鯽」係 Coptodonini 同埋 Oreochromini。

非洲鯽主要係淡水魚，生活喺淺溪、池塘、河或者湖，喺鹹淡水比較少見，不過有啲品種嘅非洲鯽亦都能夠喺河流嘅出海口，甚至近岸沿海等唔同鹽份含量嘅鹹水嗰度生活。歷史上，佢哋喺非洲嘅手工捕魚好重要；佢哋喺水產養殖同魚菜共生複合式耕養嘅重要性亦都越嚟越大。

喺一啲地方，例如澳洲，非洲鯽可能成為新溫水棲息地（warm-water habitats）嘅外來入侵物種，無論係啲人有意定係無意咁引入，但係由於佢哋喺凍水生存唔到，所以一般唔會喺溫帶氣候出現。

傳統上，非洲鯽喺菲律賓係一種好受歡迎同價錢合理嘅食物，味道溫和。2002年開始，非洲鯽亦係美國第四大食用魚，因為又平又易煮，所以備受好評。非洲鯽通常會用嚟做炸魚或者烤魚。

歷史

公元前1500年喺Nakht墓嘅畫嗰度，中間高大嘅人物個頭嘅上面同埋右側有「非洲鯽」嘅象形文字。

尼羅河非洲鯽嘅水產養殖可以追溯到古埃及；喺古埃及，非洲鯽係用加德納名單嘅聖書體象形文字 K1（）嚟表示。

非洲鯽喺古埃及藝術係投胎轉世嘅象徵，同哈化有關。據說非洲鯽會喺太陽神每日橫越天空嘅旅程嘅時候，陪住同埋保護太陽神。墓牆上畫嘅非洲鯽，令人聯想到《死亡之書》嘅第15個咒語，即係去咗世嘅人希望用呢個咒語令佢可以喺太陽船上面：「你喺綠松綠嘅池見到非洲鯽嘅［真實］形態」（英文版：You see the tilapia in its [true] form at the turquoise pool），同埋「我見到非洲鯽嘅［真實］本性，喺佢嘅水域嗰度引導快艇。」（英文版：I behold the tilapia in its [true] nature guiding the speedy boat in its waters.）

非洲鯽係塔木德時代喺加利利海捉到嘅三種主要嘅魚之一，特別係加利利梳（Galilean comb；Sarotherodon galilaeus ）；喺現代希伯來文，呢種魚種叫做 אַמְנוּן（amnun，類似粵拼：aam6 nun1），呢個名好可能係「אם」（am，阿媽咁解）同埋「נון」（nun，魚咁解）結合而成。英文就有時會叫「聖彼得魚」（St. Peter's fish），呢個名係嚟自馬太福音入面魚口得稅銀嘅故事，當中話耶穌同門徒到咗迦百農，收丁稅嘅人嚟搵使徒彼得，要佢交丁稅，彼得捉到一條魚，魚口入面有一個錢幣，可以用嚟交丁稅；雖然呢段經文無講呢隻魚嘅名，但係喺加利利海發現咗唔同嘅非洲鯽品種（包括：Sarotherodon galilaeus、Oreochromis aureus、Coptodon zillii、Tristramella 等），馬太福音嘅作者喺嗰度講返呢件事發生嘅地方。喺呢個地區，好幾千年嚟，非洲鯽都係小型手工漁業嘅捕捉目標。

特徵

尼羅非洲鯽（Vorevochramis nilitix）

非洲鯽通常有扁嘅身體。同其他慈鯛科嘅魚一樣，佢哋嘅下咽骨都係融合成一個有牙齒結構。 一組複雜嘅肌肉令到上咽同下咽骨可以用嚟作第二組下顎嚟處理食物，令到「真顎」（下顎；mandibles）同「咽下顎」（pharyngeal jaws）之間可以分工。咁即係話佢哋係有效嘅捕食者，可以捕捉同處理各種唔同嘅食物。非洲鯽嘅口係突出嘅，通常有闊而經常脹起嘅嘴唇。下顎有錐形嘅牙齒。一般嚟講，非洲鯽有一條長背鰭，同埋一條側線，啲側線經常會喺背鰭嘅尾端斷開，然後喺下面兩三排鱗片再開始。有啲尼羅河非洲鯽可以有2呎（60厘米）咁長。

