香港書展
香港書展（英文：Hong Kong Book Fair）係由香港貿易發展局主辦，係亞洲最大型嘅書展之一。
香港書展喺1990年起舉辦，每年7月喺香港會議展覽中心舉行，係香港每年夏天嘅一項盛事，為出版界提供推廣新書嘅平台，同埋為讀者提供咗接觸新書同埋會見作者嘅機會。由於入場費平，每年都吸引咗大批市民同遊客入場。唔少書籍會選擇喺書展期間出版，並喺書展入面舉行埋作者簽名會，希望為啲新書宣傳速銷。唔少名人紅星都會喺書展期間推出新書。書展每年都會同多間出版社同專業機構合作，定出一個獨特主題，並圍繞主題舉辦各項活動。喺書展買書，一般可攞到幾高嘅折頭（一般唔少過八折）。
由於香港嘅獨特背景，兩岸三地嘅出版商可同時參展，重有部分係東南亞同其他國家嘅出版商參展。1997年開始，書展並會舉行「國際版權交易會」同埋「印刷服務展覽會」。
歷年
[編輯]2004年
[編輯]2004年嘅書展喺7月21號至7月26號舉行，係書展嘅第15屆，書展試辦國際文化村，參與國家有法國同埋新加坡等。本屆嘅主題係「開卷有益，豐富生活」，展出嘅書超過1萬種。
2005年
[編輯]2005年香港書展首次增設夜場，六點過後入場費有半價優惠，反應都幾理想。成個書展共吸引到近 64 萬人次入場，同 2004年嘅 50 萬人次上升達 28%，創下開辦以來訪客升幅最高紀錄。
2006年
[編輯]2006年嘅書展喺嗰年7月19號至24號舉行，六點後票價係半價。7月22號（禮拜六），當局喺九點半畀訪客免費入場——原先係話十點，之但係因為訪客好多，所以當局提早入場時間，直落到凌晨兩點先散場。喺免費入場嗰幾個嘅鐘頭入面，有 4.4萬人入場。除7月22同24號外，其他時間都開放到晚黑十時。呢次訪客升到 68 萬人次嘅新高，增幅係 6%。
2007年
[編輯]貿易發展局考慮舉辦2007年書展時，由7月18號到24號，多舊年一日。重有下晝一點前入場 10 蚊優待，之後要 25 蚊正價。
2008年
[編輯]2008年書展喺7月23日至29號舉行，口號係：「閱讀大世界，走向世界」，綠色和平喺24號第一次舉辦『綠色日』，希望用香港書展呢個平台，推動出版行業用「森林友好型」紙張，保護消緊失嘅原始森林。
主辦機構貿易發展局指今年書展總入場人次近 83萬，打破歷屆紀錄。最暢銷書係小說，涉及心靈、中國四川512地震同中國國情、潮語嘅書籍，都係書迷心頭好。[1][2]
2009年
[編輯]2009年嘅書展喺7月22到7月28號舉行，大會主題設為「多元與創意‧書展二十年」。會展中庭擴建完工，書展面積大咗三分之一，入場嘅人喺多啲地方揀書。新加「英語世界」同「多媒體區」展區，推廣英文書、電子書、網上出版同教育軟件。第一次設「文藝廊」，畀讀者睇到文藝名家嘅珍貴藏品，包括作家張愛玲同武俠小說作者梁羽生嘅相、手稿、簽名書、劇本同啲遺物；國學師饒宗頤嘅字畫、雕刻、茶具、古玉同竹簡咁。為推動原創文化發展，書展頭一次設「創意空間」，展出漫畫家幾米、劉雲傑、李志清同許誠毅手稿，以及香港設計品牌 G.O.D. 住好啲創辦人楊志超嘅設計。「超級書迷證」頭次公開出售。書展請咗香港作家馬家輝、梁文道擔任「香港書展大使」。
2010年
[編輯]由2010年7月21號到7月27號連續七日舉行，大會主題設定為「綠色書展」。預計今次訪客升到100萬人次新高。鑑於上年書展被少女模特兒暄賓奪主，引起唔少書展參觀者抗議，大會決定拒絕有關人士喺今屆書展舉辦簽名會嘅申請。
