Talk:食物浪費

標題探討

見到有人提議「嘥嘢食」但極速被原作者否定，我都‎發表少少意見。「食物浪費」喺粵語一般只會喺比較正式場合用，日常生活溝通就好少可咁「文縐縐」，而且粵語通常會叫「浪費」就「嘥」，可以考慮叫「嘥食物」，只係「嘥食物」又似乎唔及「嘥嘢食」咁順口。另外有一個更地道嘅粵語稱呼可以考慮，就係「冇衣食」。--Jason6698 (傾偈) 2022年3月1號 (二) 13:47 (UTC)

「嘥食物」呢個配詞我未聽過有人咁配詞法。（可以睇下最近喺城市論壇度有人提出嘅配詞方法，就咁自己配詞唔應該考慮）。而「冇衣食」係唔係真係準確咁講緊「食物浪費」呢個意思呢？而「嘥嘢食」睇落好順口，不過睇返Talk:嘢食度提出嘅理據，唔認同揀「嘢食」呢個字詞，所以先用同樣係粵語寫法嘅「食物浪費」。特克斯特 (傾偈) 2022年3月2號 (三) 13:59 (UTC)

其實我覺得嘥嘢食呢個標題畀「食物浪費」更加適合，粵語口語有幾可會叫「食物」同「浪費」？既然如果粵語維基係想行書面語路線，噉「遮」呢篇文都可以搬去「傘」啦，都係粵語嚟。況且@特克斯特：話，本身冇「嘢食」呢個詞，大佬啊，語言詞彙係會演變架嘛，既然嘢食呢個詞而家普遍已經做咗代表食物嘅名詞，就連粤典同英維詞典都係噉嘅解釋，仲定義「嘢食」係名詞嚟，而嘢食喺日常生活明顯比食物更常用，真係唔明點解用「食物浪費」。再者，@特克斯特：竟然攞「嘢食&食物」同「漢字&唐字」做比較，會唔會荒謬咗少少？唐字本身喺粵語少見，搬文好正常，但係而家「嘢食」真係好常見喎，而且嘢食現今定義已經等同於食物，有咩理由可以拉埋一齊講？況且「嘢食」同「玩具/嘢玩」情況唔同，例如平時你問人哋「你啲嘢食去咗邊？」而唔會問人哋「你啲食物去咗邊？」，啲人會覺得你好奇怪添；但係相反，平時你會問人哋「你啲玩具去咗邊？」而唔會問人哋「你啲嘢玩去咗邊？」，所以兩者係唔可以相提並論。而文章標題本身就係依照大眾最習慣嘅方式嚟命名，所以點解係用「遮」而唔用「傘」，因為遮喺粵語嚟講比較普及。而講返呢篇文，既然「嘥嘢食」同「食物浪費」都表達緊同樣意思，而「嘥嘢食」比「食物浪費」更加地道同粵語化，咁請問點解唔可以以「嘥嘢食」作為標題？仲話我係大條道理？--ᐃᓄ (傾偈) 2022年3月2號 (二) 10:59 (UTC)

「粵語口語有幾可會叫「食物」同「浪費」？」？？我以為呢啲嘢可以用常識就知，點知都要發啲粵語教學材料出嚟證明到粵語真係會叫「食物」。用返你畀嘅粵典網站，我都揾到“食物”一詞喺粵語區都有用，仲有埋講法範例添：「(粵) 唔好玩食物。」。仲有你畀英維辭典都係咁解釋，其實入面嘅參考資料都係嚟自「嘢食」呢篇文，喺Talk:嘢食都已經提出咗相關問題，嗰度亦都回應咗你提出嘅「語言詞彙係會演變架嘛，既然嘢食呢個詞而家普遍已經做咗代表食物嘅名詞」理由。（要考慮埋廣東地區+粵語原本冇呢隻字）「但係而家「嘢食」真係好常見喎」，呢個任你點講常唔常見都得，麻煩睇下cantonese.sheik.co.uk啦，入面用「食物」一詞放喺粵語語境入面都係完全冇問題，亦都大把人咁講。入面有例子：「唔好買呢啲有防腐劑嘅食物！ 粵」（Don't buy food with preservatives!）、「生果係一種有益健康嘅食物 粵」（Fresh fruit is a kind of food that's beneficial to health.），我畀埋英文對譯，亦都證明到「Food」對翻做「食物」係完全冇問題，符合粵語通用嘅講法。至於你後段提出嘅「「嘥嘢食」同「食物浪費」都表達緊同樣意思，而「嘥嘢食」比「食物浪費」更加地道同粵語化，咁請問點解唔可以以「嘥嘢食」作為標題？」，我喺上面回應Jason6698揀字嗰度已經講咗「嘢食」配詞嘅相應問題。「仲話我係大條道理？」，因為喺粵語區同樣大把人叫「食物」呢隻字嘅情況下，居然可以畀你踩低「食物」一詞、仲要未經討論就搬文，咁樣唔係大條道理，仲可以想點。特克斯特 (傾偈) 2022年3月2號 (三) 13:59 (UTC)

