Portal:香港鐵路運輸/精選文/11

荃灣綫1號月台

美孚站（粵拼：mei5 fu1 zaam6；英文：Mei Foo Station）係香港一個鐵路車站，港鐵荃灣綫、西鐵綫都經過本站。荃灣綫大堂同月台，喺美孚新邨萬事達廣場地底，而西鐵綫嘅大堂同月台，就響荔枝角公園入面，兩邊大堂有條喺閘內嘅路連埋，方便人轉車。

成個美孚站可分做荃灣綫同埋西鐵綫兩個部分，其中荃灣綫嘅大堂同埋月台分別喺L2同埋L3層，L1層係通往西鐵綫大堂嘅通道。條通道伸延去到喺荔枝角公園嘅地面出口，同埋西鐵綫大堂位處嘅C層，西鐵綫嘅月台喺地面（P層）。兩個大堂都設有票務設施同埋車站商店。美孚站嘅車站出口主要喺地面，同埋荔枝角公園嘅平台上。

美孚站有荃灣綫同埋西鐵綫大堂兩部份，並設有行人隧道連接兩個車站大堂。後嚟因兩鐵合併，部份行人隧道改做收費區通道，以方便轉乘兩條路線嘅乘客。喺荃灣綫大堂同埋轉乘通道（近西鐵綫大堂）都設有車站商店，而西鐵綫大堂更加設有郵箱。

本站設有四個月台，各月台都設有月台幕門。荃灣綫1號（往荃灣）同埋2號月台（往中環）共用一個島式月台，位於美孚新邨地底，介乎荔灣道至到美孚巴士總站之間。西鐵綫1號（往屯門）同埋2號月台（往紅磡）係兩個側式月台，喺荔枝角公園貼近呈祥道嘅地面，側式月台佈置同上環及坑口站一樣。1號月台西面設有預留管道畀未來港口鐵路線嘅貨運列車用。