今屆「兒童天地」搬咗去展覽廳3B-E（新翼3樓），畀家長同小朋友提供更廣闊嘅活動空間，面積亦比上年大咗三成。大會因應業界需求，今年新增「電子書及數字出版」專區，匯聚約20間參展商，展示最新嘅電子書同數碼閱讀產品。區內重設有「數字互動閱讀區」，讓讀者可以喺現場操作電子閱讀器，瀏覽電子書嘅資料，體驗電子閱讀帶來嘅方便同樂趣。「英語世界」展區，面積比上屆增加五成。2010香港書展年度作家劉以鬯作品喺「文藝廊」展區展出，重有黃國兆改編自小說《酒徒》至電影作品時嘅心路歷程同劇照結集，亦有相關題材嘅座談會。
主辦機構貿發局加強同內地同台灣旅行社嘅合作，將書展加入訪港行程，鼓勵旅客嚟買書刊並參加文化活動。珠三角出發嘅旅行團團費，部分更低至68蚊人民幣。除咗同旅行社合作外，大會喺書展特設訪港人士售票處同特別通道，訪港旅客只需出示有效證件，就可以10蚊票價參觀書展。香港旅遊發展局旗下嘅旅客諮詢中心亦派發書展資料同優惠券，吸引訪港旅客入場[3]。
書展入場人次達92萬，訪港旅客達13,000幾人，比上年升咗兩成。雖然人次有所上升，但因連日天氣欠佳同閱讀電子版圖書漸被讀者接受，實體書刊嘅銷量反而比上年有所下跌[4]。
2011年
[編輯]2013年
[編輯]2013年書展喺7月17號到7月23號舉行。今年嘅書展破紀錄有25個國家同地區、多達560間參展商參加，書展期間舉辦三百幾個文化活動，包括講座、論壇、新書發布會等，場外重有120項活動喺全港15個地區舉行。門票2013年6月26號開始喺網上預售。
2014年
[編輯]2014年第25屆書展喺7月16-22號舉行。今年嘅主題係「從香港閱讀世界—越讀越精彩 」，有來自30個國家同地區多達570個參展商參加。
2015年
[編輯]2016年
[編輯]
2016年書展喺2016年7月20號到7月26號舉行，參展商來自30個國家同地區，數目超過600間。書展第一次以「武俠文學」為主題，設立主題展區「筆生武藝–香港的武俠文學」及「文壇俠聖 – 金庸與查良鏞」展覽[5]。
2017年
[編輯]2017年書展喺7月19 - 25號舉行，主題係「從香港閱讀世界 人文 ･ 山水 ･ 情懷」，有超過37個國家同地區，670個參展商參加。参展商嘅數目係歷嚟最多[6]。
2018年
[編輯]2018年書展喺7月18-24號舉行。[7]主題係「從香港閱讀世界 問世間情是何物」、七日嘅展覽吸引咗104萬人次入場。
2019年
[編輯]2019年書展喺7月17-23號舉行，[8] 主題係「科幻及推理文學」，七日嘅展覽吸引咗近100萬人次入場。[9]
但係，有部分參展商指出，由於反修例風波搞到政局立立亂，再加上7月21號、7月22號嘅事件陰霾，生意比之前差。
2020年
[編輯]2020年書展原定喺2020年7月15號到21號舉行，主題係「心靈勵志」。當時因應武漢肺炎香港疫情（第三波疫情）影響，書展延期舉行，另外3個同期舉行嘅展覽，包括「香港運動消閒博覽」、「教育及職業博覽」、「創業日」亦會延期舉行。當時貿發局重將書展新展期定喺12月16至22號。[10]
2020年11月23號，因應第四波疫情，貿發局宣布第31屆香港書展褪遲到2021年7月舉行。
2021年