其實，喺粵典網站當然會搵到「食物」，因為佢係書面上嘅粵語，就好似喺粵語網站同樣搵到「傘」、「下午」啊噉，甚至你畀嗰個網都有下午添，但係我哋日常唔會單獨噉叫啊嘛，就係一啲特定詞語先會用到（例如降落傘先會用個傘字），噉唔通我哋又要將遮同晏晝搬版去傘同下午？所以「食物」其實某啲情況下係可以照用，例如食物中毒，但係「嘥嘢食」係一個粵語獨有嘅詞，竟然唔揀嚟用我覺得唔太合理。所以文章例如食物中毒、仲有你開嗰篇食品添加劑，你見我又有搬文去「嘢食中毒」同「嘢食添加劑」咩？冇啊！因為呢啲詞語本身係咁叫法，而日常生活又成日咁用，所以我覺得冇問題。但係而家，明明有個比較好嘅、約定俗成嘅「嘥嘢食」你唔用，偏偏生搬硬套用「食物」同「浪費」，咁其實同直接跟書面語又有咩分別？況且，網上嘅blog都有人用嘥嘢食做標題，仲有個粵文網站都用唔准嘥嘢，你又搵到幾多個用「食物浪費」做標題嘅粵文網站？所以我已經講咗，文章標題係以大眾最習慣嘅方式嚟命名，你開嗰啲其他食物文我都可以算數，但係「食物浪費」咁明顯可以對應而又多人用嘅「嘥嘢食」就唔用，仲話粵語本身冇呢個詞嘅話，咁其他文例如士多啤梨都搬去草莓啦，反正粵語本身都冇「士多啤梨」呢個詞，係音譯返嚟咋嘛。--ᐃᓄ (傾偈) 2022年3月3號 (二) 10:28 (UTC)

@Dr. Greywolf：@Cedric tsan cantonais：@SC96：@PQ77wd：你哋又有冇咩意見？--ᐃᓄ (傾偈) 2022年3月3號 (二) 10:36 (UTC)

我覺得「嘥嘢食」好順口喎。Dr. Greywolf (傾偈) 2022年3月3號 (四) 10:37 (UTC)

仲有，第一次留言你講嘅「既然嘢食呢個詞而家普遍已經做咗代表食物嘅名詞」，亦都證明唔到「食物」一詞真係普遍被取代咗。仲有廣東嘅情況+食物一詞本身唔係粵語，你亦都未證明到。特克斯特 (傾偈) 2022年3月3號 (四) 12:00 (UTC)

「網上嘅blog都有人用嘢食做標題」，我夠搵到廣東話資料館夠用食物一詞寫入文章度，又唔見你出聲？特克斯特 (傾偈) 2022年3月3號 (四) 12:04 (UTC)

@Dr. Greywolf：，咁因為你係香港用戶姐。你揾啲廣東用戶，例如User:Cedric tsan cantonais、User:William915，佢哋未必咁諗（你睇下Cedric都覺得冧巴係唔多適合 都搬過去用號碼一詞）。

「其實，喺粵典網站當然會搵到「食物」」，咁證明到係粵語。「因為佢係書面上嘅粵語」，你明唔明你講緊啲咩？即係好似「關係」同「拏褦」咁，既然兩者都係屬於粵語，用返反而冇乜問題。何況你仲未搵到資料證明香港語言學學會研究「嘢食」呢隻字本身粵語係冇呢個字係錯嘅。咁就麻煩你揾到相應嘅資料研究反駁到呢個寫法，再嚟提出。特克斯特 (傾偈) 2022年3月3號 (四) 11:53 (UTC)

「仲有你開嗰篇食品添加劑，你見我又有搬文去「嘢食中毒」同「嘢食添加劑」咩？冇啊！因為呢啲詞語本身係咁叫法，而日常生活又成日咁用，所以我覺得冇問題。」，咦，唔知User:Z423x5c6聽過「有機嘢食」呢啲叫法未呢？「有機食物」點樣都係常用過「有機嘢食」呢個寫法。我去cantonese.sheik.co.uk度揾“有機食物”就明顯有結果，我返而去揾有機嘢食反而一個結果都冇，會唔會係你喺度濫用字詞配搭，而自己開咗篇叫“有機嘢食”呢個唔適合嘅標題名啊？用“有機食物”粵語辭典就有結果，反而用“有機嘢食”就一個都冇，仲好意思話「因為呢啲詞語本身係咁叫法，而日常生活又成日咁用，所以我覺得冇問題。」，用呢啲個人主觀理由+冇參考資料嘅理由，嚟話“有機嘢食”篇文嘅標題好恰當。特克斯特 (傾偈) 2022年3月3號 (四) 11:53 (UTC)