除咗佢哋對溫度比較敏感之外，非洲鯽存在或者可以適應好廣泛嘅條件。一個極端嘅例子係索爾頓湖，當初只係喺微鹹嘅水域嗰度引入非洲鯽，依家佢哋已經可以喺鹽嘅濃度高到其他海洋魚類生存唔到嘅海嗰度生存。

非洲鯽係一種口孵物種，即係話佢哋會喺卵黃囊被吸收之後，將受精卵同幼魚喺口入面帶住幾日。

圖庫

• 
  啲人喺肯雅奈瓦沙湖（Lake Naivasha）捉緊非洲鯽
• 
  巨型翠鳥食緊條非洲鯽（奈瓦沙湖）
• 
  非洲魚鷹捉住條非洲鯽（奈瓦沙湖）

物種

歷史上，所有非洲鯽都被納入同名嘅非洲鯽屬，但係喺近幾十年，有啲被轉移到其他幾個唔同嘅屬，特別係 Oreochromis 同 Sarotherodon。即使有呢啲改變，睇嚟非洲鯽有強烈嘅多系性（polyphyletic）或者並系性（paraphyletic）。喺2013年，一項重大嘅生物分類學（taxonomic）審查透過將大多數以前俾人歸類為非洲鯽科嘅魚移到其他幾個科，解決咗呢個問題。呢個改變嘅結果係，非洲鯽當中，已經無任何具有重大經濟意義嘅物種，有經濟價值嘅物種已經分類咗喺 Coptodon、Oreochromis 同埋 Sarotherodon 嗰度。

外來同入侵物種

非洲鯽有時會俾人用嚟做某啲水生植物問題嘅生物防治。佢哋偏好食浮飄（Lemna spp），一種浮動嘅水生植物，但係亦都會食啲絲狀藻類（filamentous algae）。喺肯亞，引進非洲鯽係用嚟控制啲會引起瘧疾嘅蚊，因為佢哋會食蚊嘅幼蟲（孑孓），從而減少作為瘧疾傳播媒介嘅成年雌蚊嘅數量。但係，呢啲好處經常俾非洲鯽作為入侵物種嘅負面影響而抵消咗。

非洲鯽係溫帶氣候之下係生存唔到嘅，因為佢哋需要暖水。純種嘅藍色非洲鯽，Oreochromis aureus，有最大嘅耐寒性，喺攝氏7度以下先至會死，而所有其他種類嘅非洲鯽喺攝氏11至17度以下就會死。結果，係佢哋雖然唔能夠入侵溫帶棲息地，同埋唔可能破壞溫帶嘅原生生態；但係，佢哋喺好多淡水同鹹淡水嘅熱帶同亞熱帶棲息地，已經廣泛傳播到已經超出咗佢哋嘅引入點，經常會大大破壞咗啲原生物種。因為咁，非洲鯽就喺國際自然保護聯盟（IUCN）嘅世界百種最差嘅外來入侵物種名單入面。

喺美國，非洲鯽喺南部嘅大部分地區，特別係佛羅里達州、德州，同埋北到愛達荷州都有，佢哋喺發電廠嘅排放區生存。 非洲鯽目前亦都喺亞利桑那州鳳凰城嘅運河系統入面飼養，作為控制藻類生長嘅措施。 喺2024年6月21號嘅華盛頓特區捕魚報告入面，提及有個釣魚者喺波多馬克河上面嘅伍德羅威爾遜橋（Woodrow Wilson Bridge）下面嘅鍾斯角公園（Jones Point Park）用曲柄餌（crankbait ）捉到一條非洲鯽。美國、澳洲、南非同其他地方嘅魚類同野生動物機構都認為非洲鯽係外來入侵物種。

水族箱品種

較大嘅非洲鯽品種一般都係差嘅社區水族館魚，因為佢哋會食啲植物、會挖底，又會同其他魚打交。 較大嘅非洲鯽品種通常會俾人養嚟做食物來源，因為佢哋喺高飼養密度同差嘅水質嗰度，都可以生長得好快。

