鯊魚皮游水衫

鯊魚皮泳衣（包哂成隻腳但無包到手嘅款式）

 鯊魚皮泳衣（粵拼：saa1 jyu4 pei4 wing6 ji1） （英文：Shark-Skin-Inspired Fastskin Swimsuit），簡稱鯊魚皮（saa1 jyu4 pei4，Shark-Skin），又叫神奇泳衣（san4 kei4 wing6 ji1）或快皮（faai3 pei4，fastskin）。佢係一種模仿鯊魚皮嚟整嘅泳衣。佢喺20世紀90年代尾出現，屬高科技泳衣。呢種泳衣由高科技布料剪裁，包嗮成個身、手臂同腳（有啲款式就包住半隻腳或成隻腳，唔包手；有啲款式包住半隻腳同半隻手）。喺1999年——2009年間，佢唔只喺打破游水嘅世界紀錄入面出嗮名，重經歷咗從高科技泳衣行業嘅一家獨大到俾其他公司反超嘅過程。雖然自2010年開始，國際泳協嘅比賽禁咗鯊魚皮，但而家呢種泳衣喺商場都有得賣。

響朵

米高菲比斯同依文蘇利雲喺2008年北京奧運會嘅4×100游泳接力比賽，都着住鯊魚皮。

話說鯊魚皮泳衣，最早喺1999年正式俾國際泳協批准，成為比賽時可用嘅科技。而呢件嘢最先喺2000年悉尼奧運會出現。當年游泳比賽，有位叫伊恩科比嘅17歲游泳健將，成日着住件黑色連體緊身泳衣去比賽，攞咗4面金牌同1面銀牌，結果佢件鯊魚皮泳衣俾人點咗相，後來呢種新科技俾好多游泳健將睇中咗。到咗2004年雅典奧運會，有47位游泳健將着鯊魚皮泳衣去比賽。喺2008年北京奧運會，由於鯊魚皮猛咁出現，仲打破咗105次世界紀錄，尤其當時嘅米高菲比斯，一嘢攞咗8面金牌。就係噉，鯊魚皮就出嗮名。不過到咗2009年7月30號，國際泳聯宣佈從2010年開始，禁止比賽用高科技泳衣喇。

版本

鯊魚皮至今出咗4代產品。

第1代鯊魚皮

第1代鯊魚皮喺2000年出現，佢用咗纖維嚟模仿鯊魚皮膚結構，降低水嘅阻力後，泳速提高咗3%～7.5%。鯊魚皮泳衣喺悉尼奧運會出嗮名，有83%嘅參賽選手著住佢參賽。

第2代鯊魚皮

第2代鯊魚皮喺2004年出現，以第1代做基礎，喺面料上加啲細細粒嘅竉仔，降低30%阻力，泳速比起第1代提升咗7.5%。

第3代鯊魚皮

第3代鯊魚皮喺2007年出現，用咗防氧彈性紗同特細尼龍紗嚟整。彈性方面，同以前嘅同類產品高咗15%，可降低肌肉振動同能量損耗。

第4代鯊魚皮

第4代鯊魚皮喺2008年出現，用咗超輕、低阻力、防水同快乾嘅LZR Pulse面料嚟整，重係全球第一套以高科技熔接嚟整嘅無皺比賽泳衣。

超聲縫合技術

内文：超聲縫合技術

最新款嘅鯊魚皮泳衣，用咗最先進嘅「超聲縫合技術」製造。工作原理係以高頻率振盪，再以燒焊嚟將聲波傳去要整嘅熔接面，一陣間就將啲物理分子產生摩擦去到塑膠熔點，跟住固體材料好快溶嗮就搞定。

睇埋

• 游水衫
• 連體游水衫

連出去

• 鲨鱼皮泳衣
• “​鲨​鱼​皮​”​泳​衣​初​探