「有機食物」同就咁「有機」都有聽到，但係「有機嘢食」就真係無聽過，Google搵「有機嘢食」都搵唔到。 ——Z423X5C6（傾偈） 2022年3月3號 (四) 12:42 (UTC)

「約定俗成嘅「嘥嘢食」你唔用，偏偏生搬硬套用「食物」同「浪費」」，你開嗰篇「有機嘢食」我上粵語辭典揾，一個結果都冇，反而揾「有機食物」就即刻有結果，會唔會係你自己特登揀個生硬用字咋？為咗粵語而粵語，並唔了解真係嘅字詞用法？「嘥嘢食」係好好順口，不過我都引用咗User:William915之前都講咗「嘢食」一詞嘅問題，所以先唔同「嘢食」做標題。呢啲我上面同Talk:嘢食都講過，無意再重複。特克斯特 (傾偈) 2022年3月3號 (四) 12:40 (UTC)

「仲有你開嗰篇食品添加劑，你見我又有搬文去「嘢食中毒」同「嘢食添加劑」咩？冇啊！因為呢啲詞語本身係咁叫法，而日常生活又成日咁用，所以我覺得冇問題。」、「你開嗰啲其他食物文我都可以算數」，你係咪有問題？後面又話算數，前面又話我開嗰啲詞語本身係咁叫法，而日常生活又成日咁用，所以我覺得冇問題。知唔知你講緊啲咩？特克斯特 (傾偈) 2022年3月3號 (四) 13:11 (UTC)

我睇到呢度嘅討論有以下幾個問題。

粵語詞彙嘅界線問題：我哋有兩條界線要分清。第一條界線係「粵語」同「非粵語」之間嘅分別，係語言嘅界線；第二條界線係「語體」（register）嘅維度，係由「非正式」「口語」「通俗」去到「正式」「莊重」「典雅」嘅光譜。「食物」同「嘢食」都係粵語嘅詞彙，呢點我諗大家唔會有太大爭議。以往香港嘅教育夾硬將「非正式語體」同「粵語」綁埋一齊，搞到我哋下意識覺得「正式嘅就唔係粵語」。但係細心諗，對於一個唔識普通話嘅人嚟講，「食物」都一樣會用。心理上佢係粵語詞。

配搭問題：詞語配搭上慣咗叫「食物」嘅嘢，亦都冇需要夾硬換做另一個詞。日文咁啱又有兩個詞去講「food」呢個概念，一個係本土詞「tabemono」另一個係「shokumotsu」。前者係通用啲，類似我哋嘅「嘢食」，後者就係「食物」嘅漢語詞。平日講嘢梗係講「tabemono」啦，但係「食物纖維」就會用後者「shokumotsu」。

名詞化問題：韻律上，粵語嘅名詞化係要用雙音節動詞，所以「嘥嘢食」「嘥米飯」係個動詞短語，要轉做名詞，就要揀個雙音節動詞，所以要用「浪費」。正如你話「皮膚痕」係一個句子，要變成名詞，就要用「痕癢」，整到佢變雙音節——呢個「痕」係侗台詞嚟，唔係官話借入。同理，你可以講「一種浪費」但係就唔可以講「* 一種嘥」。

意思唔同：有啲講法會有啲「情感色彩」，例如「冇衣食」唔係講「對食物嘅惋惜」，而係用嚟話人唔尊重食物。同「浪費」係兩個概念。例如我可以話「啲人因為『冇衣食』就夾硬食晒啲飯，其實整體滿足度係下降咗嘅，實際上係嘥/浪費咗啲嘢食。」喺呢度，嘥同浪費都相對接近，夾硬食晒啲嘢呢種浪費行為絕對唔係「冇衣食」。

我覺得「嘥嘢食」同「食物浪費」意思其實相對接近嘅，你話要用前者我未至於要堅決反對。不過支持前者，唔代表要將「食物」同「浪費」講成係「非粵語成份」。 Chaaak (傾偈) 2022年3月4號 (五) 04:10 (UTC)

多謝User:Chaaak前輩為呢次討論提供專業嘅意見。 ——Z423X5C6（傾偈） 2022年3月4號 (五) 06:50 (UTC)