較小嘅西非品種，例如 Coelotilapia joka 同喀麥隆火山口湖嘅品種，比較適合做水族館嘅觀賞魚。喺專門嘅慈鯛魚缸入面，非洲鯽可以同非領地慈鯛（nonterritorial cichlids）、骨甲鯰科魚（armored catfish）、泰國鯽魚（tinfoil barbs）、雀鱔（garpike）同埋其他強壯嘅魚類成功混合飼養。 有啲物種，包括 Heterotilapia buttikoferi、Coptodon rendalli、點非鯽（Pelmatolapia mariae）、C. joka，同埋鹹水 Sarotherodon melanotheron，都有吸引嘅圖案，適合養喺魚缸嗰度做裝飾。  

商業品種

非洲鯽嘅原產地係非洲同黎凡特（Levant）。 非洲鯽生得好快、適應性強，又可以高密度飼養，所以喺亞洲好多地方都俾人入同埋廣泛養殖，而且亦都係其他地方越嚟越常見嘅養殖漁業品種。

厘米 厘米

主要嘅非洲鯽商業品種
統稱	學名	最長（厘米）	常見嘅長度	最重（公斤）	最老	營養級	IUCN 狀態
尼羅河非洲鯽	Oreochromis niloticus (Linnaeus, 1758)	60 厘米		4.324公斤	9 歲	2.0	Least Concern
藍非洲鯽	- Oreochromis aureus       (Steindachner, 1864)	45.7厘米	16厘米	2.010公斤		2.1	Least Concern
尼羅河非洲鯽 + 藍非洲鯽混種		厘米
莫三鼻給非洲鯽	Oreochromis mossambicus (Peters, 1852)	39厘米	35 厘米	1.130公斤	11 歲	2.0	Vulnerable

 

根據糧農組織，1950-2009年嘅報告，全球非洲鯽品種嘅收穫量（單位：百萬噸）

↑  野生

↑  水產養殖

水產養殖

菲律賓中呂宋國立大學實驗緊嘅紅尼羅河非洲鯽

2002年全球養殖非洲鯽嘅產量每年大約係150萬噸，估計價值係18億美元，大約等於三文魚同鱒魚嘅產量。 喺2020年，全球非洲鯽嘅產量接近700萬噸；而喺2021年，全球非洲鯽嘅產量超過720萬噸，價值超過141億美元。

同其他食肉魚唔同，非洲鯽可以食藻類或者任何植物性食物，咁樣就可以降低非洲鯽嘅養殖成本，減少對肉食類魚嘅捕魚壓力，避免毒素過度累積喺食物鏈嘅更高層次，令到非洲鯽成為魚類養殖業嘅首選，係行業嘅「水生嘅雞」（aquatic chickens）。

由於非洲鯽嘅體型大、生長快同好味道，所以係重點嘅魚業養殖品種，特別係各種 Oreochromis 、 Sarotherodon 同 Coptodon（以前全部都係叫做非洲鯽）。同其他大型魚一樣，非洲鯽係蛋白質嘅好來源，亦都受到手工同商業漁業嘅歡迎。 大部分呢類魚原本都係喺非洲發現嘅，但係熱帶國家嘅戶外魚場，例如巴布亞新畿內亞、菲律賓同印尼，佢哋嘅非洲鯽係喺淡水湖嗰度養嘅。喺溫帶地區，非洲鯽養殖營運需要用多啲能源，將啲水加熱到同熱帶嘅溫度一樣。其中一種方法係用工廠或者係發電站嘅廢熱。

中國嘅非洲鯽年產量係130萬噸，係世界上最大嘅非洲鯽生產國，其次係埃及，有50萬噸。相比之下，美國嘅產量只係1萬噸，而消費量就高達250萬噸。

喺現代水產養殖中，野生型尼羅河非洲鯽唔太常見，因為佢哋啲肉比較深色，唔係好多顧客鍾意，而且啲人認為佢哋係窮人食嘅魚，因為啲肉好嚡口。 不過，佢哋生長得好快，而且會俾到好嘅魚柳；肉質較輕嘅白化（紅色）品種，已經俾人開發出嚟，而且好受歡迎。

雜交族群亦都喺水產養殖好流行；尼羅河×藍色非洲鯽雜交品種通常顏色比較深，但係一種淺色嘅非洲鯽雜交品種，叫做「洛磯山白」（Rocky Mountain White）嘅非洲鯽，好多水產養殖場都鍾意養，原因係佢哋啲肉質好輕，而且耐低溫。