[編輯]書展喺2021年7月14號到20號舉行[11]，主題係「從香港閱讀世界‧ 洗滌心靈 鼓舞人生 再啟航」。同場亦設有「香港運動消閒博覽」（7月14號至20號）、「零食世界」（7月14號至20號）同 「香港教育及職業博覽」（7月15號至18號）。今年書展係《港區國安法》實施後嘅第一個書展，貿發局指參展商應該知道國安法界線，大會唔會預先審查書籍，唔認為書展內唔再有政治書籍賣。出版界人士向BBC記者表示有「白色恐怖」氣氛，因為多個參展商未能夠搞清楚《國安法》紅線，只能進行自我審查，形容敏感書籍會喺書展內「清零」，並預計疫情下生意額會下跌。[12]而參展商批評貿發局講法模稜兩可，令佢哋毫無保障，多個參展商形容「而家大家步步為營、觸目驚心」。次文化堂社長彭志銘批評政府嘅政治評論書喺目前嘅氣氛之下相信會清零，只得返支持政府嘅政治書，指出噉嘅環境令到讀者嘅閱讀選擇減少，對香港並唔係好事[13]。
另外，亦因應武漢肺炎所影響，人數大約係往年嘅75%，工作人員亦要做核酸檢測或者打咗武漢肺炎疫苗先可以工作。
2022年
[編輯]書展喺2022年7月20至26號舉行，主題係「歷史文化．城市書寫」。[14]今年有80萬人次入場，平均每人洗咗879蚊。[15]
攷
[編輯]- ↑ 〈書展入場近83萬破紀錄〉。明報即時新聞。2008-07-29。原著喺2008-12-06歸檔。喺2008-07-30搵到。
- ↑ 〈香港書展"旺丁旺財 首破80萬入場人次〉。亞洲時報。2008-07-29。原著喺2009-07-26歸檔。喺2008-07-30搵到。
- ↑ 〈香港書展官網新聞中心新聞稿〉。原著喺2010年12月4號歸檔。喺2017年7月27號搵到。
- ↑ 〈星島日報2010年7月28日新聞via雅虎香港〉。原著喺2010年7月29日歸檔。喺2017年7月27日搵到。
- ↑ 點解要去2016香港書展？ etnet 2016-07-19
- ↑ 香港貿發局 新聞稿 2017-07-19
- ↑ 香港貿易發展局 書展官網
- ↑ 〈香港書展/簡介〉。香港貿易發展局 書展官網。喺2019-06-05搵到。
- ↑ 〈新聞中心/2019 新聞稿〉。《香港書展》。2019-07-23。原著喺2019-08-05歸檔。喺2019-08-05搵到。
- ↑ 〈第31屆香港書展定於2020年12月16至22日舉行 優化書展網站 為展商締造更多銷售機會〉。香港貿易發展局。2020-09-03。喺2020-10-25搵到。
- ↑ 〈香港書展/簡介〉。歸檔時間2021年7月12號。喺2021年7月18號搵到。
{{cite web}}: CS1 maint: bot: original URL status unknown (link) - ↑ 〈香港書展：《國安法》實施後首次，業界憂「白色恐怖」〉。BBC中文。2021-07-13。原先內容歸檔喺2021-07-14。喺2021-07-14搵到。
- ↑ 〈書展不審查 涉國安投訴交執法部門 貿發局「不知道」界線 參展商：模稜兩可形同割席〉。《明報》。2021-07-14。原先內容歸檔喺2021-07-14。喺2021-07-14搵到。
- ↑ 〈書展2022 書展門票入場$10起 一次過睇有咩優惠！日期+門票攻略〉。香港01。2022-07-19。喺2022-10-10搵到。
- ↑ 〈【書展2022】7日書展錄85萬入場人次 人均消費達879元按年增8%〉。HKET。2022-07-26。喺2022-11-27搵到。