Portal:香港鐵路運輸/精選文/3

沙田站（粵拼：saa1 tin4 zaam6；英文：Sha Tin Station）係香港一個鐵路車站，喺港鐵東鐵綫之上。個站喺沙田排頭圍同田寮隔籬。呢個站係兩鐵合併之前係九廣東鐵嘅一個車站。沙田站早喺1910年開站，佢同埋粉嶺站係現時香港用緊嘅港鐵車站之中，用得最耐。

沙田站有4個月台，以兩個島式月台並排。一、二號月台，泊東鐵綫去羅湖或落馬洲方向嘅列車；而三、四號月台，泊東鐵綫去紅磡方向嘅列車。大部份時間，北行泊1號月台，南行泊4號月台。當有城際客運列車經過沙田站，北行會泊2號月台，南行會泊3號月台。而沙田站開出南行嘅特別班次，亦會泊3號月台。另外，沙田站一號月台側邊，有多條路軌，係臨時軌道工場，泊工程車同維修車，部面放咗唔少路軌零件同維修工具，亦設有沙田貨場，供上落貨卡之用。因為何東樓車廠有上蓋建築工程，路軌保養基地曾經搬過嚟呢度，家下已經搬返走。

沙田站係東鐵綫嘅中途站。另外，每逢馬場站開放，沙田站會做一個臨時轉綫站，往羅湖或落馬洲方向列車嘅乘客要去馬場站，必須喺沙田站等候經馬場站嘅列車。而去火炭站嘅乘客，就要喺沙田站等經火炭站嘅列車。