商業上養殖嘅非洲鯽幾乎全部都係公嘅，通常係將食物入面嘅雄性性賀爾蒙加入非洲鯽魚苗嗰度，令到任何潛在嘅雌性非洲鯽都會變成雄性。呢個亦都可以透過某啲非洲鯽物種嘅雜交或者用所謂嘅「超級雄性」（supermales）去實現，呢啲雄性嘅性別染色體係純合嘅（令到佢哋所有嘅後代都得到雄性性別染色體，從而變成雄性）。公魚係首選，原因係佢哋嘅生長速度比乸魚快好多。 另外，由於非洲鯽係多產嘅魚，所以太多雌性非洲鯽嘅存在會令到個魚場有太多嘅細魚，而唔係穩定嘅可以收成嘅大魚。

非洲鯽作為「傳統」菜式，喺1950年首次引入菲律賓，最初係莫桑比克非洲鯽，之後喺1972年由泰國引入尼羅河非洲鯽。喺貝湖（西班牙文：Laguna de Bay；他加祿文：Lawa ng Laguna）盛產丁公（terapon；gunggong）同白鰕虎魚（white goby；biyang puti）等品種。喺1988年，總部設喺馬來西亞檳城嘅國際研究組織世界魚類（WorldFish），聯同菲律賓、挪威嘅研究人員開始咗基因改良養殖非洲鯽（ Genetically Improved Farmed Tilapia，GIFT ）嘅水產養殖（aquaculture）研究。

其他控制非洲鯽種群嘅方法係混養（polyculture），將捕食者同非洲鯽一齊養殖，或者同其他物種雜交。

作為食物

鮮醃非洲鯽

喺提比里亞餐廳供應嘅加利利海聖彼得魚（紅腹非洲鯽）

黑（Blackened）非洲鯽魚片，用卡津（Cajun）香料、檸檬同青檸汁調味

整條非洲鯽可以加工成去皮去骨嘅魚柳，喺部分商業魚柳加工當中，魚柳收成重量比率可以高達47% 。

非洲鯽係商業上重要嘅養殖水產物種之一，佢哋容易受到異味嘅影響，其他包括鱒魚（trout）、尖吻鱸魚（barramundi）同美洲河鯰魚（channel catfish）。呢啲「泥」（muddy）或者「霉」（musty）嘅味道，通常係由放線菌（Actinomycetota）產生嘅土臭素（Geosmin），同埋 MIB（2-methylisoborneol；2-甲基異莰醇）引起，呢兩種菌係無處不在嘅藍藻（cyanobacteria）所產生嘅有機物，佢哋經常存在（或者零星咁）喺水或者泥土入面繁殖。呢啲味道唔係魚嘅新鮮度或者安全性嘅指標，但係佢哋減低咗產品對消費者嘅吸引力。簡單嘅質量控制程序，可以有效咁確保進入市場嘅魚類質量。

非洲鯽嘅水銀含量好低。非洲鯽嘅飽和脂肪、熱量、碳水化合物同埋鈉（sodium）含量都比較低，係好好嘅蛋白質來源。佢哋仲含有磷（phosphorus）、維他命B₃（Niacin；vitamin B-3）、硒、維他命B₁₂ 同埋鉀（potassium）等嘅微量營養素。

非洲鯽可能係一種比一般人認為營養比較低嘅魚。魚嘅奧米加三（omega-3 fatty acid）脂肪酸含量通常遠低過其他常見嘅魚類。佢哋嘅奧米加六（Omega-6 fatty acid）脂肪酸水平異常高。多項研究評估咗將亞麻籽衍生品（奧米加三脂肪酸嘅蔬菜來源）加入養殖非洲鯽嘅飼料嘅效果。呢啲研究發現喺亞麻嗰度比較常見嘅奧米加三脂肪酸 ALA 同埋動物來源幾乎獨有嘅兩種脂肪酸（DHA 同 EPA），喺餵食呢種飼料嘅魚類嗰度都會增加。喺呢啲發現嘅指引之下，非洲鯽嘅養殖技術可以改進，以解決對呢種魚營養唔夠嘅批評，同時保留咗佢哋作為一種能夠以經濟同環境上廉價嘅植物蛋白質做主要食物嘅雜食動物（omnivore）嘅優勢。三文魚同其他肉食性魚類嘅適當飼料亦都可以由大豆等植物蛋白質來源配製而成，雖然含有豆油嘅大豆飼料亦都可能可以改變奧米加六同奧米加三脂肪酸之間嘅平衡。

其他用途

Tilapia and guppies, young and mature, of Tamil Nadu

Ecological agent

非洲鯽係應對大部分水生植物問題嘅生物控制方法。佢哋會食浮動嘅水生植物，例如浮萍（duckweed）、微萍（watermeal ）、青萍（Lemna），同埋水下植物（submerged plants），佢哋亦會食大部分形式嘅藻類（algae）。喺美國、泰國等國家，佢哋係植物控制方法嘅首選，用佢哋去食呢啲植物，可以減少或者唔用啲有毒嘅化學物質同埋含有重金屬嘅除藻劑。但係，佢哋作為入侵物種，對環境嘅影響可能超過佢哋嘅生態效益。佢哋對環境條件嘅廣泛耐受性，令佢哋可以喺受污染或者惡劣嘅水域嗰度蓬勃生長。

佢哋亦都可以養喺動物園嘅池塘嗰度，做雀仔嘅食物。

將啲非洲鯽以共生嘅方式同啲蝦一齊養，可以提升兩種物種嘅產量。

阿肯色州有好多公共池塘同湖，都有養非洲鯽，可以用嚟控制水生植物，亦都係釣友釣魚嘅好選擇。

喺肯雅，非洲鯽用嚟控制啲攜帶瘧疾（malaria）瘧原蟲（Plasmodium）嘅蚊。佢哋食啲蚊嘅幼蟲，從而減少咗成年雌蚊嘅數量，而雌蚊係瘧疾嘅病媒。

醫療用途

喺巴西，尼羅河非洲鯽（Oreochromis niloticus）嘅魚皮用嚟做繃帶，喺老鼠身上成功試驗之後，喺2017年嘅一個臨床試驗入面首次用嚟治療燒傷嘅人。喺美國，非洲鯽嘅魚皮已經成功用嚟醫一隻喺2017年十二月到2018年一月嘅加州湯馬仕大火（Thomas wildfire）嗰度救到嘅兩隻黑熊，佢哋嘅熊掌受咗三級燒傷，同埋加州卡爾大火（Carr wildfire）燒傷咗熊掌嘅一隻黑熊。 尼羅河非洲鯽皮已經完成咗一項針對淺層局部厚度（superficial partial-thickness）燒傷嘅三期臨床試驗。同燙火膏對照組相比，魚皮組顯示出更快嘅癒合速度、更低嘅痛苦、更少嘅更換敷料次數，同埋更低嘅治療成本。

尼羅河非洲鯽皮亦都用喺新陰道成形術（neovaginoplasty）入面做皮膚移植材料，用嚟做苗勒管發育不全（Müllerian agenesis）、陰道狹窄（vaginal stenosis）同埋性別肯定（gender-affirming）手術。

非洲鯽皮嘅皮膚生長特性相信係同佢嘅高 I 型膠原蛋白（type I collagen）含量同埋同人類皮膚結構嘅相似性有關。雖然非洲鯽嘅皮比較薄，但係佢亦都相當堅固。 依家嘅皮膚使用程序，需要用氯己定（chlorhexidine）做化學殺菌，浸泡喺甘油（glycerol）入面，然後做伽馬射線殺菌，同埋中間用生理鹽水（saline）洗幾次。

寄生蟲

同大部分魚類一樣，非洲鯽都有唔同嘅寄生蟲（parasites）。 而單殖吸蟲（monogenea）嚟講，特別係包括超多元化嘅 Cichlidogyrus 屬嘅鰓寄生蟲（gill parasites）。腸蟲（Enterogyrus）物種係消化系統嘅寄生蟲。 非洲鯽作為重要嘅水產養殖魚類，已經喺世界各地廣泛引入，佢哋經常會帶埋啲單殖吸蟲寄生蟲一齊。喺華南地區，喺2019年嘅一項研究顯示，引入當地嘅非洲鯽，帶有九種單殖吸蟲。